ས༌འུལ༌ལི༌ རང༌ངི༌ སྲོག༌ ལེནས༌།
31:1 ནེ༌ 13
31
ཏ༌ ཕི༌ལིས༌ཏི༌པ༌གུན༌ནི༌ ཨིས༌ར༌ཨེལ༌པ༌གུན༌ ཉམ༌པོ༌ ནོལས༌ ཡང༌ ཨིས༌ར༌ཨེལ༌ལི༌ མག༌མི༌གུན༌ ཤོར༌ཏེ༌ སོང༌,
ཁོང༌ མང༌པོ༌ གིལ༌བོའེ༌ རི༌ཀ༌ སདས༌།
2 ཕི༌ལིས༌ཏི༌པ༌གུན༌ནི༌ ས༌འུལ༌ དང༌ ཁོའེ༌ བུ༌ཚ༌གུན༌ལ༌ ཏེད༌ཏེ༌ ཁྱེརས༌ ཡང༌ ས༌འུལ༌ལི༌ བུ༌ཚ༌ ཡོ༌ན༌ཐན༌,
ཨ༌བི༌ན༌དབ༌ དང༌ མལ༌ཀི༌ཤུའ༌ སུམ༌ཀོ༌ ཐུབ༌ཏེ༌ སདས༌།
3 ས༌འུལ༌ལི༌ ཉེ༌ཁོར༌ལ༌ ནོལ༌ཅེས༌ ཀྲག༌པོ༌ ཆའད༌པིན༌ ཡང༌ ཕི༌ལིས༌ཏི༌པ༌ དའ༌ ཏང༌ཁན༌ ཞིག༌གི༌ དའ༌ ས༌འུལ༌ ཕོག༌ཏེ༌ མ༌སྐྱོན༌ སྲན༌ཏྲེ༌ ཅོས༌།
4 ས༌འུལ༌ལི༌ ཁོ༌རང༌ངི༌ ཚོན༌ཆ༌ ཁུར༌ཁན༌བོའ༌ ཟེརས༌,
“ཁྱོ༌རང༌ངི༌ ར༌འི༌ ཁུར༌ཏེ༌ ང༌ སོད༌ ཏེ༌མན༌ན༌ འི༌ སུན༌ནད༌ མ༌ཅོ༌ཁན༌ ཕི༌ལིས༌ཏི༌པ༌གུན༌ནི༌ ངའ༌ ནགས༌སྟན༌ཏེ༌ སད༌ད༌ ནོག༌།”
ཨིན༌ནའང༌ ཁོའེ༌ ཚོན༌ཆ༌ ཁུར༌ཁན༌བོ༌ ཇིགས༌ ཡང༌ ཏེ༌བོ༌ མ༌ཅོས༌།
ཏེ༌ནེ༌ ས༌འུལ༌ ཁོ༌རང༌ངི༌ ར༌འི༌ཀ༌ གྱེལ༌ ཅུགས༌ཏེ༌ ཁོ༌རང༌ སདས༌།
5 ས༌འུལ༌ལི༌ ཚོན༌ཆ༌ ཁུར༌ཁན༌བོའ༌ ཁོ༌ ཤི༌ཁན༌བོ༌ ཐོང༌ང༌ཅིག༌ ཁོའང༌ ཁོ༌རང༌ངི༌ ར༌འི༌ཀ༌ གྱེལ༌ ཅུགས༌ཏེ༌ སདས༌།
6 ས༌འུལ༌,
ཁོའེ༌ བུ༌ཚ༌ སུམ༌,
ཁོའེ༌ ཚོན༌ཆ༌ ཁུར༌ཁན༌ དང༌ ཁོའེ༌ མག༌མི༌ ཚང༌མ༌ ཏེན༌ན༌ ཞག༌ག༌ ཤི༌།
7 ལུང༌པ༌ དང༌ ཡོར༌དཱན༌ ལྩངས༌པོའེ༌ འ༌ངོ༌ ཆོགས༌ལ༌ ཡོད༌ཁན༌ནི༌ ཨིས༌ར༌ཨེལ༌པ༌གུན༌ནི༌ ཨིས༌ར༌ཨེལ༌པ༌ མག༌མི༌གུན༌ ཤོར༌ར༌ ཡང༌ ས༌འུལ༌ དང༌ ཁོའེ༌ བུ༌ཚ༌གུན༌ ཤི༌ཁན༌ ཐོང༌ང༌ཅིག༌ ཁོང༌གུན༌ ཁོང༌རང༌གུན༌ནི༌ གྲོང༌ཁྱེར༌ ཕངས༌ཏེ༌ ཤོར༌།
ཡང༌ ཕི༌ལིས༌ཏི༌པ༌གུན༌ ཡོངས༌ཏེ༌ ཏེ༌རུ༌ དུགས༌།
8 སྟིང༌མ༌ ཞག༌པོ༌ ཕི༌ལིས༌ཏི༌པ༌གུན༌ ཤི༌ཁན༌གུན༌ནི༌ མག༌ཆ༌ ལྡུམ༌མ༌ལ༌ ཡོང༌ང༌ཅིག༌ ཁོང༌གུན༌ནི༌ གིལ༌བོའ༌ རི༌ཀ༌ ས༌འུལ༌ དང༌ ཁོའེ༌ བུ༌ཚ༌ སུམ༌ཀོའེ༌ རོ༌གུན༌ ཐོང༌།
9 ཁོང༌གུན༌ནི༌ ས༌འུལ༌ལི༌ གོ༌ ཅདས༌ ཡང༌ ཁོའེ༌ མག༌ཆ༌གུན༌ ཕུད༌ཏེ༌ ས༌འུལ༌ ཤི༌ཁན༌ནི༌ ནས༌ཚུལ༌ ཁོང༌རང༌གུན༌ནི༌ སྐུན༌དྲ༌གུན༌ བོར༌སའེ༌ ཆོད༌ཁང༌ དང༌ ཕི༌ལིས༌ཏི༌པ༌ ཚང༌མའ༌ ཤད༌ཅེས༌ལ༌ ལོན༌ཁྱེར༌ཁན༌གུན༌ ལམ༌ཅུགས༌།
10 ཁོང༌གུན༌ནི༌ ས༌འུལ༌ལི༌ མག༌ཆ༌གུན༌ ཨཤ༌ཏོ༌རེཐ༌དི༌ ཆོད༌ཁང༌ངི༌ ནང༌ང༌ བོརས༌ ཡང༌ ཁོ༌ དང༌ ཁོའེ༌ བུ༌ཚ༌གུན༌ནི༌ རོ༌ བེཐ༌ཤན༌ནི༌ གྱལ༌སའེ༌ རྩིག༌པའེ༌ཀ༌ ཏགས༌ཏེ༌ བོརས༌།
11 ཨིན༌ནའང༌ ཕི༌ལིས༌ཏི༌པ༌གུན༌ནི༌ ས༌འུལ༌ལ༌ ཅོ༌ཁན༌གུན༌ ཡ༌བེཤ༌ གི༌ལེད༌དི༌ མི༌གུན༌ནི༌ ཚོར༌ར༌ཅིག༌,
12 ཁོང༌གུན༌ནི༌ ནོལ༌ཁན༌ ཁས༌པའེ༌ མག༌མི༌ ཚང༌མ༌ ཚན༌ གང༌པོ༌ གྲུལ༌ཏེ༌ བེཐ༌ཤན༌ལ༌ སོང༌ ཡང༌ ས༌འུལ༌ དང༌ ཁོའེ༌ བུ༌ཚ༌གུན༌ནི༌ རོ༌ རྩིག༌པའེ༌ཀ༌ ཏགས༌ཁན༌གུན༌ ཡ༌བེཤ༌ཤི༌ གྱལ༌ས༌ ཁྱོངས༌ཏེ༌ མེའ༌ སྲགས༌།
13 ཁོང༌གུན༌ནི༌ ཁོང༌གུན༌ནི༌ རུས༌པ༌ ཡ༌བེཤ༌ཤི༌ ནང༌ང༌ ཀྲ༌མ༌རིག༌གི༌ ལྕང༌མ༌ ཆེན༌མོའེ༌ ཡོག༌ག༌ སུབས༌ ཡང༌ ཁོང༌གུན༌ ཞག༌པོ༌ རྡུན༌ ཉེ༌ནས༌ལ༌ དུགས༌།