ས༌མུའེལ༌ལི༌ སྤེ༌ཆ༌ ཏང༌པོ༌
ས༌མུའེལ༌ སྐྱེས༌།
1:1 ནེ༌ 20
1
ཨེཕ༌ར༌ཡིམ༌ རི༌ཡུལ༌ལི༌ ར༌མཧ༌ ནས༌སའེ༌ ནང༌ང༌ ཨེལ༌ཀ༌ན༌ ཟེར༌ཁན༌ནི༌ མི༌ཞིག༌ དུག༌གད༌པིན༌,
ཁོ༌ ཟུཕ༌ མིར༌གྱུད༌ནེ༌ ཨིན༌པིན༌།
ཨེལ༌ཀ༌ན༌ ཡེ༌རོ༌ཧམ༌མི༌ བུ༌ཚ༌,
ཡེ༌རོ༌ཧམ༌ ཨེ༌ལི༌ཧུའི༌ བུ༌ཚ༌,
ཨེ༌ལི༌ཧུ༌ ཏོ༌ཧུའི༌ བུ༌ཚ༌ ཡང༌ ཏོ༌ཧུ༌ ཟུཕ༌ཕི༌ བུ༌ཚ༌ ཁོང༌ ཚང༌མ༌ ཨེཕ༌ར༌ཡིམ༌པ༌ ཨིན༌པིན༌།
2 ཨེལ༌ཀ༌ནའ༌ ན༌མ༌ ཉིས༌ ཡོད༌པིན༌,
ཧན༌ན༌ དང༌ པེ༌ནིན༌ནཧ༌།
པེ༌ནིན༌ནཧ༌ ཕྲུ༌གུ༌ ཡོད༌པིན༌ ཨིན༌ནའང༌ ཧན༌ན༌ མེད༌པིན༌།
3 ཨེལ༌ཀ༌ན༌ ཡ༌ཝ༌ ཀུན༌ཝང༌ དཀོན༌མཆོག༌ག༌ ཅོལ༌ཅེས༌ དང༌ ཁོང༌ང༌ ཆོད༌པ༌ ཕུལ༌ལ༌ ལོ༌ཞུང༌ ཁོ༌རང༌ངི༌ ཡུལ༌ནེ༌ ཤི༌ལོའ༌ ཆའད༌པིན༌།
ཏེ༌ཏུས༌ ཡ༌ཝ༌ དཀོན༌མཆོག༌ག༌ བླ༌མའེ༌ ཞབས༌ཏོག༌ ཨེ༌ལིའེ༌ བུ༌ཚ༌ ཧོཕ༌ནི༌ དང༌ ཕི༌ནི༌ཧས༌ ཉིས༌ཀོའེ༌ ཞུའད༌པིན༌།
4 ཆོད༌པ༌ ཕུལ༌ལི༌ ཞག༌ག༌,
ཨེལ༌ཀ༌ནའེ༌ ཆོད༌པ༌ ཕུལ༌ཁན༌ནི༌ ཤའེ༌ ཁག༌རིག༌ ཁོ༌རང༌ངི༌ ན༌མ༌ པེ༌ནིན༌ནཧ༌ དང༌ ཁོའེ༌ ཕྲུ༌གུ༌གུན༌ལ༌ ཏང༌ངད༌པིན༌།
5 ཡ༌ཝའེ༌ ཧན༌ན༌ ཕྲུ༌གུ༌ མ༌ སལ༌ནའང༌ ཨེལ༌ཀ༌ནའེ༌ ཧན༌ན༌ ཅམས༌པ༌ སྲན༌ཏྲེ༌ ཅོ༌ཅེས༌པའེ༌ ཁོའ༌ ཤའེ༌ ཁག༌ ཉི༌ལྡབ༌པོ༌ ཏང༌ངད༌པིན༌།
6 ཡ༌ཝའེ༌ ཧན༌ན༌ ཕྲུ༌གུ༌ མི༌སལ༌ཅེས༌པོའེ༌ པེ༌ནིན༌ནཧའེ༌ ཧན༌ནའ༌ ཚིག༌ ཏང༌ཨིན༌ སྲོ༌ ཡོང༌ཅུག༌གད༌ པིན༌།
7 ལོ༌ཞུང༌ འིན༌ན༌ ཙོགས༌ ཆའད༌པིན༌,
ཧན༌ན༌ ཡ༌ཝ༌ དཀོན༌མཆོག༌གི༌ ཆོད༌ཁང༌ངི༌ ནང༌ང༌ ཆ༌ ཟ༌ནེ༌ པེ༌ནིན༌ནཧའེ༌ ཁོའ༌ འི༌ཟམ༌ ངན༌པ༌ ཟེར༌ཏེ༌ རྡུག༌པོ༌ སྟན༌ནད༌པིན༌ ཁོ༌ ངུ༌ཨིན༌ དུགས༌ཏེ༌ ཟན༌ནའང༌ ཟའ༌ མེད༌པིན༌།
8 ཁོའེ༌ མག༌པ༌ ཨེལ༌ཀ༌ནའེ༌ ཁོའ༌ ཟེརས༌,
“ཧན༌ན༌ ཅི༌ཕིའ༌ ཁྱོ༌རང༌ ངུའད༌?
ཅི༌ཕིའ༌ ཁྱོ༌རང༌ ཟན༌ ཟའ༌མེད༌?
ཁྱོ༌རང༌ངི༌ ཚེར༌ཁ༌ ཅིའ༌ ཅོད༌?
ཁྱོ༌རང༌ངི༌ ཕིའ༌ བུ༌ཚ༌ རྕུའི༌ སང༌ ང༌ མང༌ང༌ ཁག༌ཅན༌ མན༌ན༌?”
9 ཤི༌ལོའེ༌ ནང༌ང༌ ལན༌ཅིག༌ ཁོང༌གུན༌ ཡ༌ཝ༌ དཀོན༌མཆོག༌གི༌ ཆོད༌ཁང༌ངི༌ དུན༌ལ༌ ཟན༌ ཟའ༌ དང༌ ཆུ༌ ཐུང༌ ཚར༌ཏེ༌ སྟིང༌ནེ༌ ཧན༌ན༌ མོས༌ལམ༌ ཞུ༌ཅེས༌ལ༌ ལངས༌།
ཏེན༌ན༌ ཟ༌ནེ༌ བླ༌མ༌ ཨེ༌ལི༌ ཡ༌ཝའེ༌ ཆོད༌ཁང༌ངི༌ སྒོའེ༌ དུན༌ལ༌ ཕོས༌སྟག༌གི༌ཀ༌ དུགས༌ཏེ༌ ཡོད༌པིན༌།
10 ཧན༌ན༌ སེམས༌ མ༌སྲན༌ཏྲེ༌ སྐྱོ༌མོ༌ སོང༌ཏེ༌ ཁོའེ༌ ཡ༌ཝའ༌ མོས༌ལམ༌ ཞུས༌ ཡང༌ མ༌སྲན༌ཏྲེ༌ ངུས༌།
11 ཧན༌ནའེ༌ ནའ༌ ཁུར༌ཏེ༌ ཟེརས༌,
“ཡ༌ཝ༌ ཀུན༌ཝང༌ལེ༌,
ཀལ༌ཏེས༌ ཉེ༌རང༌ངི༌,
ང༌ ཉེ༌རང༌ངི༌ ཡོག༌མོའེ༌ རྡུག༌ངལ༌བོ༌ ཟིགས༌ཏེ༌ ང༌ རྗེད༌ མ༌རྗེད༌ད༌ ཨིད༌ཏུ༌ ཛད༌ཏེ༌ ངའ༌ བུ༌ཚ༌ཞིག༌ སལ༌ལ༌ ཛད༌ན༌ ངའེ༌ ཁོ༌,
མི༌ཚེ༌ གང༌པོ༌ ཉེ༌རང༌ང༌ ཞབས༌ཏོག༌ ཞུ༌ཅེས༌ལ༌ ཕུལ༌ཨིན༌ ཡང༌ ཁོའེ༌ སྲ༌ མ༌ནེ༌ མི༌ བྲག༌།
12 ཧན༌ནའེ༌ ཡ༌ཝའ༌ མོས༌ལམ༌ ཞུ༌ཨིན༌ ཡོད༌ ཟ༌ནེ༌ ཨེ༌ལི༌ ཁོའེ༌ ཁའ༌ ལྟས༌ཏེ༌ དུགས༌།
13 ཧན༌ནའེ༌ སེམས༌སི༌ ནང༌ང༌ མོས༌ལམ༌ ཞུས༌པ༌ ཁོའེ༌ ཁའ༌ ཅིག༌པོ༌ སྐུལ༌ལད༌པིན༌ ཨིན༌ནའང༌ སྐད༌ ཚོར༌ར༌ མེད༌པིན༌ ཏེ༌བོའེ༌ཕིའ༌ ཨེ༌ལི༌ ཁོ༌ ར༌རོས༌ཏེ༌ ཨིན༌ནོག༌ སམ༌
14 ཡང༌ ཁོའེ༌ བུ༌མོའ༌ ཟེརས༌,
“ར༌རོས༌ཏེ༌ ནམ༌ ཚག༌པ༌ སྟན༌མོ༌ སྟན༌ནད༌?
རྒུན༌ཆང༌ ཐུང༌ཅེས༌ ཕོང༌།”
15 བུ༌མོའེ༌ ལན༌ཏངས༌,
“མན༌,
ང༌ ར༌རོས༌ཏེ༌ མན༌,
སྤོན༌བོ༌ལེ༌,
ང༌ རྡུག༌ངལ༌ཅན༌ནི༌ བུ༌མོ༌ཞིག༌ ཨིན༌,
ངའེ༌ རྒུན༌ཆང༌ ཡ༌ ཞན༌ ཆང༌ མ༌ནེ༌ ཐུང༌ མི༌ཤེས༌།
ངའེ༌ ང༌རང༌ངི༌ སྙིང༌ནེ༌ རྡུག༌ངལ༌བོ༌ ཡ༌ཝའེ༌ སྐུན༌དུན༌ལ༌ བོར༌རད༌པིན༌།
16 ང༌ ངན༌པ༌ བུ༌མོ༌ ཞིག༌ ཨིན༌ནོག༌ སམ༌མ༌ མ༌ཛད༌།
ངའ༌ རྡུག༌ངལ༌ སྲན༌ཏྲེ༌ ཡོད༌པ༌ ངའེ༌ སྙིང༌ནེ༌ མོས༌ལམ༌ ཞུའད༌པིན༌།”
17 ཨེ༌ལི༌ ཟེརས༌,
“ཏེ༌ ཟུག༌ ཨིན༌ན༌,
ཞི༌དེ༌ ཉམ༌པོ༌ སོང༌,
ཨིས༌ར༌ཨེལ༌པའེ༌ དཀོན༌མཆོག༌གི༌ ཁྱོ༌རང༌ངི༌ ཞུ༌ཁན༌བོ༌ སལ༌ལ༌ ཛད༌ཤིག༌།”
18 བུ༌མོའེ༌ ལན༌ཏངས༌,
“ཉེ༌རང༌ངི༌ ཆོག༌སྐྱོར༌ ང༌ ཏུས༌གྱུན༌ ཐོབ༌ཤིག༌”,
ཏེ༌ནེ༌ ཁོ༌ ལོགས༌ཏེ༌ སོང༌ ཡང༌ ཟན༌ ཟོས༌།
ཁོའེ༌ སེམས༌ སྐྱོ༌མོ༌ མ༌ལུས༌།
19 ཐོ༌རེ༌ཟུག༌པོ༌ ཨེལ༌ཀ༌ན༌ དང༌ ཁོའེ༌ ནང༌ཚངས༌ ང༌མོ༌ནེ༌ ལངས༌ཏེ༌ ཡ༌ཝ༌ དཀོན༌མཆོག༌ག༌ ཅོལ༌ཏེ༌ སྟིང༌ནེ༌ ཁོང༌གུན༌ ར༌མཧ༌ ཁོ༌རང༌གུན༌ནི༌ ཁང༌པ༌ ལོགས༌ཏེ༌ སོང༌།
ཨེལ༌ཀ༌ན༌ དང༌ ཧན༌ནའེ༌ ལུས༌བྲེལ༌ ཅོས༌ ཡང༌ ཡ༌ཝའེ༌ བུ༌མོའེ༌ མོས༌ལམ༌མ༌ ལན༌སལས༌།
20 བུ༌མོ༌བོ༌ སྐྱེ༌ཅེས༌མ༌ གྱུར༌ ཡང༌ བུ༌ཚ༌ཞིག༌ སྐྱེས༌།
བུ༌མོའེ༌ ཁོའེ༌ མིང༌ང༌ ས༌མུའེལ༌ ཏགས༌ ཡང༌ ཟེརས༌,
“ཁོ༌ སལ༌ཅེས༌ལ༌ ངའེ༌ ཡ༌ཝ༌ དཀོན༌མཆོག༌ག༌ ཞུས༌པིན༌།”
ཧན༌ནའེ༌ བུ༌ཚ༌ ཡ༌ཝའ༌ ཕུལས༌།
1:21 ནེ༌ 28
21 ཨེལ༌ཀ༌ན༌ དང༌ ཁོའེ༌ ནང༌མི༌གུན༌ ཤི༌ལོའ༌ ཆོད༌པ༌ ཕུལ༌ལ༌ ཆ༌ཅེས༌སི༌ ཏུས༌པོ༌ ཡང༌སྐྱར༌ ལེབ༌ ཡང༌ ཁོའེ༌ ཡ༌ཝའ༌ ཆོད༌པ༌ ཕུལས༌ མིག༌སལ༌ལི༌ ཁོའེ༌ དམ༌ཆ༌ ཅོས༌ཁན༌བོ༌ ཏན༌ཏན༌ ཅོའ༌ལ༌།
22 ཨིན༌ནའང༌ ཧན༌ན༌ ཁོ༌ ཉམ༌པོ༌ མ༌ཡོངས༌ ཡང༌ ཁོ༌རང༌ངི༌ མག༌པ༌ ཟེརས༌,
“ཕྲུ༌གུའ༌ པི༌བི༌ ཅད༌ད༌ཅིག༌ ང༌ ཁོ༌ ཁྲིད༌ཏེ༌ ཡ༌ཝའེ༌ ཆོད༌ཁང༌ང༌ སོང༌ཏེ༌ ངའེ༌ ཁོ༌ ཁོང༌ང༌ ཕུལ༌ཨིན༌ ཡང༌ ཁོའེ༌ ཤི༌ཤི༌ ཚག༌པ༌ ཡ༌ཝའ༌ ཞབས༌ཏོག༌ ཞུའ༌ནོག༌།”
23 ཨེལ༌ཀ༌ནའེ༌ ལན༌ཏངས༌,
“ཁྱོ༌རང༌ངི༌ གྱལ༌ལ༌ སམ༌ཁན༌བོ༌ ཅོས༌།
བུ༌ཚའ༌ པི༌བི༌ ཅད༌ཅད༌ ཚག༌པ༌ ཁྱོ༌རང༌ སྲུང༌།
དམ༌ཆ༌ ཅོས༌ཁན༌བོ༌ གྲུབ༌ ཅུག༌ཅེས༌ལ༌ ཡ༌ཝ༌ དཀོན༌མཆོག༌གི༌ ཁྱོ༌རང༌ང༌ རོགས༌ ཛད༌ཤིག༌།”
ཏེ༌བོའེ༌ཕིའ༌ པི༌བི༌ ཅད༌ཅད༌ ཧན༌ན༌ ཁང༌པ༌ དུགས༌ཏེ༌ བུ༌ཚའེ༌ སྟ༌སྟོག༌ ཅོས༌།
24 ཕྲུ༌གུའ༌ པི༌བི༌ ཅད༌ད༌ཅིག༌,
ཧན༌ནའེ༌ བུ༌ཚ༌,
ལང༌ཏོ༌ ལོ༌ སུམ༌པ༌,
ཕེ༌ ཀི༌ལོ༌ རྒུ༌ དང༌ ནོད༌དི༌ ནང༌ང༌ རྒུན༌ཆང༌ གུན༌ ཁུར༌ཏེ༌ ཤི༌ལོའེ༌ ནང༌ང༌ ཡོད༌ཁན༌ ཡ༌ཝའེ༌ ཆོད༌ཁང༌ང༌ སོང༌།
25 བླ༌མའེ༌ ལང༌ཏོ༌ སད༌ཏེ༌ ཆོད༌པ༌ ཕུལ༌ ཚར༌ར༌ཅིག༌ ཁོང༌གུན༌ནི༌ བུ༌ཚ༌བོ༌ ཨེ༌ལི༌ ཡོད༌ས༌ ཁྱེརས༌།
26 ཧན༌ནའེ༌ ཨེ༌ལིའ༌ ཟེརས༌,
“སྤོན༌བོ༌ལེ༌ ཉེ༌རང༌ང༌ ཨིད༌ཏུ༌ རག༌ག༌?
ལོ༌ ཁ༌ཅིག༌གི༌ སྔུན༌ལ༌ ང༌ འི༌ཀ༌ ལངས༌ཏེ༌ ཡ༌ཝ༌ དཀོན༌མཆོག༌ག༌ མོས༌ལམ༌ ཞུ༌ཁན༌ནི༌ བུ༌མོ༌བོ༌ ཨིན༌།
27 ངའེ༌ འི༌ ཕྲུ༌གུ༌ ཕིའ༌ མོས༌ལམ༌ ཞུས༌པིན༌ ཡང༌ ངའེ༌ ཏོང༌ ཟེར༌ཁན༌བོ༌ ཡ༌ཝའེ༌ ངའ༌ སལ༌ ཛདས༌།
28 ཏེ༌བོའེ༌ཕིའ༌ ངའེ༌ ཁོ༌ ཡ༌ཝ༌ དཀོན༌མཆོག༌ག༌ ཕུལ༌ལད༌,
ཁོའེ༌ ཤི༌ཤི༌ ཚག༌པ༌ ཡ༌ཝ༌ དཀོན༌མཆོག༌ག༌ ཞབས༌ཏོག༌ ཞུ༌ཨིན༌།”
ཏེ༌ནེ༌ ཁོང༌གུན༌ནི༌ ཏེ༌རུ༌ ཡ༌ཝ༌ དཀོན༌མཆོག༌ག༌ ཅོལས༌།