ས༌མུའེལ༌ 1 2

ཧན༌ནའེ༌ མོས༌ལམ༌།

2:1 ནེ༌ 11

ཧན༌ནའེ༌ མོས༌ལམ༌ ཞུས༌,

“ཡ༌ཝའེ༌ ངའ༌ ཛད༌ཁན༌བོའེ༌ ཕིའ༌ ངའེ༌ ཁོང༌ང༌ སྟོད༌པ༌ ཕུལ༌ལད༌,

ཁོང༌ངི༌ ནང༌ང༌ ང༌ ཤེད༌ཅན༌ གྱུར༌།

ང༌ ང༌རང༌ངི༌ གྲ༌འོ༌གུན༌ནི༌ཀ༌ གོད༌ཅེས༌ ཡོང༌ང༌རག༌,

ཉེ༌རང༌ངི༌ ང༌ སྐྱོབ༌བ༌ ཛད༌ཅེས༌པོའ༌ ངའེ༌ ཐད༌པོ༌ ཅོད༌།

2 ཡ༌ཝ༌ ཙོགས༌ ཏམ༌པ༌ སུའང༌ མེད༌!

ཉེ༌རང༌ ཅིག༌པོ༌ དཀོན༌མཆོག༌ ཞུགས༌ཏེ༌ ཨིན༌!

ཉེ༌རང༌ ང༌ཞའ༌ སྐྱོབ༌ཏེ༌ བོར༌ར༌ ཛད༌ཁན༌ནི༌ བྲག༌པོ༌ ཨིན༌།

3 ཕོ༌སོའེ༌ སྤེ༌ར༌ མ༌ཏང༌,

ཁའ༌ནེ༌ ཕོ༌སོའེ༌ ཚིགས༌གུན༌ བིང༌ མ༌ཅུག༌,

ཅིའ༌ཟེར༌ན༌ ཡ༌ཝ༌, ཅི༌ཚང༌མ༌ ཁྱེན༌ཁན༌ནི༌ དཀོན༌མཆོག༌ ཞུགས༌ཏེ༌ ཨིན༌ནོག༌

ཡང༌ མི༌གུན༌ནི༌ ཅོ༌ཁན༌ ཚང༌མ༌ལ༌ ཁོང༌ངི༌ ཁྲིམས༌ཅད༌ ཛད༌ད༌ནོག༌།

4 ཡ༌ཝ༌, ཉེ༌རང༌ངི༌ མག༌མི༌ ཤེད༌ཅན༌གུན༌ནི༌ ཞུ༌ ཅག༌ག༌ ཛད༌ཨིན༌

ཨིན༌ནའང༌ ཤེད༌མེད༌གུན༌ ཤེད༌ཅན༌ ཛད༌ད༌ནོག༌།

5 སྔུན༌ལ༌ ཟ༌གྱུ༌ མང༌པོ༌ ཡོད༌ཁན༌གུན༌,

ཏ༌ ཟན༌ ཉོ༌ཅེས༌ལ༌ ཞན༌མའེ༌ ཕིའ༌ ལས༌ ཅོ༌གོས༌དུག༌།

ཨིན༌ནའང༌ སྟོག༌རིའ༌ ལུས༌ཁན༌གུན༌ ཏ༌ གྲང༌གྲངས༌ ཟའ༌དུག༌།

ཕྲུ༌གུ༌ མེད༌ཁན༌ནི༌ བུ༌མོ༌གུན༌ལ༌ ཕྲུ༌གུ༌ རྡུན༌ ཇོར༌,

ཨིན༌ནའང༌ ཕྲུ༌གུ༌ མང༌པོའེ༌ ཨ༌མ༌ ཏ༌ ཅིག༌པོ༌ ལུས༌ས༌ནོག༌།

6 ཡ༌ཝའེ༌ ཤི༌ཅུག༌ག༌ ཛད༌དུག༌ ཡང༌ སྲོག༌གའང༌ སལ༌ལ༌ ཛད༌དུག༌།

ཁོང༌ངི༌ ཁ༌ཅིག༌ ཤི༌ཁན༌གུན༌ནི༌ ནས༌སའེ༌ ནང༌ང༌ ལམ༌ཅུག༌ག༌ ཛད༌དུག༌

ཡང༌ ཁོང༌གུན༌ ཤི༌ཁན༌གུན༌ནི༌ ནས༌སའེ༌ ནང༌ནེ༌ ལང༌ང༌ ཛད༌དུག༌།

7 ཁོང༌ངི༌ ཉལ༌བ༌ཅན༌ དང༌ ཆུག༌པོ༌ ཛད༌དུག༌,

ཡང༌ ཁོང༌ངི༌ ཁ༌ཅིག༌ བོལ༌མོ༌ ཛད༌དུག༌ ཡང༌ ཁ༌ཅིག༌ག༌ སྤལ༌ སལ༌ལ༌ ཛད༌།

8 ཁོང༌ངི༌ ཉལ༌བ༌ཅན༌གུན༌ རྡུག༌པོའེ༌ ནས༌ལུག༌ནེ༌ ཕིང༌ང༌ ཛད༌དུག༌

ཡང༌ སྒོས༌དོམ༌ ཡོད༌ཁན༌གུན༌ རྡུག༌ངལ༌གུན༌ནེ༌ སྟག༌ག༌ ཛད༌དུག༌།

ཁོང༌ངི༌ ཁོང༌གུན༌ གྱལ༌ལུ༌གུན༌ནི༌ ཕྲོའ༌ རྩི༌ཝ༌ཅན༌ནི༌ ཁྲིས༌སི༌ཀ༌ བོར༌ར༌ ཛད༌དུག༌།

ཇིག༌རྟེན༌ནི༌ མག༌ལྡན༌གུན༌ ཡ༌ཝའེ༌ ཨིན༌ནོག༌,

ཡང༌ ཏེན༌ན༌བོའེ༌ཀ༌ ཁོང༌ངི༌ ཇིག༌རྟེན༌ རྩིག༌ག༌ ཛདས༌།

9 ཁོང༌ངི༌ ཁོང༌རང༌ངི༌ ཏམ༌པ༌ མི༌གུན༌ནི༌ སྟ༌སྟོག༌ ཛད༌ཨིན༌,

ཨིན༌ནའང༌ ངན༌པ༌གུན༌ མུན༌ནག༌གི༌ ནང༌ང༌ སྟོར༌ ཅུག༌ག༌ ཛད༌ཨིན༌།

ཁོ༌རང༌ངི༌ ཁྱུད༌ གྱུད༌ཏེ༌ མི༌ ཁྲངས༌པོ༌ གྱུར༌ར༌ མ༌ནོག༌།

10 ཡ༌ཝའེ༌ གྲ༌འོ༌གུན༌ ཁྲེས༌ཏོར༌ ཆེན༌,

ཁོང༌ངི༌ ཏེ༌གུན༌ནི༌ཀ༌ ནམ༌ཁའ༌ནེ༌ བྲུག༌ལྡིར༌ ཕབ༌བ༌ ཛད༌ཨིན༌།

ཡ༌ཝའེ༌ ཇིག༌རྟེན༌པ༌ ཚང༌མའ༌ ཁྲིམས༌ཅད༌ ཛད༌ཨིན༌།

ཁོང༌ངི༌ ཁོང༌རང༌ངི༌ གྱལ༌པོའ༌ ཝང༌ཆ༌ སལ༌ལ༌ ཛད༌ཏེ༌

ཁོང༌ངི༌ ལྡམ༌མ༌ ཛད༌ཁན༌ནི༌ གྱལ༌པོའ༌ སྟོབས༌ སལ༌ལ༌ ཛད༌ཨིན༌།”

11 ཏེ༌ནེ༌ ཨེལ༌ཀ༌ན༌ ལོགས༌ཏེ༌ ར༌མཧ༌ སོང༌ ཨིན༌ནའང༌ བུ༌ཚ༌ ས༌མུའེལ༌ བླ༌མ༌ ཨེ༌ལི༌ ལབ༌ཞའེ༌ ཡོག༌ག༌ ཡ༌ཝའ༌ ཞབས༌ཏོག༌ ཞུ༌ཅེས༌ལ༌ དུགས༌།

ཨེ༌ལིའེ༌ ངན༌པ༌ བུ༌ཚ༌གུན༌།

2:12 ནེ༌ 26

12 བླ༌མ༌ ཨེ༌ལིའེ༌ བུ༌ཚ༌ ཉིས༌ཀོ༌ མ༌ ངན༌པ༌ ཡོད༌པིན༌། ཁོང༌གུན༌ནི༌ ཡ༌ཝའ༌ རྩི༌ཝ༌ ཏང༌ང༌ མེད༌པིན༌། 13 ཏ༌ ཨེ༌ལིའེ༌ བུ༌ཚ༌ བླ༌མ༌གུན༌ལ༌ འི༌ ལོབས༌པོ༌ ཡོད༌པིན༌, མི༌གུན༌ནི༌ ཆོད༌པ༌ ཕུལ༌ཁན༌ནི༌ ཤ༌ སྐོལ༌ཨིན༌ ཡོད༌ཏུས༌ ཁོང༌གུན༌ནི༌ ཡོག༌པོ༌ སོ༌སུམ༌ཅན༌ནི༌ ཤ༌རྗེན༌ ཀལ༌ཏེ༌ ལམ༌ ཅུག༌གད༌པིན༌། 14 ཡང༌ ཁོའེ༌ ཤ༌ སྐོལ༌ཁན༌ནི༌ ཟང༌བུའི༌ ནང༌ང༌ ཤ༌རྗེན༌བོ༌ ཙུག༌ཏེ༌ ཏེ༌ཀ༌ ཁད༌ཁན༌ནི༌ ཤ༌ བླ༌མ༌ ཨེ༌ལིའེ༌ བུ༌ཚ༌གུན༌ནི༌ ཕིའ༌ ཁྱེར༌རད༌པིན༌། ཤི༌ལོའ༌ ཡ༌ཝ༌ ཅོལ༌ལ༌ ཡོང༌ཁན༌ ཨིས༌ར༌ཨེལ༌པ༌ ཚང༌མ༌ ཉམ༌པོ༌ ཁོང༌གུན༌ནི༌ འིན༌ན༌ ཙོགས༌ ཅོའད༌པིན༌།

15 ཏེ༌ མ༌ཚད༌ ཤའེ༌ ཚིལ༌ སྲག༌གི༌སང༌ སྔུན༌ལའང༌ ཡོག༌པོ༌ ཡོངས༌ཏེ༌ ཆོད༌པ༌ ཕུལ༌ཁན༌ནི༌ མི༌བོའ༌ ཟེར༌རད༌པིན༌, “བླ༌མའེ༌ ཕིའ༌ ཤ༌ སྲག༌ཅེས༌ ཏོང༌, ཁོང༌གུན༌ནི༌ ཤ༌རྗེན༌ མན༌ནེ༌ སྐོལ༌ཁན༌ནི༌ ཤ༌ ལེན༌ན༌ མ༌ནོག༌།” 16 ཀལ༌ཏེས༌ མི༌བོའེ༌ ཟེར༌ན༌, “ཚིལ༌ ཚིག༌ ཚར༌ཅུག༌, ཏེ༌ནེ༌ གོས༌ཁན༌ནི༌ ཤ༌ ཁྱེར༌།” བླ༌མའེ༌ ཡོག༌པོའེ༌ ལན༌ཏངས༌, “མན༌! ང༌ ཤ༌ དག༌ས༌རང༌ ཏོང༌, ཏེ༌མན༌ན༌ ངའེ༌ ཝང༌ ཉམ༌པོ༌ ཁྱེར༌ཨིན༌།”

17 ཨེ༌ལི༌ བུ༌ཚ༌གུན༌ནི༌ ཅོ༌ཁན༌ སྡིག༌པ༌ ཡ༌ཝའེ༌ སྐུན༌དུན༌ལ༌ མངས༌ཏེའང༌ ངན༌པ༌ ཡོད༌པིན༌ ཅིའ༌ཟེར༌ན༌ ཁོང༌གུན༌ནི༌ ཡ༌ཝའ༌ ཕུལ༌ཁན༌ནི༌ ཆོད༌པའ༌ རྩི༌ཝ༌ མ༌ཏང༌ང༌ ཨིན༌པིན༌།

18 ས༌མུའེལ༌ ཕྲུ༌གུ༌ འིན༌ནི༌ ཏུས༌ལའང༌ རས༌ ཀུས༌པོའ༌ ཙེམས༌ཁན༌ནི༌ ཨེ༌ཕོད༌ གོན༌ཏེ༌ ཡ༌ཝའེ༌ ཞབས༌ཏོག༌ ཞུའད༌པིན༌། 19 ལོ༌ཞུང༌, ས༌མུའེལ༌ལི༌ ཨ༌མའེ༌ ཁོའེ༌ ཕིའ༌ གོས༌ སོ༌མ༌ ཙེམས༌ཏེ༌ ཁོ༌རང༌ངི༌ མག༌པ༌ ཉམ༌པོ༌ ཆོད༌པ༌ ཕུལ༌ལ༌ ཆ༌ ཟ༌ནེ༌ ཁྱེར༌རད༌པིན༌། 20 ཨེལ༌ཀ༌ན༌ དང༌ ཁོའེ༌ ན༌མའ༌ ཨེ༌ལིའེ༌ ཅིན༌ལབས༌ ཏངས༌ཏེ༌ ཟེརས༌, “ཡ༌ཝའེ༌ ཞབས༌ཏོག༌གི༌ ཕིའ༌ སལ༌ཁན༌ནི༌ འི༌ བུ༌ཚའེ༌ ཚབས༌ལ༌ ཡ༌ཝའེ༌ ཁྱོ༌རང༌ང༌ འི༌ བུ༌མོ༌བོ༌ གྱུད༌ཏེ༌ ཞན༌ ཕྲུ༌གུ༌ སལ༌ཤིག༌།” ཏེ༌ སྟིང༌ནེ༌ ཁོང༌གུན༌ ཁང༌པ༌ ལོགས༌ཏེ༌ སོང༌། 21 ཡ༌ཝའེ༌ ཧན༌ན༌ ཅིན༌ལབས༌ སལས༌ ཡང༌ ཁོའ༌ ཞན༌ བུ༌ཚ༌ སུམ༌ དང༌ བུ༌མོ༌ ཉིས༌ ཇོར༌། ས༌མུའེལ༌ ཡ༌ཝའ༌ ཞབས༌ཏོག༌ ཞུ༌ཨིན༌ ལྡན༌།

22 ཏ༌ ཨེ༌ལི༌ མ༌རྒད༌པོ༌ སོང༌ཏེ༌ ཡོད༌པིན༌, ཁོའ༌ ཁོ༌རང༌ངི༌ བུ༌ཚ༌གུན༌ནི༌ ཨིས༌ར༌ཨེལ༌པ༌གུན༌ ཉམ༌པོ༌ ཅོ༌ཁན༌ དང༌ ཡ༌ཝ༌ དཀོན༌མཆོག༌ག༌ ཐུག༌སའེ༌ ཀུར༌རི༌ སྒོའེ༌ཀ༌ ཞབས༌ཏོག༌ ཞུ༌ཁན༌ནི༌ བུ༌མོ༌གུན༌ ཉམ༌པོ༌ ལུས༌བྲེལ༌ ཅོ༌ཁན༌བོ༌ ཚོར༌པ༌ 23 ཁོའེ༌ ཁོང༌གུན༌ལ༌ ཟེརས༌, “ཅི༌ཕིའ༌ ཁྱོ༌རང༌གུན༌ནི༌ འི༌ཙོགས༌ ལས༌ ཅོའད༌? ཚང༌མའེ༌ ངའ༌ ཁྱོ༌རང༌གུན༌ནི༌ ལས༌ ངན༌པ༌ ཅོ༌ཁན༌གུན༌ ཤད༌དུག༌། 24 ངའེ༌ བུ༌ཚ༌གུན༌, ཏེ༌ཙོགས༌ མ༌ཅོ༌ཤིག༌། ཡ༌ཝའེ༌ མི༌གུན༌ནི༌ ཀ༌ནེ༌ ཁྱོ༌ཞའེ༌ ལས༌ ངན༌པ༌གུན༌ནི༌ སྐོར༌ ཚོར༌ཅེས༌པོ༌ ཟང༌པོ༌ཞིག༌ མ༌ནོག༌། 25 ཀལ༌ཏེས༌ མི༌ཞིག༌གི༌ ཞན༌ མི༌ཞིག༌གི༌ གྱབ༌གལ༌ལ༌ སྡིག༌པ༌ ཅོ༌ན༌ ཏེ༌ སྡིག༌ཅན༌བོའ༌ དཀོན༌མཆོག༌གི༌ ཤགས༌པ༌ སལ༌ ཉན༌ན༌ནོག༌། ཨིན༌ནའང༌ སུ༌ཞིག༌གི༌ དཀོན༌མཆོག༌གི༌ གྱབ༌གལ༌ལ༌ སྡིག༌པ༌ ཅོ༌ན༌ ཏེ༌ནེ༌ ཁོང༌གུན༌ནི༌ པར༌ལ༌ སུའ༌ སྤེ༌ར༌ ཏང༌ ཐུབ༌ཨིན༌?” ཨིན༌ནའང༌ ཁོང༌གུན༌ནི༌ ཁོང༌རང༌གུན༌ནི༌ ཨ༌བའེ༌ ཁའ༌ མ༌ཉནས༌, ཅིའ༌ཟེར༌ན༌ ཡ༌ཝའེ༌ ཁོང༌གུན༌ སད༌ཅེས༌ ཐག༌ཅད༌ ཛད༌ཏེ༌ ཨིན༌པིན༌།

26 བུ༌ཚ༌ ས༌མུའེལ༌ ལྡན༌ཨིན༌ སོང༌། ཡ༌ཝ༌ དཀོན༌མཆོག༌ ཁོའེ༌ཀ༌ ཐུག༌ཉེས༌ ཡང༌ མི༌གུན༌ནི༌ ཁོའ༌ སྟོད༌པ༌ ཏངས༌།

ཨེ༌ལིའེ༌ ནང༌ཚངས༌སི༌ སྐོར༌ལ༌ ལུང༌སྟན༌།

2:27 ནེ༌ 36

27 ཞག༌ཤིག༌ ཨེ༌ལི༌ ཡོད༌ས༌ ལུང༌སྟོན༌པ༌ཞིག༌ ཡོངས༌ཏེ༌ ཡ༌ཝའེ༌ ཆོགས༌ནེ༌ འི༌ ལོན༌བོ༌ ཁྱོངས༌, “ཨི༌ཇིབ༌བི༌ ནང༌ང༌ ཁྱོ༌རང༌ངི༌ ཕ༌མེས༌པོ༌ ཨ༌རོན༌ དང༌ ཁོའེ༌ ནང༌ཚངས༌ ཚེ༌ཡོག༌ག༌ ཡོད༌ ཟ༌ནེ༌ ངའེ༌ ང༌རང༌ ཨ༌རོན༌ལ༌ སྔོན༌ མ༌ཅུགས༌ས༌? 28 ངའེ༌ ཨིས༌ར༌ཨེལ༌ལི༌ སྡེ༌ ཚང༌མའེ༌ ཕྲོ༌ནེ༌ ཁྱོ༌རང༌ངི༌ ཕ༌མེས༌པོ༌ ངའེ༌ བླ༌མ༌ གྱུར༌ཏེ༌ ཆོད༌ཁྲི༌ཀ༌ ཆོད༌པ༌ ཕུལ༌ཏེ༌ སྤོས༌ ཏུག༌ཅེས༌ ཡང༌ ཏམ༌པ༌ ཀོས༌ ཨེ༌ཕོད༌ གོན༌ཏེ༌ ང༌ ཞབས༌ཏོག༌ ཞུ༌ཅེས༌ལ༌ ལྡམས༌པིན༌། ངའེ༌ ཁོའེ༌ པུར༌གྱུད༌གུན༌ལ༌ ཆོད༌ཁྲི༌ཀ༌ ཆོད༌པ༌ ཕུལ༌ཁན༌གུན༌ནི༌ ནང༌ནེ༌ ཁག༌ཤིག༌ ཟའ༌ཅེས༌ལ༌ གོངས༌པ༌ ཏངས༌པིན༌། 29 ཏེ༌ནེ༌ ངའེ༌ བཀའ༌ ནང༌ཞིན༌ ངའ༌ ཕུལ༌ཁན༌ནི༌ ཆོད༌པ༌གུན༌ལ༌ ཁྱོ༌རང༌ངི༌ ནབས༌ ཉམ༌པོ༌ ཅི༌ཕིའ༌ ལྟའད༌? ཡང༌ ཁྱོ༌རང༌ངི༌ བུ༌ཚ༌གུན༌ལ༌ ངའེ༌ སང༌ མང༌ང༌ རྩི༌ཝ༌ ཏངས༌ཏེ༌ ངའ༌ ཆོད༌པ༌ ཕུལ༌ཁན༌གུན༌ནི༌ ནང༌ནེ༌ གྱལ༌ཤོག༌པོ༌ ཁོང༌གུན༌ལ༌ ཏངས༌ཏེ༌ གྱགས༌ཤུག༌གད༌?”

30 “ཏེན༌ན༌བོའེ༌ཕིའ༌ ང༌ ཡ༌ཝ༌, ཨིས༌ར༌ཨེལ༌པའེ༌ དཀོན༌མཆོག༌གི༌ ཟེར༌རད༌, ‘ངའེ༌ ཁ༌ཆད༌ ཅོས༌པིན༌ ཨ༌རོན༌ དང༌ ཁོའེ༌ པུར༌གྱུད༌གུན༌ནི༌ བླ༌མའེ༌ ཚུལ༌ལ༌ ངའ༌ ཏུས༌གྱུན༌ ཞབས༌ཏོག༌ ཞུ༌ཨིན༌ ཨིན༌ནའང༌ ཏ༌ ཁྱོ༌ཞའ༌ ཨིད༌ཤེས༌ཅན༌ མི༌ལུས༌ཤེས༌པོའེ༌ ངའེ༌ ཏེ༌ ཁ༌ཆད༌པོ༌ ཅགས༌ཏེ༌ ཟེར༌རད༌ ངའ༌ རྩི༌ཝ༌ ཅོ༌ཁན༌གུན༌ལ༌ ངའེ༌ རྩི༌ཝ༌ ཏང༌ཨིན༌ ཡང༌ ངའ༌ རིན༌མེད༌ ཅོ༌ཁན༌གུན༌ལ༌ ངེའང༌ རིན༌མེད༌ ཅོ༌ཨིན༌། 31 ཏན༌ཏན༌ འི༌ ཏུས༌པོ༌ ལེབ༌ཨིན༌ ནམ༌ ངའེ༌ ཁྱོ༌རང༌ངི༌ ནང༌མི༌ ནང༌ང༌ ཞུ༌ནུ༌ བུ༌ཚ༌ ཤེད༌ཅན༌ ཚང༌མ༌ སད༌ཨིན༌། ཏེ༌བོའེ༌ ཞས༌ཏེ༌ ཁྱོ༌རང༌ངི༌ ནང༌མི༌ སུ༌ཞིག༌གའང༌ རྒད༌པོ༌ ཆ༌ཆ༌ མི༌ལུས༌། 32 ངའེ༌ ཨིས༌ར༌ཨེལ༌པ༌གུན༌ལ༌ ཏང༌ཁན༌ནི༌ ཅིན༌ལབས༌ ཚང༌མ༌ ཐོང༌ཏེ༌ ཁྱོ༌ཞའ༌ ཚིག༌ཅེས༌ དང༌ རྡུག༌ངལ༌ ཐོང༌ཨིན༌ ཨིན༌ནའང༌ ཁྱོ༌རང༌ངི༌ ནང༌ཚངས༌སི༌ ནང༌ནེ༌ སུ༌ཞིག༌གའང༌ རྒད༌པོ༌ ཆ༌ཆ༌ མི༌ལུས༌། 33 ཁྱོ༌རང༌ངི༌ པུར༌གྱུད༌ བླ༌མའེ༌ ཞབས༌ཏོག༌ ཞུ༌ཅེས༌ལ༌ ལུས༌ཁན༌གུན༌ ཞ༌ར༌ གྱུར༌ཏེ༌ ཏུས༌གྱུན༌ ཚེར༌ཁའ༌ དང༌ རྡུག༌པོའེ༌ ནང༌ང༌ ལུས༌ཨིན༌། ཁྱོ༌རང༌ངི༌ ཞན༌ པུར༌གྱུད༌གུན༌ ར༌འི༌ གྱུད༌ཏེ༌ ཤི༌ཨིན༌།”

34 “ཁྱོ༌རང༌ངི༌ བུ༌ཚ༌ ཧོཕ༌ནི༌ དང༌ ཕི༌ནི༌ཧས༌ ཉིས༌ཀོ༌ ཞག༌ཅིག༌གི༌ ནང༌ང༌ ཤི༌ཨིན༌ ཡང༌ ཏེ༌བོ༌ ངའེ༌ ཟེར༌ཁན༌ ཚང༌མ༌ ཀྲང༌པོ༌ དང༌ གྲུབ༌ཅེས༌སི༌ སྟགས༌པོ༌ ཨིན༌། 35 ཨིད༌ཤེས༌ཅན༌ནི༌ བླ༌མ༌ ཞིག༌ ངའེ༌ ལྡམ༌ཨིན༌, ཁོའེ༌ ངའེ༌ སྙིང༌ དང༌ སེམས༌སི༌ དོད༌པ༌གུན༌ གྲུབ༌ཅུག༌ ཨིན༌། ངའེ༌, ཁོའ༌ པུར༌གྱུད༌ མང༌པོ༌ ཏང༌ཨིན༌ ཡང༌ ཁོང༌གུན༌ནི༌ ངའེ༌ ལྡམ༌ཁན༌ནི༌ གྱལ༌པོ༌གུན༌ལ༌ ཏུས༌གྱུན༌ ཞབས༌ཏོག༌ ཞུ༌ཨིན༌། 36 ཁྱོ༌རང༌ངི༌ པུར༌གྱུད༌ སོན༌ཏེའ༌ ལུས༌ཁན༌གུན༌ བླ༌མ༌ ཡོད༌ས༌ སོང༌ཏེ༌ པེ༌ནེ༌ དང༌ ཟན༌ནི༌ ཕིའ༌ ལྩངས༌ཏེ༌ ཟེར༌ཨིན༌, ‘ང༌ཞའ༌ བླ༌མའེ༌ ཚུལ༌ལ༌ ཞབས༌ཏོག༌ ཞུ༌ཅེས༌སི༌ གོངས༌པ༌ སལ༌ ཏེ༌ནེ༌ ང༌ཞའ༌ ཟའ༌ཅེས༌ལ༌ ཟན༌ ཐོབ༌ཨིན༌།’”