Bibuti bya Rubeni.
5
1 Bana ba Rubeni, nkula za Israeli; kubuno abezaga nkula, tondo ku kabamba ka kubigia mugu w'isi, bunkula bwage bwakasilwe ku bana ba Yosefu mwana wa Israeli. Tondo Yosefu ntasanzilwe nkula mu mukanda wa bibuti. 2 Lebelebe Yuda abezaga na magala kutinga mibuto zage, nu mwangati atukile mweli; tondo bunkula bwabezaga bwa Yosefu. 3 Bana ba Rubeni, nkula za Israeli: Hanoki, nu Palu, nu Hezironi, nu Karmi.
4 Bana ba Yoeli: Semaya, mwana wage, Gogo, nu Simei, 5 nu Mika, Raya, nu Bali, 6 Bera wa Tigilati-Pileseri, mukota wa Asuria, amukatile nu kumwigia, kubuno abezaga munene wa baRubeni. 7 Nu mibuto zage ku kikanga kyabo, gabasanzilwe mu mukanda wa bibuti byabo, mukulu wabo Yeieli, nu Zekaria, 8 nu Bela mwana wa Ahazi, mwana wa Sema, mwana wa Yoeli, wikalaga kuko ku Aroeri, aba nu kubasa ku Nebo nu Bali-Meoni, 9 nu ntungo za kuntata ku mwaga wazindila ku kalula kukutukaga luuzi lwa Furati, kubuno ngombe zabo zitide nunse mu kisi kya Gileadi. 10 Nu mu bindi bya Saulo beitenne bita na baHagari, babakindile, beikede mu hema zabo mu kisi kinsania kuntata kwa Gileadi.
Bibuti bya Gadi.
11 Nu bana ba Gadi beikalaga ku kisi kya Basani kuzindila ku Saleka; 12 Yoeli mutangi, nu wa babili Safamu, Yanai, Safati mu Basani; 13 nu mibuto zabo za numba za beisibo, Mikaeli nu Mesulamu, nu Seba, nu Yorai, nu Yakani, nu Zia, nu Eberi, bantu mutubakamo. 14 Babano beli bana ba Abihaili, mwana wa Huri, mwana wa Yaroa, mwana wa Gileadi, mwana wa Mikaeli, mwana wa Yesisai, mwana wa Yado, mwana wa Buzi, 15 Ahi, mwana wa Abudieli, mwana wa Guni, abezaga mukota mu kikanga kyabo. 16 Beikalile mu Gileadi, mu Basani nu mu miino zabo mikeke nu mu masoa mansania ma Saroni nu kubasa ku myaga zamo.
17 Babano bansania basanzilwe mu mikanda za bibuti mu bindi bya Yotamu, mukota wa Yuda, nu mu bindi bya Yeroboamu mukota wa Israeli. 18 BaRubeni, nu baGadi, nu kyindi kya kikanga kya Manase babezaga na mapuka bakatile ngabo nu myene za nganda, nu balasi ba misungu, nu bakiti ba bita babezaga bantu tununu makumi manazi nu tunazi, nkama mutubakamo nu makumi mutuba (44.760), bavwamine kwenda ku bita. 19 Beitenne na baHagari, nu Yeturi, nu Nafisi, nu Nodabu. 20 Bavwamine kukasibwa, nu baHagari babikilwe mu maboko mabo, nu bansania babezaga gamozi nabo, kubuno basegile Kalaga mu bita, nu ongule masego mabo kubuno babezaga bakatizia. 21 Bakatile bituganwa byabo, ngamia tununu makumi matano (50.000), mikoko tununu tubili, nkama ibili nu makumi matano (2.250), mpunda tununu tubili (2.000) nu bantu tununu lukama (100.000). 22 Kubuno bita byabezaga bya Kalaga, ububo bantu beingi bakule. Beikede ku kiziki kyabo aaba nu nkungu za kwigibwa.
23 Nu kyindi kya kikanga kya baManase, beikede mu kisi kutukila Basani aaba nu Bali-Hermoni, nu Seniri, nu mwiduko wa Hermoni, babezaga beingi. 24 Nu babano u bangati beingi ba numba za beisibo: Eferi, nu Isi, nu Elieli, nu Azrieli, nu Yeremia, nu Hodavia, Yadieli, mapuka ma bita nu beiya lukumu lunene, matoe ma numba za beisibo. 25 Bagunine Kalaga wa beisibo nu bakitile butazi mu kuyanga tungo tulaga twa kisi. Kalaga abazikizye lwabusio lwato. 26 Nu Kalaga wa Israeli ayukizie mutima wa Puli, mukota wa Asuria, nu mutima wa Tigilati-Pileseri, mukota wa Asuria, akatile nu kwigia baRubeni, nu baGadi, nu kyindi kya kikanga kya Manase; abalusizie ku Hala, ku Habori, ku Hara nu ku luuzi lwa Gozani u kubeli aaba nu lelo.