Elisa akulengania kuzinda kwa nzala
7
1 Elisa amubwide bunee: “Ungwililazi bukutenda Yehowa. Bubuno u bwatenda Yehowa: Lubi, bwigi ku nkungu zeno, ku isula lya Samaria, luzi lumozi lwa bunga bwa ngano busoga lwakunzwe ku kyindi kimozi kya feza nu nzi ibili za shayiri ku kyindi kimozi kya feza.” 2 Wozo mukota wa bakoloboyo wabezaga wegamizia mukota ku kuboko kwage akwide wozo muntu wa Kalaga bunee: “Ndi Yehowa anakandwide madilisa mwigulu nti kitondo kikino kinakulungenne?”
Elisa amwakwide bunee: “Uwe walimoneko na meiso mobe, tondo ntwalie kulyo.” 3 Kwabezaga beiya bibali banazi beikalaga ku isula lya mwino. Batendenne bunee: “Kubuni kutwikala gano aaba nu gatwakue? 4 Ndi twingila mu mwino, nzala zili ko nti twakua, nu ndi twikala gano nti twakue kankanka. Twendazi ku iyombo lya baAramu, ndi batusiga na kalamo nti twalame; ndi batwita nti twakue umpanga.”
5 Geidile busi, bendile ku ido lya baAramu. Gababasile ku isula ly'ido lya baAramu, lola, takwabezaga muntu. 6 Mukota ongwilisizie baAramu nkindo za tuyanga nu farasi nu z'iyombo inene. Batendenne bwabo bwabo bunee: “Mukota wa baIsraeli asegile bakota ba baHiti nu baMisri buno bavwe kwitana n'iswe.” 7 Ububo batinine mu musulosulo. Basigile hema zabo nu farasi nu mpunda zabo nu ido lyabo nu batinine buno bonie tulamo twabo.
8 Beiya bibali babasile ku ido. Beingide mu hema emozi. Balide nu banune; bekile feza nu olo nu nsulu, nu bendile kubibisa. Basubizie nu beingide mu hema z'ibili; batikizye bintu gago nu bendile kubibisa. 9 Kumbusa batendenne bunee: “Tatukukita busoga. Lelo buli busi bwa musagu musoga nu iswe twikala kibibi. Ndi tukulindila nindunindu, nti tunasungibwa. Tusambalile bantu ba numba za mukota.”
10 Ububo bendile nu bamanine balangi ba mwino bunee: “Twabasile ku ido lya baAramu. Twasanga takuli muntu wampa kuko aba iyuki lya muntu, tugu farasi nu mpunda zaswikwa nu hema zabo zili anga bubazisigile.” 11 Balangi balalukile nu basambede wozo musagu ku bantu ba numba za mukota.
12 Mukota ayukile mu kindi, abwide bakiti bage bunee: “Kano kaluma nkumulolesia bwatukitila baAramu. Beizi buno tuli na nzala, ububo batuka ku ido nu kwibisa ku lubanda. Batendile bunee: ‘Gabatuke mu mwino, twabakate beikili na kalamo. Kumbusa twavwame kwingila mu mwino.’”
13 Nu umozi wa bakiti bage amwakwide bunee: “Nkukubuzia buno singa bantu bamozi gantata ga farasi itano za zeno zasigala mu mwino kubuno ziseli anga musanganano munene wa baIsraeli bazikile bulazi nu tusinge kulola kyatinga.”
14 Batolile tuyanga tubili nu farasi zato; nu mukota abasingile kuyanga iyombo lya baAramu nu abwide benzia bazo bunee: “Endazi mulole.” 15 Babayangile aaba nu kubasa ku Yordani. Nu mu nzila insania, bamonine nsulu ningi nu bintu byingi byasigile baAramu gabatinaga. Bantu basingagwa basubizie nu basambalide mukota. 16 Bantu bendile kutukula ido lya baAramu. Nu kwabede luzi lumozi lwa bunga bwa ngano busoga, lwakunzilwe ku kyindi kimozi kya feza nu nzi ibili za shayiri kyindi kimozi kya bikulo anga bwatendile Yehowa.
17 Nu mukota abikile wozo wabezaga egamizia ku kuboko kwage kulanga mwingilo wa mwino nu bantu bamunyantile gago. Akule anga bwamutendile muntu wa Kalaga gendile mukota ku Elisa. 18 Nu bwabede anga bubo bwabulaga muntu wa Kalaga ku mukota bunee: “Kwabe nzi ibili za shayiri ku kyindi kya feza nu luzi lwa bunga bwa ngano busoga ku kyindi kimozi kya bikulo, u bwabe lubi bwigi ku nkungu zeno ku mwingilo wa Samaria.” 19 Nu wozo mukiti akwide muntu wa Kalaga bunee: “Lola ndi Yehowa akandula madilisa, kitondo kikino kinaba buni?” Nu Elisa amwakwide bunee: “Uwe walimone ko tondo ntwalie.” 20 U bwabede, kubuno bantu bamunyantile nu akule.