II BAKOTA. 15

Kwangata kwa Azaria mu Yuda

1 Mu mwaka wa makumi mabili nu mutubakamo wa Yeroboamu mukota wa baIsraeli, Azaria mwana wa Amazia mukota wa baYuda alingile kwangata. 2 Abezaga na myaka ikumi nu mutuba gaalingile kwangata, nu angatile myaka makumi matano nu ibili mu Yerusalema, nu izina lya nina lyabezaga Yekolia wa ku Yerusalema. 3 Akitile busoga lwabusio lwa Yehowa anga bwakitile isi Amazia. 4 Tondo ntatikizye biziki bya kukumbamina tungo tulaga gantata ga nkangamo nu bantu bendile kuko kukita kisansa nu kugisia bulago. 5 Yehowa asambizie mukota na bibali aaba nu ku lukuo lwage. Eikede mu numba zitunda zage wenyene. Mwana wage Yotamu angatile mu numba zage nu akalilaga bantu bage milondo. 6 Nu bingo bitondo binsania byakitile Azaria nu binsania byakitile, ndi tabyasanzilwe mu mikanda za byawakalazi bya bakota ba baYuda? 7 Azaria akule nu bamuyikile gamozi na beisi mu mwino wa Davidi nu Yotamu mwana wage angatile mu kiziki kyage.

8 Mu mwaka wa makumi masatu nu kinana wa Azaria mukota wa Yuda, Zekaria mwana wa Yeroboamu angatile baIsraeli mu Samaria myezi mutuba. 9 Akitile bubi lwabusio lwa Yehowa anga bwakitile beisi. Akitile mibi anga Yeroboamu mwana wa Nebati, wagizie baIsraeli. 10 Nu Salumu mwana wa Yabesi akatide Zekaria musona. Amulibwide lwabusio lwa bantu nu kumwita, nu angatile mu kiziki kyage. 11 Bingo bitondo binsania byakitile Zekaria, byasanzilwe mu mikanda za byawakalazi bya bakota ba baIsraeli. 12 Bubo u bwazindililide kyatendile Yehowa ku Yehu bunee: “Bana bobe bakeiyana kisumbi kya bukota bwa baIsraeli aaba nu ku kibuti kya binazi.”

13 Nu Salumu mwana wa Yabesi alingile kwangata mu mwaka wa makumi masatu nu mubula wa Uzia mukota wa baYuda. Angatile mwezi umozi mu Samaria. 14 Menahemu mwana wa Gadi atukile ku Tirza nu abakamine ku Samaria. Alibwide Salumu mwana wa Yabesi ku Samaria nu amwitile, nu angatile mu kiziki kyage. 15 Bingo bitondo binsania byakitile Salumu nu musona waakitile, byasanzilwe mu mikanda za byawakalazi za Bakota ba baIsraeli. 16 Menahemu atukile ku Tirza nu azikizye Tifusa nu bansania babezaga bwigi nago. Abukitile kubuno tawamwigulide nibi zage. Azikizye Tifusa nunsania, nu eitile bakikulu bansania babezaga na meimi.

Kwangata kwa Menahemu mu Israeli

17 Mu mwaka wa makumi masatu nu mubula wa Azaria mukota wa Yuda Menahemu mwana wa Gadi alingile kwangata mu Israeli. Angatile myaka ikumi mu Samaria. 18 Akitile bubi lwabusio lwa Yehowa bindi byage binsania. Ayangile mibi za Yeroboamu mwana wa Nebati wagizie baIsraeli. 19 Puli mukota wa Aramu avule ku kisi kya Israeli kubasuna, nu Menahemu akasile Puli talanta kanunu kamozi ka feza buno amukasie kugugumania bukota mu maboko mage. 20 Menahemu aligizie kodi za feza ku baIsraeli. Bagumi bansania batunganenne kuliga, na muntu na muntu, shekeli makumi matano ma feza buno azikasane ku mukota wa Aramu. Ububo mukota wa Asuria asubizie nu nteikede lingo mu kikyo kisi. 21 Bingo bitondo bya Menahemu nu binsania byakitile, ndi tabyasanzilwe mu mukanda wa byawakalazi wa bakota ba baIsraeli? 22 Menahemu akule nu ayikilwe na beisi. Nu Pekahia mwana wa Menahemu angatile mu kiziki kyage.

Pekahia mukota wa baIsraeli.

23 Mu mwaka w'itano wa Azaria mukota wa Yuda, Pekahia mwana wa Menahemu alingile kwangata baIsraeli ku Samaria. Angatile myaka ibili. 24 Akitile bubi ku meiso ma Yehowa. Ntatukile mu bwagi bwa Yeroboamu mwana wa Nebati bwagizie na baIsraeli. 25 Nu Peka mwana wa Remalia, mukota w'iyombo lyage, amukitide musona. Amulibwide ku Samaria mu busio bwa kwidanga bwa numba za mukota, gamozi na Argobu nu Arie. Abezaga gamozi na bamulume makumi matano ba baGaladi. Eitile Pekahia nu angatile mu kiziki kyage. 26 Bingo bitondo bya Pekahia nu binsania byakitile, ndi tabyasanzilwe mu mukanda wa byawakalazi bya bakota ba baIsraeli?

Peka mukota wa baIsraeli

27 Mu mwaka wa makumi matano nu ibili wa Azaria mukota wa Yuda, Peka mwana wa Remalia alingile kwangata baIsraeli ku Samaria. Angatile myaka makumi mabili. 28 Akitile bubi ku meiso ma Yehowa; ntasigile bwagi bwa Yeroboamu mwana wa Nebati, bwagizie na baIsraeli. 29 Mu bindi bya Peka mukota wa Israeli kwavule mukota umozi izina lyage Tigilati-Pileseri, mukota wa Asuria. Akatile Iyoni nu Abeli-Beti nu Maka nu Yanoa, nu Kedesi nu Hazori nu Gileadi nu Galilaya nu kisi kinsania kya Nafutali. Asingile babo bantu ku Asuria bakandwa ku bukobe. 30 Nu Hoshea, mwana wa Ela, akatile musona ku Peka mwana wa Remalia, amulibwide nu amwitile. Angatile mu kiziki kyage mu mwaka wa makumi mabili wa Yotamu, mwana wa Uzia. 31 Bingo bitondo bya Peka mwana wa Remalia mukota wa Israeli nu binsania byakitile ndi tabyasanzilwe mu mukanda wa byawakalazi bya bakota ba Israeli?

Kwangata kwa Yotamu ku baYuda

32 Mu mwaka w'ibili wa Peka mwana wa Remalia mukota wa Israeli, Yotamu mwana wa Uzia mukota wa baYuda, alingile kwangata. 33 Abezaga na myaka makumi mabili nu itano gaalingile kwangata. Angatile myaka ikumi nu mutuba mu Yerusalema. Izina lya nina lyamanagwa Yerusa mukinga wa Zadoki. 34 Akitile busoga lwabusio lwa Yehowa anga bwakitile isi Uzia. 35 Tondo ntatikizye biziki bya kukumbamina tulaga gantata ga nkangamo. Bantu bendaga kukasana bisansa nu bulago ku nkangamo. Akitile lwibi lunene lwa numba za kukumbamina Yehowa.

36 Bingo bitondo bya Yotamu nu binsania byakitile ndi tabyasanzilwe mu mukanda wa byawakalazi bya bakota ba baYuda? 37 Mu bibyo bindi, Yehowa alingile kusinga Resini mukota wa Aramu nu Peka mwana wa Remalia kwitana na baYuda. 38 Yotamu akule nu ayikilwe na beisi mu mwino w'isi Davidi. Ahazi mwana wage angatile mu kiziki kyage.