ཡ༌ཝ༌ དཀོན༌མཆོག༌ག༌ དཱ༌བིད༌དི༌ སྟོད༌པའེ༌ ལུ༌།
22:1 ནེ༌ 51
22
ཡ༌ཝའེ༌ དཱ༌བིད༌,
ས༌འུལ༌ དང༌ ཁོའེ༌ གྲ༌འོ༌ ཚང༌མའེ༌ ཀ༌ནེ༌ སྐྱོབ༌བ༌ ཛད༌དི༌ ཞག༌ག༌ ཁོའེ༌ ཡ༌ཝའ༌ སྟོད༌པ༌ ཕུལ༌ཨིན༌ ལུ༌ ཏངས༌།
2 ཁོའེ༌ ཟེརས༌,
“ཡ༌ཝ༌ ངའེ༌ བྲག༌,
ངའེ༌ སྲུང༌སྐྱོབ༌བི༌ གྱང༌སྐོར༌ ཡང༌ ངའེ༌ སྐྱབ༌གོན༌,
3 ངའེ༌ དཀོན༌མཆོག༌ ངའེ༌ བྲག༌,
ཁོང༌ངི༌ ནང༌ང༌ ངའེ༌ སྲུང༌སྐྱོབ༌ ལེན༌ནད༌།
ཁོང༌ ངའེ༌ ཀབ༌ཅེས༌སི༌ མག༌ཆ༌ ཡང༌ ངའ༌ སྐྱོབ༌ཁན༌ནི༌ ཁྱུད༌,
ཁོང༌ ངའེ༌ ཇིགས༌པ༌ མེད༌སའེ༌ སྟན༌པོ༌ ནས༌ས༌,
ངའེ༌ སྲུང༌སྐྱོབ༌ ལེན༌ས༌
ཡང༌ ངའེ༌ སྐྱབ༌གོན༌,
ཉེ༌རང༌ངི༌ ང༌ ནོད༌སྐྱལ༌ཁན༌གུན༌ནེ༌ སྐྱོབ༌བ༌ ཛདས༌།
4 ངའེ༌ རོགས༌སི༌ ཕིའ༌ ཡ༌ཝའ༌ བོད༌དད༌,
ཁོང༌ སྟོད༌པའི༌ འོས༌པ༌ ཨིན༌
ཡང༌ ཁོང༌ངི༌ ང༌ ངའེ༌ གྲ༌འོ༌གུན༌ནི༌ ཀ༌ནེ༌ སྐྱོབ༌བ༌ ཛདས༌།
5 ཆུལ༌བག༌ ཆེན༌མོ༌ ཙོགས༌ལ༌ ཤི༌ཅེས༌སི༌ ང༌ སྐོརས༌,
ཡང༌ ང༌ ཁྲེས༌ཏོར༌ ཅོ༌ཁན༌ ཆུ༌ལོག༌ ཙོགས༌ ཡོངས༌།
6 རོམ༌ཁང༌ངི༌ ཐག༌པ༌ ངའ༌ སྲིལས༌ཏེ༌
ཤི༌ཅེས༌ ལམ༌མི༌ཀ༌ ང༌ ཟུམ༌མ༌ལ༌ དུགས༌།
7 རྡུག༌ངལ༌ལི༌ ནང༌ང༌ ངའེ༌ ཡ༌ཝའ༌ བོད༌པིན༌,
འོ༌ན༌ ངའེ༌ ང༌རང༌ངི༌ དཀོན༌མཆོག༌ག༌ རོགས༌ ཛད༌ཅེས༌ལ༌ བོད༌པིན༌།
ཁོང༌ངི༌ ཏམ༌པ༌ ཆོད༌ཁང༌ངི༌ ནང༌ནེ༌ ཁོང༌ངི༌ ངའེ༌ སྐད༌ སན༌ན༌ ཛདས༌
ངའེ༌ བོད༌ཁན༌བོ༌ ཁོང༌ངི༌ ནམ༌ཅོག༌ ཚག༌པ༌ ལེབ༌།
8 ཏེ༌ནེ༌ ཇིག༌རྟེན༌ནི༌ཀ༌ སང༌གུལ༌ ཡོངས༌ཏེ༌ སྲུགས༌,
ནམ༌ཁའེ༌ མག༌ལྡན༌ སྲུགས༌།
ཁོང༌ངི༌ ཐུགས༌སྲོའེ༌ ཞས༌ཏེ༌ ཏེ༌གུན༌ ཇིགས༌ཏེ༌ དར༌།
9 ཁོང༌ངི༌ ན༌ཁུང༌ནེ༌ ཏུད༌པ༌ ཡང༌ ཞལ༌ནེ༌ མེ༌ ཀྲག༌པོ༌ བིང༌,
ཏེ༌ནང༌ནེ༌ མེ༌ བར༌ཨིན༌ ཡོད༌ཁན༌ནི༌ སོལ༌ལ༌ བིང༌།
10 ཁོང༌ངི༌ ནམ༌ཁའ༌ ཕེའ༌ ཛད༌ཏེ༌ ཐུར༌ལ༌ སྐྱོདས༌,
ཁོང༌ངི༌ ཞབས༌སི༌ ཡོག༌ག༌ སྲིན༌ནག༌གུན༌ དུགས༌།
11 ཤོག༌པ༌ཅན༌ནི༌ ཕོ༌ཉའེ༌ཀ༌a ཞོན༌ན༌ ཛད༌ཏེ༌
ལུངས༌པོའེ༌ ཤོག༌པའེ༌ཀ༌ ཁོང༌ ཅི༌པ༌ ཙོགས༌ལ༌ འུར༌ར༌ ཛདས༌།
12 ཁོང༌ངི༌ མུན༌ནག༌ རས༌ཤིག༌ ཙོགས༌ལ༌ ཁོང༌རང༌ང༌ ཀབ༌བ༌ ཛདས༌
ཡང༌ ཆར༌པ༌ གང༌ཁན༌ནི༌ སྲིན༌ ཐུག༌མོའེ༌ ཁོང༌ང༌ སྐོརས༌།
13 ཁོང༌ངི༌ དུན༌ཁོར༌ མ༌ འོད༌ཅན༌
ཏེ༌ནང༌ནེ༌ མེ༌ བར༌ཁན༌ནི༌ སོལ༌ལ༌ ཕང༌དུག༌།
14 ནམ༌ཁའ༌ནེ༌ ཡ༌ཝའེ༌ བྲུག༌ལྡིར༌ཁན༌ ཙོགས༌ལ༌ ཞལ༌ཏ༌ སལས༌,
ཚང༌མའེ༌ སང༌ ཝང༌ཅན༌ ཡ༌ཝའེ༌ ཞལ༌ཏ༌ ཀྲག༌པོ༌ ཚོར༌།
15 ཁོང༌ངི༌ རྡའ༌ ཏངས༌ཏེ༌ གྲ༌འོ༌གུན༌ ཡན༌ཅུག༌ག༌ ཛདས༌,
སྐམ༌ལག༌ ཙོགས༌ འོད༌ བར༌ ཡང༌ ཁོང༌གུན༌ མེད༌ཁན༌ སོང༌།
16 ཡ༌ཝའེ༌ ཐུགས༌སྲོའེ༌ ནང༌ང༌ ན༌ཁུང༌ནེ༌ འུགས༌ ལྕིན༌ཏྲེ༌
ལེན༌ན༌ ཛད༌ཏེ༌ གྲ༌འོ༌གུན༌ལ༌ ཁའ༌སྐྱེའ༌ ཛད༌ད༌ཅིག༌,
ཚོའེ༌ ཐིལ༌ལི༌ ས༌ཀྱད༌ ཐོང༌ ཡང༌ ཇིག༌རྟེན༌ནི༌ མག༌ལྡན༌གུན༌ སྔོན༌ཅུག༌ག༌ ཛདས༌།
17 ཁོང༌ ནམ༌ཁའ༌ནེ༌ ཡོག༌ག༌ སྐྱོད༌ཏེ༌ ང༌ སྐྱོབ༌བ༌ ཛདས༌
ཁོང༌ངི༌ ང༌ ཆུ༌ ཏིང༌ཅན༌ནི༌ ནང༌ནེ༌ ཕིངས༌ཏེ༌ ཁྱོང༌ང༌ ཛདས༌།
18 ཁོང༌ངི༌ ངའེ༌ གྲ༌འོ༌ ཤུགས༌ཅན༌,
ངའ༌ ནཕ༌རད༌ ཅོ༌ཁན༌གུན༌ནི༌ ཀ༌ནེ༌ ང༌ སྐྱོབ༌བ༌ ཛདས༌
ཀ༌གུན༌ ངའེ༌ ཕིའ༌ མངས༌ཏེའང༌ ཤེད༌ཅན༌ ཡོད༌པིན༌།
19 ང༌ རྡུག༌ངལ༌ལི༌ ནང༌ང༌ ཡོད༌ ཟ༌ནེ༌ ངའེ༌ གྲ༌འོ༌གུན༌ནི༌ ངའ༌ སྤུང༌གོལ༌ ཅོས༌
ཨིན༌ནའང༌ ཡ༌ཝའེ༌ ངའ༌ རོགས༌ ཅོའ༌ ཛདས༌།
20 ཁོང༌ངི༌ ཇིགས༌པ༌ མེད༌ཁན༌ནི༌ ནས༌ས༌ ཕལ༌ཅན༌ནི༌ ནང༌ང༌ ང༌ ཁྱོང༌ང༌ ཛདས༌།
ཁོང༌ངི༌ ང༌ སྐྱོབ༌བ༌ ཛདས༌ ཅིའ༌ཟེར༌ན༌ ཁོང༌ ངའེ༌ཀ༌ ཐུག༌ཉེས༌ས༌ ཛདས༌།
21 ཡ༌ཝའེ༌ ངའེ༌ ཀྲང༌པོ༌ ཅོ༌ཁན༌ ནང༌ཞིན༌ ངའ༌ སོལ༌རས༌ སལས༌,
ཡང༌ ང༌ ནོངས༌མེད༌ ཨིན༌ཅེས༌པའེ༌ ཁོང༌ངི༌ ངའ༌ ཅིན༌ལབས༌ སལས༌,
22 ཅིའ༌ཟེར༌ན༌ ང༌ ཡ༌ཝའེ༌ ལམ༌མི༌ཀ༌ གྲུལ༌ཏེ༌
ངའེ༌ དཀོན༌མཆོག༌ནེ༌ གྱུར༌ཏེ༌ ངན༌པ༌ མ༌ནེ༌ མ༌ཅོས༌པིན༌།
23 ཁོང༌ངི༌ ཁྲིམས༌ ཚང༌མ༌ ངའེ༌ ཁའ༌ཉན༌ཏེ༌
ཁོང༌ངི༌ བཀའ༌རྒྱ༌གུན༌ མ༌ནེ༌ མ༌ ཕངས༌པིན༌།
24 དཀོན༌མཆོག༌གི༌ སྐུན༌དུན༌ལ༌ ང༌ སྐྱོན༌མེད༌ ཨིན༌།
ངའེ༌ ང༌རང༌ སྡིག༌པའེ༌ ལས༌གུན༌ནེ༌ ཐག༌རིང༌ང༌ བོར༌པིན༌།
25 ཡ༌ཝའེ༌ ངའེ༌ ཀྲང༌པོ༌ ཅོ༌ཁན༌ ནང༌ཞིན༌ ངའ༌ སོལ༌རས༌ སལས༌།
ཁོང༌ངི༌ ངའ༌ ནོངས༌མེད༌ ཨིན༌ཁན༌བོ༌ ཁྱེན༌ན༌ ཛདས༌།
26 ཨིད༌ཤེས༌ཅན༌གུན༌ནི༌ ཕིའ༌ ཉེ༌རང༌ ཨིད༌ཤེས༌ཅན༌ ཞུགས༌ས༌ ཛདས༌
ཡང༌ སྐྱོན༌མེད༌གུན༌ནི༌ ཕིའ༌ ཉེ༌རང༌ སྐྱོན༌མེད༌ ཞུགས༌ས༌ ཛདས༌།
27 སེམས༌ལག༌མོ༌གུན༌ནི༌ ཕིའ༌ ཉེ༌རང༌ངི༌ སེམས༌ལག༌མོ༌ སྟན༌ན༌ ཛདས༌
ཨིན༌ནའང༌ སེམས༌ངན༌པ༌གུན༌ནི༌ གྱབ༌གལ༌ ཉེ༌རང༌ངི༌ ཛདས༌།
28 ཉེ༌རང༌ངི༌ སྙིང༌བོལ༌མོ༌ ཡོད༌ཁན༌གུན༌ སྐྱོབ༌བ༌ ཛདས༌
ཨིན༌ནའང༌ ཕོ༌སོ༌ཅན༌གུན༌ནི༌ཀ༌ ཉེ༌རང༌ངི༌ སྣང༌ང༌ བོར༌ར༌ ཛད༌ཏེ༌
པས༌མོ༌ གྱུར༌ཅེས༌ལ༌ ཁོང༌གུན༌ལ༌ ཁྲེལ༌པ༌ སྟན༌ན༌ ཛདས༌།
29 ཡ༌ཝ༌ལེ༌ ཉེ༌རང༌ ངའེ༌ འོད༌པོ༌ ཨིན༌།
ཡ༌ཝ༌ ཉེ༌རང༌ངི༌ ངའེ༌ མུན༌གྲིག༌པོ༌ འོད༌ཅན༌ ཛདས༌།
30 ཉེ༌རང༌ངི༌ རོགས༌ ཉམ༌པོ༌ ངའ༌ གྲ༌འོའེ༌ མག༌མི༌ ཁྲེས༌ཏོར༌ ཅོ༌ཉན༌
དཀོན༌མཆོག༌ ང༌ ཉམ༌པོ༌ ཞུག༌ཤེས༌པའེ༌ ངའ༌ གྲ༌འོའེ༌ རྩིག༌པ༌ རྒལ༌ཉན༌།
31 དཀོན༌མཆོག༌གི༌ ལམ༌,
ཕུན༌སུམ༌ཚོགས༌པ༌ ཨིན༌,
ཡ༌ཝའེ༌ དམ༌ཆ༌ ཛད༌ཁན༌ ཚང༌མ༌ ཨིད༌ཤེས༌ཅན༌ ཨིན༌ནོག༌།
ཁོང༌ངི༌ ནང༌ང༌ སྲུང༌སྐྱོབ༌ ལེན༌ཁན༌གུན༌ནི༌ ཕིའ༌
ཁོང༌ སྐྱོབ༌ཅེས༌སི༌ མག༌ཆ༌བོ༌ ཨིན༌།
32 ཡ༌ཝ༌ མན༌ནེ༌ ཡང༌ སུ༌ དཀོན༌མཆོག༌ ཨིན༌?
ཡང༌ ཏེ༌ བྲག༌པོ༌ ང༌དང༌ངི༌ དཀོན༌མཆོག༌ མན༌པ༌ ཞན༌ སུ༌ ཨིན༌?
33 དཀོན༌མཆོག༌ ངའེ༌ སྐྱབ༌ཅོལ༌ལི༌ ནས༌ས༌ ཨིན༌
ཁོང༌ངི༌ ངའེ༌ ལམ༌མི༌ སྒག༌སྐྱིལ༌གུན༌ མེད༌ཁན༌ ཛདས༌།
34 ཁོང༌ངི༌ ངའེ༌ རྐང༌པ༌ ཤ༌ཝའེ༌ རྐང༌པ༌ ཙོགས༌ སྟན༌པོ༌ ཛད༌ཏེ༌
ང༌ རི༌ ཐོན༌པོའེ༌ཀ༌ ལངས༌ཏེ༌ དུག༌ཐུབ༌ཅུག༌ག༌ ཛདས༌།
35 ཁོང༌ངི༌ མག༌གི༌ ཕིའ༌ ངའེ༌ ལག༌པ༌ ལོབ༌ཇོང༌ སལ༌ཏེ༌
ངའ༌ ཟངས༌སི༌ ཞུ༌ སྐྱིལ༌ ཉན༌ཅེས༌སི༌ སྟོབས༌ སལས༌།
36 ཉེ༌རང༌ངི༌ རང༌ངི༌ གྱལ༌ཁའེ༌ སྲུང༌སྐྱོབ༌བི༌ མག༌ཆ༌ ངའ༌ སལ༌ལ༌ ཛདས༌
ཡང༌ ཉེ༌རང༌ངི༌ རོགས༌ ཛད༌ཅེས༌པོའེ༌ ང༌ མིང༌ཅན༌ གྱུར༌།
37 ངའེ༌ རྐང༌པ༌ གྲེད༌ མི༌གྲེད༌ཅེས༌སི༌ ཕིའ༌
ཉེ༌རང༌ངི༌ ངའེ༌ ལམ༌གུན༌ ཞང༌ཅན༌ ཛདས༌།
38 ངའེ༌ ང༌རང༌ངི༌ གྲ༌འོ༌གུན༌ལ༌ རྡས༌ཏེ༌ ཁྱེར༌ཏེ༌ ཁོང༌གུན༌ མེད༌ཁན༌ ཅོས༌པིན༌
ཁོང༌གུན༌ མེད༌ཁན༌ ཆ༌ཆའ༌ ཚག༌པ༌,
ངའེ༌ ངལ༌ མན༌ནེ༌ མ༌ཚོས༌པིན༌།
39 ལང༌ མི༌ཉན༌ཅེས༌ལ༌ ངའེ༌ ཁོང༌གུན༌ སིང༌ མེད༌ཁན༌ ཅོས༌པིན༌,
ཁོང༌གུན༌ ངའེ༌ རྐང༌པའེ༌ ཡོག༌ག༌ གྱེལ༌ཏེ༌ ཤི༌།
40 ཉེ༌རང༌ངི༌ ངའ༌ མག༌གི༌ ནང༌ང༌ ནོལ༌ཅེས༌སི༌ ཤེད༌ སལས༌,
ངའ༌ གྱབ༌གལ༌ ཅོ༌ཁན༌གུན༌ ཉེ༌རང༌ངི༌ ངའེ༌ རྐང༌པའེ༌ ཡོག༌ག༌ ཁྱོང༌ང༌ ཛདས༌།
41 ཉེ༌རང༌ངི༌ ངའེ༌ གྲ༌འོ༌གུན༌ ངའ༌ གྱབ༌ ལོགས༌ཏེ༌ ཤོར༌ཅུག༌ག༌ ཛདས༌།
ངའ༌ ནཕ༌རད༌ ཅོ༌ཁན༌གུན༌ ངའེ༌ མེད༌ཁན༌ ཅོས༌པིན༌།
42 ཁོང༌གུན༌ནི༌ རོགས༌སི༌ ཕིའ༌ བོདས༌ ཨིན༌ནའང༌ སྐྱོབ༌བ༌ སུའང༌ མ༌ཡོངས༌།
ཁོང༌གུན༌ནི༌ ཡ༌ཝའང༌ ཞུ༌ཝ༌ ཕུལས༌ ཨིན༌ནའང༌ ཁོང༌ངི༌ ལན༌ མ༌སལས༌།
43 ངའེ༌ ཁོང༌གུན༌ ཐགས༌ཏེ༌ ཇིག༌རྟེན༌ནི༌ ཐལ༌བ༌ ཙོགས༌ ཅོས༌པིན༌
ངའེ༌ ཁོང༌གུན༌ ལམ༌མི༌ ཀ༌ལག༌ ཙོགས༌ལ༌ རྐང༌པ༌ ཉམ༌པོ༌ ཉེས༌པིན༌།
44 གྱབ༌གལ༌ ཅོ༌ཁན༌ནི༌ ངའེ༌ མི༌གུན༌ནི༌ ཀ༌ནེ༌ ཉེ༌རང༌ངི༌ ང༌ སྐྱོབ༌བ༌ ཛདས༌།
གྱལ༌ཁམས༌ མང༌པོའེ༌ཀ༌ ཝང༌སྲུལ༌ཅེས༌ལ༌ ཉེ༌རང༌ངི༌ ངའ༌ སོན༌ཏེའ༌ བར༌ར༌ ཛདས༌།
ཞན༌ཡུལ༌ལི༌ མི༌གུན༌ནིའང༌ ངའ༌ ཞབས༌ཏོག༌ ཞུས༌།
45 ཇིགས༌སི༌ ནང༌ང༌ ཞན༌ ཡུལ༌ལི༌ མི༌གུན༌ནི༌ ངའེ༌ དུན༌ལ༌ གོ༌རྒུ༌ དུག༌།
ངའེ༌ སྐོར༌ལ༌ ཚོར༌ར༌ཅིག༌ ཁོང༌གུན༌ནི༌ ངའེ༌ ཟེར༌ཁན༌གུན༌ལ༌ ཁའ༌ཉནས༌།
46 ཁོང༌ ཚང༌མའ༌ སེམས༌ཤུགས༌ མེད༌ཁན༌ སོང༌,
ཡང༌ ཨིབ༌སའེ༌ ནས༌སའེ༌ ནང༌ནེ༌ དར༌ཨིན༌ བིང༌ཏེ༌ ཡོངས༌།
47 ཡ༌ཝ༌ སོན༌པོ༌ ངའེ༌ བྲག༌,
ཁོང༌ང༌ ངའེ༌ སྟོད༌པ༌ ཕུལ༌ལད༌།
ངའེ༌ ཐར༌པའེ༌ བྲག༌ དཀོན༌མཆོག༌ག༌ སྤལ༌ ཐོབ༌ཤིག༌།
48 ཁོང༌,
ང༌ ནོད༌པ༌ སྐྱལ༌ཁན༌གུན༌ལ༌ ལན༌ སལ༌ཁན༌ དཀོན༌མཆོག༌ ཞུགས༌ཏེ༌ ཨིན༌,
ཁོང༌ངི༌ གྱལ༌ཁམས༌གུན༌ ངའེ༌ ང༌ཡོག༌ག༌ ཁྱོང༌ང༌ ཛདས༌།
49 ཡང༌ ང༌ ངའེ༌ གྲ༌འོ༌གུན༌ནི༌ ཀ༌ནེ༌ སྐྱོབས༌ཏེ༌ ཁྱོང༌ང༌ ཛདས༌,
ཉེ༌རང༌ངི༌ ང༌ ངའེ༌ གྲ༌འོ༌གུན༌ནི༌ དུན༌ལ༌ རྩི༌ཝ༌ སལ༌ལ༌ ཛདས༌།
མི༌ ཇིགས༌པ༌གུན༌ནེ༌ ཉེ༌རང༌ངི༌ ངའ༌ སྐྱོབ༌བ༌ ཛདས༌།
50 ཏེ༌བོའེ༌ཕིའ༌ ཡ༌ཝ༌ལེ༌ གྱལ༌ཁམས༌ ཚང༌མའེ༌ ཕྲོའ༌ ངའེ༌ ཉེ༌རང༌ང༌ སྟོད༌པ༌ ཕུལ༌ལད༌,
ངའེ༌ ཉེ༌རང༌ངི༌ ཚན༌ལ༌ སྟོད༌པའེ༌ ལུ༌ ཕུལ༌ཨིན༌།
51 ཉེ༌རང༌ངི༌ རང༌ངི༌ གྱལ༌པོའ༌ མ༌ ཀྲག༌པོ༌ གྱལ༌ཁ༌གུན༌ སལས༌,
ཉེ༌རང༌ངི༌ ལྡམ༌མ༌ ཛད༌ཁན༌,
ང༌ དཱ༌བིད༌ དང༌ ངའེ༌ པུར༌གྱུད༌གུན༌ལ༌
ཉེ༌རང༌ངི༌ ཨིད༌ཤེས༌ཅན༌ནི༌ ཅམས༌པ༌ ཏུས༌གྱུན༌ ཛད༌ཨིན༌།