Yehu eita Yoramu nu Ahazia
9
1 Mulengania Elisa amanine mwana umozi wa balengania, amubwide bunee: “Ikande kibunda kyobe, kata kabongelo kakano mu maboko mobe nu wende ku Ramoti-Gileadi. 2 Gawabase ko, londa Yehu mwana wa Yosafati mwana wa Nimusi. Ingila nu mumane munkatini mwa mibuto zage nu enda nage mu busio bwa numba. 3 Tola kako kabongelo ka mwambo, kakubule gantata g'itoe lyage nu mutende bunee: ‘Yehowa u watenda buno nikubongie mwambo buno ube mukota wa baIsraeli.’ Kumbusa igula lwibi nu tina geteli kulindila.” 4 Ububo wozo mulengania endile ku Ramoti-Gileadi. 5 Gaabasile ko, amonine bakota b'iyombo beli gamozi, abwide bunee: “Ee mukota, nili na musagu kuguli.”
Yehu amubuzizie bunee: “Ku nazi munkatini mweitu?”
Amwakwide bunee: “Kuguli, ee mukota.” 6 Emanukile nu beingide mu numba nu akubwide mwambo g'itoe lyage. Amubwide bunee: “Yehowa, Kalaga wa baIsraeli, atenda bunee: ‘Nakubongia mwambo buno ube mukota wa bantu ba Yehowa baIsraeli. 7 Wazikye numba za Ahabu mukota wobe buno nisube musubo wa mikila za balengania bane nu za bakiti bansania ba Yehowa ku kuboko kwa Yezebeli. 8 Kubuno bansania ba Ahabu bazike; nazikye wamulume unsania wa numba za Ahabu, wozo wakandwa nu wozo utakandwa mu Israeli. 9 Nakite numba za Ahabu anga buli numba za Yeroboamu mwana wa Nebati nu anga numba za Basha mwana wa Ahiya. 10 Nu mboa zalie Yezebeli ga mulungu wa Yezereheli aba takwabe muntu kumuyika.’” Nu eigwide lwibi nu atinine.
11 Nu gasubizie Yehu ku bakiti ba mukota wage, umozi wa kubeli amubuzizie bunee: “Buli bubobelelo? Wozo musile avule kuguli ku kabamba kakizi?”
Ababwide bunee: “Inyuwe mwizi muntu wono nu musagu wage.”
12 Batendile bunee: “Buza, tubule tugu.”
Yehu abakwide bunee: “Atendile bubo nu bubo, buno Yehowa atenda buno nakubongia mwambo buno ube mukota wa baIsraeli.”
13 Basasizie kutikya muntu na muntu nsulu zage nu bazibikile gansi gantata ga kyindo nu batutile myonze, nu balalukile bunee: “Yehu eli mukota!”
14 Ububo Yehu mwana wa Yosafati, u mwana wa Nimusi, abede na musona ku Yoramu. (Yoramu abezaga akulanga Ramoti-Gileadi, gamozi na baIsraeli bansania ku kabamba ka Hazaeli, mukota wa baAramu. 15 Tondo mukota Yoramu asubizie buno onibwe byulu byasumitilwe na baAramu geitenne na Hazaeli mukota wa baAramu). Yehu atendile bunee: “Ndi mamo meli makengelo meinyu, tamusige muntu umozi kutuka mu mwino buno ende na musagu wono ku Yezereheli.” 16 Yehu abakamine mu kayanga kage nu endile ku Yezereheli kubuno Yoramu abezaga musambi kuko nu Ahazia mukota wa baYuda endile kumulola.
17 Mulangi wabezaga gantata ga kitutu kya Yezereheli amonine ku kibombo kya Yehu kikuvwa, nu atendile bunee: “Namona ku kibombo kya bantu kikuvwa.”
Yoramu akakizizie bunee: “Singa muntu umozi wa farasi kubakulumania nu ababuzie bunee: ‘Ndi mwavwa mu bubobelelo?’”
18 Mwiya farasi umozi akulumenne nabo, nu ababuzizie bunee: “Bubuno u bwatenda mukota: ‘Ndi buli bubobelelo?’”
Yehu amwakwide bunee: “Bubobelelo buli buni kuguli? Galuka unyange.”
Wozo mulangi wabezaga gantata ga kitutu abasambalide musagu bunee: “Wozo mugenzi ababaside, tondo ntasubya lingo.”
19 Ububo mukota asingile mwiya farasi wa babili nu ababaside. Abatendile bunee: “Mukota atenda bunee: ‘Buli bubobelelo?’”
Yehu amwakwide bunee: “Bubobelelo buli buni kuguli? Galuka unyange.”
20 Wozo mulangi asambede musagu bunee: “Ababasila tondo ntasubya lingo. Nu mwendezi wage guli anga wa Yehu, mwana wa Nimusi, kubuno akwenzia kayanga lubilo nunse.”
21 Yoramu atendile bunee: “Bika kayanga kayikayika.” Nu bakitile. Yoramu mukota wa baIsraeli nu Ahazia mukota wa Yuda bendile mu tuyanga twabo kukulumana na Yehu. Bamusangile mu isoa lya Naboti muYezereheli. 22 Gamonine Yoramu ku Yehu, amubuzizie bunee: “Yehu, buli bubobelelo?”
Amwakwide bunee: “Bubobelelo bukizi? Ndi butazi bwa nyoko Yezebeli nu buganga bwage tabuli bwingi?” 23 Yoramu agalukizye kayanga kage kutina, atendile kuli Ahazia bunee: “Ee Ahazia, kuli bwengelezi!” 24 Yehu akatile bunkanda na magala mansania. Asumitile Yoramu gasamba bituli nu musungu wabasenne ku mutima. Agwede mu kayanga kage. 25 Yehu abwide Bidikari mukiti wage bunee: “Mutole nu kumwisa mu isoa lya Naboti muYezereheli kubuno ndi ukubukengela lingo, gatwayangaga isi Ahabu, Yehowa alenganizie kitondo kikino kweli. 26 Yehowa akubula bunee: ‘Namonine walubi mikila za Naboti nu za bana bage, nakusube mu isoa lilino.’ Kano kaluma mutole umwise mu isoa lilino anga bwatendile Yehowa.”
27 Tondo gamonine Ahazia mukota wa baYuda ku bitondo bibino, atinine ku nzila za numba z'isoa. Yehu amuyangile. Atendile bakiti bage bunee: “Sumitazi wono ungo mu kayanga kage.” Bamusumitile mu kubakama ku Guri bwigi na Ibuleamu. Atinine ku Megido nu akule kuko. 28 Nu bakiti bage bamwekile ku Yerusalema mu kayanga kage. Bamuyikile mu nsinda zage gamozi na beisi mu mwino wa Davidi.
29 Mu mwaka w'ikumi nu umozi wa Yoramu mwana wa Ahabu, Ahazia alingile kwangata baYuda.
Yezebeli akatile lukalilo lwage
30 Gabasile Yehu ku Yezereheli, Yezebeli ungule ku musagu. Atilile idangi ku meiso mage, alebezie itoe nu alolile g'idilisa. 31 Geingide Yehu ga mwingilo wa mwino, wozo mukikulu abuzizie bunee: “Ndi buli bubobelelo, ee Simuri, mwiti wa mukota wobe.”
32 Yehu alolile ku idilisa nu abuzizie bunee: “Nazi uli ku lulenge lwane? Nazi?” Mintembele ibili aba isatu balolaga gamozi na Yezebeli. 33 Abatendile bunee: “Mwisazi gansi.” Bamwisile gansi nu mikila zabalangenne ku kitutu nu ku farasi gazamunyantilenyantile. 34 Kumbusa Yehu eingide mu numba, alide nu anune. Kusila atendile bunee: “Kano kaluma endazi mulole mukikulu wono waswililwa nu mumuyike mu nsinda kubuno eli mukinga wa mukota.” 35 Bendile buno bamuyike mu nsinda tondo tabamonine kena tugu lukungu lwage nu masindi mage nu makasa mage. 36 Basubizie nu basambalide Yehu musagu. Atendile bunee: “Bubo u bwatendile Yehowa ku kanua ka mukiti wage Elia muTisibe buno mboa zalie misuna za Yezebeli mu isoa lya Yezereheli. 37 Kitumba kya Yezebeli kyabe anga tubi gantata ga bilongo bya masoa mu masoa ma Yezereheli buno tabavwame kutenda bunee: ‘Wono u Yezebeli.’”