Isaga lyaziminne nu lyamoneka
6
1 Kumbusa kibombo kya beigisibwa balengania kyabwide Elisa bunee: “Lola kiziki kituli mukyo kili kikeke kutuli. 2 Twendazi ku Yordani buno muntu na muntu atole muti umozi buno gago twikitile kiziki kya kwikala mukyo.” Ababwide bunee: “Endazi.” 3 Umozi wa kubeli amubwide bunee: “Enda gamozi n'iswe,” nu akwide bunee: “Nkwenda.” 4 Ububo endile gamozi nabo.
Gababasile ku Yordani basindile miti. 5 Tondo umozi wa kubeli gaasindaga iyango, isaga lyakolokile mu luuzi. Alilile bunee: “Ee mukota wane, kabebe kundi, kubuno lyabezaga lya kwamba.”
6 Muntu wa Kalaga amubuzizie bunee: “Lyakoloka kuni?” Amulolesizie kiziki kyongo, nu Elisa asesile kati nu kukisa gago nu isaga lyavule lyatamba gantata mazi. 7 Amubwide bunee: “Lisongye.” Alambizie kuboko kwage nu alitolile.
Masego ma Elisa
8 Mukota wa baAramu akitile bita na baIsraeli. Akitile lwango na bakiti bage bunee: “Ido lyane lyabe ku kiziki kisiembe.” 9 Wozo muntu wa Kalaga ekile musagu ku mukota wa baIsraeli, amutondile bunee: “Ntutinge kiziki kisiembe kubuno baAramu bagela ko.” 10 Mukota wa baIsraeli asingile bantu kusona kikyo kiziki kyabwidwe na wozo muntu wa Kalaga. Eiyonezie, ta limbizi limozi aba ta mambizi mabili.
11 Mukota wa baAramu ongilwe nunse ku kabamba ka kitondo kikino. Amanine bakiti bage, ababuzizie bunee: “Ndi tamunandolesia nazi uli ku lulenge lwa mukota wa baIsraeli?”
12 Umozi wa bakiti bage amwakwide bunee: “Kilo, mukota wane, Elisa mulengania wa baIsraeli u gukusambalila mukota wa baIsraeli bitondo byukutenda mu busio bwobe bwa kwiyombeka.”
13 Ababwide bunee: “Endazi mulole kiziki kyeli kukyo buno nivwame kusinga bantu kumutola.” Bavule kumutenda bunee: “Eli ku Dotani.” 14 Ububo asingile iyombo inene nu ibibu na farasi nu tuyanga. Babasile mu kindi nu batimbile mwino wozo ndenge insania.
15 Mu nindunindu gayukile mukiti wa Elisa endile kumbuga. Kasi iyombo lya bantu na farasi nu tuyanga byatimba mwino. Mukiti wage amubwide bunee: “Kabebe kutuli, mukota wane, tukite buni?”
16 Mulengania amwakwide bunee: “Ntukue boba kubuno babo beli gamozi n'iswe beli beingi kutinga babo beli gamozi nabo.” 17 Nu Elisa asegile bunee: “Ee Yehowa, nkukusega, limbula meiso mage avwame kumona.” Kazanga kongo Yehowa azibwide meiso ma mukiti nu amonine mwiduko wiyala na farasi nu tuyanga twa keiya byatimba Elisa ku ndenge insania.
18 Gamugelede beiti bage, Elisa asegile Yehowa bunee: “Ziba meiso ma bantu babano babe byuku.” Amazibile nu babede byuku anga bwasegile Elisa. 19 Elisa ababwide bunee: “Zeno ta nzila. Nu wozo ta mwino. Munyange, namusondelezie ku muntu wozo u mukulonda.” Abasondelezizie aaba nu ku Samaria. 20 Gabeingide mu Samaria, Elisa asegile bunee: “Yehowa, zibula meiso mabo.” Yehowa azibwide meiso mabo nu bamonine kasi beseli munkatini mwa Samaria. 21 Gaabamonineko, mukota wa baIsraeli abuzizie bunee: “Ee tatane, ndi nibalibule?”
22 Amwakwide bunee: “Ntubalibule. Ndi ukwita bantu babo bawakindile na mwene wa nganda wobe nu wa bunkanda bwobe? Bakase mazi nu idia buno balie nu banue nu kumbusa bende ku mukota wabo.” 23 Abalongekede idia lingi nu gabasilile kulia nu kunua, abasigile kwenda ku mukota wabo. Nu bibombo bya baAramu tabyavule lingo mu kisi kya baIsraeli.
Nzala mu Samaria
24 Kumbusa kwa bitondo bibino, Beni-Hadadi mukota wa baAramu akundamanizie mayombo mage mansania. Avule kutimba Samaria na bita. 25 Nzala zabezaga nnene kuko ku Samaria, bagutimbile ku bita bindi byingi buno itoe lya mpunda lyakunzilwe ku byindi makumi kinana bya feza nu kituma kya tubi twa nkulimba ku byindi bitano bya feza.
26 Nu gatingile mukota wa baIsraeli gantata ga kitutu, mukikulu umozi amulalukide bunee: “Mukota wane, ee mukota, nnonie!”
27 Mukota amwakwide bunee: “Ndi Yehowa ntakwonia, buni buninakwonia? Na ngano ga mulungu aba na maku m'ituba mu kansango?” 28 Mukota amubuzizie bunee: “Uli na kikizi?”
Amwakwide bunee: “Mukikulu wono antendile bunee: ‘Lisia mwana wobe tumulie lelo, nu twalie mwana wane lubi.’ 29 Twayikile mwana wane nu twamulile. Namubwide busi bw'ibili bunee: ‘Tola mwana wobe, tumulie,’ tondo abisile mwana wage.”
30 Gongule mukota ku bitondo bya mukikulu wono, atile nsulu zage. Abezaga akutinga gantata ga kitutu nu bantu bamonine buno abezaga na makunino ku mubili wage. 31 Atendile bunee: “Nkulumbilila mu Kalaga, itoe lya Elisa, mwana wa Safati, talyasigale kweli lelo.”
32 Elisa abezaga eikala kwage ku numba nu bakulu beikalaga gamozi nage. Mukota asingile mugenzi lwabusio lwage. Tondo lwabusio ntebasa, Elisa abwide bakulu bunee: “Mwamone mwiti wozo wasinga muntu kusesa itoe lyane. Lolazi, wozo wasingilwe ndi abasa, igalazi lwibi, mumunanie kwingila. Ndi magulu ma mukota wage tameli kumbusa kwage?” 33 Mu kutenda kwage, wozo wasingilwe abasile kweli; atendile bunee: “Mibi zeno zatuka ku Yehowa. Kubuni kuninalindila Yehowa lingo?”