ཨིབ༌རི༌པ༌ i

ཨིབ༌རི༌པ༌ མ༌ཤི༌ཀ༌པ༌གུན༌ལ༌ ཆག༌བྲིས༌།

ཨིབ༌རི༌པའེ༌ ཆག༌བྲིས༌སི༌ སྐོར༌།

འི༌ ཆག༌བྲིས༌ བྲིའ༌ ཛད༌ཁན༌བོའེ༌, ཁོ༌རང༌ངི༌ མིང༌ མ༌ནེ༌ བྲིའ༌ ཛད༌ཏེ༌ མི༌དུག༌། ཆོས༌སི༌ ནང༌ང༌ ཁས༌པ༌ མང༌པོའེ༌ འི༌ ཆག༌བྲིས༌ བྲིའ༌ཛད༌ཁན༌བོ༌ ཤེ༌ཤེས༌སི༌ རྩོན༌གྲུས༌ ཅོས༌ཏེ༌ ༼སྤེར༌ན༌ པ༌འུ༌ལུ༌, ཨ༌པོ༌ལོས༌, བཱར༌ན༌བས༌ དང༌ ཡང༌ མང༌པོ༌ཞིག༌གི༌ མིང༌ ཟེརས༌།༽ ངོས༌པོའ༌ འི༌ ཆག༌བྲིས༌ བྲི༌ཁན༌བོ༌ སུ༌ཞིག༌ ཨིན༌ནའང༌ ཅའང༌ ཁྱད༌ ཆ༌ཅེས༌ མེད༌པ༌ ཨིན༌ནོག༌། ཁག༌ཅན༌བོ༌ ནི༌, འི༌ ཆག༌བྲིས༌ བྲི༌ཁན༌བོའ༌ སུང༌རབས༌སི༌ སྐོར༌ལ༌ མ༌ཐར༌ཁྱེལ༌ ཧ༌གོ༌ ཡོད༌ཁན༌ ཡང༌ ཁོ༌ ཨིབ༌རི༌པ༌ མ༌ཤི༌ཀ༌པ༌ ཨིན༌ཁན༌བོ༌ ཏན༌ཏན༌ ཨིན༌ནོག༌།

ཆོས༌སི༌ ཁས༌པ༌ མང༌ཆེའེ༌ འི༌ ཆག༌བྲིས༌པོ༌ ཡེ༌རུ༌ཤ༌ལེམ༌མི༌ ཆོད༌ཁང༌ ཁྲེས༌ཏོར༌ ཆེའེ༌ སང༌ སྔུན༌ལ༌ བྲིའ༌ ཛད༌ཀྱག༌ ཟེར༌ར༌ནོག༌། ཏེ༌བོ༌ ནམ༌ ཡ༌ཧུ༌དཱ༌པ༌གུན༌ནི༌ རོམ༌མི༌ གྱལ༌པོ༌ ཀྱེ༌སར༌རི༌ ཝང༌སྲུལ༌ལི༌ གྱབ༌གལ༌ ཅོའེ༌ ཏུས༌ ཨིན༌པིན༌, ཀ༌བོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ས༌ ཛད༌ཏེ༌ ལོ༌ 37 ནི༌ སྟིང༌ནེ༌ ཇུང༌།

ཆག༌བྲིས༌ བྲི༌ཁན༌ནི༌ འི༌ ཆག༌བྲིས༌པོ༌ ཨིབ༌རི༌པ༌ ཏད༌པའེ༌ ནང༌ང༌ ལྡན༌མ༌ལྡན༌ཁན༌ དང༌ ཁོ༌རང༌ ཉམ༌པོ༌ བྲེལ༌ཡོད༌ཁན༌ ཏད༌པ༌ཅན༌གུན༌ནི༌ ཕིའ༌ བྲིའ༌ ཛདས༌། འི༌ མི༌གུན༌ ཏུས༌ མང༌པོ༌ཞིག༌ནེ༌ ཕར༌ལ༌ མ༌ཤི༌ཀ༌པ༌ ཨིན༌ཁན༌བོ༌ ང༌དང༌ང༌ འི༌ ཆག༌བྲིས༌པོའེ༌ ནང༌ནེ༌ སལ༌པོ༌ གྱུས༌ ཆའ༌ནོག༌། ཨིན༌ནའང༌ ཏད༌པ༌ ཅོ༌ཅེས༌པོའེ༌ ནགས༌བར༌དོ༌ ཐོང༌པ༌, ཁོང༌གུན༌ནི༌ ཞན༌མ༌ ཏད༌པ༌ཅན༌གུན༌ ཉམ༌པོ༌ ཛོམ༌ཅེས༌ ཕངས༌ཏེ༌ ཡ༌ཧུ༌དཱ༌པའེ༌ ཆོས༌སི༌ གྱབ༌ནེ༌ ཆེན༌ སམ༌མད༌པིན༌།

ཆག༌བྲིས༌ བྲི༌ཁན༌ནི༌ འི༌ ཆག༌བྲིས༌ བྲི༌ཅེས༌སི༌ གྱུན༌ཚན༌གུན༌ ནི༌:

མོ༌ཟེས༌སི༌ ཁྲིམས༌ དང༌ ཞལ༌ཆད༌ སྙིང༌པའེ༌ སང༌ ཡེ༌ཤུ༌ གྱུད༌ཏེ༌ ཐར༌པ༌ དང༌ སྡིག༌པའེ༌ ཀ༌ནེ༌ ཤགས༌པ༌ ཐོབ༌ཅེས༌པོ༌, མང༌ང༌ ཤེད༌ཅན༌ དང༌ ཀྲག༌པོ༌ ཨིན༌ཁན༌བོ༌ སྟན༌ན༌ནོག༌། ཡང༌ ཁོའེ༌ མོ༌ཟེས༌སི༌ ཁྲིམས༌སི༌ གྱབ༌ནེ༌ གྲུལ༌ཅེས༌ མན༌པ༌, ཡེ༌ཤུ༌ མ༌ཤི༌ཀའེ༌ ནང༌ང༌ ཏད༌པ༌ ཅོ༌ཅེས༌ ཅིག༌པོ༌ གྱུད༌ཏེ༌ དཀོན༌མཆོག༌གི༌ སྐུན༌དུན༌ལ༌ ཁོང༌གུན༌ ཀྲང༌པོ༌ གྱུར༌ཅེས༌པོ༌ སལ༌པོ༌ ཅོས༌། ཆག༌བྲིས༌ མང༌ཆེའ༌བོའེ༌ ནང༌ང༌ ཏེ༌བོའེ༌ སྐོར༌ལ༌ བྲིའ༌ཛད༌ཏེ༌ ཨིན༌ནོག༌། ཨིན༌ནའང༌ ལག༌ལུས༌པོའེ༌ ནང༌ང༌ ཞན༌ ནས༌ལུག༌གུན༌ནི༌ སྐོར༌ལ༌ བྲིའ༌ཛད༌ཏེ༌ དུག༌, སྤེར༌ན༌:

ཁོའེ༌ རྡུག༌ངལ༌ལི༌ ཏུས༌ལའང༌ ཏད༌པ༌ཅན༌གུན༌ ཛོམ༌ཅེས༌ ཡང༌ ཏད༌པའེ༌ ནང༌ང༌ མང༌ང༌ སམ༌བ༌ཅན༌ གྱུར༌ཏེ༌ ལྡན༌ཅེས༌ལ༌ སྤོས༌པ༌ ཏང༌ཨིན༌, རྡུག༌ངལ༌ལི༌ ཏུས༌ལ༌ ཏད༌པའེ༌ ནང༌ང༌ སྟན༌པོ༌ དུག༌གོས༌ ཟེར༌ར༌ནོག༌།

ཁོའེ༌ དཀོན༌མཆོག༌ ཏུས༌གྱུན༌ ཁོང༌གུན༌ ཉམ༌པོ༌ ཞུགས༌ཁན༌ ཡང༌ རྡུག༌ངལ༌ ཇུང༌ཅེས༌པོ༌ དཀོན༌མཆོག༌ ཁོང༌གུན༌ནི༌ ཡབ༌བི༌, ཁོང༌གུན༌ནི༌ གྱལ༌ལི༌ ཕིའ༌ སྐྱོང༌ང༌ ཛད༌ཁན༌བོ༌ ཧ༌གོ༌ཅུག༌ཅེས༌པོ༌ ཨིན༌ནོག༌།

ཁོའེ༌ ཁོང༌གུན༌ལ༌ ཟུས༌མའེ༌ ལོབ༌བོན༌གུན༌ནེ༌ སྤང༌པུདས༌, ཡང༌ སྟིང༌ཇུག༌པོའེ༌ཀ༌ ཁོའེ༌ ཕིའ༌ མོས༌ལམ༌ ཞུ༌ཅེས༌ལ༌ ཞུ༌ཝ༌ ཕུལས༌།