དཱ༌བིད༌ ཡ༌ཧུ༌དཱའེ༌ གྱལ༌པོའ༌ ལྡམས༌།
2:1 ནེ༌ 7
2
ཏུས༌ བན༌ཤིག༌གི༌ སྟིང༌ནེ༌,
དཱ༌བིད༌དི༌ ཡ༌ཝའ༌ ཏྲིའ༌ ཛདས༌,
“ཡ༌ཧུ༌དཱའེ༌ གྲོང༌ཁྱེར༌ ཤིག༌གི༌ ནང༌ང༌ ང༌ དུག༌ག༌ ཆའ༌ལེ༌?”
ཡ༌ཝའེ༌ ལན༌སལས༌,
“དུག༌ག༌ སོང༌།”
དཱ༌བིད༌དི༌ ཡང༌སྐྱར༌ ཏྲིས༌,
“ཀ༌ གྲོང༌ཁྱེར༌ལ༌ ཆ༌ལེ༌?”
ཡ༌ཝའེ༌ ལན༌སལས༌,
“ཧེབ༌རོན༌ གྲོང༌ཁྱེར༌ལ༌ སོང༌།”
2 ཏེ༌ནེ༌ དཱ༌བིད༌ ཁོ༌རང༌ངི༌ ན༌མ༌ ཡེཟ༌རེ༌འེལ༌མ༌ ཨ༌ཧི༌ནོའམ༌ དང༌ ཀར༌མེལ༌པ༌ ན༌བལ༌ ཤི༌ཁན༌ནི༌ ན༌མ༌ ཨ༌བི༌གཱའིལ༌ ཁྲིད༌ཏེ༌ ཀེན༌ལ༌ ཏེ༌རུ༌ སོང༌།
3 དཱ༌བིད༌ ཉམ༌པོ༌ ཁོའེ༌ མི༌གུན༌ དང༌ ཁོང༌གུན༌ནི༌ ནང༌ཚངས༌ ཚང༌མའང༌ ཡོད༌པིན༌ ཡང༌ ཁོང༌གུན༌ ཧེབ༌རོན༌ དང༌ ཉེ༌ཁོར༌རི༌ གྲོང༌ཁྱེར༌ གུན༌ནི༌ ནང༌ང༌ ཚུགས༌ཏེ༌ དུགས༌།
4 ཏེ༌ནེ༌ ཡ༌ཧུ༌དཱ༌པ༌གུན༌ དཱ༌བིད༌ ཡོད༌ས༌ ཡོངས༌ཏེ༌ ཁོའ༌ མར༌ ལུགས༌ཏེ༌ ཡ༌ཧུ༌དཱའེ༌ མི༌སྡེ༌ཀ༌ གྱལ༌པོའ༌ ལྡམས༌།
དཱ༌བིད༌ལ༌ ཡ༌བེཤ༌ གི༌ལེད༌དི༌ བུ༌ཚ༌གུན༌ནི༌ ས༌འུལ༌ལི༌ སྤུར༌ སུབས༌ ཏོག༌ ཟེར༌ཏེ༌ ཚོར༌ར༌ཅིག༌,
5 ཁོའེ༌ ལོན༌ ཀལ༌ཏེ༌ ཟེརས༌,
“ཁྱོ༌ཞའེ༌ ཁྱོ༌ཞ༌གུན༌ནི༌ སྤོན༌བོ༌ ས༌འུལ༌ལི༌ སྤུར༌ སུབས༌ཏེ༌ ཁོང༌ང༌ ཀུས༌པ༌ སྟན༌ཅེས༌ལ༌ ཡ༌ཝའེ༌ ཁྱོ༌ཞའ༌ ཅིན༌ལབས༌ སལ༌ཤིག༌།
6 ཡ༌ཝའེ༌ ཁྱོ༌ཞ༌གུན༌ལ༌ སྙིང༌རྗེ༌ དང༌ ཐུག༌རྗེ༌ སྟན༌ན༌ ཛད༌ཤིག༌ ཡང༌ ངེའང༌ ཁྱོ༌ཞ༌གུན༌ལ༌ ཁྱོ༌ཞའེ༌ ཅོ༌ཁན༌བོའ༌ སོལ༌རས༌ ཏང༌ཨིན༌།
7 ཏ༌ ཁྱོ༌ཞའེ༌ སྤོན༌བོ༌ ས༌འུལ༌ ཀྲོངས༌ནའང༌,
ངའ༌ ཁོ༌རང༌གུན༌ནི༌ གྱལ༌པོའ༌ ལྡམས༌ཁན༌ ཡ༌ཧུ༌དཱ༌པ༌གུན༌ ཙོགས༌ལ༌ ཁྱོ༌ཞའ༌ སྤོས༌པ༌ ལེན༌ཏེ༌ སྟོབས༌ཅན༌ དུག༌ཅེས༌ལ༌ ངའེ༌ ཟེར༌རད༌།”
ས༌འུལ༌ལི༌ བུ༌ཚ༌ ཨིཤ༌བོ༌ཤེཐ༌ དང༌ དཱ༌བིད༌དི༌ པར༌ལ༌ མག༌།
2:8 ནེ༌ 3:5
8 ཏེན༌ན༌ ཏུས༌ལ༌ ས༌འུལ༌ལི༌ མག༌མི༌གུན༌ནི༌ སྤོན༌བོ༌ ནེར༌རི༌ བུ༌ཚ༌ ཨབ༌ནེར༌,
ས༌འུལ༌ལི༌ བུ༌ཚ༌ ཨིཤ༌བོ༌ཤེཐ༌ ཉམ༌པོ༌ མ༌ཧ༌ནཱའིམ༌མི༌ གྲོང༌ཁྱེར༌ལ༌ སོང༌།
9 ཏེ༌རུ༌ ཁོའེ༌ གི༌ལེད༌,
ཨ༌ཤུར༌རི༌,
ཡེཟ༌རེ༌འེལ༌,
ཨེཕ༌ར༌ཡིམ༌,
བེན༌ཡཱ༌མིན༌ ཡུལ༌ཇོངས༌གུན༌ དང༌ ཨིས༌ར༌ཨེལ༌ གང༌པོའེ༌ཀ༌ ཨིཤ༌བོ༌ཤེཐ༌ གྱལ༌པོའ༌ ལྡམས༌།
10 ས༌འུལ༌ལི༌ བུ༌ཚ༌ ཨིཤ༌བོ༌ཤེཐ༌ གྱལ༌པོ༌ གྱུར༌ ཟ༌ནེ༌ ཁོའ༌ ལོ༌ 40 ཆའད༌པིན༌ ཡང༌ ཁོའེ༌ ལོ༌ 2 ཝང༌སྲུལས༌།
ཨིན༌ནའང༌ ཡ༌ཧུ༌དཱ༌པ༌གུན༌ ཁོ༌རང༌གུན༌ནི༌ གྱལ༌པོ༌ དཱ༌བིད༌ལ༌ ཆོག༌སྐྱོར༌ ཅོའད༌པིན༌།
11 དཱ༌བིད༌དི༌ ཧེབ༌རོན༌ནི༌ ནང༌ང༌ ཡ༌ཧུ༌དཱ༌པ༌གུན༌ནི༌ གྱལ༌པོའེ༌ ཚུལ༌ལ༌ ལོ༌ རྡུན༌ དང༌ ལྫ༌ཝ༌ དྲུག༌ ཝང༌སྲུལས༌།
12 ཞག༌ཤིག༌ ཨབ༌ནེར༌རི༌ གོ༌ཁྲིད༌ ཅོས༌ཏེ༌ ཨིཤ༌བོ༌ཤེཐ༌དི༌ མག༌མི༌གུན༌ མ༌ཧ༌ནཱའིམ༌ནེ༌ གི༌བེ༌འོན༌ནི༌ གྱལ༌ས༌ སོང༌།
13 ཟེ༌རུའི༌འཧའེ༌ བུ༌ཚ༌ ཡོ༌འབ༌བི༌ དཱ༌བིད༌དི༌ མག༌མི༌གུན༌ གོ༌ཁྲིད༌ ཅོས༌ཏེ༌ གི༌བེ༌འོན༌ནི༌ ཟིང༌ངི༌ཀ༌ ཨབ༌ནེར༌རི༌ མག༌མིའ༌ ནོལ༌ལ༌ སོང༌།
སྡེ༌ ཅིག༌ ཟིང༌ངི༌ འི༌ངོ༌ ཆོགས༌ ཡང༌ ཅིག༌ ཟིང༌ངི༌ འ༌ངོ༌ ཆོགས༌ལ༌ དུགས༌།
14 ཏེ༌ནེ༌ ཨབ༌ནེར༌རི༌ ཡོ༌འབ༌བ༌ ཟེརས༌,
“ང༌དང༌ངི༌ མག༌མི༌ ཞུ༌ནུ༌ ཁ༌ཅིག༌ ང༌དང༌གུན༌ནི༌ དུན༌ལ༌ ནོལ༌ ཅུགས༌ཏེ༌ ལྟེན༌།”
ཡོ༌འབ༌བི༌ ཁའ༌ ཆམས༌ཏེ༌ ཟེརས༌,
“ཏེ༌བོ༌ གྱལ༌ལ༌ རག༌།”
15 ཏེ༌ནེ༌ བེན༌ཡཱ༌མིན༌ནི༌ སྡེ༌ ས༌འུལ༌ལི༌ བུ༌ཚ༌ ཨིཤ༌བོ༌ཤེཐ༌དི༌ ཆོགས༌པ༌ མག༌མི༌ རྕུག༌ཉིས༌ ཡང༌ དཱ༌བིད༌དི༌ ཆོགས༌པ༌ མག༌མི༌ རྕུག༌ཉིས༌ ལྡམས༌།
16 ཁོང༌གུན༌ནི༌ རང༌རང༌ངི༌ གྲ༌འོ༌ སྲ༌ ནེ༌ ཟུམས༌ཏེ༌ ར༌འི༌ ཟུགས༌སི༌ ནང༌ང༌ ཙུགས༌པ༌ ཁོང༌ ཚང༌མ༌ ཤི༌།
ཏེན༌ན༌ ཏུས༌ནེ༌ ཕར༌ལ༌ གི༌བེ༌འོན༌ནི༌ ཏེ༌ ནས༌ས༌བོའ༌ ར༌འི༌ ཞིང༌ ཟེར༌ར༌ནོག༌།
17 ཏེ༌ ཞག༌ག༌ མག༌ མ༌ སྲན༌ཏྲེ༌ སོང༌ ཡང༌ ཨིས༌ར༌ཨེལ༌པ༌ ཨབ༌ནེར༌ དང༌ ཁོའེ༌ མག༌མི༌གུན༌ལ༌ དཱ༌བིད༌དི༌ མག༌མི༌གུན༌ནི༌ ཕམ༌ཀལས༌།
18 ཟེ༌རུའི༌འཧའེ༌ བུ༌ཚ༌ ཡོ༌འབ༌,
ཨ༌བི༌ཤའི༌ དང༌ ཨ༌ས༌ཧེལ༌ སུམ༌ཀོ༌ ཏེ༌ ཞག༌ག༌ དཱ༌བིད༌དི༌ མག༌མི༌ ཕྲོའ༌ ཡོད༌པིན༌།
ཨ༌ས༌ཧེལ༌,
ཤ༌ཝ༌ ཙོགས༌ གྱོགས༌པ༌ བང༌ཏང༌ ཉན༌ནད༌པིན༌།
19 ཡང༌ ཁོའེ༌ སྣང༌ང༌ འི༌ངོ༌ འ༌ངོ༌ མ༌གྱུར༌ར༌ ཨབ༌ནེར༌ སད༌ཅེས༌ལ༌ ཁོའ༌ ཏེད༌ཏེ༌ ཁྱེརས༌།
20 ཨབ༌ནེར༌རི༌ གྱུར༌ཏེ༌ ལྟའ༌ཅིག༌ ཁོ༌ ཡོང༌ང༌ ཐོང༌ཏེ༌ ཟེརས༌,
“ཨ༌ས༌ཧེལ༌ འི༌བོ༌ ཁྱོ༌རང༌ ཨིན༌ན༌?”
ཁོའེ༌ ལན༌ཏངས༌,
“ང༌ ཨིན༌།”
21 ཨབ༌ནེར༌རི༌ ཟེརས༌,
“ལྡལ༌དོའ༌ གྱུར༌ཏེ༌ ཞུ༌ནུ༌ ཞིག༌ ཟུམས༌ཏེ༌ ཁོའེ༌ ཚོན༌ཆ༌གུན༌ ཀོགས༌།”
ཨིན༌ནའང༌ ཨ༌ས༌ཧེལ༌ ལྡལ༌དོའ༌ མ༌གྱུར༌ར༌ ཨབ༌ནེར༌ལ༌ ཏེད༌ཏེ༌ ཁྱེརས༌།
22 ཡང༌སྐྱར༌ ཨབ༌ནེར༌རི༌ ཀུ༌ཅོ༌ ཏངས༌ཏེ༌ ཁོའ༌ ཟེརས༌,
“ང༌ ཏེད༌ཏེ༌ མ༌ ཁྱོང༌།
ཅིའ༌ ང༌ ཁྱོ༌རང༌ སད༌ ཅུག༌གད༌?
ཏེ༌ནེ༌ ཁྱོ༌རང༌ངི༌ ཨ༌ཅོ༌ ཡོ༌འབ༌བ༌ ངའེ༌ ཀ༌ཟུག༌གི༌ ལྡོང༌ སྟན༌ཅེན༌?
23 ཨིན༌ནའང༌ ཨ༌ས༌ཧེལ༌ལི༌ ཁོའེ༌ ཁའ༌ མ༌ཉན༌ན༌ ཁོའ༌ ཏེད༌ཏེ༌ ཁྱོངས༌ ཏེ༌ནེ༌ ཨབ༌ནེར༌རི༌ ཁོ༌རང༌ངི༌ དུང༌ངི༌ ཇུག༌པོ༌ ཁོའེ༌ གྲོད༌པའེ༌ ནང༌ང༌ ཙུགས༌པ༌ ཏེ༌བོ༌ ཁོའེ༌ གྱབ༌ནེ༌ བིངས༌།
ཁོ༌ སའེ༌ཀ༌ གྱེལ༌ ཡང༌ ཏེ༌ཀ༌ ཤི༌།
ཏེ༌ཀ༌ནེ༌ ཡོང༌ཁན༌ ཚང༌མ༌ ཨ༌ས༌ཧེལ༌ ཤི༌ སའེ༌ཀ༌ ལངས༌ཏེ༌ ཁོའེ༌ ཟུགས༌པོའ༌ ལྟས༌།
24 ཡོ༌འབ༌ དང༌ ཨ༌བི༌ཤའི༌ ཨབ༌ནེར༌རི༌ སྟིང༌རང༌ནེ༌ སོང༌ ཡང༌ ཉི༌མ༌ ནུབ༌ཀྱིས༌ ཡོད༌ ཟ༌ནེ༌ ཁོང༌གུན༌ གི༌བེ༌འོན༌ནི༌ ཐང༌སྟོང༌ང༌ ཆ༌སའེ༌ ལམ༌མི༌ཀ༌,
གིའི༌ ཉེ༌མོའ༌ རི༌ ཨམ༌མཧའེ༌ཀ༌ ལེབ༌།
25 བེན༌ཡཱ༌མིན༌ནི༌ སྡེ༌ མག༌མི༌གུན༌ རི༌ གོའེ༌ཀ༌ ཨབ༌ནེར༌ ཡོད༌ས༌ ཛོམས༌ཏེ༌ ནོལ༌ལ༌ལ༌ གྲལ༌གྲིག༌ ཅོས༌།
26 ཨབ༌ནེར༌རི༌ ཐུར༌ལ༌ ཡོ༌འབ༌བ༌ ཀུ༌ཅོ༌ ཏངས༌ཏེ༌ ཟེརས༌,
“ཅི༌ ང༌དང༌གུན༌ ཏུས༌གྱུན༌ ནོལ༌ཨིན༌ དུག༌ག༌ནོག༌ག༌?
ཁྱོ༌རང༌ང༌ ཧ༌གོའ༌ མེ༌རག༌ག༌ ཏེ༌བོའེ༌ བྲས༌བུ༌ ནི༌ ང༌དང༌གུན༌ནི༌ ཕར༌ལ༌ ཁོན༌ལུས༌ཨིན༌།
ཁྱོ༌རང༌ངི༌ ཨིས༌ར༌ཨེལ༌པ༌ རང༌ངི༌ སྤུན༌གུན༌ལ༌ མི༌ཏེད༌ཅེས༌ལ༌ རང༌ངི༌ མི༌གུན༌ལ༌ ནམ༌ བཀའ༌ ཏང༌ཨིན༌?”
27 ཏེ༌ནེ༌ ཡོ༌འབ༌བི༌ ཟེརས༌,
“ཀལ༌ཏེས༌ ཁྱོ༌རང༌ངི༌ ཏེ༌བོ༌ མ༌ཟེར༌པིན༌ན༌ དཀོན༌མཆོག༌ སོན༌པོའེ༌ ཚན༌ནི༌ ནང༌ང༌ ང༌ཞའེ༌ ང༌ཞ༌རང༌ངི༌ སྤུན༌གུན༌ལ༌ ང༌མོ༌ ཚག༌པ༌ ཏེད༌ཏེ༌ ཁྱོང༌ཅེས༌ ཡོད༌པིན༌།”
28 ཏེ༌བོའེ༌ཕིའ༌ ཡོ༌འབ༌བི༌ ཏུང༌ ཕུས༌ ཡང༌ མག༌མི༌གུན༌ནི༌ མག༌ ཏང༌ཅེས༌པོ༌ སྒགས༌།
ཁོང༌གུན༌ནི༌ ཨིས༌ར༌ཨེལ༌པ༌གུན༌ལ༌ ཏེད༌ཅེས༌ ཕངས༌ ཡ༌ ཁོང༌གུན༌ལ༌ ནོལ༌ མ༌ནོལས༌།
29 ཏེ༌ ཚན༌ གང༌པོ༌ ཨབ༌ནེར༌ དང༌ ཁོའེ༌ མག༌མི༌གུན༌ ཡོར༌དཱན༌ ལུང༌པ༌ནེ༌ གྲུལ༌ཏེ༌ སོང༌།
ཁོང༌གུན༌ ཡོར༌དཱན༌ ལྩངས༌པོ༌ རྒལས༌ ཡང༌ ང༌མོ༌ ཚེ༌རེ༌ གྲུལ༌ཏེ༌ མ༌ཧ༌ནིའམ༌མ༌ ལེབ༌ལེབ༌ ཚོག༌པ༌ སོང༌།
30 ཡོ༌འབ༌ དང༌ ཁོའེ༌ མག༌མི༌གུན༌ ཨབ༌ནེར༌ལ༌ ཏེད༌ཅེས༌ ཕངས༌ཏེ༌ སྟིང༌ནེ༌ ཡོ༌འབ༌བི༌ མག༌མི༌གུན༌ ཛོམ༌ ཅུགས༌ ཡང༌ མ༌སྐྱོན༌ ཆའ༌ཁན༌གུན༌ རྩི༌ཅུགས༌པ༌ ཨ༌ས༌ཧེལ༌ མ༌ཐེའ༌ མི༌ 19 སྟོར༌ཁན༌བོ༌ གྱུས༌སོང༌།
31 ཨིན༌ནའང༌ དཱ༌བིད༌དི༌ མག༌མིའི༌ ཨབ༌ནེར༌རི༌ མག༌མི༌ 360 སདས༌,
ཁོང༌ ཚང༌མ༌ བེན༌ཡཱ༌མིན༌ནི༌ སྡེ༌ནེ༌ ཨིན༌པིན༌།
32 ཡོ༌འབ༌ དང༌ ཁོའེ༌ མག༌མི༌གུན༌ནི༌ ཨ༌ས༌ཧེལ༌ལི༌ རོ༌ བེད༌ལེ༌ཧེམ༌མ༌ ཁྱེར༌ཏེ༌ ཁོང༌རང༌ངི༌ ཨ༌བའེ༌ སྤུར༌ཁང༌ངི༌ ནང༌ང༌ སུབས༌།
ཏེ༌ནེ༌ ཁོང༌གུན༌ ཚན༌ གང༌པོ༌ གྲུལས༌ ཡང༌ ནམ༌ ལང༌ ཟ༌ནེ༌ ཧེབ༌རོན༌ལ༌ ལེབ༌།