Yoahazi mukota wa Israeli
13
1 Mu mwaka wa makumi mabili nu isatu wa Yoasi mwana wa Ahazia mukota wa baYuda, Yoahazi mwana wa Yehu alingile kwangata baIsraeli mu Samaria. Angatile myaka ikumi nu mutubakamo. 2 Akitile bubi ku meiso ma Yehowa kuyanga mibi za Yeroboamu mwana wa Nebati zaagizie na baIsraeli. Ntazigile kuzilekela. 3 Yehowa ongedwe baIsraeli. Abakasenne mu maboko ma Hazaeli mukota wa baAramu nu mu maboko ma Beni-Hadadi mwana wa Hazaeli bindi byingi nunse. 4 Tondo Yoahazi asegile ku Yehowa, nu Yehowa amungule kubuno amonine ku mbabazio za baIsraeli zibababazizibwe na mukota wa Aramu. 5 Yehowa akasile baIsraeli monia nu abatikizye mu maboko ma baAramu. BaIsraeli beikede mu hema zabo anga bubabezaga lwabusio. 6 Tondo tabasigile mibi za numba za Yeroboamu, wagizie baIsraeli. Bakitilaga nkisi za Ashera zaabezaga eimika mu Samaria. 7 Nu ku iyombo lya mukota, asigede na beiya farasi makumi matano nu tuyanga ikumi, nu babo bendaga na magulu tununu ikumi (10.000), kubuno mukota wa baAramu abazikizye; ababungwide anga mukungu wa kunyanta na magulu. 8 Bingo bitondo binsania byakitile Yoahazi, ndi tabyasanzilwe mu mukanda wa byawakalazi bya bakota ba baIsraeli? 9 Yoahazi akule nu bamuyikile mu Samaria. Nu Yoasi mwana wage angatile mu kiziki kyage. Mukota Yoasi wa baIsraeli
10 Mu mwaka wa makumi masatu nu mutubakamo wa Yoasi mukota wa Yuda, Yoasi mwana wa Yoahazi alingile kwangata baIsraeli mu Samaria. Angatile myaka ikumi nu mutuba. 11 Akitile bubi ku meiso ma Yehowa. Ntasigile mibi za Yeroboamu mwana wa Nebati zaagizie na baIsraeli, tondo endelede muzo. 12 Bingo bitondo binsania byakitile Yoasi nu magala mage ku nkungu ziitenne na Amazia mukota wa Yuda, ndi tabyasanzilwe mu mukanda wa byawakalazi bya bakota ba baIsraeli? 13 Yoasi akule nu Yeroboamu eikede mu kisumbi kyage kya bukota. Yoasi ayikilwe kuko ku Samaria gamozi na bakota ba Israeli.
14 Elisa akatilwe na lusambo nu lwamwitile; nu Yoasi mukota wa baIsraeli agelile kumulola. Amulilide gantata malanga mage bunee: “Tatane, tatane, tuyanga twa Israeli nu bakwendaga ga farasi zage.”
15 Elisa amubwide bunee: “Tola bunkanda nu misungu,” nu azitolile. 16 Abwide mukota wa baIsraeli bunee: “Bika maboko mobe gantata gabo.” Gaabukatile, Elisa abikile kuboko kwage gantata ga kuboko kwa mukota, 17 nu atendile bunee: “Igula idilisa lyalolela kuntata kwa kisi,” nu aligwide. Elisa atendile bunee: “Isa,” nu eisile go. Elisa atendile bunee: “Musungu wa Yehowa guli wa kukinda, guli musungu wa kukinda Aramu kubuno wite baAramu mu Afeki aaba nu wabazikye.” 18 Nu atendile bunee: “Tola misungu,” nu azitolile. Abwide mukota wa baIsraeli bunee: “Libula gansi.” Alibwide bisogo mambizi masatu nu asigile. 19 Wozo muntu wa Kalaga amongedwe, atendile bunee: “Songo walibwide gansi mambizi matano aba mambizi mutuba, songo wazikya baAramu, tondo kano kaluma wakinde baAramu mambizi masatu tugu.” 20 Elisa akule nu bamuyikile. Nu mu kulinga kwa mwaka, bibombo bya baMoabu banyagi balingile kwingila mu kisi. 21 Busi bumozi gayikagwa muntu, bamonine ku kibombo kya baMoabu; ububo beisile wozo muntu mu nsinda za Elisa. Geitubizie kitumba kya muntu ku makwa ma Elisa ayukile nu emenne. 22 Nu Hazaeli mukota wa Aramu asungizie baIsraeli bindi binsania bya Yoahazi. 23 Tondo Yehowa abakwilide kyombo nu abagalukide lingo kubakitila mponga ku kabamba k'idagano lyage na Abrahamu nu Isaka nu Yakobo; ntatundile kubeita, aaba nu kubasiga bulazi nage. 24 Hazaeli mukota wa baAramu akule nu Beni-Hadadi mwana wage angatile mu kiziki kyage. 25 Nu Yoasi mwana wa Yoahazi atikizye miino lingo mu maboko ma Beni-Hadadi mwana wa Hazaeli, zezo zatolile Yoahazi isi mu bita. Yoasi amukindile mambizi masatu nu asubizie miino ku baIsraeli.