དཱ༌བིད༌དི༌ མི༌ རྩིས༌ ཏངས༌།
24:1 ནེ༌ 17
24
ཡང༌སྐྱར༌ ཡ༌ཝའ༌ ཨིས༌ར༌ཨེལ༌པ༌གུན༌ནི༌ཀ༌ ཐུག༌སྲོ༌ སྐྱོདས༌ ཡང༌ ཁོང༌ངི༌ དཱ༌བིད༌ གྱུད༌ཏེ༌ ཁོང༌གུན༌ལ༌ རྡུག༌ངལ༌ ཁྱོངས༌ཏེ༌ མོལས༌,
“སོང༌ ཡང༌ ཨིས༌ར༌ཨེལ༌ དང༌ ཡ༌ཧུ༌དཱའེ༌ མི༌གུན༌ནི༌ རྩི༌རུག༌ ཏོང༌།”
2 ཏེ༌བོའེ༌ཕིའ༌ གྱལ༌པོ༌ དཱ༌བིད༌དི༌ ཡོ༌འབ༌ དང༌ མག༌མི༌ འུ༌སྐྱོང༌གུན༌ལ༌ ཟེརས༌,
“དཱན༌ནེ༌ ཏངས༌ཏེ༌ བེར༌ཤེ༌བ༌ ཚོག༌པ༌,
ཨིས༌ར༌ཨེལ༌ལི༌ མི༌སྡེ༌ ཚང༌མའེ༌ ནང༌ང༌ ནོལ༌ ཉན༌ཁན༌ མི༌གུན༌ རྩིའ༌ལ༌ སོང༌།
ཏེ༌ནེ༌ ང༌ མི༌ ནོལ༌ཁན༌ ཙམ༌ཞིག༌ ཡོད༌ གྱུས༌ཆེན༌།”
3 ཨིན༌ནའང༌ ཡོ༌འབ༌བི༌ གྱལ༌པོའ༌ ཟེརས༌,
“ཉེ༌རང༌ངི༌ མི༌ཚེའེ༌ ནང༌ང༌ ཡ༌ཝ༌ ཉེ༌རང༌ངི༌ དཀོན༌མཆོག༌གི༌ ཉེ༌རང༌ངི༌ མི༌,
གྱ༌ལྡབ༌ ཕེལ༌ ཅུག༌ག༌ ཛད༌ཤིག༌།
ཨིན༌ནའང༌ ངའེ༌ སྤོན༌བོ༌ གྱལ༌པོ༌ ཉེ༌རང༌ངི༌ འི༌བོ༌ ཅིའ༌ ཛད༌ ཉིན༌རག༌?”
4 ཨིན༌ནའང༌ གྱལ༌པོའེ༌ ཡོ༌འབ༌ དང༌ མག༌མི༌ འུ༌སྐྱོང༌གུན༌ལ༌ འུ༌ཙུག༌ ཏངས༌པ༌ ཁོང༌གུན༌ སོང༌ ཡང༌ ཨིས༌ར༌ཨེལ༌ལི༌ ནོལ༌ཁྱུད༌ཁན༌ མི༌གུན༌ རྩིས༌།
5 ཁོང༌གུན༌ ཡོར༌དཱན༌ ལྩངས༌པོ༌ རྒལ༌ཏེ༌ ཨ༌རོ༌འེར༌ གྲོང༌ཁྱེར༌རི༌ ལྷོ༌ ཆོགས༌ལ༌ ལུང༌པའེ༌ ནང༌ང༌ ཀུར༌ ཙུགས༌ཏེ༌ དུགས༌,
ཏེ༌ནེ༌ གཱད༌ གྱུད༌ཏེ༌ ཡ༌ཟེར༌ལ༌ སོང༌།
6 ཏེ༌སྟིང༌ནེ༌ ཁོང༌གུན༌ གི༌ལེད༌ དང༌ ཏཧ༌ཏིམ༌ ཧོད༌ཤིའི༌ ཡུལ༌ཇོངས༌,
དཱན༌ ཡང༌ སི༌དོན༌ནི༌ ཉེ༌ཁོར༌རི༌ ནས༌ས༌ གུན༌ལ༌ སོང༌།
7 ཁོང༌གུན༌ རྩིག༌པ༌ སྐོར༌ཏེ༌ ཡོད༌ཁན༌ ཏཱ༌ཡིར༌རི༌ གྱལ༌ས༌ ཡང༌ ཧིཝ༌ དང༌ ཀེ༌ནན༌ནི༌ གྲོང༌ཁྱེར༌ ཚང༌མའ༌ སོང༌།
སྟིང༌ཇུག༌ག༌ ཁོང༌གུན༌ ཡ༌ཧུ༌དཱའེ༌ ལྷོ༌ ཆོགས༌སི༌ ས༌ཆ༌ བེར༌ཤེ༌བ༌ ཚོག༌པ༌ སོང༌།
8 ས༌ཆ༌ ཚང༌མ༌ལ༌ སོང༌ཏེ༌ ཟླ༌ཝ༌ རྒུ༌ དང༌ ཞག༌མ༌ ཉི༌ཤུ༌ སྟིང༌ནེ༌ ཁོང༌གུན༌ ཡེ༌རུ༌ཤ༌ལེམ༌མ༌ ལོགས༌ཏེ༌ ལེབ༌།
9 ཡོ༌འབ༌བི༌ ནོལ༌ཁྱུད༌ཁན༌ མི༌གུན༌ནི༌ ཀྲངས༌ཀ༌ གྱལ༌པོའ༌ ཏངས༌།
ཨིས༌ར༌ཨེལ༌ལི༌ ནང༌ང༌ ར༌འི༌ ཀོལ༌ཉན༌ཁན༌ མི༌ 800,000 ཡང༌ ཡ༌ཧུ༌དཱའེ༌ ནང༌ང༌ 500,000 ཡོད༌པིན༌།
10 ཨིན༌ནའང༌ ཀྲངས༌ཀ༌ ལེན༌ ཚར༌ཏེ༌ སྟིང༌ནེ༌ དཱ༌བིད༌ལ༌ ཁོ༌རང༌ངི༌ སེམས༌སི༌ ནང༌ང༌ ནོངས༌ཅན༌ ཚོར༌ཏེ༌ ཁོའེ༌ ཡ༌ཝའ༌ ཞུས༌,
“མི༌ ཀྲངས༌ཀ༌ ལེན༌ཏེ༌ ངའེ༌ སྡིག༌པ༌ ཆེན༌མོ༌ ཅོས༌ཏེ༌ ཨིན༌ནོག༌།
ཡ༌ཝ༌ལེ༌ ཇུ༌ཇུ༌ ངའེ༌ སྡིག༌པའ༌ ཤགས༌པ༌ སལ༌,
ངའེ༌ སམ༌མེད༌དི༌ ལས༌ ཅོས༌ཏེ༌ ཨིན༌ནོག༌།”
11 སྟིང༌མ༌ ཞག༌གི༌ ང༌མོ༌ དཱ༌བིད༌ ལངས༌སི༌ སང༌ སྔུན༌ལ༌ ཡ༌ཝའེ༌ གྱལ༌པོའེ༌ ཞབ༌ཤི༌ ལུང༌སྟོན༌པ༌ གཱད༌ལ༌ འི༌ ལོན༌བོ༌ སལས༌,
12 “སོང༌ ཡང༌ དཱ༌བིད༌ལ༌ ཟེར༌,
‘འི༌བོ༌ ཡ༌ཝའེ༌ མོལས༌,
ངའེ༌ ཁྱོ༌རང༌ང༌ ཏང༌ཅེས༌སི༌ ཆད༌པ༌ སུམ༌མི༌ ནང༌ནེ༌ ཅིག༌ ལྡོམ༌ ཡང༌ ཏེ༌བོ༌ ངའེ༌ ཁྱོ༌རང༌ང༌ ཏང༌ཨིན༌།”
13 ཏེ༌ནེ༌ ལུང༌སྟོན༌པ༌ གཱད༌ དཱ༌བིད༌ ཡོད༌ས༌ ཡོངས༌ཏེ༌ ཟེརས༌,
“ཉེ༌རང༌ངི༌ ས༌ཆ༌ གང༌པོའེ༌ ནང༌ང༌ ལོ༌ སུམ༌མི༌ ཕིའ༌ མུ༌གེ༌ ཡ༌ ཟླ༌ཝ༌ སུམ༌ ཉེ༌རང༌ ཉེ༌རང༌ངི༌ གྲ༌འོ༌གུན༌ནི༌ ཀ༌ནེ༌ ཤོར༌ཅེས༌ ཡ༌ ཉེ༌རང༌ངི༌ ས༌ཆ༌ གང༌པོའེ༌ ནང༌ང༌ ཞག༌མ༌ སུམ༌ ནད༌ རྩོག༌པོ༌ ཡོང༌ཅེས༌,
ཏེ༌ སུམ༌ཀོའེ༌ ནང༌ནེ༌ ཉེ༌རང༌ངི༌ ཀ༌བོ༌ ལྡམ༌མད༌།
ཏ༌ སམ༌བ༌ ཏངས༌ཏེ༌ ཡ༌ཝའ༌ ལན༌ ཕུལ༌ཅེས༌པོ༌ ཐག༌ཅད༌ད༌ ཛད༌།”
14 དཱ༌བིད༌དི༌ གཱད༌ལ༌ ལན༌ཏངས༌,
“འི༌བོ༌ ངའེ༌ ཕིའ༌ མ༌ ཀགས༌པོ༌ ནས༌ལུག༌ཞིག༌ ཨིན༌ནོག༌།
ངའེ༌ ང༌ཞ༌རང༌ ཡ༌ཝའེ༌ ཆག༌ག༌ སྟད༌དད༌ ཅིའ༌ཟེར༌ན༌ ཁོང༌ངི༌ མ༌ སྙིང༌རྗེ༌ཅན༌ ཞུགས༌ཏེ༌ ཨིན༌ནོག༌།
ང༌ མི༌ ལག༌པའེ༌ ནང༌ང༌ སྟད༌ཅུག༌ག༌ མ༌ཛད༌།”
15 ཏེ༌ནེ༌ ཡ༌ཝའེ༌ ཏེན༌ན༌ ང༌མོ༌ ཨིས༌ར༌ཨེལ༌པ༌གུན༌ལ༌ ནད༌ རྩོག༌པོ༌ སལས༌ ཡང༌ ཏེ༌བོ༌ ཞག༌པོ༌ སུམ༌ ལུས༌།
དཱན༌ནེ༌ ཏངས༌ཏེ༌ བེར༌ཤེ༌བ༌ ཚོག༌པ༌,
ནས༌ས༌ གང༌པོའེ༌ ནང༌ང༌ མི༌ 70,000 ཤི༌།
16 ཏེ༌ནེ༌ ཕོ༌ཉའེ༌ ཡེ༌རུ༌ཤ༌ལེམ༌ མེད༌ཁན༌ ཛད༌ཅེས༌ལ༌ ཆག༌ རྐྱང༌ང༌ཅིག༌ ཡ༌ཝ༌ ཐུགས༌ཚེར༌ར༌ ཛད༌ཏེ༌ སད༌ཁན༌ནི༌ ཕོ༌ཉ༌ མོལས༌,
“ཏ༌ གྲིག༌,
ཏེ༌བོ༌ ཐད༌ཐད༌ ཨིན༌ནོག༌།”
ཏེ༌ཏུས༌ ཡ༌ཝའེ༌ ཕོ༌ཉའ༌ ཡེ༌བས༌པ༌ ཨ༌རུ༌ནཧའེ༌ ཡུལ༌ཐག༌ག༌ ཡོད༌པིན༌།
17 ཕོ༌ཉའེ༌ མི༌གུན༌ སད༌ད༌ ཐོང༌ཏེ༌ དཱ༌བིད༌དི༌ ཡ༌ཝའ༌ མོལས༌,
“སྡིག༌པ༌ དང༌ ནོར༌ཁྲུལ༌ ཅོ༌ཁན༌བོ༌ ང༌ ཨིན༌།
འི༌ མི༌གུན༌ ནོངས༌མེད༌ ལུག༌གུན༌ ཨིན༌ནོག༌།
ཁོང༌གུན༌ནི༌ ཅི༌ ཅོས༌ཏོག༌?
ཉེ༌རང༌ངི༌ ཐུག༌སྲོ༌ ང༌ དང༌ ངའེ༌ ནང༌ཚངས༌སི༌ཀ༌ བབས༌ ཤུག༌ག༌ ཛད༌ཤིག༌།”
དཱ༌བིད༌དི༌ ཆོད༌ཁྲི༌ རྩིགས༌།
24:18 ནེ༌ 25
18 ཏེ༌ ཞག༌ག༌ ལུང༌སྟོན༌པ༌ གཱད༌ དཱ༌བིད༌ ཡོད༌ས༌ ཡོངས༌ཏེ༌ ཟེརས༌,
“སོང༌ཏེ༌ ཡ༌ཝའེ༌ ཕིའ༌ ཡེ༌བས༌པ༌ ཨ༌རུ༌ནཧའེ༌ ཡུལ༌ཐག༌ག༌ ཆོད༌ཁྲི༌ཞིག༌ རྩིག༌།”
19 ཡ༌ཝའེ༌ གཱད༌ གྱུད༌ཏེ༌ བཀའ༌ སལ༌ཁན༌ ནང༌ཞིན༌ ཅོའ༌ལ༌ དཱ༌བིད༌ སོང༌།
20 ཨ༌རུ༌ནཧའེ༌ གྱལ༌པོ༌ དང༌ ཁོང༌ངི༌ མི༌གུན༌ ཁོ༌ ཆོགས༌ལ༌ ཡོང༌ང༌ ཐོང༌ང༌ཅིག༌ ཁོ༌ ཕི༌ལོག༌ག༌ སོང༌ཏེ༌ གྱལ༌པོའེ༌ དུན༌ལ༌ ཆག༌ཕུལ༌ཏེ༌ ཀུས༌པ༌ སྟནས༌།
21 ཡང༌ ཨ༌རུ༌ནཧའེ༌ ཏྲིས༌,
“ངའེ༌ སྤོན༌བོ༌ གྱལ༌པོ༌ལེ༌,
ཉེ༌རང༌ འི༌རུ༌ ཅི༌ཕིའ༌ སྐྱོད༌ཏེ༌ ཨིན༌?”
དཱ༌བིད༌དི༌ ལན༌ཏངས༌,
“ཁྱོ༌རང༌ངི༌ ཡུལ༌ཐག༌པོ༌ ཉོའ༌ལ༌ ཡོངས༌ཏེ༌ ཨིན༌།
མི༌གུན༌ནི༌ ཀ༌ནེ༌ འི༌ ནད༌པོ༌ མེད༌ཁན༌ ཛད༌ཅེས༌ལ༌ ངའེ༌ ཏེ༌ཀ༌ ཡ༌ཝའེ༌ ཕིའ༌ ཆོད༌ཁྲི༌ཞིག༌ རྩིག༌ཨིན༌།”
22 ཨ༌རུ༌ནཧའེ༌ དཱ༌བིད༌ལ༌ ཟེརས༌,
“ངའེ༌ སྤོན༌བོ༌ གྱལ༌པོ༌ལེ༌,
ཏེ༌བོ༌ ཁྱེར༌ར༌ཛད༌ ཡང༌ ཉེ༌རང༌ངི༌ ཐུགས༌དོད༌ ནང༌ཞིན༌ ཆོད༌པ༌ ཕུལ༌ལ༌ ཛད༌།
ཁུ༌ཡུས༌ སྐོར༌ཅེས༌སི༌ ལག༌ཆ༌ དང༌ ཉ༌ཤིང༌ གུན༌ ཤིང༌ངི༌ ཕིའ༌ ཀོལ༌ཏེ༌ ངའེ༌ ལང༌ཏོ༌ གུན༌ མེའ༌ སྲགས༌ཏེ༌ ཆོད༌པ༌ ཕུལ༌ལ༌ ཛད༌།
23 ངའེ༌ འི༌ ཚང༌མ༌ ཉེ༌རང༌ང༌ ཏང༌ངད༌ སྤོན༌བོ༌ལེ༌ ཡང༌ ཉེ༌རང༌ངི༌ དཀོན༌མཆོག༌ ཡ༌ཝའ༌,
ཉེ༌རང༌ངི༌ ཆོད༌པ༌ ཕུལ༌ཁན༌བོའ༌ ཐུག༌ཉེས༌ས༌ ཛད༌ཤིག༌།”
24 ཨིན༌ནའང༌ གྱལ༌པོ༌ དཱ༌བིད༌དི༌ ཨ༌རུ༌ནཧའེ༌ ཟེརས༌,
“མན༌,
ཁོ༌རང༌ངི༌ འི༌གུན༌ལ༌ རིན༌ ལེན༌གོས༌,
ངའེ༌ རིན༌ མ༌ཏང༌ང༌ མི༌ ཁྱེར༌ ཅིའ༌ཟེར༌ན༌ ངའེ༌ ཅའང༌ མ༌ ཤལ༌ཁན༌ནི༌ མེའེ༌ སྲོག༌ཆོད༌,
ཡ༌ཝ༌ ངའེ༌ དཀོན༌མཆོག༌ག༌ མི༌ ཕུལ༌།”
ཏེ༌ནེ༌ དཱ༌བིད༌དི༌ ཁོའ༌ ཁུ༌ཡུས༌ སྐོར༌སའེ༌ ནས༌ས༌ དང༌ ལང༌ཏོ༌ གུན༌ནི༌ ཕིའ༌ མུལ༌ལི༌ པེ༌ནེ༌ 50 ཤལས༌།
25 ཏེ༌ཀ༌ དཱ༌བིད༌དི༌ ཡ༌ཝའེ༌ ཕིའ༌ ཆོད༌ཁྲི༌ རྩིགས༌ཏེ༌ མེའ༌ སྲག༌ཅེས༌ དང༌ ཞི༌དེ༌ ཆོད༌པ༌གུན༌ ཕུལས༌།
ཏེ༌ནེ༌ དཱ༌བིད༌དི༌ ཏེ༌ ས༌ཀྱད༌དི༌ ཕིའ༌ མོས༌ལམ༌ ཞུ༌ཁན༌བོའ༌ ཡ༌ཝའེ༌ ལན༌སལ༌ཏེ༌ ཨིས༌ར༌ཨེལ༌ གང༌པོའེ༌ ནང༌ང༌ ཏེ༌ ནད༌པོ༌ མེད༌ཁན༌ ཛདས༌།