Yosafati akindile baMoabu nu baAmoni
20
1 Kumbusa kwa bindi bimozi, baMoabu nu baAmoni nu baMeoni bamozi bakitile bita na Yosafati. 2 Bantu bamozi bavule nu babwide Yosafati bunee: “Iyombo inene lyatukile ku Edomu nu kutinga kitatenge nu kuvwa kuguli, nu lili ku Hazazoni-Tamari u Engedi.” 3 Yosafati akule boba, nu eikokomezizie kulonda Yehowa, nu akakizizie baYuda bansania buno tabalie. 4 BaYuda bakundamenne kusega bukasia ku Yehowa. 5 Yosafati emenne lwabusio lwa musanganano wa baYuda mu Yerusalema mu numba za Yehowa lwabusio lwa kabelabela kato. 6 Nu asegile bunee: “Ee, Yehowa, Kalaga wa batateiswe, uli Kalaga wa kwigulu. Wangata makota mansania ma bilongo, uli na bwangato nu magala buno ta umozi unemana lwabusio lwobe. 7 Ndi ntuli Kalaga weitu, wapumbizie bantu ba kisi kikino lwabusio lwa bantu bobe baIsraeli nu kukikasa ku kibuti kya Abrahamu, mwida wobe, ku milyalya? 8 Nu bo beikede mukyo nu bakwobakide numba zasililila mukyo ku izina lyobe, 9 nu batendile bunee: ‘Ndi bubi bukuvwa kutuli, aba bita, aba lusungio, aba lusambo, aba nzala, nti twemane lwabusio lwa numba zeno nu lwabusio lwobe, kubuno izina lyobe lili mu numba zeno, nu twakulilile mu milondo zeitu nu mu tubebe tweitu, nu uwe nti watungwe nu kutonia.’ 10 Gabatukile ku Misri, ntwazigile baIsraeli kwingila mu kisi kya baAmoni, aba kya baMoabu, aba kya babo ba miduko za Seiri. Ububo baIsraeli bagalukile nu tababazikizye. 11 Kano kaluma, lola buni bubakwisuba ku bantu bobe. Bakuvwa kutupumbia ku bwiyani buwatukasile. 12 Ee Kalaga weitu, ndi ntukubasungia? Kubuno tatuli na magala ma kwemana ku iyombo lilino inene likwingila mu kisi kyeitu. Tatwizi buni butunakita; tukulola kuguli.” 13 BaYuda bansania bemenne lwabusio lwa Yehowa gamozi na bakikulu babo nu bana babo bansania. 14 Mu nkungu zezo, mu musanganano, Muuza wa Yehowa wavule ku Yahazieli, mwana wa Zekaria nu mwana wa Benaya, mwana wa Yeieli, u mwana wa Matania, muLawi wa kibuti kya Asafu. 15 Nu Yahazieli ababwide bunee: “BaYuda bansania nu bansania ba ku Yerusalema, nu we mukota Yosafati, ungwililazi bukutenda Yehowa bunee: ‘Tamukue iyombo lilino inene boba, kubuno bita tabili byeinyu, tondo bya Kalaga. 16 Lubi kumbazi kubeli, nu babakame mu nzila za Zizi nu mwabasange kunsi kwa mpinga, butunganana na kalula ka Yerueli. 17 Tamwatunganana kwitana nabo mu bita bibino, mube mu biziki byeinyu; mwemane tugu nu mwamone lonio lwamukase Yehowa.’ Inyuwe baYuda nu baYerusalema, tamukue boba nu tamutambe, walubi endazi kubeli, nu Yehowa abe gamozi n'inyu.”
18 Yosafati akumbile itoe lyage gansi, nu babo baYuda nu baYerusalema bakumbaminne Yehowa. 19 BaLawi bamozi, u baKoati nu baKora, bazanzukile kuganuna Yehowa, Kalaga wa baIsraeli, n'iyuki inene. 20 Lukesikesi bazanzukile, nu bendile ku kalula ka Tekoa. Gaabasile ku mwino, Yosafati abamanine nu ababwide bunee: “BaYuda nu bantu ba ku Yerusalema, nnungwililazi, katiziazi Yehowa, Kalaga weinyu, nu inyuwe mwalindibwe, katiziazi balengania bage ububo mwakinde.” 21 Akalile lwango na bantu, asombwede babo bakwimbila Yehowa nu bakumuganuna mu busoga bwa luganuno lwage, nu ababikile lwabusio lw'iyombo lyage. Nu abatendile bunee: “Ganunazi Yehowa, kubuno kyombo kyage kili kya milyalya.” 22 Gabalingile kwimba nu kuganuna Yehowa, abikile bantu kukobela baAmoni nu baMoabu nu babo ba mwiduko wa Seiri bavule kwitana na baYuda. Nu bo bakindilwe. 23 Kubuno baAmoni nu baMoabu bazanzukile ku baSeiri kubazikya nunsania. Gabasilile kwita baSeiri bansania, beitenne bobenyene, nawe nawe na munyage.
24 Gabasile baYuda ku katangila ka mu kalula, balolile iyombo nu bamonine bitumba tugu; takwabezaga wampa walamine. 25 Gavule Yosafati nu bantu bage kubatikya ntiko, basangile bikulo byingi, u bintu nu nsulu nu makozi ma bukunza bukali, bibatolile, aaba nu tabavwamine kweka binsania. Bakitile bindi bisatu kutikya ntiko kubuno zabezaga ningi nunse. 26 Mu kindi kya binazi, bakundamenne ku mpinga za Baraka, nu gago baganwine Yehowa nunsania. Ububo beinikile mpinga zezo Baraka aaba nu lelo. 27 Kumbusa baYuda bansania nu baBenjamina, nu Yosafati gantonga ga mulindi, basubizie ku Yerusalema na kyelele, kubuno Yehowa ababogeziebogezie ku beiti babo. 28 Gababasile ku Yerusalema nu ku numba za Yehowa, bidile myonze nu bapili nu nzenze. 29 Nu boba bwa Kalaga bwabede ku makota mansania ma bilongo gabongule buni bwasakile Yehowa na beiti ba baIsraeli. 30 Nu bukota bwa Yosafati bwabede na bubobelelo, nu Kalaga wage amukasile kyumuno ku ndenge insania.
31 Yosafati angatile Yuda. Abezaga na myaka makumi masatu nu itano gaalingile kwangata nu angatile myaka makumi mabili nu itano mu Yerusalema. Izina lya nina lyabezaga Azuba mukinga wa Silihi. 32 Atabangile mu nzila z'isi Asa nu ntagalukile nunse. Akitile bwisanana ku meiso ma Yehowa. 33 Biziki bya kukumbamina byasakama tabyatikizibwe kubuno bantu tabeikokomezizie mu mitima zabo kulonda Kalaga wa beisibo. 34 Nu bingo bitondo bya Yosafati kutukila bitangi aaba nu ku bizinda, byasanzilwe mu mukanda wa Yehu, mwana wa Hanani, wasanzilwe mu mukanda wa bakota ba Israeli. 35 Kumbusa Yosafati mukota wa Yuda agomezie na Ahazia, mukota wa Israeli, wakitile mibi mingi. 36 Eitabizizie kukita nage maato manenda ku Tarsisi mobakile ku Ezioni-Geberi. 37 Mu nkungu zezo, Eliezeri, mwana wa Dodawa wa ku Maresa, alenganizie ku Yosafati bunee: “Kubuno wagomanizie na Ahazia, Yehowa eite mulimo u wakitile.” Nu maato mabungukile nu tamavwamine lingo kwenda ku Tarsisi.