གི༌བེ༌འོན༌པ༌གུན༌ནི༌ ས༌འུལ༌ལི༌ ཅོས༌ཁན༌བོའེ༌ ལན༌ ཏངས༌།
21:1 ནེ༌ 14
21
དཱ༌བིད༌དི༌ ཝང༌སྲུལ༌ལི༌ ཏུས༌ལ༌ ལོ༌ སུམ༌ མུ༌གེ༌ ཇུངས༌པ༌ ཁོའེ༌ ཡ༌ཝའ༌ མོས༌ལམ༌ ཞུས༌ཏེ༌ ཏྲིའ༌ཛདས༌ ཡང༌ ཡ༌ཝའེ༌ མོལས༌,
“ས༌འུལ༌ དང༌ ཁོའེ༌ ནང༌ཚང༌གུན༌ནི༌ གི༌བེ༌འོན༌པ༌གུན༌ སད༌ཅེས༌པོའེ༌ ངའེ༌ ཁྱོ༌ཞའ༌ འི༌ མུ༌གེ༌ ཁྱོངས༌ཏེ༌ ཨིན༌།”
2 གྱལ༌པོ༌ དཱ༌བིད༌དི༌ གི༌བེ༌འོན༌པ༌གུན༌ སྤེ༌ར༌ ཏང༌ང༌ལ༌ བོད༌ཏེ༌ ཁྱོངས༌།
༼དག༌ས༌ གི༌བེ༌འོན༌པ༌གུན༌ ཨིས༌ར༌ཨེལ༌ལི༌ མན༌པ༌ ལུས༌ཏེ༌ ཡོད༌ཁན༌ ཨེམ༌མོན༌པ༌གུན༌ནི༌ ཁག༌ཞིག༌ ཨིན༌པིན༌།
ཨིས༌ར༌ཨེལ༌པ༌གུན༌ནི༌ ཁོང༌གུན༌ མི༌སད༌ཅེས༌སི༌ ནའ༌ ཁུར༌ཏེ༌ ཨིན༌པིན༌ ཨིན༌ནའང༌ ས༌འུལ༌ལི༌ ཨིས༌ར༌ཨེལ༌པ༌ དང༌ ཡ༌ཧུ༌དཱ༌པ༌ གུན༌ ཅིག༌པོ༌ ཏེ༌ ནས༌སའེ༌ ནང༌ང༌ ལུས༌ཤེས༌ལ༌ ཁོང༌གུན༌ མེད༌ཁན༌ ཅོ༌ཅེས༌སི༌ རྩོན༌གྲུས༌ ཅོས༌།༽
3 དཱ༌བིད༌དི༌ གི༌བེ༌འོན༌པ༌གུན༌ལ༌ ཏྲིས༌,
“ཁྱོ༌ཞའ༌ ཉམ༌པོ༌ ང༌ཞའེ༌ བྲེལ༌ ལྡེ༌མོ༌ ཅོ༌ཅེས༌ལ༌ ང༌ཞའེ༌ སྡིག༌པ༌ ཅོ༌ཁན༌བོའ༌ རིན༌ ཅི༌ ཤལ༌གོས༌?
ཏེ༌ནེ༌ ཁྱོ༌ཞའེ༌ ཡ༌ཝའེ༌ ཁོང༌ངི༌ མི༌གུན༌ལ༌ ཅིན༌ལབས༌ སལ༌ཅེས༌ལ༌ ཞུ༌ཝ༌ ཕུལ༌ཉན༌ཨིན༌།”
4 གི༌བེ༌འོན༌པ༌གུན༌ནི༌ ལན༌ཏངས༌,
“ས༌འུལ༌ དང༌ ཁོའེ༌ ནང༌མི༌གུན༌ནི༌ ཀ༌ནེ༌ མུལ༌ དང༌ སེར༌ ལེན༌ཏེ༌ ཁོང༌ངི༌ སྡིག༌པ༌ ཅོ༌ཁན༌བོའ༌ ཤགས༌པ༌ མི༌ཏང༌ ཡ༌ ཨིས༌ར༌ཨེལ༌པ༌ སུ༌ཞིག༌གའང༌ སད༌ཅེས༌སི༌ ཝང༌ཆ༌ ང༌ཞའ༌ མེད༌།”
དཱ༌བིད༌དི༌ ཏྲིས༌,
“ཏེ༌ནེ༌ ངའེ༌ ཁྱོ༌ཞ༌གུན༌ནི༌ ཕིའ༌ ཅི༌ ཅོ༌,
ཟེར༌རའང༌།”
5 ཁོང༌གུན༌ནི༌ ལན༌ཏངས༌,
“ང༌ཞའ༌ ཚང༌མ༌ སད༌ཏེ༌ ཨིས༌ར༌ཨེལ༌ གང༌པོའེ༌ ནང༌ནེ༌ ང༌ཞའ༌ མེད༌ཁན༌ ཅོ༌ཅེས༌སི༌ ཅུས༌ངན༌ ལྡིངས༌ཁན༌བོ༌ ས༌འུལ༌ ཨིན༌།
6 ས༌འུལ༌ལི༌ པུར༌གྱུད༌ནེ༌ བུ༌ཚ༌ རྡུན༌ ང༌ཞའེ༌ ལག༌ག༌ སྟོད༌ ཏེ༌ནེ༌ ཡ༌ཝའེ༌ ལྡམ༌མ༌ ཛད༌ཁན༌ནི༌ ས༌འུལ༌ལི༌ གྲོང༌ཁྱེར༌ གི༌བེ༌འོན༌ནི༌ ནང༌ང༌ ཡ༌ཝའེ༌ སྐུན༌དུན༌ལ༌ ང༌ཞའེ༌ ཁོང༌གུན༌ སད༌ཨིན༌།”
གྱལ༌པོའེ༌ ཟེརས༌,
“ངའེ༌ ཁོང༌གུན༌ ཁྱོ༌ཞའ༌ ཏང༌ཨིན༌།”
7 གྱལ༌པོའེ༌ ས༌འུལ༌ལི༌ ཚ༌འོ༌ ཡོ༌ན༌ཐན༌ནི༌ བུ༌ཚ༌ མེ༌ཕི༌བོ༌ཤེཐ༌ ཁོང༌གུན༌ལ༌ མ༌ཏངས༌ ཅིའ༌ཟེར༌ན༌ དཱ༌བིད༌ དང༌ ཡོ༌ན༌ཐན༌ ཉིས༌ཀོའེ༌ ཡ༌ཝའེ༌ སྐུན༌དུན༌ལ༌ ཁ༌ཆད༌ ཅོས༌ཏེ༌ ཨིན༌པིན༌།
8 ཨིན༌ནའང༌ ཨའི༌ཧའེ༌ བུ༌མོ༌ རིཟ༌པཧ༌ གྱུད༌ཏེ༌ སྐྱེ༌ཁན༌ ས༌འུལ༌ལི༌ བུ༌ཚ༌ ཨར༌མོ༌ནི༌ དང༌ མེ༌ཕི༌བོ༌ཤེཐ༌ ཉིས༌ཀོ༌ ཡང༌ ས༌འུལ༌ལི༌ བུ༌མོ༌ མེ༌རབ༌བི༌ བུ༌ཚ༌ ལྔ༌ཀོ༌ ཏངས༌།
མེ༌རབ༌ མེ༌ཧོ༌ལཧ༌པ༌ བར༌ཟིལ༌ལཱའི༌ བུ༌ཚ༌ ཨད༌རིལ༌ལི༌ ན༌མ༌ ཨིན༌པིན༌།
9 གི༌བེ༌འོན༌པ༌གུན༌ནི༌ ཁོང༌གུན༌ ཡ༌ཝའེ༌ སྐུན༌དུན༌ལ༌ རི༌ཀ༌ སདས༌།
ནས༌སི༌ སྟོན༌ཐོག༌ རྔ༌ཅེས༌ གོ༌ཟུག༌གི༌ ཞག༌ག༌ ཁོང༌ རྡུན༌ཀོ༌ སདས༌།
10 ཏེ༌ནེ༌ ཨའི༌ཧའེ༌ བུ༌མོ༌ རིཟ༌པཧའེ༌ བྲག༌གི༌ཀ༌ ཕ༌ཙའེ༌ ཚེ༌ལེ༌ ཀབས༌ཏེ༌ སྟོན༌ཐོག༌ རྔ༌ཅེས༌ གོ༌ཟུགས༌པ༌ནེ༌ ཆར༌པའེ༌ ཏུས༌ ཚག༌པ༌ ཏེ༌ རོ༌གུན༌ ཉི༌མ༌ ཅི༌པ༌གུན༌ལ༌ ཡང༌ ཚན༌ལ༌ རིའི༌ སེམས༌ཅན༌གུན༌ལ༌ ཟའ༌ མ༌ཅུག༌ག༌ སྲུངས༌ཏེ༌ དུགས༌།
11 དཱ༌བིད༌ལ༌ ས༌འུལ༌ལི༌ ཚེ༌ཡོག༌ ན༌མ༌ རིཟ༌པཧའེ༌ ཅོ༌ཁན༌གུན༌ གྱུས༌ ཆའ༌ཅིག༌
12 ཁོ༌ ས༌འུལ༌ དང༌ ཁོའེ༌ བུ༌ཚ༌ ཡོ༌ན༌ཐན༌ནི༌ རུས༌པ༌གུན༌ ཁྱོང༌ང༌ལ༌ ཡ༌བེཤ༌ གི༌ལེད༌པ༌གུན༌ ཡོད༌ས༌ སོང༌ ༼ཕི༌ལིས༌ཏི༌པ༌གུན༌ནི༌ ས༌འུལ༌ དང༌ ཡོ༌ན༌ཐན༌ གིལ༌བོའེ༌ རི༌ཀ༌ སད༌ཏེ༌ ཁོང༌གུན༌ནི༌ རོ༌ བེཐ༌ཤན༌ནི༌ ཁྲོམས༌སི༌ ནང༌ང༌ ཆར༌ལ༌ ཏང༌སའེ༌ ཀ༌ནེ༌ ཡ༌བེཤ༌ གི༌ལེད༌པ༌གུན༌ནི༌ རྐུས༌ཏེ༌ ཁྱོངས༌ཏེ༌ ཨིན༌པིན༌༽།
13 ཏེ༌ ནས༌ས༌ནེ༌ དཱ༌བིད༌དི༌ ས༌འུལ༌ དང༌ ཡོ༌ན༌ཐན༌ནི༌ རུས༌པ༌གུན༌ མ༌ཚད༌ གི༌བེ༌འོན༌པ༌གུན༌ནི༌ སད༌ཁན༌ ས༌འུལ༌ལི༌ པུར༌གྱུད༌གུན༌ནི༌ རུས༌པའང༌ ཁྱོངས༌།
14 ཁོང༌གུན༌ནི༌ ས༌འུལ༌ དང༌ ཡོ༌ན༌ཐན༌ནི༌ རུས༌པ༌ བེན༌ཡཱ༌མིན༌ནི༌ ཡུལ༌ཇོངས༌སི༌ ཟི༌ལ༌ ནས༌སའེ༌ ནང༌ང༌ ས༌འུལ༌ལི༌ ཨ༌བ༌ ཀིཤ༌ཤི༌ རོམ༌ཁང༌ངི༌ ནང༌ང༌ སུབས༌ ཡང༌ གྱལ༌པོའེ༌ བཀའ༌ ཏང༌ཁན༌ ཚང༌མ༌ ཅོས༌།
ཏེ༌ནེ༌ དཀོན༌མཆོག༌གི༌ ཁོའེ༌ མོས༌ལམ༌མ༌ ལན༌ སལ༌ཏེ༌ མུ༌གེ༌ མེད༌ཁན༌ ཛདས༌།
ཕི༌ལིས༌ཏི༌པ༌གུན༌ནི༌ གྱབ༌གལ༌ལ༌ མག༌།
21:15 ནེ༌ 22
15 ཡང༌ལན༌ ཅིག༌ ཕི༌ལིས༌ཏི༌པ༌གུན༌ དང༌ ཨིས༌ར༌ཨེལ༌པ༌གུན༌ པར༌ལ༌ མག༌ སོང༌།
མག༌མི༌གུན༌ ཁྲིད༌ཏེ༌ དཱ༌བིད༌ ཕི༌ལིས༌ཏི༌པ༌གུན༌ལ༌ ནོལ༌ལ༌ སོང༌ ཡང༌ དཱ༌བིད༌ མ༌སྲན༌ཏྲེ༌ ངལ༌ཏེ༌ ཡོད༌པིན༌།
16 མ༌ ཆེན༌མོ༌ ཟུགས༌སི༌ མིར༌གྱུད༌ ཨིཤ༌བི༌བེ༌ནོབ༌བི༌ དུང༌,
ཟངས༌ལ༌ ཅོས༌ཏེ༌ ཀི༌ལོ༌ སུམ༌ནང༌ཕེད༌ ལྕིན༌ཏྲེ༌ ཡང༌ ཁོའེ༌ ར༌འི༌ སོ༌མ༌ ཡོད༌པིན༌།
ཁོའེ༌ དཱ༌བིད༌ སད༌ཨིན༌ ཟེརས༌།
17 ཨིན༌ནའང༌ ཟེ༌རུའི༌འཧའེ༌ བུ༌ཚ༌ ཨ༌བི༌ཤའི༌ དཱ༌བིད༌ སྐྱོབ༌བ༌ལ༌ ཡོངས༌ ཡང༌ ཏེ༌ ཕི༌ལིས༌ཏི༌པ༌ ནོལ༌ཏེ༌ སདས༌།
ཏེ༌ནེ༌ དཱ༌བིད༌དི༌ མག༌མི༌གུན༌ནི༌ ནའ༌ ཁུར༌ཏེ༌ ཟེརས༌,
“ཉེ༌རང༌ ཡང༌སྐྱར༌ ང༌ཞ༌གུན༌ ཉམ༌པོ༌ མག༌ག༌ མན༌ནེ༌ མ༌སྐྱོད༌ ཅིའ༌ཟེར༌ན༌ ཨིས༌ར༌ཨེལ༌ལི༌ འོད༌པོ༌ མ༌ནེ༌ ཤི༌ མ༌གོས༌།”
18 སྟིང༌ནེ༌,
གོབ༌བི༌ ནས༌སའེ༌ ནང༌ང༌ ཕི༌ལིས༌ཏི༌པ༌གུན༌ནི༌ གྱབ༌གལ༌ལ༌ ཡང༌སྐྱར༌ མག༌ སོང༌།
མག༌གི༌ ཏུས༌ ཧུ༌ཤའཧ༌པ༌ སིབ༌བེ༌ཀཱའི༌,
མ༌ ཆེན༌མོ༌ ཟུགས༌སི༌ མིར༌གྱུད༌ སཕ༌ ཟེར༌ཁན༌བོ༌ སདས༌།
19 གོབ༌བི༌ ནང༌ང༌ ཕི༌ལིས༌ཏི༌པ༌གུན༌ནི༌ གྱབ༌གལ༌ལ༌ ཞན༌ཡང༌ མག༌ཞིག༌གི༌ ནང༌ང༌ བེད༌ལེ༌ཧེམ༌པ༌ ཡཱའིར༌རི༌ བུ༌ཚ༌ ཨེལ༌ཧ༌ནན༌ནི༌ གཱད༌པ༌ གོ༌ལི༌ཡཱཐ༌ཐི༌ ཨ༌ཅོ༌a སདས༌།
གོ༌ལི༌ཡཱཐ༌ཐི༌ དུང༌ངི༌ ལུང༌ ཁྲི༌ཤའེ༌ རྡུང༌མ༌ ཙོགས༌ རོམ༌པོ༌ ཡོད༌པིན༌།
20 ཕི༌ལིས༌ཏི༌པ༌གུན༌ ཉམ༌པོ༌ གཱད༌དི༌ ནང༌ང༌ ཡང༌སྐྱར༌ མག༌ སོང༌ ཡང༌ ཏེ༌ནང༌ང༌ མ༌ མི༌ ཆེན༌མོ༌ རྐང༌པ༌ དང༌ ལག༌པ༌ རེ༌རེའེ༌ཀ༌ ཛི༌གུ༌ དྲུག༌,
ལྡོམ༌ 24 ཡོད༌ཁན༌ཞིག༌ ཡོད༌པིན༌།
ཁོའང༌ མ༌ ཟུགས༌ ཆེན༌མོའེ༌ མིར༌གྱུད༌ནེ༌ ཨིན༌པིན༌།
21 ཁོའེ༌ ཨིས༌ར༌ཨེལ༌པ༌གུན༌ལ༌ མ༌བེབས༌ ཅོས༌ཏེ༌ ཚིག༌པ༌ སྲགས༌ ཡང༌ དཱ༌བིད༌དི༌ ཨ༌ཅོ༌ ཤམ༌མཧའེ༌ བུ༌ཚ༌ ཡོ༌ན༌ཐན༌ནི༌ ཁོ༌ སདས༌།
22 ཏེ༌ ཕི༌ལིས༌ཏི༌པ༌ ཞི༌ཀོ༌ གཱད༌དི༌ ནས༌ས༌ནེ༌ མ༌ ཟུགས༌ ཆེན༌མོའེ༌ མིར༌གྱུད༌ནེ༌ ཨིན༌པིན༌ ཨིན༌ནའང༌ ཁོང༌གུན༌ དཱ༌བིད༌ དང༌ ཁོའེ༌ མག༌མི༌གུན༌ནི༌ ལག༌ནེ༌ ཤི༌།