BaYuda balinga kukindwa
24
1 Mu bindi bya Yoyakimu, Nebukadneza mukota wa Babeli amukindile nu Yoyakimu abede mukiti wage myaka isatu, tondo kumbusa asombile kuliga mutulo. 2 Nu Yehowa asingile banyagi batukile ku Kaldea, nu ku Aramu, nu ku Moabu, nu baAmoni buno bazikye baYuda anga bwatendile Yehowa mu balengania bage. 3 Bubuno bwabede ku baYuda ku kabamba ka bongoa bwa Yehowa kubuno asombwede kubatikya lwabusio lwage ku kabamba ka bwagi bunsania bwakitile Manase. 4 Yehowa ntabasigilide kubuno Manase eizazizie Yerusalema na mikila za bantu beteli na katati. 5 Bingo bitondo binsania byakitile Yoyakimu, ndi tabyasanzilwe mu mukanda wa byawakalazi bya bakota ba baYuda? 6 Yoyakimu alekenne nu mwana wage Yoyakini angatile mu kiziki kyage. 7 Nu mukota wa Misri ntatukile lingo ku kisi kyage kubuno mukota wa Babeli akatile bisi binsania kutukila ku luuzi lwa Misri aaba nu ku luuzi lwa Furati.
Kukindwa kwa bukota bwa baYuda
8 Yoyakini abezaga na myaka ikumi nu kinana gaalingile kwangata. Angatile myezi isatu mu Yerusalema. Nu izina lya nina lyabezaga Nehusta mukinga wa Elnatani muYerusalema. 9 Akitile bubi ku meiso ma Yehowa anga binsania byakitile isi.
10 Ku nkungu zezo, bakiti ba Nebukadneza mukota wa Babeli bavule ku Yerusalema nu bagutimbile. 11 Gatimbile mayombo mage wozo mwino, Nebukadneza wenyene avule ko. 12 Yoyakini mukota wa baYuda abasile ku Yerusalema ku mukota wa Babeli, we nu nina nu bakiti bage, nu bakota ba bantu bage, nu bakota ba bakoloboyo buno bikasana kweli, ku mwaka wa kinana wa mukota wa Babeli, akandile mukota wa baYuda nu bakiti bage. 13 Anga bwatendile Yehowa, anyagile masuku mansania ma numba za Yehowa nu ma numba za mukota; akekile bintu binsania bya olo byakitile Solomono, mukota wa baIsraeli mu numba za Yehowa. 14 Akandile bantu bansania ba ku Yerusalema: bantu banene nu mapuka ma bakoloboyo nu bakulumizi ba mbavu nu batumbi bansania; bantu bansania u bantu tununu ikumi (10.000). Bazambi tugu u basigede mu kikyo kisi.
15 Nebukadneza ekile Yoyakini ku Babeli gamozi na nina nu bakikulu bage nu bakiti banene bage nu bakota bage bansania ba kisi. 16 Nebukadneza ekile ku Babeli mapuka mabezaga na magala tununu mutubakamo (7.000) nu bakulumizi ba mbavu nu batumbi kanunu kamozi (1.000). 17 Nu mukota wa Babeli abikile Matania mubuto wa Yoyakini mu kiziki kyage. Agalukizye izina lyage buno Zedekia. 18 Zedekia abezaga na myaka makumi mabili nu umozi gaalingile kwangata. Angatile myaka ikumi nu umozi mu Yerusalema. Izina lya nina lyabezaga Hamutali mukinga wa Yeremia wa ku Libuna. 19 Akitile bubi ku meiso ma Yehowa anga binsania byakitile isi Yoyakimu. 20 Ku kabamba ka bongoa bwa Yehowa, bitondo bibino binsania byabasile ku Yerusalema nu ku Yuda, aaba nu gaasilile kubatikya lwabusio lwage.
Zedekia asombile kwanza mukota wa Babeli.