Bibuti bya Yuda.
4
1 Bana ba Yuda: Perezi, Hezironi, Karmi, Huri, nu Sobali. 2 Nu Raya, mwana wa Sobali abutile Yahati; nu Yahati abutile Ahumai nu Lahadi, kikino kili kikanga kya baZora. 3 Babano babezaga bana ba Huri, isi wa Etamu: Yezereheli, Isima, Idubasi, nu izina lya mubitu wabo Hasilelponi; 4 nu Penueli, isi wa Gedori, nu Ezeri isi wa Husa. Babano beli bana ba Huri, nkula za Efurata, mwiya Betelehemu. 5 Nu Asuri, nyene Tekoa abezaga na bakikulu babili, Hela nu Nara. 6 Nu Nara abutile Ahuzamu nu Heferi nu Temeni, nu Ahastari. Babano u bana ba Nara. 7 Nu bana ba Hela babezaga Zereti; nu Zohari, nu Etinani. 8 Nu Hakosi abutile Anubu, nu Zobeba, nu kikanga kya Aharheli, mwana wa Harumu. 9 Yabesi abezaga alemaninwa kutinga mibuto zage insania, nu nina amwinikile Yabesi, atendile bunee: “Kubuno namubutile ku lubaba.” 10 Nu Yabesi asegile Kalaga wa Israeli, atendile bunee: “Ee songo wankasa mponga nu kutanuna myaga zane nu kuboko kwobe kuba gamozi na nne buno undange na mibi, nu nsibe mu mbabazio.” Nu Kalaga amukasile kikyo kyasegaga.
11 Nu Kelubi, mubuto wa Sua, abutile Mehiri wabede isi wa Estoni. 12 Nu Estoni abutile Beti-Rafa, nu Pasea, nu Tehina, isi wa Iri-Nahasi; babano beli bantu ba Reka. 13 Nu bana ba Kenazi: Otinieli, nu Seraya nu bana ba Otinieli; Hatati, 14 nu Meonatai abutile Ofura, nu Seraya abutile Yoabu, isi wa baKarashi kubuno babano babezaga bakiti bakulumina. 15 Nu bana ba Kalebu, mwana wa Yefune: Iru, nu Ela, nu Nama; nu bana ba Ela: Kenazi. 16 Bana ba Yehaleleli: Zifu, nu Sifa, nu Tiria, nu Asareli. 17 Nu bana ba Ezra: Yeteri, nu Meredi, nu Eferi, nu Yaloni, we u wabutile Miriamu, nu Samai, nu Isiba, wa Estemoa. 18 Nu mukazi wage abezaga wa kilongo kya baYuda, abutile Yeredi, isi wa Gedori, nu Heberi, isi wa Soko, nu Yekutieli, isi wa Zanoa. Nu babo u bana ba Bitia, mukinga wa Farao, wasongilwe na Meredi. 19 Nu bana ba mukazi wa Hodia, mubitu wa Nahamu, isi wa Keila, muGarmi nu Estemoa muMakati. 20 Nu bana ba Simoni: Amunoni, Rina, Beni-Hanani nu Tiloni. Nu bana ba Isi: Zoheti, nu Beni-Zoheti.
21 Bana ba Sela, mwana wa Yuda, Eri, isi wa Leka, nu Lada, isi wa Maresa, nu kikanga kya numba za babo bakuluka nsulu za kitani ba numba za Asibea. 22 Yokimu nu bantu ba Kozeba, Yoasi, Sarafu, babezaga na bwangato mu Moabu, nu Yasubi-Lehemu. Tondo bitondo bibino bili bya wakalazi nunse. 23 Babano babezaga babumbi ba malega nu beikalaga mu Netaimu nu Gedera nu kulama mu masoa nu mu tukolo, bantu beikalaga gamozi na mukota kukita mulimo wage.
Bibuti bya Simeoni.
24 Bana ba Simeoni: Nemueli, Yamini, Yaribu, Zera, nu Sauli. 25 Nu mwana wa Sauli eli Salumu, Mibusamu, mwana wage, nu Misama, mwana wage. 26 Bana ba Misama: Hamueli, Zakuri, nu mwana wage Simei. 27 Nu Simei abezaga na bana bamulume ikumi nu mutuba nu bakinga mutuba. Tondo mibuto zage tazabezaga na bana beingi, nu bikanga byabo tabyabesizie anga ba Yuda. 28 Nu beikede ku Beri-Seba, nu ku Molada, nu ku Hasari-Suali, 29 ku Biliha, nu ku Ezemu, nu ku Toladi, 30 nu ku Betueli, nu ku Horma, nu ku Ziklagi, 31 nu ku Beti-Marakaboti, nu ku Hasari-Susimu, nu ku Beti-Biri, nu ku Sarayimu. Zeno zabezaga miino zabo nkungu za kwangata kwa Davidi. 32 Nu miino zabo mikeke zabezaga Etamu, nu Aini, nu Rimoni, nu Tokeni, nu Asani, miino itano. 33 Miino zabo insania mikeke zabezaga zatimba miino zeno minene kuzindila ku Bali. Bibino byabezaga biziki byabo, nu bibuti byabo.
34 Nu Mesobabu, nu Yamuleki, nu Yosa, mwana wa Amazia, 35 nu Yoeli, nu Yehu, mwana wa Yosibia, mwana wa Seraya, mwana wa Asieli, 36 nu Eliyoenai, nu Yakoba, nu Yesohaya, nu Asaya, nu Adieli, nu Yesimieli, nu Benaya, 37 na Ziza, mwana wa Sifi, mwana wa Aloni, mwana wa Yedaya, mwana wa Simuri, mwana wa Semaya; 38 babo batekulwa meina mabo babezaga banene mu bikanga byabo nu numba za beisibo zabesizie nunse.
39 Bendile aaba nu kwingila ku Gedori, kuli kuzinda kwa ntungo za kuntata kwa kibitabita kulonda idia isoga lya mikoko zabo. 40 Bamonine idia isoga lyanaga, nu kisi kyabezaga na kiziki nu kyabota nu kya bubobelelo; kubuno babo beikalaga kuko wakalazi babezaga bantu ba Hamu. 41 Babo basanzilwe meina mabo beingide kuko mu bindi bya Hezekia, mukota wa Yuda, nu bakitile bita na baHamu gamozi na baMunimu basangilwe ko, babazikizye nunse, aaba nu lelo. Beikede kuko ku kiziki kyabo, kubuno kwabezaga idia lyingi lya mikoko zabo. 42 Nu bango kubeli babezaga bana ba Simeoni, bantu nkama itano, bendile ku mwiduko wa Seiri. Basondelezia babo babezaga Pelatia, nu Nearia, nu Refaya, nu Uzieli, bana ba Isi. 43 Nubo balibwide basigede ku baAmaleki nu beikede ko aaba nu bino bindi.