Mukota Amazia wa Yuda
14
1 Mu mwaka w'ibili wa Yoasi mwana wa Yoahazi, mukota wa baIsraeli, Amazia mwana wa Yoasi, mukota wa baYuda, alingile kwangata. 2 Abezaga na myaka makumi mabili nu itano gaalingile kwangata. Angatile myaka makumi mabili nu mubula mu Yerusalema. Izina lya nina lyabezaga Yoadani wa ku Yerusalema. 3 Akitile busoga lwabusio lwa Yehowa, tondo ta anga bwakitile isi Davidi. Akitile binsania anga bwakitile isi Yoasi. 4 Tondo biziki byasakama tabyatikizibwe. Bantu bendaga kukasana tuyulo nu kugisia bulago ga nkangamo. 5 Gabede bukota bwagugumana mu maboko mage, eitile bakiti beitile isi, mukota. 6 Tondo nteitile bana ba babo beiti, anga bwasanzilwe mu mukanda wa mulembe wa Musa, mwakakizizie Yehowa bunee: “Beisibo tabakue ku bwagi bwa bana, aba bana tabakue ku bwagi bwa beisibo, tondo muntu na muntu akue ku bwagi bwage wenyene.” 7 Eitile baEdomu tununu ikumi (10.000) mu Kibitabita kya Munkange. Akatile Sela mu bita nu agumanine Yokiteli u izina liguli nalyo aaba nu lelo.
8 Amazia asingile migenzi ku Yoasi, mwana wa Yoahazi, mwana wa Yehu, mukota wa baIsraeli kumutenda bunee: “Vwa, tumonane meiso ku meiso.”
9 Tondo Yoasi, mukota wa baIsraeli, asingile musumo ku Amazia, mukota wa baYuda bunee: “Mukele wabezaga mu Lebanoni wasingile ku mwerezi guli mu Lebanoni kutenda bunee: ‘Kasa mwana wane mukinga wobe buno abe mukazi wage.’ Tondo nyama za mu lubanda zatingaga mu nzila ku Lebanoni zanyantile wozo mukele. 10 Lebelebe wakindile baEdomu nu mutima wobe ukwisakika. Bogaboga na lutanuno nu ikala mu numba zobe. Kubuni kuukulonda kitondo kinakwingizia mu kabebe nu kugoa, uwe gamozi na baYuda?”
11 Tondo Amazia ntazigile kumungwa, nu Yoasi, mukota wa baIsraeli abakamine nu amonenne meiso ku meiso na Amazia, mukota wa baYuda ku Beti-Semesi guli ku Yuda. 12 BaYuda bakindilwe na baIsraeli. Ububo batinine nawe ku hema zage. 13 Yoasi mukota wa baIsraeli akandile Amazia mukota wa baYuda, u mwana wa Yoasi mwana wa Ahazia, kuko ku Beti-Semesi. Avule ku Yerusalema nu atile kitutu kya Yerusalema bulazi bwa mabusu nkama inazi kutukila ku mwingilo wa Efuraimu aaba nu kubasa ku mwingilo wa ku kapindapinda. 14 Atolile olo insania nu feza nu bintu binsania byabezaga mu numba za Yehowa nu mu isuku lya numba za mukota. Akatile bantu mu bita nu asubizie ku Samaria.
15 Bingo bitondo binsania byakitile Yoasi nu magala mage nu lukita lwasakile na Amazia mukota wa baYuda, ndi tabyasanzilwe mu mukanda wa byawakalazi bya bakota ba baIsraeli? 16 Yoasi akule nu ayikilwe mu Samaria gamozi na bakota ba baIsraeli. Yeroboamu mwana wage angatile mu kiziki kyage. 17 Nu Amazia mwana wa Yoasi mukota wa baYuda alamine kumbusa kwa kukua kwa Yoasi mwana wa Yoahazi mukota wa Israeli myaka ikumi nu itano. 18 Nu bingo bitondo bya Amazia ndi tabyasanzilwe mu mukanda wa byawakalazi bya bakota ba baYuda? 19 Bamukitide musona ku Yerusalema; ububo atinine ku Lakisi, tondo basingile bantu kumuyanga nu bamwitile kuko. 20 Bavule nage gantata ga farasi nu bamuyikile ku Yerusalema gamozi na beisi mu mwino wa Davidi. 21 Nu bantu bansania ba baYuda basombwede Azaria, wabezaga na myaka ikumi nu mutuba, bamubikile mukota mu kiziki ky'isi Amazia. 22 Kumbusa kwa lukuo lw'isi, Azaria obakile Elati nu kugusubya ku bwangato bwa baYuda.
Yeroboamu wa babili mukota wa Israeli.
23 Mu mwaka w'ikumi nu itano wa Amazia mwana wa Yoasi, mukota wa baYuda, Yeroboamu mwana wa Yoasi, mukota wa baIsraeli, alingile kwangata mu Samaria. Angatile myaka makumi manazi nu umozi. 24 Akitile bubi lwabusio lwa Yehowa. Akitile mibi insania za Yeroboamu mwana wa Nebati zaagizie na baIsraeli. 25 We asubizie kyindi kya kisi kya baIsraeli gasamba Hamati na Kitatenge kya Araba, anga bwabezaga iyuki lya Yehowa, Kalaga wa Israeli, mu kanua ka mukiti wage Yona mwana wa Amitai, mulengania wa ku Gati-Heferi. 26 Yehowa amonine mbabazio nkali za baIsraeli, bakandwa aba bakandulwa, nu takwabezaga wampa wa kukasia baIsraeli. 27 Yehowa ntatendile buno azimie izina lya baIsraeli mu kisi. Ububo abonezie mu maboko ma Yeroboamu mwana wa Yoasi. 28 Bingo bitondo binsania byakitile Yeroboamu nu magala mage nu lukita lwage lwa kwitana nu bwasubizizie baIsraeli Damasiki nu Hamati, zabezaga za baYuda mu kulinga; ndi bibino tabyasanzilwe mu mikanda za bya wakalazi bya bakota ba Israeli? 29 Yeroboamu akule anga bango bakota ba baIsraeli nu Zekaria mwana wage angatile mu kiziki kyage.