Kwangata kwa Manase ku baYuda
21
1 Manase abezaga na myaka ikumi nu ibili gaalingile kwangata. Angatile myaka makumi matano nu itano mu Yerusalema. Nina amanagwa Hefuziba. 2 Akitile bubi lwabusio lwa Yehowa anga bubi bwa babilongo bapumbizibwe na Yehowa lwabusio lwa baIsraeli. 3 Obakile lingo biziki byasakama gantata nkangamo byatikizye isi Hezekia, nu obakile tusenga twa tuyulo ku Baali. Akitile nkisi anga bwakitile Ahabu mukota wa Israeli; akumbaminne nu kukitila iyombo linsania lya kwigulu. 4 Angile tungo tusenga twa tuyulo mu numba za Yehowa ga kiziki kyatendile Yehowa bunee: “Mu Yerusalema u munabike izina lyane.” 5 Angile tusenga twa tuyulo ku kabamba k'iyombo linsania lya mwigulu mu bibanza bibili bya numba za Yehowa. 6 Atingizie mwana wage mu keiya. Agomanizie na baganga nu bagila nu na babo beiya basumbu. Akitile mibi mingi buno ongie Yehowa. 7 Abikile nkisi za mukikulu Ashera mu numba za Yehowa, zabwide Yehowa ku Davidi nu Solomono, mwana wage bunee: “Mu numba zeno nu mu Yerusalema u nasombwede munkatini mwa bikanga binsania bya Israeli u munkabika izina lyane ku milyalya. 8 Nsyazangiezangie magulu ma baIsraeli kubatikya mu kisi kinakasile beisibo ndi bakokomezia kukita binsania nu milembe insania zinabakakizizie mu mukiti wane Musa.” 9 Tondo tabongule; nu Manase abaagizie kukita bubi kutinga babilongo bazikizye Yehowa lwabusio lwa baIsraeli. 10 Ububo Yehowa atendide mu bakiti bage balengania bunee: 11 “Manase, mukota wa baYuda, akitile mibi kutinga insania zakitile baAmoni babezaga lwabusio lwage nu agizie baYuda na nkisi zage. 12 Ububo Yehowa, Kalaga wa baIsraeli, atenda bunee: ‘Nkulusia mbabazio mu Yerusalema nu ku baYuda zalengye matuzi ma unsania wakyungwageko. 13 Nalindike Yerusalema na muzigi wa Samaria nu na kilindiko kya numba za Ahabu anga bukusugwa lupepe ku ndenge ibili. 14 Nasige ntiko zane zikusigala nu kubagabula ku beiti babo nu basombwe nu kunyegwa na beiti babo. 15 Kubuno bakitile bitondo bibi lwabusio lwane nu kunongia kutukila kindi kyatukile beisibo mu Misri aaba nu lelo.’”
16 Nu Manase akubwide mikila za babo beteli na katati. Eizazizie Yerusalema nazo ku ndenge insania kutinga bwagizie baYuda kukita bubi lwabusio lwa Yehowa. 17 Bingo bitondo byakitile Manase nu bwagi bwakitile, ndi tabyasanzilwe mu mukanda wa Misagu za Bakota ba Yuda?
18 Manase alekenne nu ayikilwe mu isoa lyage mu numba za bakota lyakitile Uza. Nu Amoni mwana wage angatile mu kiziki kyage.
Kwangata kwa Amoni mu Yuda
19 Amoni abezaga na myaka makumi mabili nu ibili gaalingile kwangata. Angatile myaka ibili mu Yerusalema. Nu izina lya nina lyamanagwa Mesulemeti mukinga wa Haruzi wa ku Yotiba. 20 Akitile bubi lwabusio lwa Yehowa anga bwakitile isi Manase. 21 Akitile misako insania zakitaga isi; akitide nkisi z'isi nu kuzikumbamina. 22 Asigile Yehowa, u Kalaga wa beisi nu ntakitile misako za Yehowa. 23 Nu bakiti ba Amoni bamukalide lwango lwa kumwita nu beitile mukota mu numba zage. 24 Tondo bantu ba kisi beitile bansania bakalile lwango lwa kwita Amoni, nu babikile mwana wage Yosia mu kiziki kyage kya bukota.