Masego ma Hezekia monezie Yerusalema
19
1 Gongule mukota Hezekia ku bitondo bibino, atile nsulu zage. Avwalile ikunino nu eingide mu numba za Yehowa. 2 Asingile Eliakimu mwemanizi wa numba za mukota nu Sebuna, musanzi, nu bakulu ba basankoga, bavwalile makunino bende ku mulengania Isaya, mwana wa Amozi. 3 Bamubwide bunee: “Hezekia atenda bunee: ‘Kindi kikino kili kya kabebe nu mbabazio nu bilingano kubuno, bana beli kayikayika kubutwa, tondo takuli magala ma kubabuta. 4 Embe Yehowa, Kalaga wobe, ongwe bitondo binsania byatendile Rabashake. Asingilwe na mukota wa Asuria buno alinge Kalaga uli Mulami. Embe Yehowa, Kalaga wobe, azugile moki mongule kumo; ku bubo segela bantu bage basigala beikili balami.’” 5 Bakiti ba mukota Hezekia bendile ku Isaya. 6 Isaya abwide bunee: “Mubule mukota weinyu bunee: ‘Bubuno u bwatenda Yehowa bunee: “Tamukue boba ku bitondo bimungule kubyo, u bilingano byandingile bakiti ba mukota wa Asuria. 7 Kubuno nasinge mugenzi nu ongwe misagu nu asubye kwabo wenyene. Namwite na mwene wa nganda mu kisi kyage.”’” 8 Rabashake asubizie nu asangile mukota wa Asuria akwitana na Libuna kubuno ungule buno atuka ku Lakisi. 9 Mukota wa Asuria ungule ku misagu za Tiraka mukota wa Etiopia avwa kwitana nage. Asingile migenzi ku Hezekia nu abakakizizie bunee: 10 “Tendazi kuli Hezekia mukota wa Yuda bunee: ‘Ntwengelelwe na Kalaga wobe u ukulemanina, ukutenda buno Yerusalema ntakindwe na mukota wa Asuria. 11 Ndi ntungule bwakitile bakota ba Asuria ku bisi binsania nu kubizikya nunse. Ndi uwe unonibwa? 12 Ndi tulaga twa bilongo bibyo twabyonezie? Batatane bazikizye Gozani nu Harani nu Resefu nu baEdeni babezaga mu Telasari. 13 Kuni kuli mukota wa Hamati aba wa Arpadi aba nu wa mwino wa Sefarwaimu aba nu wa Hena, aba nu wa Iwa?’”
14 Hezekia akatile mukanda wasingilwe na migenzi nu agusomine. Kumbusa abakamine ku numba za Yehowa nu agubikile lwabusio lwa Yehowa. 15 Hezekia asegile bunee: “Yehowa, Kalaga wa Israeli, ukwikalaga kwigulu gantata ga makerubi, uwe tugu uwenyene uli Kalaga wa makota mansania ma kisi. Wabumbile igulu nu kisi. 16 Ee Yehowa, tega kutuzi kwobe nu ungwilila. Ee Yehowa, zibula meiso mobe nu lola. Ungwilila moki ma Saniharibu, wasingile Rabashake buno alinge Kalaga uli mulami.
17 Buligo, ee Mukota, buno bakota ba Asuria bazikizye bilongo nu bisi byabo. 18 Beisile tulaga twabo mu keiya, kubuno tatwabezaga tulaga twa lebelebe, tondo mulimo wa maboko ma bantu, nu miti nu makozi tugu; ububo batuzikizye. 19 Ee Yehowa, Kalaga weitu, kano kaluma tonie mu maboko ma Saniharibu buno makota mansania ma kisi mavwame kumenya buno uwenyene, ee Yehowa, uli Kalaga.”
20 Nu Isaya, mwana wa Amozi, asingile kutenda ku Hezekia bunee: “Yehowa, Kalaga wa baIsraeli, atenda bunee: ‘Nungule isego liwasegile ku kabamba ka Saniharibu mukota wa Asuria.’ 21 Bubuno u bwatendile Yehowa ku misagu zage bunee:
‘Kikumi, u mukinga wa Sayuni, akukubenga nu kukunyega.
Mukinga wa Yerusalema akukutengezia itoe.
22 Wabengile nu kulinga nazi?
Walalukile n'iyuki inene ku nazi,
Nu kusakika nkige mu mpena?
Ukwisakika kuli Wasililila wa Israeli.
23 Wabengile Mukota na migenzi zobe gawabwide bunee:
“Na bwingi bwa tuyanga twane,
Nabakamine ga miduko minene.
Mu myaga za Lebanoni, nasinde miti za mierezi zage ndazi,
Nu miberoshi zili nsoga kutinga.
24 Nombile tunuabalongo mu bisi biteli byane,
Nu nanune mazi ma bulazi.
Na magulu mane nakamizie nuuzi insania za Misri.”
25 Ndi ntungule buno nne u walenganizie bubo
Kutukila wakalazi nu kubukita ku bindi bya wakalazi?
Kano kaluma nalizindilizia,
Buno wite miino zili na mikolo aaba nu
Zibe biziki by'iyala.
26 Ku bubo bantu beli mo batamba nu bakue na nsoni.
Beli anga bisugu bya masoa, anga bisugu bibisi,
Anga nsolu zili gantata ga numba nu
Anga ngano zakamibwa lwabusio lwa kwela.
27 Tondo nizi kwikala kwobe, nu kubasa kwobe,
Nu kwingila kwobe nu bongoa bwobe kundi.
28 Ku kabamba ka bongoa bwobe kundi nu
Lwikotio lwobe lunungule kulo,
Nabike kyuma kyane kya kusondelezia mu mwembe wobe
Nu kasabuka kane gasamba milomo zobe.
Nu nakusubye ku nzila zezo ziwavule muzo.’
29 Ee Hezekia, kakano kabe kalolesio kuguli;
Ku mwaka wono, mwalie bikwasa byo byenyene.
Ku mwaka w'ibili mwalie matubulo mabyo.
Ku mwaka w'isatu, yikazi mbuto nu kutubula.
Yikazi masoa ma mizigi za biguma nu kubilia.
30 Nu babo bonine mu numba za Yuda base mizi munsi
Nu kukolama biguma.
31 Kubuno basigede batuke ku Yerusalema
Nu bonine ku mwiduko wa Sayuni.
Magala ma Yehowa, Mwiya Mayombo, makabisililizia.
32 Ku bubo, Yehowa atenda ku mukota wa Asuria bunee:
‘Nteingile mu wono mwino aba nteise musungu mugo,
Aba ntakaguvwila na ngabo nu ntakatikya bitutu byago.
33 Asubye mu nzila zavwaga muzo.
Nteingile mu mwino wono, u bwatenda Yehowa.
34 Nalange nu konia mwino wono ku kabamba kane nnenyene
Nu ku kabamba ka Davidi, mukiti wane.’”
35 Mu kindi kikyo mwanzelo wa Yehowa abasile nu eitile mu ido lya baAsuria bantu tununu lukama, makumi kinana nu tutano (185.000). Gayukile bantu nindunindu, bamonine babano bansania beseli bitumba. 36 Ububo Saniharibu, mukota wa Asuria, eigile mu ido lyage nu endile kwage nu eikede mu mwino wa Ninawe. 37 Tondo gaabezaga akukumbamina mu numba za Nisiroki kalaga kage, bana bage, Adarameleki nu Sarezeri, bamwitile na mwene wa nganda nu batinine ku kisi kya Ararati. Esari-Hadoni mwana wage angatile mu kiziki kyage.