Balangi ba nibi.
26
1 Nu babano balangile nibi. BaKora: Meselemia, mwana wa Kora wa bana ba Asafu. 2 Nu Meselemia abezaga na bana: Zekaria nkula zage, Yediaeli wa babili, Zebadia wa basatu, Yatinieli wa banazi, 3 Elamu wa batano, Yehohanani wa mutuba, nu Eliehoenayi wa mutubakamo. 4 Nu Obedi-Edomu abezaga na bana: Semaya nkula, Yehozabadi wa babili, Yoa wa basatu, Sakari wa banazi, Netaneli wa batano, 5 Amieli wa mutuba, Isakari wa mutubakamo, Peuletayi wa kinana, kubuno Kalaga amukasile mponga. 6 Bana babutilwe ku Semaya nu babezaga bangati mu numba za beisibo, kubuno babezaga na menge nu magala. 7 Bana ba Semaya: Otini, nu Refaeli, nu Obedi, nu Elizabadi, mibuto zage babezaga beiya menge, nu Elihu nu Semakia. 8 Babo bansania babezaga bana ba Obedi-Edomu, nu bana babo nu mibuto zabo, beiya menge ma mulimo, makumi mutubakamo nu babili ba Obedi-Edomu. 9 Nu Meselemia abezaga na bana nu mibuto, beiya menge, ikumi nu kinana. 10 Nu Hosa muMerari, abezaga na bana: Simuri, musondelezia (ntabezaga nkula tondo isi amukasile busondelezia); 11 Hilkia wa babili, Tebalia wa basatu, Zekaria wa banazi; bana bansania nu mibuto za Hosa babezaga ikumi nu basatu. 12 Bibombo bibino bya balangi ba nibi byabezaga na milimo zabyo kunsi kwa bakota babyo, kukita mu numba za Yehowa. 13 Nu besile mbale ku nibi zabo ku numba za beisibo, bakeke gamozi na banene. 14 Mbale za lulenge lwa kukutukaga kisongo kya busi zabede ku Selemia. Besile mbale ku kabamba ka mwana wage Zekaria musunguzi; mbale zage zatukile ku Lwibi lwa ku Lulenge lwa Kwikazi. 15 Za Obedi-Edomu ku Lwibi lwa ku Lulenge lwa Kwidume, nu ku za bana bage ku numba za kigenge. 16 Za Supimu, nu Hosa ku Lwibi lwa ku Kwendaga Kisongo kya Busi, ku Lwibi lwa Saleketi mu nzila zikubakama butunganana na balangi. 17 Ku lulenge lwa kukutukaga kisongo kya busi kwabezaga baLawi mutuba, nu ku lwa kwikazi banazi na busi na busi, ku lwa kwidume banazi na busi na busi, ku numba za kigenge babili babili. 18 Ku mulungu, kukwendaga kisongo kya busi, kwabezaga banazi ku nzila zasakama nu babili ku mulungu. 19 Bibino byabezaga bibombo bya balangi ba nibi munkatini mwa baKora nu baMerari.
20 Nu umozi ku baLawi, Ahiya, abezaga mulangi w'isuku lya numba za Kalaga nu lya byakasilwe ku mulimo wasililila. 21 Bana ba Ladani, u baGersoni, nkula za bikanga bya beisibo babezaga ba Ladani muGersoni, u Yehieli. 22 Bana ba Yehieli babezaga Zetamu nu Yoeli, mubuto wage, babezaga balangi b'isuku lya numba za Yehowa. 23 Mu baAmramu, baIzihari, baHebroni, baUzieli; 24 Sebueli, mwana wa Gersomi, mwana wa Musa, abezaga mwangati w'isuku, 25 nu ku mibuto zage zabutilwe na Eliezeri, Rehabia, mwana wage, nu Yesaya, mwana wage, nu Yoramu, mwana wage, nu Zikiri, mwana wage, nu Selomiti mwana wage. 26 Wono Selomiti nu mibuto zage babezaga bangati b'isuku linsania lya bintu bya mulimo wasililila byengezie mukota Davidi, nu basondelezia ba bikanga bya beisibo nu basondelezia ba tununu nu ba nkama, nu basondelezia b'iyombo. 27 Engezie ku bibyo byakatilwe ku bita buno bilongeke numba za Yehowa. 28 Nu binsania byaswagizie Samweli, mulaguzi, nu Saulo mwana wa Kisi, nu Abeneri mwana wa Neri, nu Yoabu, mwana wa Zeruya, binsania byengezibwe byabezaga ku maboko ma Selomiti nu mibuto zage. 29 BaIzihari u Kenania nu mibuto zage babezaga na milimo insania za nkangala nu za ngatu ku baIsraeli batabezaga mu Yerusalema. 30 BaHebroni, Hasabia nu mibuto zage bantu kanunu nu nkama mutubakamo (1.700), mapuka, babezaga balangi ba baIsraeli, lisa lya luuzi lwa Yordani, kukwendaga kisongo kya busi, mu milimo insania za Yehowa nu mu mukambo wa mukota. 31 Ku baHebroni, Yeriya abezaga mukota, aba ku baHebroni ku bibuti bya beisibo. Mu mwaka wa makumi manazi wa bukota bwa Davidi, balondilwe, nu munkatini mwabo mwasangilwe beiya menge nu magala ku Yazeri wa Gileadi. 32 Mibuto za Yeriya, mapuka, babezaga tununu tubili nu nkama mutubakamo (2.700), nu babezaga basondelezia ba kikanga nu kikanga kyabo. Mukota Davidi ababikile gantata ga baRubeni nu baGadi nu kyindi kya kikanga kya Manase ku milimo insania za Kalaga nu ku bitondo bya mukota.