པི༌ཏྲར༌རི༌ ཆག༌བྲིས༌ ཏང༌པོ༌།
པི༌ཏྲར༌རི༌ ཇུ༌ ཞུས༌།
1:1-2
1
གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌ ང༌ པི༌ཏྲར༌རི༌ ཁྱོ༌ཞའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ པོན༌ཏུས༌,
གཱ༌ལ༌ཏི༌ཡ༌,
ཀ༌པ༌དོ༌ཀི༌ཡཱ༌,
ཨ༌སི༌ཨཱ༌ དང༌ བི༌ཏི༌ནི༌ཡཱ༌ ཡུལ༌གུན༌ནི༌ ནང༌ང༌ ཁྱེབས༌ཏེ༌ ཡོད༌ཁན༌གུན༌ནི༌ ཕིའ༌ བྲིའད༌།
2 ཇིག༌རྟེན༌ ཛད༌དི༌ སང༌ སྔུན༌ལ༌,
དཀོན༌མཆོག༌ ཡབ༌བི༌ ཁྱོ༌ཞ༌གུན༌ ཤེས༌ཏེ༌ ལྡམ༌མ༌ ཛད༌ཏེ༌,
ཏམ༌པའེ༌ ཐུག༌ཉིད༌ གྱུད༌ཏེ༌ ཏམ༌པ༌ ཅོའ༌ ཛདས༌།
ཏེ༌བོའེ༌ ཞས༌ཏེ༌ ཁྱོ༌ཞ༌གུན༌ནི༌ ཡེ༌ཤུའི༌ ཁའ༌ཉནས༌,
ཡང༌ མ༌ཤི༌ཀའེ༌ སྐུ༌ཁྲག༌ ཕོའ༌ ཛད༌ཅེས༌པོའེ༌ ཁྱོ༌ཞ༌གུན༌ རྩང༌མ༌ ཅོའ༌ ཛདས༌།
ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ མང༌མི༌ སང༌ མང༌ང༌ ཐོབ༌ཤིག༌།
ཐར༌པའེ༌ རེ༌ཝའེ༌ ཕིའ༌ དཀོན༌མཆོག༌ག༌ ཐུག༌རྗེ༌ཆེ༌།
1:3-12
3 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཡབ༌ དང༌ དཀོན༌མཆོག༌ག༌ སྟོད༌པ༌ ཕུལ༌ཤིག༌།
ང༌དང༌གུན༌ལ༌ ཁོང༌ངི༌ སྙིང༌རྗེ༌ ཆེན༌མོ༌ ཛད༌ཏེ༌,
མི༌ཚེ༌ སོ༌མ༌ཞིག༌ སལ༌ལ༌ ཛདས༌,
ཅིའ༌ཟེར༌ན༌ དཀོན༌མཆོག༌གི༌ ཡེ༌ཤུ༌ མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛདས༌།
ཏ༌ ང༌དང༌གུན༌ནིའང༌ རེ༌ཝ༌ ཆེན༌མོ༌ ཉམ༌པོ༌ མི༌ཚེ༌ ཕུད༌ད༌ནོག༌།
4 ཏེ༌བོ༌ ནི༌ ནོར༌སྐལ༌ མ༌ནེ༌ མི༌རུལ༌ཁན༌,
མ༌ནེ༌ ཚི༌ཏུ༌ མི༌ཆའ༌ཁན༌ དང༌ ལྡངས༌ མ༌ནེ༌ མི༌ཡོལ༌ཁན༌ ཀ༌བོ༌ ང༌དང༌གུན༌ནི༌ ཕིའ༌ ནམ༌ཁའེ༌ ནང༌ང༌ བོར༌ར༌ ཛད༌ཏེ༌ ཡོད༌།
5 ཁྱོ༌ཞ༌གུན༌ནི༌ ཏད༌པ༌ གྱུད༌ཏེ༌ དཀོན༌མཆོག༌གི༌ སྟོབས༌པོའེ༌ ཁྱོ༌ཞ༌གུན༌ལ༌ ཏེ༌ ཐར༌པ༌ ཐོབ༌ཐོབ༌ ཚོག༌པ༌ སྲུང༌སྐྱོབ༌ ཛད༌དུག༌,
ཀ༌བོ༌ སྟིང༌ཇུག༌གི༌ ཏུས༌ལ༌,
སྔོན༌ ཅུག༌ག༌ ཛད༌ཅེས༌ལ༌ གྲལ༌གྲིག༌ ཡོད༌།
6 ཏེན༌ན༌བོའེ༌ཕིའ༌ གའ༌མོ༌ ཅོ༌ཤིག༌།
ཞན༌ དག༌ས༌ ཏུས༌ ཉུ༌ངུན༌ཞིག༌,
ཁྱོ༌ཞ༌གུན༌ལ༌ ཚོད༌ལྟ༌ སོ༌སོའེ༌ ནང༌ང༌ རྡུག༌ངལ༌ ཐོང༌ནའང༌,
ཡོང༌ཅེས༌ཅན༌ནི༌ ཏུས༌སི༌ ནང༌ང༌ ཧ༌ལས༌ཤེས༌སི༌ ཐད༌པོ༌ ང༌ཏི༌ ཕིའ༌ སྲུངས༌ཏེ༌ ཡོད༌།
7 ཏེ༌ ཚོད༌ལྟ༌གུན༌ནི༌ ཁྱོ༌ཞའེ༌ ཏད༌པ༌ དེན༌བ༌ ཨིན༌ཁན༌བོ༌ སྟན༌ན༌ནོག༌,
ཀ༌ཟུག༌གི༌ སེར༌ལ༌ སྟག༌ཅད༌ མེ༌ གྱུད༌ཏེ༌ ཅོས༌ཏེ༌ ལག༌མོ༌ ཅོའ༌ནོག༌,
ཨིན༌ནའང༌ ཁྱོ༌ཞའེ༌ ཏད༌པ༌གུན༌ སེར༌རི༌ སང༌ མང༌ང༌ རིན༌ཅན༌ ཨིན༌ནོག༌།
ཀལ༌ཏེས༌ ཁྱོ༌ཞ༌གུན༌ནི༌ ཏད༌པ༌བོ༌,
ཚོད༌ལྟ༌གུན༌ནི༌ ནང༌ང༌ སྟན༌པོ༌ ལུས༌ན༌,
གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ སྐྱོད༌ ཟ༌ནེ༌,
ཁྱོ༌ཞ༌གུན༌ལ༌ སྟོད༌པ༌,
སྤལ༌ དང༌ རྩི༌ཝ༌ ཐོབ༌ཨིན༌།
8 ཁྱོ༌ཞ༌གུན༌ནི༌ ཡེ༌ཤུ༌ མ༌ཇལ༌ནའང༌ ཁོང༌ང༌ ཅམས༌པ༌ ཅོའ༌ནོག༌,
ཡང༌ དག༌ས༌ རང༌ངི༌ མིག༌ནེ༌ མ༌ཐོང༌ནའང༌,
ཁོང༌ང༌ ཏད༌པ༌ ཅོས༌ཏེ༌ ཧ༌ལས༌ཤེས༌ དང༌ ཤད༌ མི༌ཉན༌ཅེས༌སི༌ ཐད༌པོ༌ ཅོའ༌ནོག༌།
9 ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ ཅོ༌ཅེས༌སི༌ སོལ༌རས༌པོ༌ ནི༌,
ཁྱོ༌ཞ༌གུན༌ལ༌ ཐར༌པ༌ ཐོབ༌ཅེས༌པོ༌ ཨིན༌།
10 ཁྱོ༌ཞ༌གུན༌ནི༌ཀ༌ སྔོན༌ཅུག༌ཅེས༌སི༌ ཐུག༌རྗེའེ༌ ཐར༌པའེ༌ སྐོར༌ལ༌ ལུང༌སྟན༌ ཛད༌ཁན༌ནི༌ ལུང༌སྟོན༌པ༌གུན༌ནི༌,
གྱལ༌ལ༌ ཅོས༌ཏེ༌ རྩར༌ཅོད༌ ཅོའ༌ ཛདས༌།
11 ཏེ༌གུན༌ལ༌ མ༌ཤི༌ཀའ༌ རྡུག༌ངལ༌ ཇུངས༌ཏེ༌ སྤལ༌ ཐོབ༌ཅེས༌སི༌ ཏུས༌ དང༌ ནས༌ལུགས༌ གུན༌ནི༌ སྐོར༌ལ༌ ཧ༌གོ༌ཅེས༌སི༌ དོད༌པ༌ ཡོད༌པིན༌,
ཀ༌བོ༌ ཁོང༌གུན༌ནི༌ ནང༌ང༌ ཡོད༌ཁན༌ནི༌ མ༌ཤི༌ཀའེ༌ ཐུག༌ཉིད༌དི༌ ཁོང༌གུན༌ལ༌,
ཏེ༌གུན༌ ཇུང༌ངི༌ སང༌ སྔུན༌ལ༌ སྔོན༌ ཅུག༌ག༌ ཛད༌ཏེ༌ ཨིན༌པིན༌།
12 ཏེ༌ ལུང༌སྟོན༌པ༌གུན༌ནི༌ ཞབས༌ཏོག༌པོ༌,
ཁོང༌རང༌གུན༌ནི༌ ཕིའ༌ མན༌པ༌,
ཁྱོ༌ཞ༌གུན༌ནི༌ ཕིའ༌ ཨིན༌ཁན༌བོ༌ ཁོང༌གུན༌ལ༌ སྔོན༌ ཅུག༌ག༌ ཛད༌ཏེ༌ ཨིན༌པིན༌།
ཏ༌ ཁྱོ༌ཞ༌གུན༌ལ༌ གའ༌མོའེ༌ ནས༌ཚུལ༌ ཤད༌ཁན༌གུན༌ནི༌,
ནམ༌ཁའ༌ནེ༌ བབས༌ཁན༌ནི༌ ཏམ༌པའེ༌ ཐུག༌ཉིད༌དི༌ རོགས༌ ཉམ༌པོ༌ ཤད༌ད༌ནོག༌,
ཡང༌ ཕོ༌ཉ༌གུན༌ལའང༌,
འི༌གུན༌ནི༌ སྐོར༌ལ༌ ཧ༌གོ༌ཅེས༌སི༌ དོད༌པ༌ ཆེན༌མོ༌ ཡོད༌པིན༌།
མི༌ཚེ༌ ཏམ༌པ༌ཞིག༌ ཕུད༌།
1:13-2:3
13 ཏེན༌ན༌བོའེ༌ཕིའ༌ ཇིག༌རྟེན༌ནི༌ ནང༌ང༌ ཡོད༌ཁན༌གུན༌ནི༌ ཆོགས༌ལ༌ སམ༌བ༌ མ༌ཏང༌ང༌,
རང༌སེམས༌ ཅུན༌ཏེ༌ ཡེ༌ཤུ༌ མ༌ཤི༌ཀ༌ སྔོན༌ནི༌ ཏུས༌ལ༌ ཐོབ༌ཅེས༌ཅན༌ནི༌ ཐུག༌རྗེ༌ ཐར༌པ༌བོའེ༌ཀ༌ སྟན༌པོ༌ རེ༌ཝ༌ བོར༌ཤིག༌།
14 ཁྱོ༌ཞའེ༌ ནང༌ང༌ དཀོན༌མཆོག༌ མ༌ཤེས༌སི༌ སང༌ སྔུན༌ལ༌ ཡོད༌ཁན༌ནི༌ དོད༌པ༌ ངན༌པ༌གུན༌ནི༌ གྱབ༌ནེ༌ མ༌གྲུལ༌ལ༌,
དཀོན༌མཆོག༌གི༌ ཁའ༌ ཉན༌ཁན༌ནི༌ ཕྲུ༌གུ༌གུན༌ ཙོགས༌ གྱུར༌ཤིག༌།
15 མ༌ཚད༌ ཁྱོ༌ཞ༌གུན༌ བོད༌ད༌ ཛད༌ཁན༌ དཀོན༌མཆོག༌ ཁོང༌རང༌ ཏམ༌པ༌ ཨིན༌ཁན༌ ཙོགས༌ལ༌ ཅི༌ས༌ཐོག༌ནེ༌ ཁྱོ༌ཞ༌རང༌ངི༌ མི༌ཚེ༌ ཏམ༌པ༌ཞིག༌ པུད༌ཤིག༌།
16 ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌,
“ང༌ ཏམ༌པ༌ ཨིན༌པ༌ ཁྱོ༌ཞ༌གུན༌ནའང༌ ཏམ༌པ༌ གྱུར༌གོས༌a” མོལ༌ཏེ༌ དུག༌།
17 ཡང༌ འི༌གུན༌ ཨིད༌ཏུ༌ བོར༌ཤིག༌,
ཁྱོ༌ཞ༌གུན༌ནི༌ མོས༌ལམ༌ ཕུལ༌ཁན༌,
ནམ༌ཁའེ༌ ཡབ༌བི༌ ཆོགས༌རིས༌ ཛད༌ད༌ མ༌ནོག༌།
ཁྱོ༌ཞ༌གུན༌ནི༌ ཅོ༌ཁན༌ ནང༌ཞིན༌ལ༌ ཁོང༌ངི༌ ཁྲིམས༌ཅད༌ ཡ༌ སོལ༌རས༌ སལ༌ཅེས༌ ཨིན༌ པ༌སང༌,
ཇིག༌རྟེན༌ནི༌ཀ༌ མི༌ཚེ༌བོ༌ བེས༌པ༌ཞིག༌ ཙོགས༌ལ༌ དཀོན༌མཆོག༌ག༌ རྩི༌ཝ༌ དང༌ ཁོང༌ངི༌ ཇིགས༌སི༌ ནང༌ང༌ ཕུད༌ཤིག༌།
18-19 ཁྱོ༌ཞ༌གུན༌ལ༌ གྱུས༌ཨིན༌ནོག༌,
ཁྱོ༌ཞ༌གུན༌ ཁྱོ༌ཞའེ༌ ཕ༌མེས༌པོ༌གུན༌ནེ༌ ཐོབ༌ཁན༌ནི༌ ཕན༌མི༌ཐོགས༌སི༌ མི༌ཚེ༌ནེ༌ ཐར༌ཏེ༌ ཨིན༌,
ཨིན༌ནའང༌ ཏེ༌བོ༌ མེད༌ཁན༌ ཆ༌ཉན༌ཅེས༌སི༌ སེར༌ ཡ༌ མུལ༌ གུན༌ གྱུད༌ཏེ༌ མན༌པ༌,
སྡིག༌པ༌ ཡ༌ སྐྱོན༌མེད༌ཁན༌ནི༌ ལུ༌གུ༌,
མ༌ཤི༌ཀའེ༌ སྐུ༌ཁྲག༌ རིན༌ཅན༌ ཤལ༌ཏེ༌,
ཉོའ༌ཛད༌ཏེ༌ ཨིན༌ནོག༌།
20 ཁོང༌ ཇིག༌རྟེན༌ མ༌ཆགས༌སི༌ སང༌ སྔུན༌ལ༌ དཀོན༌མཆོག༌གི༌ ལྡམ༌མ༌ ཛད༌ཏེ༌ ཨིན༌པིན༌།
ཨིན༌ནའང༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ འི༌ སྟིང༌ཇུག༌གི༌ ཞག༌གུན༌ནི༌ ནང༌ང༌ ཁོང༌ སྔོན༌ ཅུག༌ག༌ ཛད༌ཏེ༌ ཨིན༌།
21 གཙོ༌བོ༌ ཡེ༌ཤུ༌ གྱུད༌ཏེ༌,
ཁྱོ༌ཞ༌གུན༌ནི༌ དཀོན༌མཆོག༌གི༌ ནང༌ང༌ ཨིད༌ཤེས༌ ཅོའ༌ནོག༌།
དཀོན༌མཆོག༌གི༌ ནང༌ང༌ ཁྱོ༌ཞ༌གུན༌ནི༌ ཏད༌པ༌ དང༌ རེ༌ཝ༌ བོར༌ར༌ནོག༌,
ཅིའ༌ཟེར༌ན༌ ཁོང༌ངི༌ ཤི༌ཁན༌གུན༌ནི༌ ཕྲོ༌ནེ༌,
ཡེ༌ཤུ༌ སོན༌ཏེའ༌ ལང༌ང༌ ཛད༌ཏེ༌ སྤལ༌ སལ༌ལ༌ ཛདས༌།
22 ཏ༌ ཁྱོ༌ཞ༌གུན༌ནི༌ དེན༌བ༌བོའ༌ ཁའ༌ཉན༌ཅེས༌པོའེ༌,
ཁྱོ༌ཞའ༌ རྩང༌མ༌ གྱུར༌ཏེ༌ ཨིན༌ནོག༌།
ཏེ༌བོའེ༌ཕིའ༌ མིང༌སྲིང༌ ཙོགས༌ལ༌ ཁྱོ༌ཞའ༌ ཅིག༌ དང༌ ཅིག༌གི༌ ནང༌ང༌ དེན༌བའེ༌ ཅམས༌པ༌ ཡོང༌གོས༌།
ཏ༌ སྙིང༌ངི༌ ཐིལ༌ནེ༌ ཅིག༌ དང༌ ཅིག༌ག༌ ཅམས༌པ༌ ཅོ༌ཤིག༌།
23 ཁྱོ༌ཞ༌གུན༌ རུལ༌ཅེས༌ཅན༌ནི༌ ས༌འོན༌ནེ༌ མ༌སྐྱེའ༌,
སོན༌པོ༌ དང༌ ཏུས༌གྱུན༌ ཞུགས༌ཁན༌ དཀོན༌མཆོག༌གི༌ བཀའ༌ གྱུད༌ཏེ༌ མ༌ནེ༌ མི༌རུལ༌ཅེས༌ཅན༌ནི༌ ས༌འོན༌ནེ༌ ཡང༌སྐྱར༌ སྐྱེས༌ཏེ༌ ཨིན༌།
24 ཏམ༌པའེ༌ སུང༌རབས༌སི༌ མོལ༌དུག༌,
“མི༌ཚང༌མ༌ ནི༌ རྩཱ༌ ཙོགས༌ ཨིན༌།
ཁོང༌གུན༌ནི༌ སྤལ༌ ཚང༌མ༌ རྩཱའེ༌ མེན༌ཏོག༌ ཙོགས༌ ཨིན༌།
རྩཱ༌ སྐམས༌ཏེ༌ མེན༌ཏོག༌ ཡོལ༌ལ༌ནོག༌།
25 ཨིན༌ནའང༌ དཀོན༌མཆོག༌གི༌ བཀའ༌ ཏུས༌གྱུན༌ ལུས༌ཨིན༌།”b
ཏེ༌ བཀའ༌བོ༌ ནི༌,
ཁྱོ༌ཞ༌གུན༌ལ༌ ཤད༌ཁན༌ནི༌ གའ༌མོའེ༌ ནས༌ཚུལ༌བོ༌ ཨིན༌ནོག༌།