ཤི༌བའེ༌ དཱ༌བིད༌དི༌ གྱབ༌གལ༌ ཅོས༌།
20:1 ནེ༌ 26
20
ཏ༌ བེན༌ཡཱ༌མིན༌ནི༌ སྡེ༌ནེ༌ བིཀ༌རིའི༌ བུ༌ཚ༌ ཤི༌བ༌ ཕ༌སད༌ ཕིང༌ང༌ ཐད༌ཁན༌ནི༌ མི༌ཞིག༌ ཡོད༌པིན༌།
ཤི༌བའེ༌ ཏུང༌ ཕུས༌ ཡང༌ ཀུ༌ཅོ༌ ཏངས༌ཏེ༌ ཟེརས༌,
“དཱ༌བིད༌དི༌ ཝང༌སྲུལ༌ལི༌ ཡོག༌ག༌ ང༌དང༌ དུག༌གོས༌ མེད༌ཏེ༌ ཨིན༌ནོག༌།
དཱ༌བིད༌ ཡེ༌ཤེ༌ བུ༌ཚའེ༌ གྱབ༌ནེ༌ ང༌དང༌ མི༌ཆ༌།
ཨིས༌ར༌ཨེལ༌པ༌གུན༌ ང༌དང༌ ལོགས༌ཏེ༌ རང༌ངི༌ ཁང༌པ༌ ཆེན༌།”
2 ཏེ༌ནེ༌ ཨིས༌ར༌ཨེལ༌ལི༌ ཞན༌ སྡེ༌ མི༌ཚང༌མ༌ དཱ༌བིད༌ ཕངས༌ཏེ༌ བིཀ༌རིའི༌ བུ༌ཚ༌ ཤི༌བའེ༌ གྱབ༌ནེ༌ སོང༌།
ཨིན༌ནའང༌ ཡ༌ཧུ༌དཱ༌པ༌གུན༌ ཡོར༌དཱན༌ ལྩངས༌པོ༌ནེ༌ ཡེ༌རུ༌ཤ༌ལེམ༌ ཚག༌པ༌ གྱལ༌པོ༌ ཉམ༌པོ༌ ཡོངས༌།
3 དཱ༌བིད༌ ཡེ༌རུ༌ཤ༌ལེམ༌མི༌ ནང༌ང༌ ཁོ༌རང༌ངི༌ ཁར༌ལ༌ ལེབ༌བ༌ཅིག༌ ཁོའེ༌ ཁར༌ལ༌ སྟ༌སྟོག༌ ཅོའ༌ བོར༌ཁན༌ ཚེ༌ཡོག༌ ན༌མ༌ རྕུ༌ཀོ༌ ཞན༌ ཁང༌པ༌ཞིག༌གི༌ ནང༌ང༌ དུག༌ཅུགས༌ཏེ༌ མག༌མི༌ སྲུང༌ཁན༌ བོརས༌།
ཁོང༌གུན༌ནི༌ སྒོས༌དོམ༌གུན༌ དཱ༌བིད༌དི༌ རིག༌ནའང༌ ཁོའེ༌ ཁོང༌གུན༌ ཉམ༌པོ༌ ལུས༌བྲེལ༌ མ༌བོརས༌།
ཁོང༌གུན༌ ཤི༌ཤི༌ ཚོག༌པ༌ ཏེན༌ན༌ ཁང༌པའེ༌ ནང༌ང༌ ཞིད༌མད༌ ཤི༌ཁན༌ ཙོགས༌ལ༌ དུག༌གོས༌།
4 ཏེ༌ནེ༌ གྱལ༌པོའེ༌ ཨ༌མ༌ས༌ ཟེརས༌,
“ཞག༌པོ༌ སུམ༌མི༌ ནང༌ང༌ ཡ༌ཧུ༌དཱའེ༌ མག༌མི༌གུན༌ ང༌ ཡོད༌ས༌ ཛོམ༌ཅེས༌ལ༌ ལོན༌ ཀོལ༌ ཡང༌ ཁྱོ༌རང༌ང༌ ཡོང༌གོས༌།”
5 ཏེ༌བོའེ༌ཕིའ༌ ཨ༌མ༌ས༌ ཡ༌ཧུ༌དཱ༌པ༌གུན༌ལ༌ ལོན༌ ཀལ༌ལ༌ སོང༌ ཨིན༌ནའང༌ གྱལ༌པོའེ༌ ཏུས༌ ཏང༌ཁན༌ནི༌ སང༌ མང༌ང༌ གོར༌།
6 དཱ༌བིད༌དི༌ ཨ༌བི༌ཤའི༌ ཟེརས༌,
“བིཀ༌རིའི༌ བུ༌ཚ༌ ཤི༌བའེ༌ ང༌དང༌གུན༌ལ༌ ཨབ༌ས༌ལོམ༌མི༌ སང༌ མང༌ང༌ ནོད༌ སྐྱལ༌ཨིན༌།
ཁོ༌ གྱལ༌སའེ༌ གྱང༌སྐོར༌རི༌ ནང༌ང༌ ཞུགས༌ཏེ༌ སྟན༌པོ༌ ཅོའེ༌ སང༌ སྔུན༌ལ༌ ངའེ༌ མག༌མི༌གུན༌ ཁྲིད༌ཏེ༌ ཁོའ༌ རྡས༌ཏེ༌ ཁྱེར༌ ཡང༌ ཁོ༌ ཟུམས༌ཏེ༌ ཁྱོང༌།”
7 ཏེ༌ནེ༌ ཨ༌བི༌ཤའི༌ གོ༌ཁྲིད༌ ཅོས༌ཏེ༌ ཡོ༌འབ༌བི༌ མག༌མི༌གུན༌ དང༌ གྱལ༌པོ༌ སྲུང༌སྐྱོབ༌ ཅོ༌ཁན༌ ཡང༌ ནོལ༌ཁན༌ ཁས༌པའེ༌ མག༌མི༌ ཚང༌མ༌ ཡེ༌རུ༌ཤ༌ལེམ༌ནེ༌ བིང༌ཏེ༌ ཤི༌བའེ༌ སྟིང༌རང༌ནེ༌ སོང༌།
8 ཁོང༌གུན༌ གི༌བེ༌འོན༌ནི༌ ཕོ༌ལོངས༌ ཆེན༌མོ༌ ཡོད༌ས༌ ལེབ༌བ༌ཅིག༌ ཨ༌མ༌ས༌ ཁོང༌གུན༌ལ༌ ཐུག༌ག༌ ཡོངས༌།
ཡོ༌འབ༌ མག༌གི༌ ཀོས༌ལག༌ གོན༌ཏེ༌ ཀྲི༌ ཆེན༌མོ༌ཞིག༌ ཁོ༌རང༌ངི༌ སྐྱེད༌པའེ༌ སྐྱེ༌རག༌གི༌ཀ༌ ཏགས༌ཏེ༌ ཡོད༌པིན༌།
ཁོ༌ ཨ༌མ༌སའེ༌ དུན༌ལ༌ ལེབ༌བ༌ཅིག༌ ཀྲི༌བོ༌ སའེ༌ཀ༌ བུད༌།
9 ཡོ༌འབ༌བི༌ ཨ༌མ༌ས༌ ཟེརས༌,
“ངའེ༌ ཛ༌འོ༌ ཁམ༌ཟང༌ ཨིན༌ན༌?
ཡང༌ པུག༌ ཏང༌ཅེས༌ལ༌ ཁོའེ༌ སམ༌དལ༌ ཁོ༌རང༌ངི༌ ལག༌པ༌ ཡས༌པ༌ ཉམ༌པོ༌ ཟུམས༌།
10 ཨ༌མ༌ས༌ ཡོ༌འབ༌བི༌ ལག༌པའེ༌ ནང༌ང༌ ཡོད༌ཁན༌ནི༌ ཀྲི༌བོ༌ མ༌ཐོང༌,
ཡོ༌འབ༌བི༌ ཏེ༌བོ༌ ཁོའེ༌ གྲོད༌པའེ༌ ནང༌ང༌ ཙུགས༌པ༌ ཁོའེ༌ གྱུ༌མ༌གུན༌ སའེ༌ཀ༌ བིང༌ཏེ༌ ཡོངས༌།
ཨ༌མ༌ས༌ ཤི༌,
ཡང༌སྐྱར༌ ཀྲི༌ ཙུག༌གོས༌ མ༌ཡོངས༌།
ཏེ༌ནེ༌ ཡོ༌འབ༌ དང༌ ཁོའེ༌ ནོ༌ ཨ༌བི༌ཤའི༌ ཡང༌སྐྱར༌ ཤེ༌བ༌ ཏེད༌ཏེ༌ ཁྱེརས༌།
11 ཡོ༌འབ༌བི༌ ཁྱོག༌ཏོང༌ མག༌མི༌ཞིག༌ ཨ༌མ༌སའེ༌ ཟུགས༌པོའེ༌ དུན༌ལ༌ ལངས༌ཏེ༌ ཟེརས༌,
“ཡོ༌འབ༌ དང༌ དཱ༌བིད༌དི༌ ཨིན༌ཁན༌གུན༌,
ཡོ༌འབ༌བི༌ སྟིང༌རང༌ནེ༌ ཡོང༌ཤིག༌།”
12 ཨ༌མ༌སའེ༌ ཟུགས༌པོ༌ ལམ༌མི༌ཀ༌ ཁྲག༌ ཁྱིལ༌ཏེ༌ ཡོད༌པིན༌,
ཡོ༌འབ༌བི༌ མག༌མི༌ ཚང༌མ༌ གྲུལ༌ མ༌གྲུལ༌ལ༌ ཏེ༌བོ༌ ལྟེན༌ དུག༌ཁན༌བོ༌ མག༌མི༌བོའ༌ ཧ༌གོའ༌ཅིག༌ ཁོའེ༌ ཨ༌མ༌སའེ༌ ཟུགས༌པོ༌ ལམ༌མི༌ ཀ༌ནེ༌ ཐེན༌ཏེ༌ ཞིང༌ངི༌ཀ༌ ཁྱེར༌ཏེ༌ ཀོས༌ལག༌ ཞིག༌ ཀབས༌།
13 ཨ༌མ༌སའེ༌ ཟུགས༌པོ༌ ལམ༌མི༌ ཀ༌ནེ༌ ཐེན༌ན༌ཅིག༌ མག༌མི༌ ཚང༌མ༌ ཡོ༌འབ༌བི༌ སྟིང༌རང༌ནེ༌ བིཀ༌རིའི༌ བུ༌ཚ༌ ཤི༌བ༌ ཟུམ༌མ༌ལ༌ སོང༌།
14 ཏེ༌ཏུས༌ ཤི༌བ༌ ཨིས༌ར༌ཨེལ༌ལི༌ མི༌སྡེའེ༌ ཡུལ༌ ཚང༌མ༌ གྱུད༌ཏེ༌ ཨ༌བེལ༌ བེཐ༌ མའ༌ཀཧ༌ གྲོང༌ཁྱེར༌ལ༌ ལེབ༌།
ཁོའེ༌ ཨ༌བའེ༌ མིར༌གྱུད༌ བིཀ༌རི༌པ༌ ཚང༌མ༌ ཛོམས༌ཏེ༌ ཁོ༌ ཉམ༌པོ༌ གྲོང༌ཁྱེར༌རི༌ ནང༌ང༌ སོང༌།
15 ཡོ༌འབ༌བི༌ མག༌མི༌ ཚང༌མ༌ ཨ༌བེལ༌ བེཐ༌ མའ༌ཀཧ༌ ལེབ༌ཏེ༌ གྲོང༌ཁྱེར༌ལ༌ མག༌མི༌ སྐོརས༌།
ཁོང༌གུན༌ནི༌ ཏེ༌ གྲོང༌ཁྱེར༌རི༌ ཕི༌ལོག༌གི༌ རྩིག༌པའེ༌ཀ༌ ཛག༌ཅེས༌ལ༌ ལམ༌ཁྲེད༌ཁྲེད༌ རྩིགས༌ ཡང༌ རྩིག༌པ༌ ཞིག༌ཅེས༌ལ༌ ལྕིན༌ཏྲེ༌ ལྡུང༌མ༌ གྱབས༌།
16 ཨིན༌ནའང༌ གྲོང༌ཁྱེར༌རི༌ རྩིག༌པའེ༌ ཀ༌ནེ༌ ཤེས༌རབ༌ཅན༌ བུ༌མོ༌ཞིག༌གི༌ བོད༌ཏེ༌ ཟེརས༌,
“ཉོན༌ཤིག༌།
ང༌ ཡོ༌འབ༌ ཉམ༌པོ༌ སྤེ༌ར༌ ཏང༌ཉན༌ཅེས༌ལ༌ ཁོང༌ང༌ འི༌ཀ༌ ཡོང༌ ཟེར༌།”
17 ཡོ༌འབ༌ བུ༌མོ༌ ཡོད༌ས༌ སོང༌ ཡང༌ ཏེ༌ བུ༌མོའེ༌ ཏྲིས༌,
“ཅི༌ ཉེ༌རང༌ ཡོ༌འབ༌ ཨིན༌ན༌?”
ཁོའེ༌ ལན༌ཏངས༌,
“ང༌ ཨིན༌།”
བུ༌མོ༌བོའེ༌ ཟེརས༌,
“ཉེ༌རང༌ངི༌ ཡོག༌མོའེ༌ ཟེར༌ཁན༌བོའ༌ ཉན༌ན༌ ཛད༌།”
ཁོའེ༌ ཟེརས༌,
“ང༌ ཉན༌ཏེ༌ ཡོད༌།”
18 བུ༌མོའེ༌ ཟེརས༌ “‘ཏམ༌སྤེ༌ ཞིག༌ ཡོང༌ཅེན༌,
ཛིང༌མོ༌ ཐག༌ཅད༌གོས༌ ཡོད༌ན༌ ཨ༌བེལ༌ལི༌ གྲོང༌ཁྱེར༌ལ༌ ལབ༌ཞ༌ ལེན༌ན༌ སོང༌།’
ཡང༌ མི༌གུན༌ནི༌ ཏེ༌བོ༌ ཅོའད༌པིན༌།
19 ཨིས༌ར༌ཨེལ༌ལི༌ ནང༌ང༌ ང༌ཞའ༌ ཞི༌དེ༌ དང༌ ཡུལ༌དད༌ཅན༌ ཨིན༌།
ཨིས༌ར༌ཨེལ༌ལི༌ ཨ༌མ༌ ཙོགས༌ གྲོང༌ཁྱེར༌བོ༌ ཉེ༌རང༌ངི༌ མེད༌ཁན༌ ཅོ༌ཅེས༌ ཨིན༌ནོག༌།
ཅི༌ཕིའ༌ ཉེ༌རང༌ངི༌ ཡ༌ཝའེ༌ ཨིན༌ཁན༌ གྲོང༌ཁྱེར༌བོ༌ མེད༌ཁན༌ ཛད༌དད༌?”
20 ཡོ༌འབ༌བི༌ ལན༌ཏངས༌,
“ངའེ༌ཀ༌ ཨིད༌ཤེས༌ ཅོས༌ ང༌ ཁྱོ༌རང༌ངི༌ གྲོང༌ཁྱེར༌ ཁྲེས༌ཏོར༌ ཡ༌ མེད༌ཁན༌ ཅོ༌ཨིན༌ མེ༌རག༌།”
21 ང༌ཞའེ༌ ཐབ༌ལྡིངས༌ ཏེ༌བོ༌ མན༌།
ཨེཕ༌ར༌ཡིམ༌པ༌ བིཀ༌རིའི༌ བུ༌ཚ༌ ཤི༌བའེ༌ གྱལ༌པོ༌ དཱ༌བིད༌དི༌ གྱབ༌གལ༌ ཅོས༌ཏེ༌ ཨིན༌ནོག༌།
ཁྱོ༌རང༌ངི༌ ཏེ༌ མི༌བོ༌ ངའེ༌ ལག༌ག༌ སྟད༌ན༌ ང༌ཞའ༌ ཞི༌དེའེ༌ ཉམ༌པོ༌ ལོགས༌ཏེ༌ ཆེན༌།”
བུ༌མོ༌བོའེ༌ ཡོ༌འབ༌བ༌ ཟེརས༌,
“ང༌ཞའེ༌ ཁོའེ༌ གོ༌ ཅད༌ཏེ༌ རྩིག༌པའེ༌ ཀ༌ནེ༌ ཐུར༌ལ༌ ཉེ༌རང༌ ཡོད༌ས༌ ཕང༌ཨིན༌།”
22 ཏེ༌ནེ༌ བུ༌མོའེ༌ མི༌ཚང༌མ༌ ཁོ༌རང༌ངི༌ སམ༌བ༌ཅན༌ནི༌ ལབ༌ཞ༌ ཏངས༌ ཡང༌ ཁོང༌གུན༌ནི༌ ཤི༌བའེ༌ གོ༌ ཅད༌ཏེ༌ ཡོ༌འབ༌ ཡོད༌ས༌ ཕངས༌།
ཏེན༌ན༌བོའེ༌ཕིའ༌ ཡོ༌འབ༌བི༌ ཏུང༌ ཕུས༌ ཡང༌ མག༌མི༌གུན༌ གྲོང༌ཁྱེར༌ནེ༌ ཡན༌ཏེ༌ རང༌ངི༌ ཁང༌པ༌ ལོགས༌ཏེ༌ སོང༌ ཡང༌ ཡོ༌འབ༌ གྱལ༌པོ༌ ཡོད༌ས༌ ཡེ༌རུ༌ཤ༌ལེམ༌མ༌ སོང༌།
23 ཡོ༌འབ༌ ཨིས༌ར༌ཨེལ༌ལི༌ མག༌མི༌ ཚང༌མའེ༌ འུ༌སྐྱོང༌ ཨིན༌པིན༌,
ཡེ༌ཧོའི༌དའི༌ བུ༌ཚ༌ བེ༌ནཱའི༌འཧ༌ གྱལ༌པོ༌ སྲུང༌སྐྱོབ༌ ཅོ༌ཁན༌ནི༌ མག༌མི༌ འུ༌སྐྱོང༌ ཨིན༌པིན༌།
24 ཨ༌དོ༌ནི༌རམ༌,
གྱལ༌པོའེ༌ ཕིའ༌ ལས༌ ཅོ༌ཅུག༌ཁན༌ གུན༌ནི༌ ཁག༌ཁུར༌པ༌ ཡང༌ ཨ༌ཧི༌ལུད༌དི༌ བུ༌ཚ༌ ཡེ༌ཧོ༌ཤ༌ཕད༌,
གྱལ༌པོའ༌ ནས༌ཚུལ༌ དང༌ ཐག༌ཅད༌གུན༌ མི༌གུན༌ལ༌ ཤད༌ཁན༌བོ༌ ཨིན༌པིན༌།
25 ཤི༌ཝ༌,
གྱལ༌པོའེ༌ ཞུང༌ངི༌ ནང༌ང༌ ཇུང༌ཁན༌ ཚང༌མ༌ བྲི༌ཁན༌ ཡང༌ ཟ༌དོག༌ དང༌ ཨ༌བིའ༌ཐར༌ བླ༌མ༌གུན༌ ཨིན༌པིན༌།
26 ཡ༌འིར༌རི༌ མིར༌གྱུད༌ ཨི༌ར༌,
དཱ༌བིད༌དི༌ བླ༌མ༌གུན༌ནི༌ ནང༌ནེ༌ ཅིག༌ ཨིན༌པིན༌།