Atalia eita bana ba bukota bwa baYuda
11
1 Atalia nina wa Ahazia, gaamonine buno mwana wage akua, azanzukile nu eitile ibuta linsania lya bukota. 2 Tondo Yoseba, mukinga wa mukota Yoramu, mubitu wa Ahazia, atolile Yoasi mwana wa Ahazia. Amutikizye munkatini mwa bana ba mukota beitagwa. Amubikile na mulezi wage nu kubabika mu busio bwa kwiyombeka, kubabisa buno Atalia ntabamoneko. Ububo ntakule. 3 Abisilwe myaka mutuba gamozi na mulezi wage mu Numba za Yehowa gabezaga Atalia angata kisi. 4 Mwaka wa mutubakamo, Yehoyada amanine bangati ba nkama ba bakoloboyo nu balangi ba mukota nu ba numba za kukumbamina nu abakundamanizie nage mu numba za Yehowa. Akitile nabo idagano nu kubalumbizia mu numba za Yehowa nu abalolesizie mwana wa mukota. 5 Abakakizizie mu kutenda bunee: “Kitazi kitondo kikino: kibombo kimozi kya bisatu kyeinyu kyumunwe Busi bwa Kumunwa, u Sabato, kyalange numba za mukota; 6 nu kibombo kimozi kya bisatu nu kyalange lwibi lwa Suri; nu kibombo kimozi kya bisatu kyalange lwibi luli bwigi na numba za balangi. U bubo mwalange numba kunania bantu kuteingila muzo. 7 Nu bango beteli ku mulimo busi bwa Sabato, balange numba za kukumbamina bwigi na mukota. 8 Mutimbe mukota ntungo insania, muntu na muntu na ngabo zage mu maboko. Nu unsania wageleka kwingila, nti akue. Mwikale bwigi na mukota kunsania kweli.”
9 Nu bangati ba nkama bakitile anga bwakakizizie Yehoyada sankoga. Batolile nawe na bantu bage babo beingila ku mulimo nu babo batukaga ku mulimo Busi bwa Kumunwa nu bavule kuli sankoga Yehoyada. 10 Nu sankoga akasile bangati ba nkama masumo nu ngabo za mukota Davidi zabezaga mu numba za Yehowa. 11 Balangi bemenne na muntu na muntu na ngabo zage mu maboko kutukila ku lulenge lwa kwikazi aaba nu kubasa ku lulenge lwa kwidume kwa numba bwigi na kayulo nu bwigi na numba. Batimbile mukota ku ntungo insania. 12 Alusizie mwana wa mukota gambuga. Bamubongezie mwambo. Batutile nkasa nu balalukile bunee: “Mukota alame.” 13 Gongule Atalia ku iyuki lya balangi nu lya bantu, eingide mu numba za Yehowa. 14 Alolile nu amonine mukota emana bwigi n'iyango anga bwabezaga bumba bwa kulolesia mukota. Bangati nu batuti ba myonze babezaga bwigi na mukota. Bantu ba kisi babogilebogile nu batutile myonze. Nu Atalia atile nsulu zage, alilile bunee: “Musona, musona.”
15 Nu Yehoyada sankoga akakizizie bangati ba nkama, u basondelezia ba mapuka, bunee: “Mumubasie kumbuga kwa mukolo nu kumwita na mwene gamozi na babo bakumuyanga.” Sankoga atendile buno nteitwe mu numba za Yehowa. 16 Bamukatile gaabasile ku mwingilo wa farasi wa numba za mukota; gago bamwitile.
BaIsraeli basubya ku Kalaga wabo
17 Kumbusa Yehoyada akitile idagano na Yehowa nu mukota nu bantu, buno babe bantu ba Yehowa lingo. Akitile lingo idagano gasamba mukota na bantu. 18 Bantu bansania ba kisi bendile ku numba za Baali. Bazigusizie nu kubungula tusenga nu nkisi zazo. Beitile Matani sankoga wa Baali lwabusio lwa kasenga ka kayulo. Sankoga abikile balangi mu numba za Yehowa. 19 Akakizizie bangati ba nkama nu balangi ba mukota nu balangi ba numba za kukumbamina nu bantu bansania ba kisi kutikya mukota ku numba za Yehowa nu kwenda nage mu nzila za lwibi lwa balangi ku numba za mukota. Ububo Yoasi eikede ga kisumbi kya bakota. 20 Bantu bansania ba kisi babogilebogile nu mwino wikede kibibi, kubuno Atalia eitilwe na mwene mu numba za mukota. 21 Yoasi abezaga na myaka mutubakamo gaalingile kwangata.