Mukota asubya bikulo bya muSunemu
8
1 Elisa atendile na wozo mukikulu waayukizagia mwana wage bunee: “Zanzuka wende na kikanga kyobe wikale mu kiziki kyunavwama kwikala, kubuno Yehowa amana nzala zibe mu kisi kikino ku myaka mutubakamo.” 2 Wozo mukikulu endile anga bwatendile muntu wa Kalaga. Endile na kikanga kyage. Eikede ku kisi kya baFilistini myaka mutubakamo. 3 Gasilile myaka mutubakamo, wozo mukikulu asubizie kutuka ku kisi kya baFilistini. Avule kulila ku mukota ku kabamba ka numba zage nu isoa lyage.
4 Nu mukota abezaga akusambala na Gehazi, mukiti wa muntu wa Kalaga. Amubuzizie bunee: “Mbule bitondo binene binsania byakitile Elisa.” 5 Gaasambalilaga mukota lukita lwayukizie Elisa muntu wakua, wozo mukikulu wayukizizie Elisa mwana wage avule kulilila mukota ku kabamba ka numba zage nu isoa lyage. Gehazi atendile bunee: “Mukota wane, wono u wozo mukikulu nu wono u mwana wage wayukizie Elisa.” 6 Nu gabuzizie mukota wozo mukikulu kitondo kikyo, amusambalide bunsania. Mukota asombwede musondelezia nu amubwide bunee: “Musubizie binsania byabezaga nabyo nu matubulo mansania m'isoa lyage kutukila busi bwendile aaba nu lelo.”
Mukota wa baAramu akua
7 Kumbusa Elisa endile ku Damasiki nu Beni-Hadadi mukota wa baAramu abezaga na lusambo. Bamusambalide buno muntu wa Kalaga abasa gano. 8 Mukota abwide Hazaeli bunee: “Eka lukaso mu maboko mobe. Buzia Yehowa mweli kutenda bunee: ‘Ndi none na lusambo luluno?’”
9 Hazaeli endile kukulumana nage. Ekile lukaso lwa kintu na kintu kili kisoga mu Damasiki, mizigo za ngamia makumi manazi. Eingide kuli Elisa nu emenne lwabusio lwage nu atendile bunee: “Mwana wobe Beni-Hadadi mukota wa baAramu ansinga kuguli kutenda bunee: ‘Ndi none na lusambo luluno?’”
10 Elisa amwakwide bunee: “Enda umubule buno one, tondo Yehowa andolesia buno akue.” 11 Nu muntu wa Kalaga alolile Hazaeli nu amukakamizie meiso aaba nu Hazaeli akule na nsoni. Kumbusa Elisa alingile kulila.
12 Hazaeli amubuzizie bunee: “Kikizi kyukulilila, mukota wane?” Amwakwide bunee: “Kubuno nizi mibi ziwakite ku baIsraeli. Wagisie miino zabo nsoga, nu wite mitoka zabo na mwene wa nganda, nu wanyante bana babo bakeke nu wabasie meimi ma bakikulu babo.”
13 Hazaeli amubuzizie bunee: “Ndi mukiti wobe eli mboa buno ninakita kitondo kikino kinene?”
Elisa amwakwide bunee: “Yehowa andolesia buno wabe mukota wa baAramu.”
14 Hazaeli asigile Elisa nu asubizie ku mukota wage. Amubuzizie bunee: “Elisa abwide buni?”
Amwakwide bunee: “Ambwide buno lebelebe wone.” 15 Tondo mu kukya kwa busi, Hazaeli anunizie nsulu za ga mugu mu mazi; azikandile ku kilungi kyage nu akule. Nu Hazaeli angatile mu kiziki kyage.
Mukota Yoramu angata.
16 Mu mwaka w'itano wa Yoramu, mwana wa Ahabu mukota wa baIsraeli, Yehoramu mwana wa Yosafati mukota wa Yuda alingile kwangata. 17 Abezaga na myaka makumi masatu nu ibili gaalingile kwangata. Angatile myaka kinana mu Yerusalema. 18 Endile mu nzila za bakota ba Israeli anga bwakitile numba za Ahabu kubuno asongile mukinga wa Ahabu. Akitile mibi ku meiso ma Yehowa. 19 Tondo Yehowa ntatundile kuzikya baYuda ku kabamba ka Davidi, mukiti wage, anga bwamulagile kumukasa lukenikeni, we nu ibuta lyage bindi binsania. 20 Mu bindi byage, Edomu abengile bwangato bwa baYuda nu eibikide wage mukota. 21 Yoramu endile ku Zairi na tuyanga twage tunsania. Endile mu kindi. Eitile baEdomu babezaga bamutimba, tondo babo b'iyombo lyage batinine ku hema zabo. 22 Nu baEdomu bagunine bwangato bwa baYuda aaba nu lelo. Nu baLibuna bagunine nubo ku nkungu zezo.
23 Nu bingo bitondo byakitile Yoramu, ndi tabyasanzilwe mu mukanda wa byawakalazi bya bakota ba baYuda? 24 Yoramu akule nu ayikilwe gamozi na beisi mu mwino wa Davidi; nu Ahazia, mwana wage, angatile mu kiziki kyage.
Mukota Ahazia
25 Mu mwaka w'ikumi nu ibili wa Yoramu, mwana wa Ahabu mukota wa baIsraeli, Ahazia mwana wa Yoramu mukota wa baYuda alingile kwangata. 26 Ahazia abezaga na myaka makumi mabili nu ibili gaalingile kwangata. Angatile mwaka umozi mu Yerusalema. Izina lya nina lyabezaga Atalia, mukinga wa Omuri, mukota wa baIsraeli. 27 Endile mu nzila za numba za Ahabu. Akitile mibi lwabusio lwa Yehowa anga bwakitile kikanga kya Ahabu, kubuno abezaga mukozi wa Ahabu. 28 Endile gamozi na Yoramu mwana wa Ahabu ku Ramoti-Gileadi kwitana na Hazaeli mukota wa baAramu. BaAramu basumitile Yoramu. 29 Mukota Yoramu asubizie ku Yezereheli buno onibwe byulu byamusumitile baAramu ku Rama gabeitenne na Hazaeli mukota wa baAramu. Nu Ahazia mwana wa Yehoramu mukota wa baYuda endile ku Yezereheli kulola Yoramu mwana wa Ahabu kubuno abezaga musambi.