Yehu asila kwita bana ba Ahabu
10
1 Ahabu abezaga na bana makumi mutubakamo mu Samaria. Yehu abasanzide mukanda nu kugusinga ku Samaria ku bakulu nu ku balangi ba bana ba Ahabu ba ku Yezereheli. Mwatendile bunee: 2 “Kano kaluma gabase wono mukanda kumuli, kubuno muli gamozi na bana ba mukota weinyu nu tuyanga nu mpunda nu mwino guli na mukolo nu ngabo, 3 sombolazi wozo uli musoga nu mupuka munkatini mwa bana ba mukota weinyu. Mumubike ga kisumbi kya bukota bw'isi nu mwitane ku kabamba ka numba za mukota weinyu.” 4 Tondo babo bakule boba nunse nu batendile bunee: “Bakota babili tabemenne lwabusio lwage, nu iswe twemane buni?” 5 Wozo wabezaga mwangati wa numba nu wozo mwangati wa mwino nu bakulu nu balangi ba bana basingile mugenzi ku Yehu. Batendile bunee: “Iswe tuli bakobe bobe. Kitondo kinsania kyukatubulaga twakikite. Tatwabike muntu wampa kuba mukota. Kita bubo buli busoga kuguli.” 6 Yehu asanzile mukanda w'ibili bunee: “Ndi muli ku lulenge lwane nu mukungwa iyuki lyane, tolazi matoe ma bana ba mukota weinyu nu muvwe namo kundi ku nkungu zeno lubi kuno ku Yezereheli.” Nu bana ba mukota makumi mutubakamo babezaga ku bakulu ba mwino babakuzagia. 7 Gababaside mukanda, batolile babo bana makumi mutubakamo nu babeitile. Beisile matoe mabo mu nzi nu bamasingile ku Yehu ku Yezereheli. 8 Mugenzi wavule ku Yehu kutenda bunee: “Bavwa na matoe ma bana ba mukota.” Atendile bunee: “Mabikazi mu bibombo bibili ga mwingilo wa mwino aaba nu mu nindunindu.”
9 Mu nindunindu, endile kwemana lwabusio lwa bantu bansania, nu abatendile bunee: “Inyuwe muli beisanana. Lolazi, nne nabede na musona ku mukota wane, nu namwitile, tondo nazi witile babano bansania? 10 Menyazi buno takwazimine kitondo kya Yehowa, aba kimozi, kyatendile ku numba za Ahabu. Yehowa azindilizia bwatendile mu kanua ka mukiti wage Elia.” 11 Ububo eitile bansania basigede ba numba za Ahabu mu Yezereheli, bakiti bage bansania, beida bage nu basankoga bage, aba ntasigile umozi na kalamo.
12 Kumbusa endile ku Samaria. Gaabasile ku numba za kusesa myoza za mikoko za balangi, mu nzila, 13 Yehu akulumenne na mibuto za Ahazia mukota wa baYuda, abuzizie bunee: “Muli banazi inyuwe?”
Bamwakwide bunee: “Tuli mibuto za Ahazia, tukwenda kusambizia bana ba mukota nu mukikulu wage.”
14 Atendile bakiti bage bunee: “Bakatazi beikili na kalamo.” Babakatile beikili na kalamo nu babeitile, bantu makumi manazi nu babili. Babeitile ku kyundundu kya kusesa myoza za mikoko nu ntasigile umozi wa kubeli na kalamo. 15 Gaatukile gago, asangile Yehonadabu mwana wa Rekabu, wavwaga wamukulumania. Amusekede nu amubwide bunee: “Ndi mutima wobe ukuntunda anga bukukutunda wane?”
Yehonadabu amwakwide bunee: “Ee, nili gamozi nobe.”
Nu Yehu amwakwide bunee: “Ndi bubo, mpe kuboko kwobe.” Amukasile kuboko nu amubakamizie bwigi nage mu kayanga kage. 16 Yehu amutendile bunee: “Vwa na nne, umone komanizia kane ku Yehowa.” Ububo amwekile mu kayanga kage.
Yehu azikya balengania bansania ba Baali.
17 Gaabasile ku Samaria, eitile bansania basigede ku Ahabu mu Samaria nu kubazikya anga bwabwidwe Elia na Yehowa. 18 Yehu akundamanizie bantu bansania nu ababwide bunee: “Ahabu akitide Baali kakeke, tondo Yehu akumukitila nunse. 19 Kano kaluma manazi balengania bansania ba Baali. Bansania bakumukambila nu basankoga bage bansania. Muntu wampa nteide kubasa, kubuno nkukasana kayulo kanene ku Baali. Unsania wide kubasa gago ntalame.” Tondo Yehu akitile bitondo bibino na menge buno azikye babo bakukumbamina Baali.
20 Yehu ababwide bunee: “Kundamaniazi musanganano munene wa kuganuna Baali.” Ububo bagukundamanizie. 21 Yehu asingile mugenzi mu baIsraeli bansania, nu bobansania bakumbaminaga Baali aba takwasigede muntu wampa utabasile. Beingide mu numba za Baali nu numba insania ziyede. 22 Abwide mulangi wa nsulu bunee: “Basia nsulu ku bakiti bansania ba Baali.” Nu azibasizie kubeli. 23 Yehu nu Yehonadabu mwana wa Rekabu beingide mu numba za Baali nu babwide bakiti ba Baali bunee: “Londazi ndi takuli umozi ukukitila Yehowa, tugu babo bakukumbamina Baali.” 24 Nu beingide buno bakasane tuyulo twa kugisibwa. Yehu abikile bantu makumi kinana kumbuga. Ababwide bunee: “Ndi muntu atinia umozi wa ku babano banabika ku maboko meinyu nti akue mu kiziki kyage.”
25 Gabasilile kukasana kisansa kya kugisibwa, Yehu abwide balangi ba numba nu bangati ba mayombo bunee: “Ingilazi nu beitazi. Takubase aba muntu wampa.” Babeitile na myene za nganda nu beisile bitumba byabo kumbuga. Beingide mu busio bwa kizila bwa numba za Baali. 26 Babasizie nkisi zabezaga mu numba za Baali nu kuzigisia. 27 Babigizie nkisi za Baali nu kugisia numba za Baali nu bazikitile iyala aaba nu lelo. 28 Ububo Yehu azikizye Baali munkatini mwa baIsraeli.
29 Tondo Yehu ntatukile mu nzila mbi za Yeroboamu mwana wa Nebati, wagizie baIsraeli; ntatikizye nkisi za byana bya ngombe bya olo byabezaga ku Beteli nu ku Dani. 30 Yehowa abwide Yehu bunee: “Kubuno wakita busoga lwabusio lwa meiso mane nu kukita numba za Ahabu anga bunatundile, bana bobe beikalage ga kisumbi kya bukota bwa Israeli aaba nu ba kibuti kya binazi.” 31 Tondo Yehu ntalangile kwenda na mutima wage unsania mu milembe za Yehowa, Kalaga wa baIsraeli; ntatukile mu mibi za Yeroboamu zaagizie na baIsraeli.
32 Mu bindi bibyo, Yehowa alingile kukokola ku baIsraeli. Hazaeli abeitile mu myaga zabo insania. 33 Kutukila Yordani nu kubasa ku lulenge lwa kuntata kwa kisi, bakindile kisi kinsania kya Gileadi, u kisi kya baGadi nu kya baRubeni nu kya baManase, kutukila Aroeri guli mu mpinga za Arnoni aaba nu kubasa ku Gileadi nu ku Basani. 34 Bingo bitondo binsania byakitile Yehu nu magala mage ndi tabyasanzilwe mu mukanda wa byawakalazi bya bakota ba Israeli? 35 Nu Yehu akule nu bamuyikile mu Samaria. Yoahazi mwana wage angatile mu kiziki kyage. 36 Yehu angatile baIsraeli mu Samaria myaka makumi mabili nu kinana.