ས༌མུའེལ༌ལི༌ སྤེ༌ཆ༌ ཉིས༌པོ༌
ས༌འུལ༌ ཤི༌ཁན༌ནི༌ ནས༌ཚུལ༌ དཱ༌བིད༌དི༌ ཚོར༌།
1:1 ནེ༌ 16
1
ས༌འུལ༌ ཤི༌ཏེ༌ སྟིང༌ནེ༌,
ཨ༌མ༌ལིཀ༌པ༌གུན༌ལ༌ ཕམ༌ཀལ༌ཏེ༌ དཱ༌བིད༌ ཟིག༌ལག༌ གྲོང༌ཁྱེར༌ལ༌ ལོགས༌ཏེ༌ ཡོངས༌ཏེ༌ ཞག༌མ༌ ཉིས༌ སོང༌
2 ཡང༌ ཞག༌མ༌ སུམ༌པའེ༌ ཞག༌ག༌ ས༌འུལ༌ལི༌ མག༌མི༌ ཀུར༌ ཙུགས༌ཏེ༌ དུགས༌ས༌ནེ༌ མི༌ཞིག༌ ལེབ༌།
ཁོའེ༌ ཉ༌ངན༌ ཅོས༌ཏེ༌ ཁོ༌རང༌ངི༌ ཀོས༌ལག༌གུན༌ ཤགས༌ཏེ༌ གོའེ༌ཀ༌ ཐལ༌བ༌ གོན༌ཏེ༌ ཡོད༌པིན༌།
ཁོ༌ དཱ༌བིད༌དི༌ དུན༌ལ༌ སའེ༌ཀ༌ གྱེལ༌ཏེ༌ ཁོའ༌ ཀུས༌པ༌ སྟནས༌།
3 དཱ༌བིད༌དི༌ ཏྲིས༌,
“ཁྱོ༌རང༌ ཀ༌ནེ༌ ཡོངས༌ཏེ༌ ཨིན༌?”
མི༌བོའེ༌ ལན༌ཏངས༌,
“ང༌ ཨིས༌ར༌ཨེལ༌ལི༌ མག༌མི༌ ཀུར༌ ཙུགས༌ཏེ༌ དུག༌ས༌ ནེ༌ ཤོར༌ཏེ༌ ཡོངས༌པིན༌།”
4 དཱ༌བིད༌དི༌ ཏྲིས༌,
“ཅི༌ སོང༌,
ངའ༌ ཤོད༌དའང༌།”
མི༌བོའེ༌ ལན༌ཏངས༌,
“མག༌མི༌ ཚང༌མ༌ ཤོར༌ཏེ༌ སོང༌།
མང༌པོ༌ཞིག༌ ནོལ༌ཨིན༌ ཤི༌ ཡང༌ ས༌འུལ༌ དང༌ ཁོའེ༌ བུ༌ཚ༌ ཡོ༌ན༌ཐན༌ནའང༌ ཤི༌།”
5 དཱ༌བིད༌དི༌ ཞུ༌ནུ༌ ཏྲིས༌,
“ས༌འུལ༌ དང༌ ཡོ༌ན༌ཐན༌ ཤི༌ཁན༌བོ༌ ཁྱོ༌རང༌ང༌ ཀ༌ཟུག༌གི༌ གྱུས༌སོང༌?”
6 ཞུ༌ནུའི༌ ལན༌ཏངས༌,
“ང༌ གིལ༌བོའ༌ རི༌ཀ༌ ཡོད༌ ཟ༌ནེ༌ ངའེ༌ ས༌འུལ༌ ཁོ༌རང༌ངི༌ དུང༌ངི༌ཀ༌ ཉེས༌ཏེ༌ ཐོང༌ ཡང༌ གྲ༌འོའེ༌ ཤིང༌རྟ༌ དང༌ རྟ༌ ཞོན༌ཁན༌ནི༌ མག༌མི༌གུན༌ ཁོང༌ངི༌ ཉེ༌མོའ༌ ལེབ༌ དུག༌པིན༌།
7 ཁོང༌ངི༌ གྱུར༌ཏེ༌ ངའ༌ ལྟས༌ ཡང༌ ཁོང༌ ཡོད༌ས༌ ཡོང༌ཅེས༌ལ༌ ཟེརས༌།
ངའེ༌ ཁོང༌ང༌ ཏྲིས༌པིན༌,
‘ངའེ༌ ཀ༌ཟུག༌གི༌ རོགས༌ ཅོ༌ ལེ༌?’
8 “ཁོང༌ངི༌ ངའ༌ ‘ཁྱོ༌རང༌ སུ༌ ཨིན༌’ ཟེར༌ཏེ༌ ཏྲིའ༌རག༌?”
“ངའེ༌ ཁོང༌ང༌ ལན༌ཏངས༌པིན༌,
‘ང༌ ཨ༌མ༌ལིཀ༌པ༌ ཞིག༌ ཨིན༌ ལེ༌།’”
9 “ཏེ༌ནེ༌ ཁོང༌ངི༌ ངའ༌ མོལ༌ལ༌རག༌,
‘ཇུ༌ཇུ༌ འི༌ཀ༌ ཡོངས༌ཏེ༌ ངའ༌ སོད༌ ཅིའ༌ཟེར༌ན༌ ང༌ མ༌སྐྱོན༌ སོན༌ཏེ༌ མ༌སྲན༌ཏྲེ༌ ནགས༌ ཐོང༌ང༌རག༌ ཡང༌ ང༌ ཤི༌ཀྱིས༌ ཨིན༌ནོག༌།’”
10 “ཏེ༌བོའེ༌ཕིའ༌ ང༌ ཏེ༌ཀ༌ སོང༌ཏེ༌ ཁོང༌ སད༌པིན༌ ཅིའ༌ཟེར༌ན༌ མ༌སྐྱོན༌ སྲན༌ཏྲེ༌ ཆ༌ཅེས༌པོའེ༌ ཁོང༌ སོན༌ཏེའ༌ ལུས༌ཤེས༌ མི༌དུག༌པིན༌།
སྤོན༌བོ༌ལེ༌,
ཏེ༌ནེ༌ ངའེ༌ ཁོང༌ངི༌ གོའེ༌ ཀ༌ནེ༌ ཐོར༌ཤོག༌ དང༌ ལག༌པའེ༌ ལྡུ༌གུ༌ ཁུར༌ཏེ༌ ཉེ༌རང༌ངི༌ཀ༌ ཁྱོངས༌པིན༌།”
11 དཱ༌བིད༌ དང༌ ཁོའེ༌ མི༌གུན༌ནི༌ ཁོ༌རང༌གུན༌ནི༌ ཀོས༌ལག༌གུན༌ ཤགས༌།
12 ཁོང༌གུན༌ནི༌ ཉ༌ངན༌ ཅོས༌ཏེ༌ ངུས༌ ཡང༌ ས༌འུལ༌ དང༌ ཁོའེ༌ བུ༌ཚ༌ ཡོ༌ན༌ཐན༌ནི༌ ཕིའ༌ ཉི༌མ༌ གང༌པོ༌ ཉེ༌ནས༌ལ༌ དུགས༌།
ཡ༌ཝའེ༌ མག༌མི༌གུན༌ དང༌ ཨིས༌ར༌ཨེལ༌ལི༌ གྱལ༌ཁམས༌སི༌ ཕིའང༌ ཅིའ༌ཟེར༌ན༌ ཏེ༌ ཞག༌ག༌ ཁོང༌གུན༌ ར༌འི༌ ཉམ༌པོ༌ ཤི༌ཏེ༌ ཨིན༌པིན༌།
13 ཏེ༌ནེ༌ དཱ༌བིད༌དི༌ ནས༌ཚུལ༌ ཁྱོང༌ཁན༌ནི༌ ཞུ༌ནུ༌བོའ༌ ཟེརས༌,
“ཁྱོ༌རང༌ ཀ༌ནེ༌ ཨིན༌?”
ཡང༌ ཁོའེ༌ ལན༌ཏངས༌,
“ང༌ ཞན༌ཡུལ༌ལི༌ མི༌ ཉེ༌ཞའེ༌ ས༌ཀྱད༌དི༌ ནང༌ང༌ དུག༌ཁན༌ནི༌ བུ༌ཚ༌ ཨ༌མ༌ལིཀ༌པ༌ ཞིག༌ ཨིན༌།”
14 དཱ༌བིད༌དི༌ ཏྲིས༌,
“ཡ༌ཝའེ༌ ལྡམ༌མ༌ ཛད༌ཁན༌བོ༌ སད༌ཅེས༌ལ༌ ཁྱོ༌རང༌ ཇིགས༌ མ༌ཇིགས༌ས༌?”
15 ཏེ༌ནེ༌ དཱ༌བིད༌དི༌ ཁོ༌རང༌ངི༌ མི༌ ཅིག༌ག༌ ཟེརས༌,
“ཁོ༌ སོད༌།”
ཁོའེ༌ ཁོ༌རང༌ངི༌ ར༌འི༌ ཨ༌མ༌ལིཀ༌པ༌ ཙུགས༌ཏེ༌ ཁོ༌ སདས༌།
16 དཱ༌བིད༌དི༌ ཟེརས༌,
“ཁྱོ༌རང༌ངི༌ ཁྲག༌གི༌ སྐྱོན༌ ཁྱོ༌རང༌ང༌ ཕོག༌ཨིན༌,
ཅིའ༌ཟེར༌ན༌ ཁྱོ༌རང༌ རང༌ངི༌ ཁའ༌ནེ༌ ཁྱོ༌རང༌ངི༌ ཡ༌ཝའེ༌ ལྡམ༌མ༌ ཛད༌ཁན༌བོ༌ སད༌པིན༌ ཟེར༌ཏེ༌ ཁས༌ལེན༌ ཅོས༌ཏེ༌ ཨིན༌ནོག༌།”
དཱ༌བིད༌དི༌ ས༌འུལ༌ དང༌ ཡོ༌ན༌ཐན༌ནི༌ ཕིའ༌ རྡུག༌པོ༌ ཅོས༌།
1:17 ནེ༌ 27
17 ཏེ༌ནེ༌ དཱ༌བིད༌དི༌ ས༌འུལ༌ དང༌ ཡོ༌ན༌ཐན༌ནི༌ ཕིའ༌ འི༌ རྡུག༌ ལུ༌བོ༌ བྲིས༌
18 ཡང༌ ཡ༌ཧུ༌དཱ༌པ༌གུན༌ནི༌ ཏེ༌བོ༌ ཇང༌གོས༌ ཟེར༌ཏེ༌ བཀའ༌ ཏངས༌།
ཏེ༌བོའ༌ ཞུའི༌ ལུ༌ ཟེར༌ར༌ནོག༌ ཡང༌ ཡ༌ཤར༌རི༌ ལྡེབ༌བི༌ ནང༌ང༌ ཏེ༌བོ༌ བྲིས༌ཏེ༌ ཡོད༌ཏེ༌ ཨིན༌ནོག༌།
19 ཨིས༌ར༌ཨེལ༌,
ཉེ༌རང༌ངི༌ སྤལ༌ཅན༌ འུ༌སྐྱོང༌གུན༌ འི༌ རི༌ཀ༌ སདས༌,
མག༌གི༌ ནང༌ང༌ སྟོབས༌ཤུག༌ཅན༌ སྤའ༌འོ༌གུན༌ ཤི༌ཏེ༌ ཙམ༌ཞིག༌གི༌ རྡུག༌པོ༌ མ༌ནོག༌,
20 འི༌ ནས༌ཚུལ༌བོ༌ གཱད༌དི༌ ནང༌ང༌ མ༌ཤད༌,
འི༌བོ༌ ཨཤ༌ཀེ༌ལོན༌ནི༌ སྲང༌གུན༌ནི༌ ནང༌ང༌ མ༌ཤད༌།
ཏེ༌ མ༌ནེ༌ ཕི༌ལིས༌ཏི༌པ༌ བུ༌མོ༌གུན༌ནི༌ གའ༌མོ༌ སྐྱིད༌པོ༌ ཅོ༌ཨིན༌,
ཡང༌ སུན༌ནད༌ མ༌ཅོ༌ཁན༌ བུ༌མོ༌གུན༌ནི༌ གའ༌སྟོན༌ རྩི༌ཨིན༌།
21 གིལ༌བུའེ༌ རི༌གུན༌ནི༌ཀ༌ ཟིལ༌པ༌ ཡ༌ ཆར༌པ༌ མ༌ནེ༌ མ༌བབས༌ཤིག༌,
ཡ༌ ཆོད༌པ༌ ཕུལ༌ཅེས༌སི༌ ཕིའ༌ ཞིང༌གུན༌ལ༌ གྲུའི༌ སྟོན༌ཐོག༌ མ༌ སྨིན༌ཤིག༌
ཅིའ༌ཟེར༌ན༌ ཏེ༌རུ༌ སྤའ༌འོ༌གུན༌ ཤི༌ཏེ༌ ཁོང༌གུན༌ནི༌ མག༌ཆ༌ སའེ༌ཀ༌ བུད༌
ཏ༌ ས༌འུལ༌ལི༌ མག༌ཆའ༌ སུའིང༌ མར༌ནག༌ མི༌ སྐུ༌།
22 ཡོ༌ན༌ཐན༌ནི༌ ཞུ༌ མ༌ སྟོབས༌ཤུག༌ཅན༌ ཡང༌ ས༌འུལ༌ལི༌ ར༌འི༌ ལས༌ ཀྲག༌པོ༌ ཅོས༌,
ཁོང༌ངི༌ གྲ༌འོ༌གུན༌ནི༌ ཁྲག༌པོ༌ ཕོས༌ཏེ༌ སྤའ༌འོ༌གུན༌ནི༌ ཟུགས༌པོའ༌ དུང༌ གྱབས༌།
23 མི༌གུན༌ནི༌ ས༌འུལ༌ དང༌ ཡོ༌ན༌ཐན༌ལ༌ ཙམ༌ཞིག༌གི༌ ཅམས༌པ༌ ཅོའ༌ མེད༌པིན༌།
ཁོང༌གུན༌ སོན༌ཏེའ༌ མ༌ཚད༌ ཤི༌ ཟ༌ནེའང༌ ཉམ༌པོ༌ ཡོད༌པིན༌།
ཁོང༌གུན༌ ལག༌གི༌ སང༌ གྱོགས༌པ༌ ཡང༌ སིང༌གེ༌ སང༌ ཤེད༌ཅན༌ ཡོད༌པིན༌།
24 ཨིས༌ར༌ཨེལ༌པའེ༌ བུ༌མོ༌གུན༌
ས༌འུལ༌ལི༌ ཕིའ༌ ངུ༌ཤིག༌
ཅིའ༌ཟེར༌ན༌ ཁོང༌ངི༌ ཁྱོ༌རང༌གུན༌ལ༌ ཀོས༌ལག༌ གྱས༌པ༌ སྐོན༌ཏེ༌
ཏག༌ཅེས༌ལ༌ སེར༌རི༌ གྱན༌ཆ༌ ཏང༌ངད༌པིན༌།
25 མག༌གི༌ ནང༌ང༌ སྟོབས༌ཤུག༌ཅན༌ སྤའ༌འོ༌གུན༌ ཤི༌ཏེ༌ ཙམ༌ཞིག༌གི༌ རྡུག༌པོ༌ མ༌ནོག༌,
ཡོ༌ན༌ཐན༌ རི༌ཀ༌ ཀྲོངས༌ཏེ༌ ཨིན༌ནོག༌།
26 ངའེ༌ སྤུན༌ ཡོ༌ན༌ཐན༌,
ང༌ ཉེ༌རང༌ངི༌ ཕིའ༌ ངུ༌ཨིན༌ རྡུག༌པོ༌ ཅོད༌
ངའེ༌ ཉེ༌རང༌ང༌ ཙམ༌ཤིག༌ ཅམས༌པ༌ ཅོའ༌ མེད༌པིན༌
ཡང༌ ངའེ༌ ཕིའ༌ ཉེ༌རང༌ངི༌ ཅེས༌པ༌བོ༌ ཧ༌ལས༌ཤེས༌
ཏེ༌བོ༌ བུ༌མོ༌ཞིག༌གི༌ ཅེས༌པའི༌ སང༌ གྱས༌ས༌ ཡོད༌པིན༌།
27 མག༌གི༌ ནང༌ང༌ སྟོབས༌ཤུག༌ཅན༌ སྤའ༌འོ༌གུན༌ ཤི༌ཏེ༌ ཙམ༌ཞིག༌གི༌ རྡུག༌པོ༌ མ༌ནོག༌,
ཏ༌ ཁོང༌གུན༌ནི༌ མག༌ཆ༌གུན༌ བུད༌ཏེ༌ དོད༌མེད༌ གྱུར༌ཏེ༌ ཨིན༌ནོག༌།