Namani mwiya bibali onibwa
5
1 Namani, mukota w'iyombo lya mukota wa Aramu, abezaga muntu munene lwabusio lwa mukota wage nu mwiya lwanzo kubuno ku kuboko kwage, Yehowa akasile bukindi ku baAramu. Abezaga ipuka lya bita, tondo abezaga na bibali. 2 BaAramu bamozi bendile kunyaga ku kisi kya Israeli; bekile mukinga mukeke umozi ku bukobe nu akasilwe ku mukazi wa Namani kumukitila. 3 Mukinga abwide mukota wage bunee: “Songo mukota abasa ku wozo mulengania uli mu Samaria, songo amonie bibali byage.” 4 Nu Namani eingide kubula mukota wage bunee: “Bubuno nu bubuno u bwantenda wozo mukinga mukeke watukile ku kisi kya baIsraeli.”
5 Mukota wa Aramu amwakwide bunee: “Enda, nkusingila mukota wa Israeli mukanda.” Ububo ekile byindi ikumi bya feza nu byindi bya olo tununu mutuba, nu nsulu ikumi. 6 Ekede mukota wa baIsraeli mukanda wozo wasanzwa bunee: “Kano kaluma gabase wono mukanda kuguli, wamenye buno nakusingila Namani, mukiti wane, buno umonie bibali byage.”
7 Gaasilile kusoma mukanda, mukota wa Israeli atile nsulu zage. Atendile bunee: “Ndi nili Kalaga buno nite nu kulamia lingo, bwansingila wono muntu buno nimwonie bibali byage? Menyazi nu songololazi buno akutunda kusaka na nne.” 8 Gongule Elisa buno mukota wa Israeli atile nsulu zage, asingile muntu ku mukota. Atendile bunee: “Kubuni watile nsulu zobe? Avwe kundi nu amenye buno kuli mulengania mu Israeli.”
9 Namani avule na farasi nu kayanga kage. Emenne ku lwibi lwa numba za Elisa. 10 Nu Elisa amusingide mugenzi kumubula bunee: “Enda itutike ku Yordani mambizi mutubakamo, nu mubili wobe wasubye lingo musoga nu wenge nunse.”
11 Tondo Namani ongilwe nunse nu endile, atendile bunee: “Lola, nakengede anabasa kundi nu kwemana nu kusega ku izina lya Yehowa, Kalaga wage, nu kubika maboko mage ku lusambo nu kunonia bibali. 12 Ndi Abana nu Farpari u nuuzi za ku Damasiki tazili nsoga kutinga mazi mansania ma baIsraeli? Ndi nsineitutika muzo nu kwenga?” Agalukile nu endile na bongoa.
13 Nu bakiti bage bamukundile, nu bamubuzizie bunee: “Tateiswe, songo mulengania akukakizizie kukita iganogano, ndi ntunalikitile? Embe kano kaluma gaakubula buno witutike nu wenge?”
14 Ububo agelile nu eitutikile mambizi mutubakamo mu Yordani anga bwatendile wozo muntu wa Kalaga. Mubili wage wasubizie anga mubili wa mwana muto nu onine. 15 Asubizie na bansania babezaga nabo kuli wozo muntu wa Kalaga. Emenne lwabusio lwage nu atendile bunee: “Kano kaluma namenya buno takuli Kalaga mu kisi kinsania tugu mu Israeli. Nkukusega buno ukate lukaso lwa mukiti wobe.”
16 Tondo mulengania amwakwide bunee: “Lebelebe, anga bukulamaga Yehowa u nkukambila, nsyakate kena.” Nu Namani amusindikile kulukata tondo asombile. 17 Namani atendile bunee: “Ndi ta bubo, nti wankasa buzitu bwa bilongo bwakuka kweka nyumbu ibili kubuno kutukila lelo, nsyakase lingo kisansa kya kugisibwa aba kayulo ku tungo tulaga tugu ku Yehowa. 18 Tondo Yehowa ansigilile kungwa mukota wane eingila mu numba za Rimoni kukumbamina, nu kwegamina ku kuboko kwane, nti nakumbamina mu numba za Rimoni; Yehowa asigilile mukiti wage kungwa nakumbamina Rimoni mu numba zage!”
19 Nu Elisa amubwide bunee: “Enda na bubobelelo.”
Nu geendile kakeke, 20 Gehazi, mukiti wa Elisa muntu wa Kalaga, akengede bunee: “Mukota wane asiga wono Namani muAramu buno ntakate kena kweli ku bibyo byavule nabyo. Anga bukulama Yehowa, nkumuyanga lubilo nikate bimozi kweli.” 21 Ububo Gehazi ayangile Namani.
Gamonine Namani ku muntu akuvwa lubilo kumbusa kwage, atukile mu kayanga kage nu kukulumana nage. Amubuzizie bunee: “Kuli bubobelelo?”
22 Amwakwide bunee: “Bubobelelo. Mukota wane ansinga kutenda bunee: ‘Kano kaluma kwambasila balengania babili kutuka ku mwiduko wa Efuraimu. Nkukusega buno bakase talanta za feza nu nsulu ibili.’”
23 Namani atendile bunee: “Tola talanta ibili.” Itide kumutenda nu akandile talanta ibili za feza mu nsago ibili nu nsulu ibili. Azekizie bakiti bage babili; nu baziekile lwabusio lwa Gehazi. 24 Gaabasile ga mwiduko, Gehazi abitolile ku maboko mabo nu abibikile mu numba. Asigile babo bantu kwiyendela nu beiyendide. 25 Tondo eingide nu kwemana lwabusio lwa mukota wage. Elisa amubuzizie bunee: “Gehazi, ukutuka kuni?”
Amwakwide bunee: “Mukiti wobe ntendile kungo.”
26 Amubwide bunee: “Ndi mutima wane tawendile gamozi nobe gakebetukile wozo muntu mu kayanga kage buno akusambizie? Ndi zeno zili nkungu za kukata feza nu nsulu, nu masoa ma biguma, nu mizigi za biguma, nu mikoko, nu ngombe, nu bakiti nu bakobe? 27 Bibali bya Namani bikukukata nu ku kibuti kyobe aaba ku milyalya.” Nu atukile lwabusio lwa Elisa na bibali byenga anga lubula.