Kusamba nu kona kwa Hezekia.
20
1 Mu bindi bibyo, Hezekia akatilwe na lusambo bwigi na kukua. Mulengania Isaya, mwana wa Amozi, avule kweli nu amubwide bunee: “Yehowa atenda bunee: ‘Kasana nkusako ku numba zobe kubuno ukukua, ntwone.’” 2 Ububo Hezekia atimbwide meiso mage ku kitutu nu asegile ku Yehowa bunee: 3 “Nkukusega, ee Yehowa, kengela kano kaluma lukita lunendaga lwabusio lwobe mu bulili na mutima musoga nu nakitile bili bisoga ku meiso mobe.” Nu Hezekia alilile bubibu.
4 Gabede Isaya ntebasa ga mulungu, iyuki lya Mukota lyamubaside kutenda bunee: 5 “Subya nu tenda kuli Hezekia mukota wa bantu bane bunee: ‘Yehowa, Kalaga wa so Davidi, atenda bunee: “Nungwa masego mobe nu namona ku bisozi byobe. Nakonie. Wabakame ku kindi kya bisatu ku numba za Yehowa. 6 Natalikile bindi byobe ingo myaka ikumi nu itano, nakonie, uwe nu wono mwino, mu maboko ma mukota wa Asuria; nalange mwino wono ku kabamba kane nu ku kabamba ka Davidi mukiti wane.”’”
7 Nu Isaya atendile bunee: “Tolazi kyindi kya biguma kyasusania ndiga.” Bakitolile nu kukibika gantata g'iyute nu onine. 8 Hezekia abuzizie Isaya bunee: “Kalolesio kakizi kabe buno Yehowa anonia, nu mu kindi kya bisatu nibakame ku numba za Yehowa?”
9 Isaya amwakwide bunee: “Kwabe kalolesio kakano kuguli, umenye buno Yehowa azindilizia kitondo kyatendile. Ndi ukutunda kilimelime kyende lwabusio masomoneno ikumi aba kwenda kumbusa masomoneno ikumi?”
10 Hezekia amwakwide bunee: “Buli busosu kilimelime kwenda lwabusio masomoneno ikumi; kasi kilimelime kisubye lumbusambusa masomoneno ikumi.” 11 Ububo Isaya mulengania asegile ku Yehowa; nu asubizie kilimelime lumbusambusa masomoneno ikumi ku kyindo kyakitile Ahazi.
12 Nkungu zezo Berodaki-Baladana, mwana wa Baladani, mukota wa Babeli, asingile mukanda nu lukaso kuli Hezekia kubuno ongule ku musagu wa lusambo lwa Hezekia. 13 Hezekia abogilebogile nabyo nu abalolesizie mu numba zage bintu binsania bya bukunza bubibu nu feza, nu olo, nu bulago, nu makiti ma bukunza bubibu, nu numba za ngabo zage nu bintu binsania bikumoneka mu masuku mage. Aba takwasigede kyampa kitalolesizie Hezekia mu numba zage, aba mu bukota bwage bunsania. 14 Mulengania Isaya avule ku mukota Hezekia nu amubuzizie bunee: “Babo bantu batendile buni nu batukile kuni kuvwa kuguli?”
Hezekia amwakwide bunee: “Batukile bulazi na gano ku kisi kya Babeli.”
15 Isaya amubuzizie bunee: “Bamonine ku kikizi mu numba zobe?”
Hezekia amwakwide bunee: “Bamonine binsania bili mu numba zane. Takuli kyampa kinsyabalolesizie mu masuku mane.”
16 Isaya abwide Hezekia bunee: “Ungwilila iyuki lya Yehowa: 17 Lola, mu bindi byavwe, binsania bili mu numba zobe, nu bibyo byabikile ba so, byekwe ku Babeli, aaba nu takwasigale kena, u bwatenda Yehowa. 18 Nu bana bobe bawabute babeke bulazi nu babe bakiti mu numba za mukota wa Babeli.”
19 Hezekia abwide Isaya bunee: “Kitondo kya Yehowa kiwatenda kili kisoga.” Atalikide kutenda bunee: “Ndi bubobelelo bwabe mu kalamo kane?” 20 Bingo bitondo byakitile Hezekia nu magala mage, nu buni bwombile lugezi lwa kugezia mazi mu mwino, ndi tabyasanzilwe mu mukanda wa byawakalazi bya bakota ba baYuda? 21 Nu Hezekia akule nu ayikilwe na beisi; mwana wage Manase angatile mu kiziki kyage.