ཕི༌ལི༌མོན༌ལ༌ པ༌འུ༌ལུའི༌ ཆག༌བྲིས༌།
པ༌འུ༌ལུའི༌ ཆོགས༌ནེ༌ ཇུ༌།
1:1-3
1
འི༌ ཨི༌གེ༌བོ༌ མ༌ཤི༌ཀ༌ ཡེ༌ཤུའི༌ ཏོན༌ལ༌ ཙོན༌པ༌ པ༌འུ༌ལུ༌ དང༌ ང༌དང༌ངི༌ སྤུན༌ ཏི༌མོ༌ཐིའི༌ ཆོགས༌ནེ༌ ཨིན༌།
ངའེ༌ ང༌ཞའ༌ ཉམ༌པོ༌ ལས༌ ཅོ༌ཁན༌ ཕྲོ༌པ༌ ཅེས༌པ༌ ཕི༌ལི༌མོན༌ལ༌ བྲིའད༌།
2 ཡང༌ ང༌ཞའེ༌ སྤུན༌མོ༌ ཨ༌ཕིའ༌,
མ༌ཤི༌ཀའེ༌ ཕིའ༌ མག༌མི༌ ཕྲོ༌པ༌ སྤུན༌ ཨར༌ཀིབ༌པུས༌ དང༌ ཁྱོ༌རང༌ངི༌ ཁང༌པའེ༌ ནང༌ང༌ ཛོམ༌ཨིན༌ ཡོད༌ཁན༌ནི༌ ཆོས༌ཚོགས༌ལའང༌ བྲིའད༌།
3 ང༌ཞའེ༌ མོས༌ལམ༌ ཞུའད༌,
དཀོན༌མཆོག༌ ང༌དང༌གུན༌ནི༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀ༌ གུན༌ནི༌ ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ཤིག༌།
པ༌འུ༌ལུའི༌ མོས༌ལམ༌ དང༌ ཐུག༌རྗེ༌ཆེ༌ ཞུས༌།
1:4-7
4 ཕི༌ལི༌མོན༌ ཁྱོ༌རང༌ངི༌ ཕིའ༌ མོས༌ལམ༌ ཞུ༌ ཟ༌ནེ༌,
ངའེ༌ ཏུས༌གྱུན༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌,
5 ཅིའ༌ཟེར༌ན༌ ཁྱོ༌རང༌ངི༌ གཙོ༌བོ༌ ཡེ༌ཤུའི༌ ནང༌ང༌ ཏད༌པ༌ དང༌,
དཀོན༌མཆོག༌གི༌ མི༌ ཏམ༌པ༌ ཚང༌མའེ༌ ཕིའ༌ ཅེས༌པ༌ ཡོད༌ཁན༌བོའེ༌ སྐོར༌ལ༌ ཚོར༌།
6 མ༌ཤི༌ཀའེ༌ ང༌དང༌གུན༌ལ༌ སལ༌ལ༌ ཛད༌ཁན༌ ཅིན༌ལབས༌ ཚང༌མ༌ ཁྱོ༌རང༌ང༌ སྙིང༌ངི༌ ཐིལ༌ནེ༌ ཧ༌གོ༌ཏེ༌,
ཞན༌མ༌གུན༌ ཉམ༌པོ༌ ཁྱོ༌རང༌ངི༌ ཏད༌པ༌བོ༌ བགོ༌ཉན༌ཅེས༌ལ༌ ངའེ༌ མོས༌ལམ༌ ཕུལ༌ལད༌།
7 ཁྱོ༌རང༌ངི༌ ཅེས༌པའེ༌,
ངའ༌ སྤོས༌པ༌ དང༌ གའ༌མོ༌ སྲན༌ཏྲེ༌ ཏངས༌,
ཅིའ༌ཟེར༌ན༌ ངའེ༌ སྤུན༌,
ཁྱོ༌རང༌ངི༌ དཀོན༌མཆོག༌གི༌ ཏམ༌པའེ༌ མི༌གུན༌ནི༌ སྙིང༌ང༌ སྤོས༌པ༌ ཏང༌ཏེ༌ ཨིན༌ནོག༌།
པ༌འུ༌ལུའི༌ ཨོ༌ནེ༌སི༌མུས༌སི༌ ཕིའ༌ ཞུ༌ཝ༌།
1:8-22
8 ཏེ༌བོའེ༌ཕིའ༌ ཞན༌ཏ༌ མ༌ཤི༌ཀའེ༌ ནང༌ང༌ ངའེ༌ ཁྱོ༌རང༌ང༌ འོས༌པ༌བོ༌ ཅོས༌ ཟེར༌ཏེ༌ བཀའ༌ཏང༌ཅེས༌སི༌ ཝང༌ ཡོད༌ནའང༌,
9 ང༌དང༌ངི༌ ཅེས༌པའེ༌ ཞས༌ཏེ༌ ངའེ༌ ཁྱོ༌རང༌ང༌ འི༌ ཞུ༌ཝ༌བོ༌ ཨིན༌།
ང༌ པ༌འུ༌ལུ༌ མི༌རྒན༌ཞིག༌ དང༌ མ༌ཤི༌ཀ༌ ཡེ༌ཤུའི༌ ཞབས༌ཏོག༌ ཞུ༌ཅེས༌པོའེ༌,
དག༌ས༌ ཙོན༌པ༌ཞིག༌ ཨིན༌པ༌,
10 ཁྱོ༌རང༌ང༌,
ངའེ༌ བུ༌ཚ༌ ཙོགས༌ ཨོ༌ནེ༌སི༌མུས༌སི༌ ཏོན༌ལ༌ ཞུ༌ཝ༌ ཞུའད༌།
འི༌རུ༌ ཙོན༌ཁང༌ངི༌ ནང༌ང༌ ཡོད༌ ཟ༌ནེ༌,
ཏད༌པའེ༌ ནང༌ང༌ ང༌ ཁོའེ༌ ཨ༌བ༌ གྱུར༌།
11 སྔུན༌ལ༌ ཨོ༌ནེ༌སི༌མུས༌a ཁྱོ༌རང༌ངི༌ ཕིའ༌ ཕན༌མི༌ཐོགས༌ཤིག༌ ཡོད༌པིན༌,
ཨིན༌ནའང༌ ཏ༌ དག༌ས༌ ང༌དང༌ ཉིས༌ཀོའེ༌ ཏོན༌ལ༌,
ཁོ༌ སྲན༌ཏྲེ༌ ཕན༌ཐོགས༌ཅན༌ཞིག༌ གྱུར༌ཏེ༌ ཨིན༌ནོག༌།
12 ཞན༌ ཁོ༌ ངའེ༌ སྙིང༌བོ༌ ཨིན༌ནའང༌,
ངའེ༌ ཁོ༌ ཁྱོ༌རང༌ ཡོད༌ས༌ ལོགས༌ཏེ༌ ལམ༌ཅུག༌གད༌།
13 གའ༌མོའེ༌ ནས༌ཚུལ༌ ཤད༌ཅེས༌སི༌ ཞས༌ཏེ༌ ངའ༌ འི༌རུ༌ ཙོན༌ཁང༌ངི༌ ནང༌ང༌ ཡོད༌ ཟ༌ནེ༌,
ཁོའེ༌ ངའ༌ ཁྱོ༌རང༌ངི༌ ཚབས༌ ཅོས༌ཏེ༌ ཡ༌ཏོ༌ ཅོ༌ཅེས༌སི༌ ཕིའ༌,
ཁོ༌ འི༌རུ༌ ང༌རང༌ ཉམ༌པོ༌ བོར༌ཅེས༌སི༌ དོད༌པ༌ རག༌།
14 ཨིན༌ནའང༌ ཁྱོ༌རང༌ངི༌ ཀ༌ནེ༌ གོངས༌པ༌ མེད༌པ༌,
ངའེ༌ ཅི༌ཞིག༌གའང༌ ཅོ༌ཉིན༌ མེ༌རག༌།
ཁྱོ༌རང༌ང༌ ཝང༌ ཏངས༌ཏེ༌ མན༌པ༌,
ཐད༌པོ༌ ཉམ༌པོ༌ ངའ༌ ཡ༌ཏོ༌ ཅོ༌ཅེས༌སི༌ དོད༌པ༌ ཅོའད༌།
15 ཅི༌གྱུས༌,
ཁོ༌ ཁྱོ༌རང༌ ཉམ༌པོ༌ ཏུས༌བན༌ཤིག༌ བེས༌ཏེ༌ དུག༌ཅེས༌སི༌ གྱུན༌ཚན༌བོ༌,
ཁྱོ༌རང༌ང༌ ཏུས༌གྱུན༌ནི༌ ཕིའ༌ ཁོ༌ ལོགས༌ཏེ༌ ཐོབ༌ཅེས༌པོ༌ མན༌ན༌ཧེ༌?
16 ཏ༌ནེ༌ཕར༌ལ༌ ཁོ༌ ཁྱོ༌རང༌ངི༌ ཚེ༌ཡོག༌ ཙོགས༌ མན༌པ༌,
ཚེ༌ཡོག༌གི༌ སང༌ ཁག༌ཅན༌,
ཅེས༌པའེ༌ སྤུན༌ཞིག༌ ཨིན༌ནོག༌།
ཁོ༌ མིག༌སལ༌ལི༌ ངའེ༌ ཕིའ༌ རིན༌ཅན༌ཞིག༌ ཨིན༌,
ཨིན༌ནའང༌ ཁོ༌ མི༌ཞིག༌ ཡང༌ གཙོ༌བོའེ༌ ནང༌ང༌ ཕྲོ༌པ༌ སྤུན༌ཞིག༌ ཨིན༌ཅེས༌པོའེ༌,
ཁོ༌ ཁྱོ༌རང༌ངི༌ ཕིའང༌ མང༌ང༌ རིན༌ཅན༌ཞིག༌ ཨིན༌ནོག༌།
17 ཏེ༌ནེ༌ ཀལ༌ཏེས༌ ང༌ ཁྱོ༌རང༌ ཉམ༌པོ༌ དཀོན༌མཆོག༌གི༌ ཆག༌ལས༌སི༌ ནང༌ང༌ ཕྲོ༌པ༌ཞིག༌ ཐེའད༌ན༌,
ཁོའ༌ གའ༌སུས༌ ཞུས༌,
ཀ༌ཟུག༌ ཁྱོ༌རང༌ངི༌ ངའ༌ གའ༌སུས༌ ཞུས༌ཏེ༌ ཡོད༌གྲོ༌།
18 ཀལ༌ཏེས༌ ཁོའེ༌ ཁྱོ༌རང༌ང༌ ནོར༌ཁྲུལ༌ཞིག༌ ཅོས༌ཏེ༌ ཡོད༌ན༌,
ཡ༌ ཁྱོ༌རང༌ངི༌ ཀ༌ནེ༌ ཅི༌ཏོང༌ ཁྱེར༌ཏེ༌ ཡོད༌ན༌,
ཏེ༌གུན༌ ངའ༌ བུ༌ལོན༌ལ༌ ཀལ༌ནའང༌ གྲིག༌།
19 ཏ༌ དག༌ས༌ ང༌ པ༌འུ༌ལུའི༌ ང༌རང༌ངི༌ ལག༌པ༌ནེ༌ འི༌བོ༌ བྲིའད༌,
ངའེ༌ ཏེ༌ བུ༌ལོན༌བོ༌ ཤལ༌ཨིན༌།
ཁྱོ༌རང༌ང༌ ཐའ༌མེད༌པའེ༌ མི༌ཚེ༌ ཐོབ༌ཅུག༌ཅེས༌སི༌ ངའེ༌ བུ༌ལོན༌ ཡོད༌ཁན༌བོ༌,
ཨིད༌ཏུ༌ མི༌སྐུལ༌།
20 འོ༌ན༌ ངའེ༌ སྤུན༌ལེ༌,
ཇུ༌ཇུ༌ གཙོ༌བོའེ༌ ནང༌ང༌ ངའེ༌ ཕན༌ཐོགས༌སི༌ ཕིའ༌ འི༌བོ༌ ཅོས༌།
མ༌ཤི༌ཀའེ༌ ནང༌ང༌ ངའ༌ འི༌ སྤོས༌པ༌བོ༌ ཏོང༌།
21 ཁྱོ༌རང༌ང༌ ངའེ༌ ཅོ༌ཅེས༌ལ༌ ཟེར༌ཏེ༌ ཡོད༌ཁན༌ ཚང༌མ༌ གྲུབ༌ཅུག༌ཅེས༌ མ༌ཚད༌,
ཏེ༌སང༌ མང༌ང༌ ཅོས༌སི༌ ལོ༌ཁྱེལ༌ ཉམ༌པོ༌,
ངའེ༌ འི༌ ཨི༌གེ༌བོ༌ བྲིའད༌།
22 ཡང༌ སྤེ༌ར༌ཞིག༌,
ཇུ༌ཇུ༌ ངའེ༌ ཕིའ༌ ནང༌ཞིག༌ གྲལ༌གྲིག༌ ཅོས༌,
ཅིའ༌ཟེར༌ན༌ དཀོན༌མཆོག༌གི༌ ཁྱོ༌རང༌ངི༌ མོས༌ལམ༌མ༌ ལན༌སལ༌ཏེ༌ ང༌ གྱོགས༌པ༌ ཁྱོ༌རང༌ ཡོད༌ས༌ ལོགས༌ཏེ༌ ཡོང༌ ཅུག༌ག༌ ཛད༌ཅེས༌སི༌ རེ༌ཝ༌ རག༌།
པ༌འུ༌ལུའི༌ སྟིང༌ཇུག༌གི༌ ཇུ༌།
1:23-25
23 མ༌ཤི༌ཀ༌ ཡེ༌ཤུའི༌ ཞབས༌ཏོག༌ ཞུ༌ཁན༌ནི༌ ཨེ༌པ༌ཕའ༌རས༌,
ངའེ༌ ཕྲོ༌པ༌ ཙོན༌པའེ༌,
ཁྱོ༌རང༌ང༌ ཇུ༌ ཞུ༌རུག༌།
24 ཡང༌ ཏེན༌ན༌ ཟུག༌གི༌ ངའེ༌ ལས༌ ཅོ༌ཁན༌ ཕྲོ༌པ༌ མར༌ཀུས༌,
ཨ༌རིས༌ཏར༌ཀུས༌,
དེ༌མཱས༌ དང༌,
ལུ༌ཀ༌ གུན༌ནིའང༌ ཇུ༌ ཞུ༌རུག༌།
25 ངའེ༌ མོས༌ལམ༌ ཞུའད༌,
གཙོ༌བོ༌ ཡེ༌ཤུ༌ མ༌ཤི༌ཀའེ༌ ཁྱོ༌རང༌ང༌ ཐུག༌རྗེ༌ སལ༌ཤིག༌།