ཟི༌བའེ༌ དཱ༌བིད༌ལ༌ སྟགས༌ ཁྱོངས༌།
16:1 ནེ༌ 4
16
དཱ༌བིད༌ ཨོ༌ལིཝ༌ཝི༌ རི༌གོ༌ནེ༌ ཙ༌པིག༌ ཐག༌རིང༌ང༌ ལེབ༌བ༌ཅིག༌ མེ༌ཕི༌བོ༌ཤེཐ༌ཐི༌ ཡོག༌པོ༌ ཟི༌བ༌ དཱ༌བིད༌ལ༌ ཐུག༌ག༌ སྲུངས༌ཏེ༌ ཡོད༌པིན༌།
ཁོའེ༌ བུང༌བུ༌ ཉིས༌སི༌ཀ༌ ཏ༌གི༌ 200,
བ༌ཤོ༌ ནན༌ཏེ༌ ཁོ༌ལག༌ ཅོ༌ཁན༌ 100,
ཕིག༌གི༌ ཏུམ༌པོག༌ 100 དང༌ རྒུན༌ཆང༌ སྐངས༌ཁན༌ནི༌ པགས༌པ༌ ཀལ༌ཏེ༌ ཁྱོངས༌།
2 གྱལ༌པོའེ༌ ཟི༌བ༌ བྲིས༌,
“འི༌ ཚང༌མ༌ ཅི༌ཕིའ༌ ཁྱོངས༌པིན༌?”
ཟི༌བའེ༌ ལན༌ཏངས༌ “བུང༌བུ༌གུན༌ གྱལ༌པོའེ༌ ནང༌མི༌གུན༌ ཞོན༌ཅེས༌ལ༌,
ཏ༌གི༌ དང༌ ཁ༌ཟས༌ མི༌གུན༌ ཟའ༌ཅེས༌ ཡང༌ རྒུན༌ཆང༌ ཐང༌སྟོང༌ངི༌ ནང༌ང༌ ངལ༌ཁན༌གུན༌ ཐུང༌ཅེས༌སི༌ ཕིའ༌ ཨིན༌།”
3 གྱལ༌པོའེ༌ ཏྲིས༌,
“ས༌འུལ༌ལི༌ ཚ༌འོ༌ མེ༌ཕི༌བོ༌ཤེཐ༌ ཀ༌རེ༌?”
ཟི༌བའེ༌ ལན༌ཏངས༌,
“ཁོ༌ ཡེ༌རུ༌ཤ༌ལེམ༌མི༌ ནང༌ང༌ དུགས༌ ཅིའ༌ཟེར༌ན༌ ཁོའེ༌ སམ༌དུག༌,
‘དི༌རིང༌ ཨིས༌ར༌ཨེལ༌པ༌གུན༌ནི༌ ཁོའ༌ ཁོ༌རང༌ངི༌ མེ༌མེ༌ ས༌འུལ༌ལི༌ གྱལ༌སྲིད༌པོ༌ ལོགས༌ཏེ༌ ཏང༌ཨིན༌།’”
4 “ཏེ༌ནེ༌ གྱལ༌པོའེ༌ ཟི༌བ༌ ཟེརས༌,
“མེ༌ཕི༌བོ༌ཤེཐ༌ཐི༌ ཨིན༌ཁན༌ ཚང༌མ༌ ངའེ༌ ཁྱོ༌རང༌ང༌ ཏང༌ངད༌།”
དཱ༌བིད༌དི༌ དུན༌ལ༌ ཟི༌བ༌ སྒུས༌ཏེ༌ ལན༌ཏངས༌,
“ངའ༌ ཏུས༌གྱུན༌ ཉེ༌རང༌ངི༌ ཆོག༌སྐྱོར༌ ཐོབ༌ཤིག༌ གྱལ༌པོ༌ ངའེ༌ སྤོན༌བོ༌ལེ༌།”
ཤི༌མེའི༌ དཱ༌བིད༌ དང༌ ཁོའེ༌ མི༌གུན༌ལ༌ ངན༌ ཏབས༌།
16:5 ནེ༌ 14
5 གྱལ༌པོ༌ དཱ༌བིད༌ བ༌ཧུ༌རིམ༌ གྲོང༌ཁྱེར༌ལ༌ ལེབ༌བ༌ཅིག༌ ས༌འུལ༌ལི༌ གྱུད༌ཟིན༌ནི༌ མི༌ཞིག༌ ཁོའ༌ ངན༌ ཏབ༌ཨིན༌ གྲོང༌ཁྱེར༌ནེ༌ བིང༌ཏེ༌ ཡོངས༌།
ཁོ༌ གི༌ར༌རི༌ བུ༌ཚ༌ ཤི༌མེའི༌ ཨིན༌པིན༌།
6 གྱལ༌པོ༌ སྲུང༌ཁན༌ དང༌ ནོལ༌ཁན༌ ཁས༌པ༌ མག༌མི༌ ཚང༌མའེ༌ དཱ༌བིད༌ལ༌ སྐོར༌ཏེ༌ ཡོད༌ཏེའང༌ ཁོའེ༌ གྱལ༌པོ༌ དང༌ ཁོང༌ངི༌ སྤོན༌བོ༌ ཚང༌མ༌ལ༌ རྡོའ༌ གྱབས༌
7 ཡང༌ ངན༌ ཏབས༌ཏེ༌ ཟེརས༌,
“འི༌ཀ༌ནེ༌ སོང༌།
ཁྱོ༌རང༌ མི༌སད༌,
མི༌ངན༌།
8 ས༌འུལ༌ལི༌ ནང༌ཚངས༌གུན༌ནི༌ ཁྲག༌ ཕོས༌ཏེ༌ ཁོའེ༌ ཞུགས༌ཁྲིས༌ ཀོག༌ཅེས༌སི༌ ཚབས༌ལ༌ ཡ༌ཝའེ༌ ཁྱོ༌རང༌ང༌ ལན༌ སལ༌ཏེ༌ ཨིན༌ནོག༌།
ཡ༌ཝའེ༌ ཏེ༌ གྱལ༌སྲིད༌པོ༌ ཁྱོ༌རང༌ངི༌ བུ༌ཚ༌ ཨབ༌ས༌ལོམ༌མ༌ སལ༌ལ༌ ཛད༌ཏེ༌ ཁྱོ༌རང༌ མེད༌ཁན༌ ཆ༌ཅེས༌ ཨིན༌ནོག༌ ཅིའ༌ཟེར༌ན༌ ཁྱོ༌རང༌ མི༌སད༌ ཨིན༌ནོག༌།”
9 ཟེ༌རུའི༌འཧའེ༌ བུ༌ཚ༌ ཨ༌བི༌ཤའི༌ གྱལ༌པོའ༌ ཟེརས༌,
“ཅི༌ཕིའ༌ འི༌ ཁྱི༌ ཤི༌རོའེ༌ གྱལ༌པོ༌ ངའེ༌ སྤོན༌བོའ༌ ངན༌ ཏབ༌བ༌ནོག༌?
ང༌ སོང༌ཏེ༌ ཁོའེ༌ གོ༌ ཅད༌ཅེས༌ལ༌ གོངས༌པ༌ སལ༌།”
10 “མན༌།”
གྱལ༌པོའེ༌ ཟེརས༌,
“ཟེ༌རུའི༌འཧའེ༌ བུ༌ཚ༌གུན༌ སུའི༌ ཁྱོ༌ཞའེ༌ སམ༌ཁན༌བོ༌ ཏྲིའ༌རག༌?
ཀལ༌ཏེས༌ ཡ༌ཝའེ༌ ཁོའ༌ ངའ༌ ངན༌ ཏོབ༌ མོལ༌ཏེ༌ ཡོད༌ན༌ ཁོ༌ སྒག༌ཁན༌ ཁྱོ༌ཞའ༌ སུ༌ ཨིན༌?”
11 ཏེ༌ནེ༌ དཱ༌བིད༌དི༌ ཨ༌བི༌ཤའི༌ དང༌ ཞབས༌ཏོག༌པ༌ ཚང༌མ༌ ཟེརས༌,
“ང༌རང༌ངི༌ བུ༌ཚའེ༌ ང༌ སད༌ཅེས༌ ཅོས༌།
འི༌ ས༌འུལ༌ལི༌ ཉེན༌གྲུང༌བོའ༌ ཏེ༌ཟུག༌ ཅོ༌ཅེས༌སི༌ ཏོན༌ཚན༌ མང༌ང༌ གྱལ༌ལ༌ ཡོད༌ཏེ༌ མ༌ནོག༌ག༌?
ཁོའ༌ ངན༌ ཏབ༌ཅུག༌ ཅིའ༌ཟེར༌ན༌ ཡ༌ཝའེ༌ ཁོའ༌ ཏེ༌ཟུག༌ ཟེར༌ཅེས༌ལ༌ མོལ༌ཏེ༌ ཨིན༌ནོག༌།
12 ཅི༌གྱུས༌ ཡ༌ཝའེ༌ ངའེ༌ རྡུག༌ངལ༌གུན༌ ཟིགས༌ཏེ༌ ཏེ༌བོའེ༌ ལན༌ལ༌ ང༌ ཅིན༌ལབས༌ སལ༌ སྲིད༌ཅེས༌ ཨིན༌ནོག༌།”
13 ཏེ༌ནེ༌ དཱ༌བིད༌ དང༌ ཁོའེ༌ མི༌གུན༌ ལམ༌ནེ༌ ཆེན༌ ཡོད༌ ཟ༌ནེ༌ ཤི༌མེའི༌ དཱ༌བིད༌ལ༌ ངན༌ ཏབ༌ཨིན༌,
རྡོའ༌ གྱབ༌ཨིན༌ ཡང༌ ཐལ༌བ༌ ཡོག༌ཨིན༌ ཁོང༌གུན༌ནེ༌ འ༌ངོ༌ ཆོགས༌སི༌ རི༌ ལྡོ༌ནེ༌ སོང༌།
14 གྱལ༌པོ༌ དང༌ ཁོང༌ ཉམ༌པོ༌ ཡོད༌ཁན༌ ཚང༌མ༌ ཡོར༌དཱན༌ ལྩངས༌པོ༌ ཡོད༌ས༌ མ༌སྲན༌ཏྲེ༌ ངལ༌ཏེ༌ ལེབ༌ ཡང༌ ཁོང༌གུན༌ ཏེ༌ཀ༌ ངལ༌ཚོས༌།
ཨ༌ཧི༌ཐོ༌ཕེལ༌ལི༌ ཁ༌དའ༌གུན༌།
16:15 ནེ༌ 23
15 ཏེན༌ན༌ ཏུས༌ ཨབ༌ས༌ལོམ༌ དང༌ ཨིས༌ར༌ཨེལ༌པ༌ ཚང༌མ༌ ཡེ༌རུ༌ཤ༌ལེམ༌མ༌ ལེབ༌ ཡང༌ ཨ༌ཧི༌ཐོ༌ཕེལ༌ ཁོང༌གུན༌ ཉམ༌པོ༌ ཡོད༌པིན༌།
16 དཱ༌བིད༌དི༌ ཛ༌འོ༌ ཨར༌ཀ༌པ༌ ཧུ༌ཤཱའི༌ ཨབ༌ས༌ལོམ༌མ༌ ཐུག༌ག༌ སོང༌ཏེ༌ ཟེརས༌,
“གྱལ༌པོའེ༌ སྐུ༌ཚེ༌ རིང༌ཤིག༌།
གྱལ༌པོའེ༌ སྐུ༌ཚེ༌ རིང༌ཤིག༌།”
17 ཨབ༌ས༌ལོམ༌མི༌ ཁོའ༌ ཟེརས༌,
“ཅི༌ ཁྱོ༌རང༌ངི༌ རང༌ངི༌ ཛ༌འོ༌ དཱ༌བིད༌ལ༌ འི༌ ཅེས༌པ༌བོ༌ སྟན༌ཏེ༌ ཨིན༌ན༌?
ཁྱོ༌རང༌ ཁོ༌ ཉམ༌པོ༌ ཅིའ༌ མ༌སོང༌པིན༌?”
18 ཧུ༌ཤཱའི༌ ལན༌ཏངས༌,
“མན༌།
ཡ༌ཝ༌,
ཨིས༌ར༌ཨེལ༌པ༌ ཚང༌མ༌ ཡང༌ འི༌ཀ༌ ཡོད༌ཁན༌གུན༌ནི༌ ལྡམས༌ཁན༌ གྱལ༌པོའེ༌ ང༌ ཨིན༌ ཡང༌ ང༌ ཁོང༌ ཉམ༌པོ༌ དུག༌ཨིན༌།
19 ངའེ༌ ཅི༌ཕིའ༌ ཉེ༌རང༌ང༌ ཞབས༌ཏོག༌ མི༌ ཞུ༌?
ངའེ༌ ཉེ༌རང༌ངི༌ ཨ༌བ༌ ཞབས༌ཏོག༌ ཞུའ༌ ཙོགས༌ལ༌ ཏ༌ ངའེ༌ ཉེ༌རང༌ང༌ ཞབས༌ཏོག༌ ཞུ༌ཨིན༌།”
20 ཨབ༌ས༌ལོམ༌མི༌ ཨ༌ཧི༌ཐོ༌ཕེལ༌ལ༌ ཟེརས༌,
“ལབ༌ཞ༌ ཏོང༌,
ཏ༌ ང༌དང༌ངི༌ ཅི༌ ཅོ༌གོས༌?”
21 ཨ༌ཧི༌ཐོ༌ཕེལ༌ལི༌ ལན༌ཏངས༌,
“སོང༌ ཡང༌ ཁྱོ༌རང༌ངི༌ ཨ༌བའེ༌ ཚེ༌ཡོག༌ ན༌མ༌ འི༌རུ༌ ཁར༌ལ༌ སྟ༌སྟོག༌ ཅོ༌ཅེས༌ལ༌ བོར༌ཁན༌གུན༌ ཉམ༌པོ༌ ལུས༌བྲེལ༌ ཅོས༌།
ཏེ༌ནེ༌ ཉེ༌རང༌ངི༌ རང༌ངི༌ ཨ༌བ༌ ཉམ༌པོ༌ ཐུན༌བྲེལ༌ ཅོ༌ མི༌ཉན༌ཅེས༌ མ༌ ཁམ༌ལོག༌ ལས༌ ཅོ༌ཁན༌བོ༌ ཨིས༌ར༌ཨེལ༌པ༌ ཚང༌མ༌ ཧ༌གོ༌ཨིན༌ ཡང༌ ཉེ༌རང༌ངི༌ གྱབ༌སྐྱོར༌ ཅོ༌ཁན༌གུན༌ལ༌ སྤོས༌པ༌ སྐྱེས༌ཏེ༌ ཚང༌མ༌ དུན༌ལ༌ ཉེ༌རང༌ང༌ ཆོག༌སྐྱོར༌ ཅོ༌ཨིན༌།”
22 ཏེ༌ནེ༌ ཁོང༌གུན༌ནི༌ ཁར༌རི༌ ཁེ༌ཐོག༌ག༌ ཀུར༌ ཙུགས༌ ཡང༌ ཨབ༌ས༌ལོམ༌མི༌ ཨིས༌ར༌ཨེལ༌པ༌ ཚང༌མའེ༌ དུན༌ལ༌ ཁོ༌རང༌ངི༌ ཨ༌བའེ༌ ཚེ༌ཡོག༌ ན༌མ༌གུན༌ ཉམ༌པོ༌ ལུས༌བྲེལ༌ ཅོས༌།
23 ཏེ༌ ཏུས༌ལ༌ ཨ༌ཧི༌ཐོ༌ཕེལ༌ལི༌ ལབ༌ཞ༌གུན༌ དཀོན༌མཆོག༌གི༌ ལུང༌སྟོན༌པའེ༌ བཀའ༌ ཙོགས༌ ཐེའད༌པིན༌།
དཱ༌བིད༌ དང༌ ཨབ༌ས༌ལོམ༌ ཉིས༌ཀོའེ༌ ཨ༌ཧི༌ཐོ༌ཕེལ༌ལི༌ ཁ༌དའ༌གུན༌ལ༌ མ༌ རྩི༌ཝ༌ ཏང༌ངད༌པིན༌།