Yosia akita idagano na Kalaga
23
1 Mukota Yosia asingile migenzi kumana bakulu bansania ba baYuda nu ba Yerusalema. 2 Kumbusa abakamine ku numba za Yehowa gamozi na bantu bansania ba baYuda nu bantu bansania ba Yerusalema, basankoga nu balengania nu bantu bansania, bakeke nu banene. Abasomenne binsania byasanzilwe mu mukanda w'idagano wamonekile mu numba za Yehowa. 3 Mukota emenne bwigi n'iyango. Alumbide lwabusio lwa Yehowa kumuyanga nu kwanza makakizio nu bulongeki nu milembe zage na mutima umozi nu na kalenganio kage kansania, kukita bitondo binsania by'idagano byasanzilwe mu mukanda wono. Nu bantu bansania beitabizizie idagano lilyo. 4 Mukota akakizizie Hilkia sankoga munene nu basankoga ba kunsi kwage nu balangi ba nibi kutikya bintu binsania bya nkisi mu numba za Kalaga, byakitilwe ku kabamba ka Baali nu Ashera nu ku iyombo linsania lya meigulu. Nu abigisizie mu mpinga za Kiduroni nu kweka lwito lwabyo ku Beteli. 5 Apumbizie basankoga bakumbaminaga nkisi, babikilwe na bakota ba baYuda buno bagisagie bulago gantata biziki byasakama bya miino za baYuda nu za ndenge za Yerusalema, nu babo bakasanaga bulago ku Baali nu ku musi nu ku mwezi nu ku nkeninkeni nu ku iyombo linsania lya kwigulu. 6 Atikizye zezo Ashera mu numba za Yehowa nu kuzeka ku isula lya Yerusalema ku mpinga za Kiduroni. Azigisizie ku luuzi lwa Kiduroni; azibungwide ku mukungu, nu awisile gantata ga nsinda za bantu. 7 Agusizie numba za bamulume bitazi ba Sodoma zabezaga mu numba za Yehowa mu kiziki kyalukilaga bakikulu hema za Ashera. 8 Avule na basankoga bansania ba baYuda nu kusambula biziki bibyo byagisizagia basankoga bulago, kutukila Geba aaba nu ku Beri-Seba. Asambwide kiziki kya tuyulo
+ \fr 23:8 \ft Tuyulo twa kalaga kabo kabezaga kisusania kya mpene. bwigi na mwingilo wa Yosua, mukota wa mwino, kako kabezaga ku seikazi lya mwingilo wa mwino. 9 Tondo basankoga ba biziki byasakama tababakamaga ku kasenga ka kayulo ka Yehowa ku Yerusalema, tondo balide tumpampa tutagagibwa gamozi na basankoga banyabo. 10 Abigizie Tofeti, kili kiziki mu mpinga za bana ba Hinomu, buno muntu ntatingie mwana wage aba mukinga wage mu keiya ku Moleki. 11 Atikizye ku mwingilo wa numba za Yehowa farasi zakasenne bakota ba baYuda ku musi. Zabezaga ga mulungu wa numba za Yehowa bwigi na busio bwa Natani-Meleki, mulangi wa mulungu. Agisizie tuyanga twa musi. 12 Asambwide tusenga twa tuyulo twabezaga gantata ga busio bwa Ahazi twakitide bakota ba Yuda nu tuyulo twakitile Manase mu mikolo ibili za numba za Yehowa. Kumbusa kwa kutubungula, nu kututikya gago, eisile mukungu wato mu luuzi lwa Kiduroni. 13 Abigizie tuyulo twa biziki byasakama byabezaga kuntata kwa Yerusalema, ku lulenge lwa kwidume kwa Mwiduko wa Kubiga,
+ \fr 23:13 \ft Wabede mwiduko wa Mizeituni mu bindi bya Yesu. tobakile Solomono, mukota wa Israeli ku Asteroti lusombo lwa baSidoni, nu ku Kemosi lusombo lwa baMoabu, nu ku Moleki lusombo lwa baAmoni. 14 Abungwide nkisi nu kusesasesa Ashera nu kwizazia biziki byazo na makwa ma bantu.
15 Asambwide kasenga ka kayulo kabezaga ku Beteli nu kiziki kyasakama kyakitile Yeroboamu mwana wa Nebati waagizie baIsraeli. Agisizie kiziki kyalanga nu kukigalukya mukungu, nu agisizie zezo Ashera. 16 Gakebetukile Yosia amonine nsinda zabezaga gago gantata ga mwiduko, asingile bantu kutola makwa mu nsinda nu kumagisia gantata ga kasenga ka kayulo nu akabigizie. Akitile bibyo binsania anga kitondo kya Yehowa kyatendile muntu wa Kalaga walenganizie bibyo bitondo. 17 Kumbusa abuzizie bunee: “Kakengelezio kakizi kako kankumona ko?”
Bantu ba mwino bamubwide bunee: “Keli nsinda za wozo muntu wa Kalaga watukaga ku Yuda, walenganizie ku kasenga ka kayulo ka Beteli bibyo bitondo biwakitile.” 18 Atendile bunee: “Sigazi we, muntu ntatikye makwa mage.” Ububo balangile makwa mage gamozi na makwa ma wozo mulengania watukaga ku Samaria.
19 Yosia azikizye numba insania za biziki byasakama byabezaga mu miino za Samaria byakitile bakota ba Israeli nu bibongizie Yehowa nabyo. Abakitile bunsania anga bwakitile mu Beteli. 20 Eitile basankoga bansania ba biziki bibyo byasakama gantata ga tusenga twa tuyulo nu agisizie makwa ma bantu gato. Kumbusa asubizie ku Yerusalema.
Busi bunene bwa Kisagulo ky'Isuluko
21 Mukota akakizizie bantu bansania bunee: “Kitazi Kisagulo ky'Isuluko ku lutanuno lwa Yehowa, Kalaga weinyu, anga bwasanzilwe mu mukanda wono w'Idagano.” 22 Lebelebe takwabede kisagulo anga kikino kutukila bindi bya ngatu basungagia baIsraeli, aba mu bindi bya bakota ba baIsraeli, aba bya baYuda. 23 Tondo kisagulo kikino kyakitilwe ku Yerusalema ku lutanuno lwa Yehowa mu mwaka w'ikumi nu kinana wa mukota Yosia.
Yosia atikizye bagila nu mpala zabo
24 Yosia atikizye bagila bansania nu mpala zabo, nu tulimu, nu nkisi, nu nsombo insania zamonekaga mu kisi kya baYuda nu mu Yerusalema; buno akokomezie bitondo binsania bya mulembe byasanzilwe mu mukanda wamonine Hilkia sankoga munene mu numba za Yehowa. 25 Nu lwabusio lwage takwabezaga ungo mukota anga wono wagalukile na mutima wage unsania nu makengelo mage mansania nu magala mage mansania ku Yehowa. Akitile milembe insania za Musa nu takwabezaga ungo anga we kumbusa kwage. 26 Tondo Yehowa ntagalukizye bukali bwa bongoa bwage bongedwe baYuda ku kabamba ka bitondo bibyo byakitile Manase buno amwongie. 27 Nu Yehowa atendile bunee: “Nkwigia baYuda bulazi na nne anga bunigizie baIsraeli. Nazikye wono mwino wa Yerusalema u nasombwede nu zeno numba zinatendaga buno izina lyane lyabe muzo.” 28 Bingo bitondo binsania bya Yosia nu binsania byakitile, ndi tabyasanzilwe mu mukanda wa byawakalazi bya bakota ba baYuda?
Kukua kwa Yosia
29 Mu bindi byage, Farao Neko mukota wa Misri avule kwitana na mukota wa Asuria. Abasile ku luuzi lwa Furati nu mukota Yosia endile kuko kwitana nage. Farao amwitile kuko ku Megido g'ibamba itangi. 30 Bakiti bage bekile kitumba kyage mu kayanga kutuka ku Megido nu kumubasia Yerusalema; bamuyikile mu nsinda zage wenyene. Nu bantu ba kisi batolile Yoahazi mwana wage, nu bamubongezie mwambo nu kumubika mukota mu kiziki ky'isi.
Kwangata kwa Yoahazi
31 Yoahazi abezaga na myaka makumi mabili nu isatu gaalingile kwangata. Angatile myezi isatu mu Yerusalema. Izina lya nina lyamanagwa Hamutali mukinga wa Yeremia muLibuna. 32 Akitile bubi ku meiso ma Yehowa anga bunsania bwakitile beisi. 33 Nu Farao Neko amubikile mu kikando mu Ribla mu kisi kya Hamati buno ntavwame kwangata lingo mu Yerusalema; nu Farao abikile kodi ka talanta lukama lwa feza nu talanta emozi za olo ku baYuda. 34 Farao Neko eikazizie Eliakimu, mwana wa Yosia mu kiziki ky'isi Yosia. Agalukizye izina lyage kuba Yoyakimu tondo endile na Yoahazi ku Misri nu akule kuko. 35 Yoyakimu aligile Farao mutulo wa feza nu wa olo tondo aligizie bantu bansania kodi, muntu na muntu anga bwabezaga idigo lyage buno azikase Farao Neko. 36 Yoyakimu abezaga na myaka makumi mabili nu itano gaalingile kwangata. Angatile myaka ikumi nu umozi mu Yerusalema. Izina lya nina lyabezaga Zebuda mukinga wa Pedaya wa ku Ruma. 37 Akitile bubi ku meiso ma Yehowa anga bunsania bwakitile beisi.