ས༌མུའེལ༌ལི༌ སྤེ༌ཆ༌ ཏང༌པོ༌
ས༌མུའེལ༌ལི༌ སྤེ༌ཆ༌ ཏང༌པོ༌ དང༌ ཉིས༌པའེ༌ སྐར༌།
གོ༌ཟུག༌གི༌ཀ༌ ས༌མུའེལ༌ གང༌པོ༌ སྤེ༌ཆ༌ ཅིག༌ ཡོད༌པིན༌ ཨིན༌ནའང༌ ཏེ༌བོ༌ མ༌ རིང༌མོ༌ ཡོད༌ཅེས༌པའེ༌ སྤེ༌ཆ༌ ཉིས༌སི༌ ནང༌ང༌ བགོས༌ཏེ༌ བྲིས༌ ཀ༌གུན༌ དག༌ས༌ ང༌དང༌ང༌ ཞལ༌ཆད༌ སྙིང༌པའེ༌ ནང༌ང༌ ཐོབ༌བ༌ནོག༌།
ས༌མུའེལ༌ལི༌ སྤེ༌ཆའེ༌ ནང༌ང༌ ལབ༌ཞ༌ སུམ༌ ཡོད༌ཏེ༌ ཨིན༌ནོག༌
1. དཀོན༌མཆོག༌གི༌ ཕོ༌སོ༌ཅན༌གུན༌ལ༌ གྱབ༌གལ༌ ཨིན༌ནའང༌ པས༌མོ༌གུན༌ལ༌ རྩི༌ཝ༌ ཀྲག༌པོ༌ སལ༌ཅེས༌།
2. སྡིག༌པ༌ ཅོ༌ཁན༌གུན༌ནི༌ ཀལ༌ཏེས༌ པས༌མོ༌ གྱུར༌ཏེ༌ གྱོད༌པ༌ ཅོ༌ན༌ དཀོན༌མཆོག༌གི༌ ཁོང༌གུན༌ལ༌ ཤགས༌པ༌ ཨིན༌ནའང༌ གྱོད༌པ༌ མ༌ཅོ༌ཁན༌གུན༌ལ༌ ཆད༌པ༌ སལ༌ཅེས༌།
3. དཀོན༌མཆོག༌གི༌ ཨིས༌ར༌ཨེལ༌པ༌ མི༌གུན༌ནི༌ ཕིའ༌ ཐའ༌མེད༌པའེ༌ གྱལ༌པོ༌ ཞིག༌ སལ༌ཅེས༌སི༌ ཞལ༌ཆད༌ ཛདས༌།
ཡེ༌ཤུ༌ ཀྲོངས༌ཏེ༌ སོན༌པོའ༌ ཞངས༌ཏེ༌ སྟིང༌ནེ༌ སོན༌ཏེའ༌ ཡོད༌ཁན༌ནི༌ ཡ༌ཧུ༌དཱ༌པའེ༌ ཆོས༌སི༌ ལོབ༌བོན༌ མང༌ཆེའ༌བོའེ༌ ས༌མུའེལ༌ལི༌ སྤེ༌ཆ༌,
ལུང༌སྟོན༌པ༌ ས༌མུའེལ༌,
གཱད༌ དང༌ ན༌ཐན༌ གུན༌ནི༌ བྲིས༌ཏེ༌ ཨིན༌ནོག༌ ཟེར༌ར༌ནོག༌།
ཨིན༌ནའང༌ དག༌སའེ༌ ཆོས༌སི༌ ནང༌ང༌ ཁས༌པ༌གུན༌ནི༌ གྱུན༌ཚན༌ མང༌པོའེ༌ ཞས༌ཏེ༌ ལུང༌སྟོན༌པ༌ ས༌མུའེལ༌,
གཱད༌ དང༌ ན༌ཐན༌ གུན༌ནི༌ བྲིས༌ཁན༌བོའེ༌ཀ༌ ཨིད༌ཤེས༌ ཅོའ༌ མ༌ནོག༌།
འི༌ སྤེ༌ཆ༌བོ༌ ལུང༌སྟོན༌པ༌ ས༌མུའེལ༌,
གཱད༌ དང༌ ན༌ཐན༌ སུའི༌ བྲིས༌ཏེ༌ ཨིན༌ནའང༌ ཅའང༌ ཁྱད༌ ཆ༌ཅེས༌ མ༌ནོག༌ ཅིའ༌ཟེར༌ན༌ འི༌ སྤེ༌ཆའེ༌ ལབ༌ཞ༌གུན༌ གྱུད༌ཏེ༌ དཀོན༌མཆོག༌གི༌ ཐུག༌ཉིད༌དི༌ འི༌ སྤེ༌ཆ༌ བྲི༌ཁན༌གུན༌ལ༌ ལམ༌སྟོན༌ ཛད༌ཁན༌བོ༌ སལ༌པོ༌ ཧ༌གོའ༌ནོག༌།
དག༌སའེ༌ ཆོས༌སི༌ ནང༌ང༌ ཁས༌པ༌གུན༌ནི༌ འི༌ སྤེ༌ཆ༌ གྱལ༌པོ༌ དཱ༌བིད༌ དང༌ སོ༌ལོ༌མོན༌ནི༌ ཝང༌སྲུལ༌ལི༌ ཏུས༌ ཀ༌བོ༌ གཙོ༌བོ༌ ཡེ༌ཤུ༌ ལྟམས༌སི༌ སང༌ ལོ༌ སྟོང༌ཅིག༌གི༌ སྔུན༌ལ༌,
བྲིས༌ཏེ༌ ཨིན༌ནོག༌ ཟེར༌ར༌ནོག༌།
སྤེ༌ཆ༌ བྲི༌ཁན༌བོའེ༌ ཨིས༌ར༌ཨེལ༌ སྐྱོབ༌ཁན༌ གོ༌ཁྲིད༌གུན༌ནི༌ ཝང༌སྲུལ༌ལི༌ སྟིང༌ནེ༌ བིང༌ཁན༌ མི༌ ཁག༌ཅན༌ སུམ༌མི༌ མི༌ཚེ༌ སྐོར༌ལ༌ བྲིས༌ཏེ༌ ཨིན༌ནོག༌།
ཨིས༌ར༌ཨེལ༌ སྐྱོབ༌ཁན༌ གོ༌ཁྲིད༌གུན༌ནི༌ ནང༌ནེ༌ ས༌མུའེལ༌ སྟིང༌ཇུག༌པོ༌ ཡང༌ ཁོ༌ དཀོན༌མཆོག༌གི༌ ལུང༌སྟོན༌པ༌ ཏང༌པོ༌བོ༌ ཨིན༌པིན༌།
ས༌འུལ༌ ཨིས༌ར༌ཨེལ༌ལི༌ གྱལ༌པོ༌ ཏང༌པོ༌,
ཁོའེ༌ ཚབས༌ལ༌ དཱ༌བིད༌ གྱལ༌པོ༌ གྱུར༌ཏེ༌ ཁོའེ༌ པུར༌གྱུད༌གུན༌ནི༌ དཀོན༌མཆོག༌གི༌ མི༌ ཨིས༌ར༌ཨེལ༌པ༌གུན༌ནི༌ཀ༌ ཏུས༌གྱུན༌ ཝང༌སྲུལས༌།
ཨེ༌ལི༌ དང༌ ས༌མུའེལ༌།
ཨེ༌ལིའེ༌ ནང༌ཚངས༌ བླ༌མ༌ ཆེན༌མོའེ༌ པུར༌གྱུད༌ནེ༌ ཨིན༌ཏེའང༌ དཀོན༌མཆོག༌ག༌ ཨིད༌ཤེས༌ མི༌ཅོ༌ཅེས༌ དང༌ ཁོང༌ངི༌ ཁའ༌ མི༌ཉན༌ཅེས༌པའེ༌ དཀོན༌མཆོག༌གི༌ ཁོའེ༌ ནང༌ཚངས༌ ཏེ༌ ཀོ༌སའེ༌ ཀ༌ནེ༌ ཐེན༌ན༌ ཛདས༌།
དཀོན༌མཆོག༌གི༌ ཁོང༌གུན༌ནི༌ ཚབས༌ལ༌ ས༌མུའེལ༌ ལྡམ༌མ༌ ཛདས༌ ཡང༌ ཁོའེ༌ དཀོན༌མཆོག༌ ཐུག༌ཉེས༌ ཅུགས༌པ༌ ཁོང༌ངི༌ ཁོ༌ ཨིས༌ར༌ཨེལ༌པ༌གུན༌ནི༌ བླ༌མ༌,
གོ༌ཁྲིད༌ དང༌ ལུང༌སྟོན༌པ༌ ཅོའ༌ ཛདས༌།
ས༌འུལ༌
ས༌མུའེལ༌ སྒས༌ས༌ཅིག༌ ཨིས༌ར༌ཨེལ༌པ༌གུན༌ནི༌ ཝང༌སྲུལ༌ཁན༌ གྱལ༌པོའེ༌ ཕིའ༌ ས༌མུའེལ༌ལ༌ ཞུ༌ཝ༌ ཕུལས༌།
དཀོན༌མཆོག༌གི༌ ས༌མུའེལ༌ལ༌ མོལས༌,
“ཨིས༌ར༌ཨེལ༌པ༌གུན༌ནི༌ ཁྱོ༌རང༌ མ༌ཕང༌ང༌ ང༌ ཁོང༌གུན༌ནི༌ གྱལ༌པོ༌ མ༌རྩིའ༌ ཕངས༌ཏེ༌ ཨིན༌ནོག༌།”
ཁོང༌གུན༌ནི༌ ཞུ༌ཝ༌བོའ༌ ས༌མུའེལ༌ དང༌ དཀོན༌མཆོག༌ ཐུག༌མ༌ཉེས༌ ཨིན༌ནའང༌ ཁོང༌ངི༌ ཁོང༌གུན༌ལ༌ གོས༌ཁན༌བོ༌ སལས༌།
ཁོང༌ངི༌ ས༌འུལ༌ ཨིས༌ར༌ཨེལ༌ལི༌ གྱལ༌པོའ༌ ལྡམ༌མ༌ ཛདས༌ ཡང༌ ཀལ༌ཏེས༌ ཁོའེ༌ དཀོན༌མཆོག༌གི༌ ཁའ༌ཉན༌ཏེ༌ ཁོང༌ང༌ རྩི༌ཝ༌ ཅོས༌པིན༌ན༌ ཁོའེ༌ པུར༌གྱུད༌གུན༌ནི༌ ཏུས༌གྱུན༌ནི༌ ཕིའ༌ ཝང༌སྲུལ༌ ཉན༌ཅེས༌ ཡོད༌པིན༌ ཨིན༌ནའང༌ ཨེ༌ལི༌ ནང༌ཚངས༌ ཙོགས༌ལ༌ ཁོའེ༌ དཀོན༌མཆོག༌གི༌ ཁའ༌ མ༌ཉན༌ན༌ ཡང༌ དཀོན༌མཆོག༌ མན༌པ༌ ཁོ༌རང༌ང༌ རྩི༌ཝ༌ ཐོབ༌ཅེས༌ལ༌ ཐད༌ པ༌སང༌ དཀོན༌མཆོག༌གི༌ ཁོ༌ ཕང༌ང༌ ཛདས༌།
དཱ༌བིད༌།
དཀོན༌མཆོག༌གི༌ ས༌འུལ༌ལི༌ ཚབས༌ལ༌ དཱ༌བིད༌ གྱལ༌པོའ༌ ལྡམ༌མ༌ ཛདས༌ ཅིའ༌ཟེར༌ན༌ དཱ༌བིད༌དི༌ སེམས༌ དཀོན༌མཆོག༌གི༌ ཐུག༌གོངས༌ ནང༌ཞིན༌ གྲུལས༌།
ས༌མུའེལ༌ལི༌ སྤེ༌ཆ༌ ཏང༌པོའེ༌ ནང༌ང༌ དཱ༌བིད༌,
ལས༌ ཚང༌མའེ༌ ནང༌ང༌ ཁྲངས༌པོ༌ ལུས༌པ༌ ཨིས༌ར༌ཨེལ༌པ༌གུན༌ ཁོའེ༌ཀ༌ ཐད༌ ཅིའ༌ཟེར༌ན༌ དཀོན༌མཆོག༌གི༌ ཁོའ༌ ཏེ༌ ཚང༌མའེ༌ ནང༌ང༌ ཁྲངས༌པོ༌ ལུས༌ཤུག༌ག༌ ཛདས༌།
ས༌འུལ༌ལ༌ དཱ༌བིད༌དི༌ཀ༌ ཚིག༌ཅེས༌ ཡོངས༌ ཅིའ༌ཟེར༌ན༌ དཀོན༌མཆོག༌གི༌ ཐུག༌ཉིད༌ ཁོའེ༌ ནང༌ནེ༌ བིངས༌ཏེ༌ དཱ༌བིད༌ ཉམ༌པོ༌ ཞུགས༌།
ས༌འུལ༌ དཱ༌བིད༌དི༌ གྲ༌འོ༌ གྱུར༌ཏེ༌ ལན༌ མང༌པོ༌ ཁོ༌ སད༌ཅེས༌ ཅོས༌ ཨིན༌ནའང༌ དཀོན༌མཆོག༌གི༌ ཁོ༌ སྐྱོབ༌བ༌ ཛདས༌།
དཱ༌བིད༌ལ༌ ས༌འུལ༌ སད༌ཅེས༌སི༌ སྐབས༌ ཐོབ༌ ཟ༌ནེ༌ ས༌འུལ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ གྱལ༌པོ༌ ཨིན༌ པ༌སང༌ ཁོའེ༌ ཁོ༌ མ༌སདས༌།
དཱ༌བིད༌དི༌ ཟེརས༌,
“དཀོན༌མཆོག༌ མ༌སྟོག༌ ས༌འུལ༌ མེད༌ཁན༌ ཅོ༌ཅེས༌སི༌ ཝང༌ཆ༌ སུ༌ཞིག༌གའང༌ མེད༌ཏེ༌ ཨིན༌ནོག༌།”
ས༌མུའེལ༌ལི༌ སྤེ༌ཆ༌ ཏང༌པོའེ༌ སྟིང༌ཇུག༌པའེ༌ཀ༌ ས༌འུལ༌ དང༌ ཁོའེ༌ བུ༌ཚ༌གུན༌ མག༌གི༌ ནང༌ང༌ ཤི༌ ཡང༌ སྤེ༌ཆ༌ ཉིས༌པོའེ༌ གོ༌ཟུག༌གི༌ཀ༌ དཱ༌བིད༌ གོ༌མ༌ ཡ༌ཧུ༌དཱའེ༌ ཏེ༌སྟིང༌ནེ༌ ཨིས༌ར༌ཨེལ༌ གང༌པོའེ༌ གྱལ༌པོ༌ གྱུར༌ཏེ༌ ཝང༌སྲུལས༌།
ཨིས༌ར༌ཨེལ༌ལི༌ གྲ༌འོའེ༌ གྱལ༌ཁམས༌ ཚང༌མའ༌ ཁོའེ༌ ཕམ༌ཀལ༌ཏེ༌ ཨིས༌ར༌ཨེལ༌ལི༌ ནང༌ང༌ ཞི༌དེ༌ ཁྱོངས༌།
དཱ༌བིད༌ དཀོན༌མཆོག༌གི༌ ཁའ༌ཉན༌ཏེ༌ ཁོང༌ངི༌ཀ༌ ཨིད༌ཤེས༌ཅན༌ ལུས༌ པ༌སང༌ དཀོན༌མཆོག༌གི༌ ཁོའེ༌ པུར༌གྱུད༌གུན༌ནི༌ ཏུས༌གྱུན༌ ཡེ༌རུ༌ཤ༌ལེམ༌མི༌ཀ༌ ཝང༌སྲུལ༌ཅེས༌ མ༌ཚད༌ ཁོའེ༌ པུར༌གྱུད༌ ཅིག༌ ཐའ༌མེད༌པའེ༌ ཝང༌སྲུལ༌ཅེས༌ལ༌ ལང༌ང༌ ཛད༌ཅེས༌སི༌ ཞལ༌ཆད༌ ཛདས༌།
ཁོང༌ ནི༌ དཀོན༌མཆོག༌གི༌ སྲས༌ ཡང༌ ཁོང༌ངི༌ འི༌ ཇིག༌རྟེན༌ནི༌ཀ༌ དཀོན༌མཆོག༌གི༌ ཆོད༌ཁང༌ རྩིག༌ག༌ ཛད༌ཨིན༌ ༼2 ས༌མུའེལ༌ 7༽།
ས༌མུའེལ༌ལི༌ སྤེ༌ཆ༌ ཉིས༌པའེ༌ ཁག༌ ཉིས༌པའེ༌ ནང༌ང༌ དཱ༌བིད༌ འུ༌ཐུགས༌ དང༌ རོགས༌གོས༌ཁན༌ ང༌དང༌ ཙོགས༌ མི༌ཞིག༌ སྟན༌ན༌ ཛདས༌།
ཁོ༌ འུ༌ཐུགས༌ ཨིན༌ཁན༌ནི༌ སྤེ༌ ཉིས༌,
ཏང༌པོ༌ དཱ༌བིད༌དི༌ སྡིག༌པ༌ ངན༌པ༌ ཅོས༌ ཨིན༌ནའང༌ གྱོད༌པ༌ ཅོས༌ པ༌སང༌ དཀོན༌མཆོག༌གི༌ ཁོའ༌ ཤགས༌པ༌ ཛདས༌།
ཉིས༌པ༌,
ཁོའ༌ ཁོ༌རང༌ངི༌ གྱལ༌སྲིད༌ གོ༌ཟུག༌ ཅོ༌ཅེས༌ དང༌ སྟན༌པོ༌ བོར༌ཅེས༌ལ༌ ཁྱུད༌ཅན༌ དང༌ སྤའ༌འོ༌ མག༌མི༌གུན༌ནི༌ རོགས༌གོས༌།
སྤེ༌ཆ༌ ཉིས༌པའེ༌ ནང༌ང༌ སྤེ༌ཆ༌ བྲི༌ཁན༌ནི༌ མ༌ཡོངས༌པོའེ༌ ཏུས༌སི༌ ནང༌ང༌ དཀོན༌མཆོག༌གི༌ དཱ༌བིད༌དི༌ སང༌ མ༌ ཀྲག༌པོ༌ གྱལ༌པོ༌ཞིག༌ ལང༌ང༌ ཛད༌ཅེས༌སི༌ སྐོར༌ལ༌ བྲིའ༌ ཛད༌ཏེ༌ ཨིན༌ནོག༌།
ཞལ༌ཆད༌ སོ༌མའེ༌ ནང༌ང༌ དཀོན༌མཆོག༌གི༌ ལང༌ང༌ ཛད༌ཅེས༌སི༌ ཞལ༌ཆད༌ ཛད༌ཁན༌ནི༌ ཏེ༌ གྱལ༌པོ༌ དཀོན༌མཆོག༌གི༌ སྲས༌,
དཱ༌བིད༌དི༌ པུར༌གྱུད༌ ཡེ༌ཤུ༌ མ༌ཤི༌ཀ༌ ཨིན༌ཁན༌བོ༌ གྱུས༌ ཆའ༌ནོག༌།
ཁོང༌ངི༌ གྱལ༌པོའེ༌ ཚུལ༌ལ༌ དཀོན༌མཆོག༌གི༌ མི༌གུན༌ནི༌ཀ༌ ཏུས༌གྱུན༌ ཝང༌སྲུལ༌ལ༌ ཛད༌ཅེས༌པོ༌ ང༌དང༌ང༌ ཞལ༌ཆད༌ སོ༌མའེ༌ སལ༌པོ༌ ཅོའ༌ནོག༌།