དཱ༌བིད༌དི༌ སྟིང༌ཇུག༌གི༌ ཞལ༌ཏ༌།
23:1 ནེ༌ 7
23
ཡེ༌ཤེ༌ བུ༌ཚ༌ དཱ༌བིད༌དི༌ མོལ༌ཁན༌ ཚིགས༌ གུན༌,
ཀུན༌ཝང༌ དཀོན༌མཆོག༌གི༌ སྤལ༌ སལ༌ལ༌ ཛད༌ཁན༌ མི༌ ཞལ༌ཏ༌,
ཡ༌ཀོབ༌བི༌ དཀོན༌མཆོག༌གི༌ ལྡམ༌མ༌ ཛད༌ཁན༌ དཱ༌བིད༌,
ཨིས༌ར༌ཨེལ༌ལི༌ ནང༌ང༌ སྟོད༌པའེ༌ ལུ༌ བྲི༌ཁན༌ ཁས༌པ༌།
དཱ༌བིད༌དི༌ སྟིང༌ཇུག༌གི༌ ཞལ༌ཏ༌ འི༌གུན༌ ཨིན༌ནོག༌:
2 “ཡ༌ཝའེ༌ སེམས༌ཉིད༌དི༌ ང༌ གྱུད༌ཏེ༌ ཞལ༌ཏ༌ སལས༌,
ཁོང༌ངི༌ ཞལ༌ཏ༌གུན༌ ངའེ༌ ལྕེའེ༌ཀ༌ ཡོད༌།
3 ཨིས༌ར༌ཨེལ༌ལི༌ དཀོན༌མཆོག༌གི༌ མོལས༌,
‘ཨིས༌ར༌ཨེལ༌ལི༌ བྲག༌གི༌ ངའ༌ མོལས༌,
ཀྲང༌པོ༌ ཉམ༌པོ༌ ཝང༌ སྲུལ༌ཁན༌,
དཀོན༌མཆོག༌གི༌ ཇིགས༌སི༌ ནང༌ང༌ ཝང༌ སྲུལ༌ཁན༌,
4 ཁོ༌ ནི༌,
ང༌མོ༌ ཤར༌ཁན༌ ཉི༌མའེ༌ འོད༌,
སྲིན༌ མེད༌ཁན༌ནི༌ ང༌མོའེ༌ ཉི༌མའེ༌ ལྡངས༌ ཙོགས༌།
ཆར༌པའེ༌ སྟིང༌ནེ༌ ཉི༌མ༌ ལྡང༌ཤན༌ ཙོགས༌,
ཀ༌བོའེ༌ ས༌ཀྱད༌དི༌ཀ༌ རྩཱ༌ སོ༌མ༌ བིང༌ ཅུག༌གད༌།
5 ཏན༌ཏན༌ ངའེ༌ ནང༌ཚངས༌ལ༌ དཀོན༌མཆོག༌གི༌ ཅིན༌ལབས༌ སལ༌ལ༌ ཛད༌ཨིན༌།
ཁོང༌ངི༌ ང༌ ཉམ༌པོ༌ ཏུས༌གྱུན༌ ལུས༌ཤེས༌ཅན༌ནི༌ ཆད༌དོན༌ ཛདས༌,
ཀ༌བོ༌ ཚིར༌ཀ༌ ནང༌ཞིན༌ ཅི༌ས༌ཐོག༌ནེ༌ སྟན༌པོ༌ ཛདས༌།
ཁོང༌ངི༌ ཏུས༌གྱུན༌ ངའ༌ རོགས༌ ཛད༌ཏེ༌
ངའེ༌ དོད༌པ༌ ཚང༌མ༌ གྲུབ༌ཅུག༌ག༌ ཛད༌ཨིན༌།
6 ཨིན༌ནའང༌ ངན༌པ༌ མི༌ཚང༌མ༌ ཚེར༌མང༌ ཙོགས༌ ཨིན༌ནོག༌
ཀ༌གུན༌ ཕི༌ལོག༌ག༌ ཕང༌ང༌ནོག༌,
ཅིའ༌ཟེར༌ན༌ ཏེ༌གུན༌ ལག༌པ༌ ཁུར༌ན༌ ཟུག༌ག༌ནོག༌།
7 ཏེ༌གུན༌ ཅད༌ཅེས༌ལ༌ ལྕགས༌སི༌ ཁྱེམ༌ ཡ༌ དུང༌ ཀོལ༌ གོས༌ས༌ནོག༌,
ཏེ༌གུན༌ མེའེ༌ ནང༌ང༌ སྲགས༌ཏེ༌ མེད༌ཁན༌ ཅོའ༌ནོག༌།”
དཱ༌བིད༌དི༌ སྤའ༌འོ༌གུན༌།
23:8 ནེ༌ 39
8 དཱ༌བིད༌དི༌ སྟོབས༌ཤུགས༌ཅན༌ མག༌མི༌ ཀྲག༌པོ༌ སུམ༌མི༌ མིང༌ འི༌གུན༌ ཨིན༌ནོག༌:
ཏང༌པོ༌ ཧཀ༌མོན༌པ༌ ཡོ༌ཤེབ༌ བས༌ཤེ༌བེད༌,
ཁོང༌ སུམ༌ཀོའེ༌ ཕྲོ༌ནེ༌ ཁོ༌ འུ༌སྐྱོང༌བོ༌ ཨིན༌པིན༌།
མག༌ཞིག༌གི༌ ནང༌ང༌ ཁོའེ༌ ཁོ༌རང༌ངི༌ དུང༌ ཉམ༌པོ༌ མི༌ 800 སདས༌།
9 ཉིས༌པ༌ ཨ༌ཧོའི༌ པུར༌གྱུད༌ གྲོ༌གྲཱའི༌ བུ༌ཚ༌ ཨེ༌ལི༌འ༌ཟར༌ ཨིན༌པིན༌།
ཨིས༌ར༌ཨེལ༌ལི༌ མག༌མི༌ ཚང༌མ༌ མ༌ནོལ༌ལ༌ ཤོར༌ ཟ༌ནེ༌ ཁོ༌ དཱ༌བིད༌ ཉམ༌པོ༌ ཕི༌ལིས༌ཏི༌པ༌གུན༌ལ༌ ནོལ༌ལ༌ དུགས༌།
10 ར༌འི༌ ཐམས༌ཁན༌ནི༌ ཛི༌གུ༌གུན༌ རངས༌ཏེ༌ སྐང༌ མི༌ཉན༌ཅེས༌ ཆ༌ཆ༌ ཚོག༌པ༌ ཁོའེ༌ ས༌ཆ༌ སྟན༌པོ༌ ཟུམས༌ཏེ༌ ཕི༌ལིས༌ཏི༌པ༌གུན༌ སདས༌།
ཏེ༌ ཞག༌ག༌ ཡ༌ཝའེ༌ ཁོང༌གུན༌ལ༌ གྱལ༌ཁ༌ ཀྲག༌པོ༌ སལས༌།
ཞན༌ མག༌མི༌ ཚང༌མ༌ མག༌མི༌ ཤི༌ཁན༌གུན༌ནི༌ ཀ༌ནེ༌ ལག༌ཆ༌ ལྡུ༌ཅེས༌ལ༌ མ༌སྟོག༌ ཁོང༌གུན༌ ལོགས༌ཏེ༌ མ༌ཡོངས༌།
11 སུམ༌པ༌བོ༌ ཧ༌རར༌པ༌ ཨ༌གེའེ༌ བུ༌ཚ༌ ཤམ༌མཧ༌ ཨིན༌པིན༌།
ཏུས༌ ཞིག༌ག༌ ཕི༌ལིས༌ཏི༌པ༌གུན༌ ལེ༌ཧིའེ༌ ནང༌ང༌ སྲན༌མ༌ སྐྱེས༌ཏེ༌ ཡོད༌ཁན༌ནི༌ ཞིང༌ངི༌ཀ༌ ཛོམས༌ཏེ༌ ཡོད༌ ཟ༌ནེ༌ ཨིས༌ར༌ཨེལ༌པའེ༌ མག༌མི༌གུན༌ མ༌ནོལ༌ལ༌ ཤོར༌།
12 ཨིན༌ནའང༌ ཤམ༌མཧ༌ ཞིང༌ངི༌ སྐྱིལ༌ལ༌ ཁོ༌རང༌ངི༌ ས༌ཆ༌ སྟན༌པོ༌ ཟུམས༌ཏེ༌ ཕི༌ལིས༌ཏི༌པ༌གུན༌ནི༌ གྱབ༌གལ༌ལ༌ ནོལས༌ ཡང༌ ཁོང༌གུན༌ སདས༌།
ཏེ༌ ཞག༌ག༌ ཡ༌ཝའེ༌ ཁོང༌གུན༌ལ༌ གྱལ༌ཁ༌ ཀྲག༌པོ༌ སལས༌།
13 རྔབ༌སའེ༌ ཏུས༌ལ༌ དཱ༌བིད༌ ཨ༌དུལ༌ལམ༌མི༌ བྲག༌ཕུགས༌སི༌ ནང༌ང༌ ཡོད༌ ཟ༌ནེ༌ ཁོའེ༌ གྱལ༌ཤོག༌ མག༌མི༌ 30 ཕྲོ༌ནེ༌,
ཁོང༌ སུམ༌ དཱ༌བིད༌ ཡོད༌ས༌ ཡོངས༌།
ཏེན༌ན༌ ཏུས༌ ཕི༌ལིས༌ཏི༌པ༌ མག༌མི༌ རེ༌ཕ༌འིམ༌མི༌ ལུང༌པའེ༌ ནང༌ང༌ དུགས༌ཏེ༌ ཡོད༌པིན༌།
14 དཱ༌བིད༌ ཨིབ༌སའེ༌ ནས༌ས༌ སྟན༌པོའེ༌ ནང༌ང༌ ཡོད༌ཏུས༌ བེད༌ལེ༌ཧེམ༌མི༌ གྲོང༌ཁྱེར༌རི༌ ནང༌ ཕི༌ལིས༌ཏི༌པའེ༌ ཞན༌ མག༌མི༌ སྡེ༌ དུགས༌ཏེ༌ ཡོད༌པིན༌།
15 དཱ༌བིད༌དི༌ ཁོ༌རང༌ ལྡན༌ཁན༌ནི༌ ནས༌སའེ༌ ཆུ༌ ཐུང༌ཅེས༌སི༌ དོད༌པ༌ སྲན༌ཏྲེ༌ ཅོས༌ཏེ༌ ཟེརས༌,
“སུ༌ཞིག༌གི༌ ངའེ༌ ཕིའ༌ བེད༌ལེ༌ཧེམ༌མི༌ སྒོའེ༌ དུན༌ནི༌ ཆུ༌དོང༌ངི༌ ནང༌ནེ༌ ཆུ༌ ཁྱོངས༌ཏེ༌ ངའེ༌ དོད༌པ༌བོ༌ གྲུབ༌ཅུག༌ཨིན༌།”
16 ཏེ༌ནེ༌ ཁོང༌ སུམ༌ཀོའེ༌ ཕི༌ལིས༌ཏི༌པའེ༌ མག༌མིའ༌ ནོལ༌ཨིན༌ སོང༌ཏེ༌ བེད༌ལེ༌ཧེམ༌མི༌ སྒོའེ༌ དུན༌ནི༌ ཆུ༌དོང༌ནེ༌ ཆུ༌ ཅུས༌ཏེ༌ དཱ༌བིད༌དི༌ ཕིའ༌ ཁྱོངས༌།
ཨིན༌ནའང༌ ཁོང༌ངི༌ ཏེ༌བོ༌ མ༌ཐུང༌ང༌ ཡ༌ཝའ༌ ཆོད༌པ༌ ཕུལ༌ལ༌ ཕོས༌།
17 ཁོའེ༌ ཟེརས༌,
“འི༌ ཆུ༌ ཐུང༌ཅེས༌པོ༌ ངའ༌ འོས༌པ༌ ཚོར༌ར༌ མེ༌རག༌།
ཏེ༌བོ༌ འི༌ མི༌གུན༌ནི༌ ཁྲག༌ ཐུང༌ཁན༌ ཙོགས༌ ཆེན༌ ཀ༌གུན༌ནི༌ ཁོ༌རང༌ངི༌ སྲོག༌ ཇིགས༌ནང༌ངི༌ ནང༌ང༌ ཏངས༌ཏེ༌ ཏེ༌བོ༌ ཁྱོངས༌།”
ཏེ༌བོའེ༌ཕིའ༌ དཱ༌བིད༌དི༌ ཆུ༌བོ༌ མ༌ཐུངས༌།
འི༌བོ༌ ཏེ༌ སྤའ༌འོ༌ སུམ༌ཀོའེ༌ ཅོ༌ཁན༌ནི༌ ལས༌གུན༌ནི༌ སྤེ༌ ཅིག༌ ཨིན༌ནོག༌།
18 ཟེ༌རུའི༌འཧའེ༌ བུ༌ཚ༌ ཡོ༌འབ༌བི༌ ནོ༌ ཨ༌བི༌ཤའི༌ ཏེ༌ གྱལ༌ཤོག༌ མག༌མི༌ 30 འུ༌སྐྱོང༌ ཨིན༌པིན༌།
མག༌ ཞིག༌གི༌ ནང༌ང༌ ཁོའེ༌ ཁོ༌རང༌ངི༌ དུང༌ ཉམ༌པོ༌ གྲ༌འོ༌ 300 སདས༌།
ཏེ༌བོའེ༌ ཞས༌ཏེ༌ ཁོའང༌ ཞན༌ སུམ༌ཀོ༌ ཙོགས༌ལ༌ མིང༌ཅན༌ གྱུར༌།
19 ཨ༌བི༌ཤའི༌ གྱལ༌ཤོག༌ མག༌མི༌ 30 ནང༌ནེ༌ མིང༌ཅན༌བོ༌ ཨིན༌པིན༌ ཡང༌ ཁོ༌ ཁོང༌གུན༌ནི༌ འུ༌སྐྱོང༌ གྱུར༌ ཨིན༌ནའང༌ ཁོ༌ ཏེ༌ སྤའ༌འོ༌ སུམ༌ཀོའེ༌ ཕྲོའ༌ མ༌ཐེའ༌ ཨིན༌ནོག༌ །
20 ཡེ༌ཧོའི༌དའི༌ བུ༌ཚ༌ བེ༌ནཱའི༌འཧ༌ ཀབ༌ཟེའེལ༌པ༌ ནོལ༌ཁན༌ སེམས༌ཤུགས༌ཅན༌ ཨིན༌པིན༌,
ཁོའེ༌ ལས༌ ཀྲག༌པོ༌ མང༌པོ༌ ཅོས༌,
ཏེ༌ནང༌ང༌ མོ༌འབ༌བི༌ སྤའ༌འོ༌ ཉིས༌ སད༌ཁན༌བོའང༌ ཐེས༌ཏེ༌ ཨིན༌ནོག༌།
ཞག༌ཤིག༌ ཁ༌ཏངས༌ཏེ༌ ཡོད༌ ཟ༌ནེ༌ ཁོ༌ དོང༌ངི༌ ཐིལ༌ལ༌ སོང༌ཏེ༌ ཁོའེ༌ སིང༌གེ༌ སད༌།
21 བེར༌ཀ༌ རོམ༌པོ༌ ཞིག༌ ཁུར༌ཏེ༌ བེ༌ནཱའི༌འཧ༌ ཟུགས༌ མ༌ ཆེན༌མོ༌ཅན༌ ཨི༌ཇིབ༌པ༌ མག༌མི༌ དུང༌ ཁུར༌ཁན༌ ཞིག༌ག༌ ནོལ༌ལ༌ སོང༌ཏེ༌ ཁོའེ༌ ལག༌པའེ༌ ནང༌ནེ༌ དུང༌ ཀོགས༌ ཡང༌ ཁོའ༌ ཙུགས༌ཏེ༌ སདས༌།
22 འི༌ཙོགས༌ ལས༌ ཅོ༌ཅེས༌པའེ༌ བེ༌ནཱའི༌འཧ༌ ཏེ༌ སྤའ༌འོ༌ སུམ༌ཀོ༌ ཙོགས༌ མིང༌ཅན༌ གྱུར༌།
23 གྱལ༌ཤོག༌ མག༌མི༌ 30 ཕྲོའ༌ ཁོའ༌ མང༌ང༌ རྩི༌ཝ༌ ཐོབ༌ ཨིན༌ནའང༌ ཁོ༌ སྤའ༌འོ༌ སུམ༌ཀོའེ༌ ཕྲོའ༌ མན༌པིན༌།
དཱ༌བིད༌དི༌ ཁོ༌ དཱ༌བིད༌ལ༌ སྲུང༌ཁན༌ནི༌ མག༌མི༌གུན༌ནི༌ འུ༌སྐྱོང༌ང༌ སྐོས༌།
24 གྱལ༌ཤོག༌ མག༌མི༌ 30 འི༌གུན༌ ཨིན༌ནོག༌:
ཡོ༌འབ༌བི༌ ནོ༌ ཨ༌ས༌ཧེལ༌,
བེད༌ལེ༌ཧེམ༌པ༌ གྲོ༌གྲོའེ༌ བུ༌ཚ༌ ཨེལ༌ཧ༌ནན༌,
25 ཧ༌རོད༌པ༌ ཤམ༌མཧ༌ དང༌ ཨེ༌ལི༌ཀ༌,
26 པེ༌ལོན༌པ༌ ཧེ༌ལེཟ༌,
ཀྲེ༌ཀོའ༌པ༌ ཨིཀ༌ཀེཤ༌ཤི༌ བུ༌ཚ༌ ཨི༌ར༌,
27 ཨ༌ན༌ཐོད༌པ༌ ཨ༌བིའེ༌ཟེར༌,
ཧུ༌ཤཧ༌པ༌ སིབ༌བེ༌ཀཱའི༌,
28 ཨ༌ཧོཧ༌པ༌ ཟལ༌མོན༌,
ནེ༌ཏོ༌ཕཧ༌པ༌ མ༌ཧ༌རཱའི༌,
29 ནེ༌ཏོ༌ཕཧ༌པ༌ བའ༌ནཧའེ༌ བུ༌ཚ༌ ཧེ༌ལེད༌,
བེན༌ཡཱ༌མིན༌ནི༌ ས༌ཀྱད༌དི༌ ནང༌ང༌ ཡོད༌ཁན༌ གི༌བེའཧ༌པ རི༌བཱའི༌ བུ༌ཚ༌ ཨི༌ཐཱའི༌,
30 ཕི༌ར༌ཐོན༌པ༌ བེ༌ནཱའི༌འཧ༌,
གའཤ༌ཤི༌ ལུང༌པ༌ནེ༌ ཧིད༌དཱའི༌,
31 ཨ༌ར༌བཧ༌པ༌ ཨ༌བི༌འལ༌བོན༌,
བ༌ཧུ༌རིམ༌པ༌ ཨཟ༌མ༌ཝེཐ༌,
32 ཤའལ༌བོན༌པ༌ ཨེ༌ལིའ༌བ༌,
ཡ༌ཤེན༌ནི༌ བུ༌ཚ༌གུན༌,
ཡོ༌ན༌ཐན༌
33 ཧ༌རར༌པ༌ ཤམ༌མཧའེ༌ བུ༌ཚ༌,
ཧ༌རར༌པ༌ ཤ༌རར༌རི༌ བུ༌ཚ༌ ཨ༌ཧི༌འམ༌།
34 མའ༌ཀཧ༌པ༌ ཨ༌ཧས༌བཱའི༌ བུ༌ཚ༌ ཨེ༌ལི༌ཕེ༌ལེཏ༌,
གི༌ལོཧ༌པ༌ ཨ༌ཧི༌ཐོ༌ཕེལ༌ལི༌ བུ༌ཚ༌ ཨེ༌ལི༌འམ༌,
35 ཀར༌མེལ༌པ༌ ཧེཟ༌རོ༌,
ཨར༌བ༌པ༌ པའ༌རཱའི༌,
36 ཟོ༌བཧ༌པ༌ ན༌ཐན༌ནི༌ བུ༌ཚ༌ ཨི༌གལ༌,
གཱད༌པ༌ བ༌ནི༌,
37 ཨེམ༌མོན༌པ༌ ཟེ༌ལེག༌,
ཡོ༌འབ༌བི༌ མག༌ཆ༌ ཁུར༌ཁན༌ བེ༌རོཐ༌པ༌ ན༌ཧ༌རཱའི༌,
38 ཡཏ༌ཏིར༌པ༌ ཨི༌ར༌ དང༌ ག༌རེབ༌,
39 ཧེད༌པ༌ ཨུ༌རི༌ཡཱཧ༌,
ལྡོམ༌ 37 ཡོད༌ཏེ༌ ཨིན༌ནོག༌།