Elisa nu mukikulu musigala
4
1 Mukikulu umozi wa bakikulu ba balengania alilide Elisa bunee: “Mukiti wobe, iba wane akua, nu wizi akuaga Yehowa boba. Nu kano kaluma mwiya nsombi avwa kutola bana bane babili kuba bakobe.” 2 Elisa amubuzizie bunee: “Nikukitile buni? Ntende uli na kikizi mu numba?” Amwakwide bunee: “Mukiti wobe nteli na kena mu numba, tugu mbusu za makiti.” 3 Elisa amwakwide bunee: “Enda kwambya mbusu ziteli na kena ku banyobe bansania, ntusege nkeke. 4 Kumbusa ingila mu numba na bana bobe; igala lwibi, ongola makiti mu mbusu insania; bika zezo ziyala mu kiziki kimozi.”
5 Ububo amusigile, eiyigalile lwibi, bana bage bamuvwilide na zezo mbusu nu azizazizie. 6 Gazizalile, abwide mwana wage bunee: “Mvwile n'ingo.”
Amwakwide bunee: “Takuli ingo.” Nu makiti masilile. 7 Endile kusambalila wozo muntu wa Kalaga, amutendile bunee: “Enda kukunzia makiti nu kuliga nsombi zobe, nu mamo masigale meli mobe nu ma bana bobe.”
Elisa ayukya mwana wa mukikulu wa muSunemu.
8 Busi bumozi Elisa endile ku Sunemu. Kwabezaga mukikulu umozi wa lukumu lusoga wamulagizie kuliaga kwage gaatingaga mu nzila zezo; eingilaga kuko kulia. 9 Mukikulu abwide iba wage bunee: “Namona buno muntu wozo ukutingaga kutuli limbizi na limbizi eli muntu wasililila wa Kalaga. 10 Nkukusega buno tumobakile busio bukeke bwa kuntata, nu kumubikila mugu nu meza nu kisumbi nu kasuku buno kungwa avwa kutuli nti eikale mo.”
11 Busi bumozi abasile kuko, eingide mu busio bwa kuntata kwiyombeka. 12 Abwide Gehazi mukiti wage bunee: “Mana wozo muSunemu.” Amumanine nu emenne lwabusio lwage. 13 Abwide Gehazi bunee: “Tenda nage bunee: ‘Watulangile busoga nunsania; ukitilwe buni? Ndi ukutunda kitondo kitendwe lwabusio lwa mukota aba ku Yehowa, Mwiya Mayombo?’”
Wozo mukikulu amwakwide bunee: “Nkwikalaga munkatini mwa bantu bane.”
14 Elisa abuzizie bunee: “Akitilwe buni?”
Gehazi akwide bunee: “Lebelebe nteli na mwana nu iba wage ese mukungu.”
15 Amubwide bunee: “Mumane.” Nu avule, nu emenne ga lwibi.
16 Elisa amubwide bunee: “Mu bindi anga bibino, mu mwaka gukuvwa, walele mwana.”
Tondo mukikulu amwakwide bunee: “Ta bubo, mukota wane, muntu wa Kalaga, ntunabula mukiti wobe buza.”
17 Wozo mukikulu ekile iyimi nkungu zezo, nu kusila kwa mwaka abutile mwana wamulume anga bwamubwide Elisa. 18 Mwana akulile, nu busi bumozi endile kusanga isi wabezaga na batubuzi mu isoa. 19 Abwide isi bunee: “Itoe lyane, itoe lyane.”
Nu isi abwide mukiti umozi bunee: “Mweke ku nina.” 20 Amwekile ku nina; nu mwana eikede ku mazu mage aaba ku makuluka nu kumbusa akule. 21 Nu we abakamine, amwiyombekezie ga mugu wa muntu wa Kalaga, eigede lwibi nu agelile lingo. 22 Amanine iba wage nu atendile kweli bunee: “Nsingile mukiti umozi nu mpunda emozi buno nisasie kwenda ku wozo muntu wa Kalaga nu kusubya lingo.”
23 Amubuzizie bunee: “Kubuni ukwenda ku wozo muntu wa Kalaga lelo? Takuli mwezi muto aba busi bwa sabato!”
Amwakwide bunee: “Kwabe busoga.” 24 Anzile mpunda kayikayika, abwide mukiti wage bunee: “Sindika mpunda twende lubilo. Ntukokole lugendo ku kabamba kane aaba nu nakutenda.” 25 Bendile nu babasile ku wozo muntu wa Kalaga ku mwiduko wa Karmeli.
Gamonine muntu wa Kalaga kweli eikili bulazi, abwide Gehazi mukiti wage bunee: “Lola muSunemu. 26 Enda lubilo kukulumana nage, umubule bunee: ‘Ndi busoga kuguli? Ndi busoga ku iba wobe? Ndi busoga ku mwana wobe?’”
Mukikulu amwakwide bunee: “Busoga bunsania.”
27 Gaabasile ku wozo muntu wa Kalaga, gantata ga mwiduko, amukatile ku magulu. Gehazi agelekile kumutikya, tondo muntu wa Kalaga amwakwide bunee: “Musige, kubuno mutima wage guli na kabebe, nu Yehowa ambisile kitondo kikino nu ntandolesizie kyo.”
28 Wozo mukikulu atendile bunee: “Mukota wane, ndi nasegile mwana? Ndi nne nsyatendile buno ntunengelele?”
29 Elisa abwide Gehazi bunee: “Vwala nsulu zobe nu wende. Eka kati kane mu kuboko kwobe; ndi wakulumana na muntu, ntumusambizie nu ndi muntu akusambizia, ntumwakule, nu bika kati kane ku kilungi kya mwana.”
30 Nina wa wozo mwana atendile bunee: “Anga bukulama Yehowa nu mutima wobe, nsyakusige.” Ububo Elisa azanzukile nu amuyangile.
31 Gehazi endile lwabusio kubika kati gantata ga kilungi kya mwana, tondo mwana ntatendile aba kungwa. Asubizie ku Elisa abwide bunee: “Mwana ntayuka.” 32 Gabasile Elisa mu numba, amonine buno mwana akua nunsania nu eiyombeka ga mugu wage. 33 Ububo eingide mu numba nu eigede lwibi, we nu wozo mwana tugu u babezaga mumo. Asegile kuli Yehowa. 34 Abakamine kuntata kwa mugu, idambikile gantata ga mwana. Abikile kanua kage ku kanua ka mwana nu meiso mage ku meiso ma mwana nu maboko mage ku maboko ma mwana. Einanwine gantata ga mwana. Mubili wage walingile kuzuza. 35 Asubizie nu atabangile mu numba kuko nu kuko. Einanwine lingo gantata gage, nu wozo mwana akitile ikisia mambizi mutubakamo, azibwide meiso mage.
36 Elisa amanine Gehazi, amutendile bunee: “Mana wozo muSunemu.” Amumanine nu gaabasile, Elisa amutendile bunee: “Eka mwana wobe.” 37 Eingide nu agwede nu kukumba mazu mage gansi; kumbusa ekile mwana wage nu endile.
Buganga mu nyungu
38 Elisa abasile ku Gilgali lingo; nu kwabezaga nzala mu kisi. Geikede balengania beigisibwa lwabusio lwage, abwide mukiti wage bunee: “Bika nyungu nnene ga keiya uyikile balengania idia.” 39 Umozi endile ku isoa kukala sombe. Amonine ku bisusania bya masola ma lubanda. Abikalile nu kwizazia nsulu zage. Abikekile mu nyungu tondo tabyamenyagwa. 40 Bavwilide babo bantu n'idia. Nu gababede bese balia, balalukile, batendile bunee: “Ee muntu wa Kalaga, lukuo luli mu nyungu.” Nu tabavwamine kulia.
41 Tondo Elisa atendile bunee: “Vwazi na bunga bwa ngano.” Nu abwisile mu nyungu nu atendile bunee: “Yulila bantu buno balie.” Nu takwabezaga lukuo mu nyungu.
42 Muntu umozi atukile ku Baali-Salisa. Avule n'idia itangi ly'isoa lyage ku muntu wa Kalaga, tumpampa makumi mabili twa shayiri nu mintenga za mbuto mu nsago. 43 Mukiti wa Elisa atendile bunee: “Ndi ninavwama kukasa ku bantu lukama?” Tondo Elisa atendile bunee: “Bakase buno balie kubuno Yehowa atenda bunee: ‘Balie nu bondwe.’” 44 Ububo abakasile nu balide nu kwasigede nkindi anga bwatendile Yehowa.