Hoshea mukota muzinda wa baIsraeli
17
1 Mu mwaka w'ikumi nu ibili wa Ahazia mukota wa baYuda, Hoshea mwana wa Ela alingile kwangata baIsraeli mu Samaria. Angatile myaka mubula. 2 Akitile bubi lwabusio lwa Yehowa, tondo ntakitile anga bakota ba baIsraeli babede lwabusio lwage. 3 Salmaneseri mukota wa Asuria avule kwitana na Hoshea, wabezaga mukiti wage nu wamuligaga kodi. 4 Mukota wa Asuria amenyininne buno Hoshea amukitide musona. Hoshea asingile migenzi ku So, mukota wa Misri, nu ntalusizie kodi ku mukota wa Asuria anga bwakitaga mwaka na mwaka. Ububo Salmaneseri amukandile mu kikando. 5 Nu mukota wa Asuria atingile mu kisi kinsania kwitana bita. Abakamine kwitania Samaria nu agutimbile myaka isatu. 6 Mu mwaka wa mubula wa Hoshea, mukota wa Asuria akindile Samaria. Asingile baIsraeli ku Asuria ku bukobe. Ababikile mu Hala nu mu Habori bwigi na luuzi lwa Gozani nu mu miino za baMedi.
7 Kitondo kikino kyabede kubuno baIsraeli bakitide Yehowa, Kalaga wabo, bwagi, wabatikizye ku maboko ma Farao mukota wa Misri, nu kukua tungo tulaga boba. 8 Bayangile nkita za ba bilongo bapumbizie Yehowa lwabusio lwa baIsraeli nu babo babikilwe na bakota ba baIsraeli. 9 Nu baIsraeli bakitile bitondo biteisanana ku lumbisombiso kubenga Yehowa, Kalaga wabo. Bobakile tusenga twa tungo tulaga mu miino zabo insania, ku biziki binsania byasakama. 10 Babikile tulimu nu nkisi gantata ga nkangamo insania nu gansina miti insania zitakuomaga nsamba. 11 Nu bakitile tuyulo twa kugisia bulago ku biziki binsania byasakama anga bwakitile babilongo batikizibwe na Yehowa lwabusio lwabo nu bakitile bitondo bibi byongizie Yehowa. 12 Bakitide nkisi zakakizizie Yehowa bunee: “Tamukite kitondo kikino.” 13 Yehowa atondile baIsraeli nu baYuda mu balengania bage nu balaguzi kutenda bunee: “Galukazi nu kusiga mibi zeinyu nu kokomeziazi makakizio mane nu milembe zane anga kinsania kinakakizizie basoinyuwe ganabasingide bakiti bane balengania.”
14 Tondo tabongule nu babezaga na mitima mibibu anga beisibo batakatizizie Yehowa, Kalaga wabo. 15 Basombile milembe zage nu idagano lyakitile na beisibo nu kutonda kwabatondile. Bayangile bitondo bya bulia nu babede bulia kubuno bayangile lukita lwa ba bilongo babatimbile nu babakakizagia Yehowa buno tabayange lukita lwabo. 16 Basigile makakizio mansania ma Yehowa, Kalaga wabo. Beikitide nkisi za kyuma kyanyengulwa, u byana bibili bya ngombe nu tulimu; bakumbaminne bibumbwa lwabusio lw'iyombo linsania lya meigulu nu bakitide Baali. 17 Nu batingizie bana babo bamulume nu bamukazi mu keiya; babuzizie bugila nu bya mbogimbogi. Beikasenne kukita bubi lwabusio lwa Yehowa buno bamwongie.
18 Ku kabamba kako Yehowa ongedwe baIsraeli nunse. Abeigizie bulazi nage nu takwabezaga umozi wasigede tugu kikanga kya Yuda. 19 BaYuda tabakokomezizie makakizio ma Yehowa, Kalaga wabo, tondo bayangile misako zakitaga baIsraeli. 20 Ububo Yehowa asombile kibuti kinsania kya baIsraeli. Abasungizie na banyagi nu apumbizie bansania lwabusio lwage.
21 Galekanukizye Yehowa baIsraeli na numba za Davidi, babikile Yeroboamu mwana wa Nebati mukota. Alutile baIsraeli buno basige Yehowa nu abasondelezizie mu bwagi bwabo. 22 BaIsraeli bakitile mibi insania za Yeroboamu; tabeibembukizie nazo, 23 aaba nu gapumbizie Yehowa baIsraeli lwabusio lwage anga bwatendile mu bakiti bage bansania balengania. BaIsraeli batikizibwe mu kisi kyabo nu beigizibwe mu kisi kya baAsuria aaba nu lelo. 24 Mukota wa baAsuria alusizie bantu ba Babeli nu baKuta nu baAwa nu baHamati nu baSefarwaimu, nu ababikile mu miino za Samaria mu kiziki kya baIsraeli. Bangatile mu Samaria nu beikede mu miino zabo. 25 Gabalingile kwikala kuko tabakuaga Yehowa boba. Ububo Yehowa abasingide bimbwe munkatini mwabo, nubyo byitile bamozi. 26 Ububo babwide mukota wa Asuria bunee: “Bilongo biwabikile mu Samaria tabeizi kukitila kalaga ka kisi kikino; ububo asingile bimbwe munkatini mwabo nu bikubeita kubuno tabeizi lukita lwa kukitila kalaga ka kisi.”
27 Mukota wa baAsuria akakizizie bunee: “Singa sankoga umozi wa babo bamwekile kuno buno ende kwikala kuko nu kubeigisia lukita lwa kukitila kalaga ka kisi.” 28 Ububo umozi wa ku babo beigizibwe endile kwikala ku Beteli. Abeigisizie buni bwa kukua Yehowa boba.
29 Tondo bantu ba kilongo na kilongo beikitide twabo tulaga mu miino zibeikalaga muzo nu kutubika mu numba za mpala zobakilwe na baSamaria gantata ga nkangamo. 30 Bantu ba Babeli bakitile nkisi za Sukoti-Benoti; bantu ba Kuta bakitile Nergali; nu baHamati bakitile Asima; 31 baAwi bakitile Nibuhasi nu Tartaki; nu baSefarwaimu beisaga bana babo mu keiya ku kabamba ka Adarameleki nu ka Anameleki u tulaga twa baSefarwaimu. 32 Bakule Yehowa boba, tondo beisombolede bantu munkatini mwabo kuba basankoga ba biziki bya mpala gantata ga nkangamo, kubabikile twabo tulaga. 33 Bakule Yehowa boba, tondo bakitide twabo tulaga anga lukita lwa bilongo bibyo bibeigizibwe kubyo.
34 Kutukila gago aaba nu lelo bakukita anga bubalingile. Tabakule Yehowa boba aba kwanza milembe zage, aba nsungio zage aba makakizio mage makakizizie Yehowa ku bana ba Yakobo, wakasilwe izina lya Israeli. 35 Yehowa akitile idagano nabo. Abakakizizie bunee: “Tamukue tungo tulaga boba, aba kutukumbamina, aba kutukitila, aba kutukasa tuyulo. 36 Tugu mwakue Yehowa boba wamutikizye ku Misri na magala manene, We tugu u gumukumbamina nu kumukitila bisansa. 37 Kitazi kankanka na milembe nu nsungio nu makakizio nu milembe byamusanzide. Tamukue tungo tulaga boba. 38 Tamwibilile idagano linalagenne n'inyuwe; aba tamukue tungo tulaga boba. 39 Kwazi Yehowa, Kalaga weinyu, boba, nu We amwonie ku beiti beinyu bansania.”