Kwangata kwa Ahazi mu Yuda
16
1 Mu mwaka w'ikumi nu mutubakamo wa Peka mwana wa Remalia, Ahazi mwana wa Yotamu mukota wa baYuda alingile kwangata. 2 Ahazi abezaga na myaka makumi mabili gaalingile kwangata. Angatile myaka ikumi nu mutuba mu Yerusalema. Ntakitile bwisanana lwabusio lwa Yehowa, Kalaga wage, anga bwakitile isi Davidi. 3 Ayangile lukita lwa bakota ba Israeli. Atingizie mwana wage mu keiya anga bwakitile ba bilongo babo bapumbizibwe na Yehowa lwabusio lwa baIsraeli. 4 Kumbusa akitile bisansa bya kugisia gantata ga nkangamo insania nu biziki binsania by'ikumbamino lyabo nu gansina ga miti zitakuomaga nsamba. 5 Nkungu zezo, Resini mukota wa Aramu gamozi na Peka mwana wa Remalia mukota wa baIsraeli, babakamine ku Yerusalema buno bagwitanie. Batimbile mwino wa Ahazi ku bita, tondo tabavwamine kumukinda. 6 Lingo wozo Resini mukota wa Aramu, apumbizie baYuda mu Elati, nu asubizie mwino wa Elati ku bukota bwa baAramu. Nu baAramu beikalaga mugo aaba nu lelo.
7 Ububo Ahazi asingile migenzi ku Tigilati-Pileseri mukota wa Asuria, kumutenda bunee: “Nili mukiti wobe nu mwana wobe. Vwa unnonie ku maboko ma mukota wa Aramu nu mukota wa baIsraeli kubuno bakunitania.” 8 Nu Ahazia atolile feza nu olo zabezaga mu numba za Yehowa nu za mu masuku ma numba za mukota. Azisingile ku mukota wa Asuria kuba nkaso. 9 Nu mukota wa Asuria amwitabizizie. Endile kwitana na Damasiki nu agukindile. Ekile bantu ku bukobe ku Kiri nu eitile Resini. 10 Gendile Ahazi ku Damasiki kumonana na Tigilati-Pileseri, mukota wa Asuria; gaamonine ku kayulo kabezaga ko, mukota Ahazia asingile kuli Uria sankoga munene, kalolesio nu lukita lwa kako kayulo nu kilindiko kyako, nu mulimo unsania wako. 11 Uria akitile kasenga anga kisusania kinsania kya kalolesio kamusingide mukota Ahazi ku Damasiki. Akakitile lwabusio mukota Ahazia nteisubya kutuka ku Damasiki. 12 Gabasile mukota kutuka ku Damasiki, amonine ku kako kasenga. Endile bwigi nako nu akasenne kayulo gantata gako. 13 Agisizie kisansa kyage nu kukasana kayulo ka bunga bwa ngano. Akubwide kayulo ka kunua nu kutogia mikila za bisansa byage gantata ga kasenga. 14 Asigelezizie kako kasenga ka nsubi kabezaga lwabusio lwa Yehowa buno takabe gasamba kasenga kato na numba za Yehowa nu akabikile mu ntungo mwa kasenga kato ku lulenge lwa kwikazi. 15 Mukota Ahazia akakizizie Uria sankoga munene bunee: “Kita gantata ga kasenga kanene kato kayulo ka nindunindu ka kugisibwa nu kisansa kya mwigolo, kayulo ka mukota ka kugisibwa nu kisansa kyage, tuyulo twa kugisibwa twa bantu bansania ba kisi nu bisansa byato, kubula gantata ga kayulo ka kunua nu kusandila mikila za tuyulo nu mikila insania za bisansa. Tondo kayulo ka nsubi kabe kane nnenyene buno nibuzie kuko.”
16 Uria sankoga akitile binsania byakakizizie mukota Ahazia. 17 Mukota Ahazia angwide miima za kunsi nu kutikya kibungulu kyabezaga gantata. Akumbizie kitatenge kya nsubi kyabezaga gantata ga ngombe zabezaga kunsi kwakyo nu akibikile gantata g'ikozi inene. 18 Atikizye lusu lwabezaga lwa mu nzila za kubasia bakota ku numba za Yehowa Busi bwa Kumunwa, u Sabato. Lingo agalukizye mwingilo wa bakota wa numba za Yehowa buno atananizie mukota wa Asuria.