Kukindwa kwa Yerusalema
25
1 Mu kindi ky'ikumi kya mwezi w'ikumi mu mwaka wa mubula wa kwangata kwa Zedekia, mukota wa Babeli avule n'iyombo lya bakoloboyo bage bansania, kwitana na Yerusalema. Batimbile mwino na ngabo nu bakitile ido lyabo gago. 2 Nu watimbilwe na bita aaba nu ku mwaka w'ikumi nu umozi wa mukota Zedekia. 3 Busi bwa mubula bwa mwezi w'inazi nzala zabezaga nnene mu mwino, ububo bantu tababede n'idia mu kisi. 4 Ububo itengu lyakitilwe mu kitutu kya mwino nu bantu bansania ba bita batinine mu kindi ku nzila za mwingilo wa gasamba bitutu bibili bwigi n'isoa lya mukota, gabezaga baKaldea batimba mwino ku ndenge insania. Batini bendile mu nzila za kibitabita. 5 Tondo bakoloboyo ba baKaldea bayangile mukota nu bamukatile mu kibitabita kya Yeriko nu iyombo lyage linsania lyabalangenne nu bamusigile. 6 Ububo bakatile mukota nu kumweka ku mukota wa Babeli ku Ribla, nu bamusungizie ko. 7 Nu beitile bana ba Zedekia lwabusio lwage nu bamubugizie meiso. Bamukandile na miyololo za byuma nu bamwekile ku Babeli. 8 Mu kindi kya mutubakamo kya mwezi w'itano mu mwaka w'ikumi nu mubula wa kwangata kwa Nebukadneza mukota wa Babeli, Nebuzaradani mukota wa bakoloboyo balangi bakulanga mukota, mukiti wa mukota wa Babeli eingide mu Yerusalema. 9 Agisizie numba za Yehowa nu numba za mukota nu numba insania za mu Yerusalema. Agisizie numba nnene insania. 10 Nu bakoloboyo bansania ba baKaldea babezaga gamozi nage, nu bakota ba bakoloboyo balangi bagusizie bitutu bya Yerusalema ndenge insania. 11 Nebuzaradani mukota wa balangi ba bakota ekile ku bukobe bantu bansania basigede mu mwino gamozi na basigede ba bantu ba miino nu babo babasile mu mwino kwenda ku mukota wa Babeli. 12 Tondo mukota wa balangi asigile bamozi ba bazambi nunse buno babe balimi ba masoa ma mizabibu. 13 BaKaldea babungwide bibebibe mango ma nsubi mabezaga mu numba za Yehowa nu kikyo kibungulu kya nsubi nu magulu makyo mabezaga mu numba za Yehowa. Bekile nsubi zabyo insania ku Babeli. 14 Bekile mpepe za lwito nu mpagu nu tulaso twa kukalakasa ntambi nu bituma nu bibungulu binsania bya nsubi byakitaga mulimo mu numba. 15 Mukota wa balangi atolile nginga nu bibungulu binsania bya olo nu bya feza. 16 Buzitu bwa mamo mango mabili nu kibungulu nu magulu makyo makitile Solomono ku numba za Yehowa tabwamenyininwe. 17 Bulazi bw'iyango limozi bwabezaga mabusu ikumi nu kinana. Bulazi bwa kyindi kya nsubi kyabezaga gantata bwabezaga mabusu masatu. Ku ntungo za kyindi kikyo kwabezaga malebo masusania makila nu biguma nu binsania byabezaga bya nsubi. Iyango lya mabili lyakitilwe bumozi.
18 Mukota wa balangi ba bakoloboyo akandile Seraya, sankoga munene nu Zefania, sankoga wa babili nu balangi basatu ba lwibi. 19 Atikizye musondelezia wa bakoloboyo nu bantu batano ba kibombo kya bakazi ba nango na mukota basangilwe mu mwino. Atikizye musanzi wa mukota w'iyombo waganzaga bantu ba kisi nu makumi mutuba ma bantu ba kisi basangilwe mu mwino. 20 Nebuzaradani mukota wa balangi abekile ku mukota wa Babeli ku Ribla. 21 Mukota wa Babeli abeitile kuko ku Ribla mu kisi kya Hamati. Ububo baYuda batikizibwe ku kisi kyabo.
22 Nebukadneza mukota wa Babeli abikile Gedalia, mwana wa Ahikamu, mwana wa Safanu kwangata bantu baasigile mu kisi kya baYuda. 23 Gongule bangati ba bakoloboyo nu bantu babo buno mukota wa Babeli abikile Gedalia mwangati, bavule kweli ku Misipa. Meina mabo mabezaga: Isimaeli mwana wa Netania, nu Yohanani mwana wa Karea, nu Seraya mwana wa Tanumeti muNetofati nu Yazania mwana wa muMakati gamozi na bantu babo. 24 Gedalia abalumbilide bunee: “Tamukue bakiti ba baKaldea boba. Ikalazi mu kisi nu kitilazi mukota wa Babeli, mwabe busoga.”
25 Tondo mu mwezi wa mutubakamo, Isimaeli mwana wa Netania mwana wa Elisama wa kikanga kya bukota endile ku Misipa na bantu ikumi, nu beitile Gedalia nu baYuda nu baKaldea babezaga gamozi nage. 26 Ububo bantu bansania batinine ku Misri bakeke nu banene gamozi na bangati ba bakoloboyo, kubuno bakule baKaldea boba. 27 Mu mwaka wa makumi masatu nu mutubakamo wa kwigibwa kwa Yoyakimu, mukota wa baYuda mu busi bwa makumi mabili nu mutubakamo bwa mwezi w'ikumi nu ibili, Ewili-Merodaki mukota wa Babeli, mu mwaka wage mutangi wa kwangata, akandwide Yoyakini, mukota wa baYuda mu kikando. 28 Amukwilide kyombo nu asakikile kisumbi kyage kutinga bango bakota baabezaga nabo mu Babeli. 29 Nu amutikizye nsulu zage za kikando nu Yoyakini alide ku meza ma mukota bindi binsania bya kalamo kage. 30 Nu mukota amukasile lukalilo busi na busi ku bindi byage binsania bya kalamo kage.