Kwangata kwa Yosia mu Yuda
22
1 Yosia abezaga na myaka kinana gaalingile kwangata, nu angatile myaka makumi masatu nu umozi mu Yerusalema. Izina lya nina lyamanagwa Yedida, mukinga wa Adaya wa ku Bozikati. 2 Akitile busoga lwabusio lwa Yehowa. Ayangile misako insania z'isi Davidi nu ntendile ku seidume aba ku seikazi. Kumoneka kwa mukanda wa milembe
3 Mu mwaka w'ikumi nu kinana wa mukota Yosia mukota asingile Safanu, mwana wa Azalia, mwana wa Mesulamu musanzi ku numba za Yehowa. 4 Amubwide bunee: “Bakama kuli Hilkia sankoga munene buno aganze feza insania zalusizibwe ku numba za Yehowa, zakatile balangi ba lwibi ku bantu. 5 Babike zezo feza ku maboko ma bemanizi ba mulimo wa numba za Yehowa nu bakase bakiti ba mulimo, 6 u bakulumizi ba mbavu nu bobaki buno balongeke kusambuka kwa numba za Yehowa, nu kukunza miti nu makozi ma bukunza bubibu buno bavwame kulongeka numba. 7 Tondo bemanizi tababuzizibwe misagu za zezo feza zibakatile kubuno bakambile na bulili.”
8 Nu Hilkia sankoga munene abwide Safanu musanzi bunee: “Namona mukanda wa milembe mu numba za Yehowa.” Akasile Safanu wozo mukanda nu agusomine. 9 Safanu musanzi asubizie ku mukota na musagu wa mulimo. Atendile bunee: “Bemanizi bobe batolile feza zamonekile mu numba za Yehowa nu bazikasile ku bakiti ba mulimo.” 10 Kumbusa Safanu musanzi abwide lingo mukota bunee: “Hilkia sankoga ankasile mukanda.” Nu agusomine lwabusio lwa mukota.
11 Gongule mukota ku bitondo bya mukanda wa milembe, atile nsulu zage. 12 Mukota akakizizie Hilkia sankoga munene nu Ahikamu, mwana wa Safanu nu Akibori, mwana wa Mikaya nu Safanu musanzi nu Asaya mukiti wa mukota bunee: 13 “Endazi kubuzia Yehowa ku kabamba kane nu ka bantu nu ka Yuda unsania, ku kitondo kya mukanda wono wa milembe wamonekile kubuno bongoa bwa Yehowa buli bukali kutuli kubuno batateiswe tabanzile bitondo bya wono mukanda nu tabakitile binsania byasanzilwe mugo kutuli.”
14 Hilkia sankoga munene, nu Ahikamu, nu Akibori, nu Safanu, nu Asaya bendile kusambala na Hulda mulengania wa mukikulu, mukazi wa Salumu, mwana wa Tikwa, mwana wa Harihasi, mulangi wa nsulu za mukota. Nu we eikalaga mu kingo kibe kya mwino wa Yerusalema. 15 Gabasilile kumutenda, ababwide bunee: “Bubuno u bwatenda Yehowa, u Kalaga wa Israeli: Tendazi muntu wamusingile kundi bunee: 16 ‘Yehowa atenda bunee: “Nne nalusie bubi mu mwino wono nu ku bantu bakwikala mugo anga bitondo binsania byasanzilwe mu mukanda wasomine mukota wa baYuda. 17 Kubuno bansigile nu bagisizie bulago ku tungo tulaga buno banongie na binsania bibakitile na maboko mabo. Ububo bongoa bwane buli bukali ga kiziki kikino nu tabukasila.”’ 18 Tondo mutende kuli mukota wa baYuda wamusingile kubuzia Yehowa, bunee: ‘Bubuno u bwatenda Yehowa, Kalaga wa baIsraeli, ku kabamba ka bitondo bigungule kubyo: 19 Kubuno mutima wobe watambile nu wibotezie lwabusio lwa Mukota gagungule ku bitondo binatendile ku kabamba ka kikino kiziki nu bantu bakwikala mukyo, buno babe babigibwa nu kuswililwa kubuno watile nsulu zobe nu kulila lwabusio lwane, aaba nu nne nungule, u bwatenda Mukota. 20 Ukinsa, lola, nakuyike bwigi na baso, wayikwe mu nsinda zobe mu bubobelelo, nu meiso mobe tamakamona ku nsungio insania zinkalusia mu kiziki kikino.’” Basambalide mukota lilyo iyakulo.