Mulengania Yehu azugide Yosafati
19
1 Yosafati, mukota wa Yuda, asubizie ku numba zage ku Yerusalema mu bubobelelo. 2 Mulengania Yehu, mwana wa Hanani, endile kumusekela nu abwide mukota Yosafati bunee: “Ndi unakasia babi nu kutunda babo bakusomba Yehowa? Kubuno wakitile bubo, Yehowa akongelwa. 3 Tondo busoga bumozi bwamoneka muguli, kubuno wazikizye Ashera mu kisi nu wakokomezizie mutima wobe kulonda Kalaga.” Yosafati asombwede baYuda
4 Yosafati eikede lingo ku Yerusalema nu atabangide bantu kutukila mwino wa Beri-Seba, aaba nu ku kisi kya miduko za Efuraimu, nu abasubizie ku Yehowa, Kalaga wa beisibo. 5 Asombwede ngatu mu miino insania za mikolo za kisi kya Yuda, 6 nu ababwide bunee: “Kengelazi bumukukita kubuno tamukwatula ku kabamba ka bantu, tondo ku kabamba ka Yehowa. Abe n'inyu mu nkungu za kwatula milondo. 7 Umpanga kuazi Yehowa boba, nu idangazi ku makitilo meinyu, kubuno Yehowa, Kalaga weitu, ntakugaluka ku bwisanana aba kukutya bantu aba kukata bikulo bya lumbisombiso.”
8 Mu Yerusalema, Yosafati asombwede lingo baLawi bamozi nu basankoga nu mitonge za baIsraeli buno batule milondo ku kabamba ka mukota. 9 Nu abakakizizie bunee: “Kitazi binsania mu kukua Yehowa boba nu mu bulili nu na mutima unsania. 10 Kungwa mibuto zeinyu, bamukwikalila mu miino zabo, bavwa na mulondo wa kwitana aba mulembe wa makakizio, nti mwabatonda; bubo tamwabe na katati lwabusio lwa Yehowa, nu bongoa bwage tabwabe kumuli nu ku mibuto zeinyu. Kitazi bubo nu tamwabe na katati. 11 Sankoga munene, Amaria, eli gantata geinyu mu bitondo binsania bya Yehowa, nu Zebadia mwana wa Isimaeli, mwangati wa numba za mukota, mu bitondo bya bukota, nu baLawi bamukitile anga bemanizi. Kitazi na komanizia, nu Yehowa abe gamozi na beisanana.”