Yoasi angata busoga
12
1 Mu mwaka wa mutubakamo wa Yehu, Yoasi alingile kwangata. Angatile myaka makumi manazi kuko ku Yerusalema. Izina lya nina lyabezaga Sibia wa Beri-Seba. 2 Yoasi akitile buli busoga ku meiso ma Yehowa mu bindi byage binsania byamwigisizie Yehoyada sankoga. 3 Tondo biziki byasakama tabyatikizibwe. Bantu bendaga kukasana bisansa nu kukubula bulago ku biziki byasakama. 4 Yoasi abwide basankoga bunee: “Tolazi feza za kodi insania za Yehowa, zilusibwe mu numba za Yehowa, nu kodi za bantu gabakuganzwa, nu feza za mitebe zakaswa mu numba za Yehowa. 5 Basankoga bazitole nu kukasa ku babano beizi kukulumizia biziki byasambukile mu numba za Yehowa.” 6 Tondo kwabede buno mu mwaka wa makumi mabili nu isatu wa mukota Yoasi, basankoga babezaga tabelongeka kampa ku kusambuka kwa numba. 7 Ububo mukota Yoasi amanine Yehoyada sankoga nu bango basankoga nu ababuzizie bunee: “Kubuni tamwalongekile kusambuka kwa numba za kukulumana? Kano kaluma tamukate lingo mitebe za bantu mubenyene, tondo muzikase ku babo bakulongeka kusambuka kwa numba.” 8 Nu basankoga beitabizizie buno tabakate lingo feza za bantu aba bobenyene tabalongeke kusambuka kwa numba.
9 Yehoyada sankoga atolile sanduku. Abotwede itengu mu kyuki kyazo. Azibikile bwigi na kayulo ku ntungo za ku seidume ga mwingilo wa numba za Yehowa. Basankoga balangaga lwibi babikile feza insania zalusibagwa mu numba za Yehowa. 10 Nu gabamonine buno kuseli bikulo byingi mu sanduku, musanzi wa mukota nu sankoga munene bavule nu babiganzile binsania byakasilwe mu numba za Yehowa, nu babibikile mu nsago. 11 Nu gabaganzile bikulo, babibikile mu maboko ma bangati ba babo bobakaga numba za Yehowa; nu bo bazikasile ku bakiti ba milimo za lukita na lukita ku numba za Yehowa, 12 ku bobaki nu ku babazi ba makozi nu kukunza mbavu nu bintu binsania bikwiyaninwa buno bilongeke kusambuka kwa numba za Yehowa. 13 Tondo tabakitile mpepe, aba tulaso twa kukalakasa ntambi , aba bibungulu, aba myonze, aba bingo bya olo, aba feza na bikulo bibyo byatikibagwa ku kabamba ka numba za Yehowa. 14 Nabyo baligile bakiti bakulumizizie numba za Yehowa. 15 Tababuzizie maganzo ma bikulo byakasilwe ku bangati buno balige bakiti ba mulimo kubuno babezaga bakatizia. 16 Bikulo bya tuyulo twa bwagi nu feza za nkaso za bwagi tabyendile ku numba za Yehowa. Byabezaga bya basankoga bobenyene.
17 Kumbusa Hazaeli mukota wa Aramu avule kwitana na Gati nu agukindile. Hazaeli eibikile kayikayika kwenda ku Yerusalema. 18 Yoasi mukota wa Yuda atolile bintu binsania byengezie beisi, u Yosafati nu Yoramu nu Ahazia, bakota ba Yuda, nu bibyo byengezie we wenyene, nu olo insania zamonekile mu masuku ma numba za Yehowa nu mu numba za mukota. Abisingile ku Hazaeli, mukota wa baAramu. Ububo Hazaeli mukota wa Aramu endile kwage kutuka ku Yerusalema.
19 Bingo bitondo binsania byakitile Yoasi, ndi tabyasanzilwe mu mukanda wa byawakalazi bya bakota ba baYuda? 20 Nu bakiti bage bakitile musona nu beitile Yoasi mu numba za Milo zabezaga ku nzila za kugela ku Sila. 21 Nkangala zage, u Yozabadi mwana wa Simeati nu Yehozabadi mwana wa Someri bamwitile. Bantu bamuyikile gamozi na beisi mu mwino wa Davidi, nu Amazia mwana wage angatile mu kiziki kyage.