ཨབ༌ས༌ལོམ༌མི༌ དཱ༌བིད༌དི༌ གྱབ༌གལ༌ ཅོ༌ཅེས༌ལ༌ ཐབས༌ ལྡིངས༌།
15:1 ནེ༌ 12
15
ཏུས༌ བན༌ཤིག༌གི༌ སྟིང༌ནེ༌ ཨབ༌ས༌ལོམ༌ ཀ༌རུ༌ ཆ༌ནའང༌ ཁོ༌ རྟ༌རེལ༌ལི༌ ནང༌ང༌ ཞོན༌ཏེ༌ ཏེ༌བོའེ༌ དུན༌ལ༌ མི༌ 50 བང༌ཏང༌ ཅུག༌གད༌པིན༌།
2 ཨབ༌ས༌ལོམ༌ ང༌མོ༌ནེ༌ ལངས༌ཏེ༌ གྱལ༌སའེ༌ གྱས༌སྒོ༌ ཆོགས༌ལ༌ ཆའ༌ཁན༌ནི༌ ལམ༌མི༌ཀ༌ དུགས༌ཏེ༌ གྱལ༌པོའེ༌ཀ༌ ཛིང༌མོ༌ ཤགས༌ ཅད༌ད༌ ཁྱོང༌ཁན༌ནི༌ མི༌གུན༌ལ༌ བོད༌ཏེ༌ ཏྲིའད༌པིན༌,
“ཁྱོ༌ཞའ༌ ཀ༌ཡུལ༌ནེ༌ ཨིན༌?”
ཡང༌ ཁོང༌གུན༌ནི༌ ཁོ༌རང༌ངི༌ མི༌སྡེ༌ ཤད༌ད༌ཅིག༌,
3 ཨབ༌ས༌ལོམ༌མི༌ ཟེར༌རད༌པིན༌,
“ཁྱོ༌ཞ༌གུན༌ནི༌ ཤགས༌པོ༌ དེན༌བ༌ དང༌ འོས༌པ༌ཅན༌ རག༌ ཨིན༌ནའང༌ ཏེ༌གུན༌ ཉན༌ཁན༌ འི༌རུ༌ གྱལ༌པོའེ༌ ཁག༌ཁུར༌པ༌ སུའང༌ མེད༌ཏེ༌ ཨིན༌ནོག༌།”
4 ཁོའེ༌ ཡང༌སྐྱར༌ ཟེརས༌,
“ཀལ༌ཏེས༌ ང༌ ཁྲིམ༌སྤོན༌ལ༌ ལྡམས༌ཏེ༌ ཨིན༌པིན༌ན༌ ཏེ༌ནེ༌ ཚང༌མའེ༌ ཤགས༌གུན༌ ངའེ༌ཀ༌ ཁྱོངས༌ཏེ༌ ངའེ༌ ཁོང༌གུན༌ལ༌ འོས༌པའེ༌ ཐག༌ཅད༌ ཏང༌ཨིན༌།”
5 མི༌གུན༌ ཡོངས༌ཏེ༌ ཨབ༌ས༌ལོམ༌མི༌ དུན༌ལ༌ གོ༌ སྒུས༌ཏེ༌ ཁོའ༌ ཀུས༌པ༌ སྟན༌ཅེས༌ ཅོའ༌ཅིག༌ ཁོའེ༌ ཏེ༌ཟུག༌ ཅོ༌ མ༌ཅུག༌ག༌ ཁོང༌གུན༌ལ༌ ཁྲིལ༌ཏེ༌ པུག༌ ཏང༌ངད༌པིན༌།
6 གྱལ༌པོའེ༌ཀ༌ ཤགས༌ ཅོའ༌ལ༌ ཡོང༌ཁན༌ ཚང༌མ༌ ཉམ༌པོ༌ ཨབ༌ས༌ལོམ༌མི༌ ཏེན༌ན༌ ཙོགས༌ ཅོས༌ཏེ༌ ཁོའེ༌ ཨིས༌ར༌ཨེལ༌པ༌ ཚང༌མའེ༌ ཆོག༌སྐྱོར༌ ཁོ༌རང༌ ཆོགས༌ལ༌ ཁྱོངས༌།
7 ལོ༌ ཞིའི༌ སྟིང༌ནེ༌ ཨབ༌ས༌ལོམ༌མི༌ གྱལ༌པོ༌ དཱ༌བིད༌ལ༌ ཟེརས༌,
“ངའེ༌ ཡ༌ཝ༌ ཉམ༌པོ༌ དམ༌ཆ༌ ཅོ༌ཁན༌བོ༌ དྲན༌དྲའ༌ ཅོ༌ཅེས༌ལ༌ ང༌ ཧེབ༌རོན༌ལ༌ ཆ༌ཅུག༌ག༌ ཛད༌
8 ཅིའ༌ཟེར༌ན༌ ངའ༌ ཉེ༌རང༌ངི༌ ཡོག༌པོ༌ ཨ༌རམ༌མི༌ ནང༌ང༌ གེ༌ཤུར༌ལ ཡོད༌ ཟ༌ནེ༌ ངའེ༌ ཡ༌ཝའ༌ འི༌ དམ༌ཆ༌ ཅོས༌པིན༌,
‘ཀལ༌ཏེས༌ ཉེ༌རང༌ངི༌ ངའ༌ ལོགས༌ཏེ༌ ཡེ༌རུ༌ཤ༌ལེམ༌མ༌ ཁྱོང༌ང༌ ཛད༌ན༌ ངའེ༌ ཉེ༌རང༌ང༌ ཧེབ༌རོན༌ནི༌ ནང༌ང༌ ཆོད༌པ༌ ཕུལ༌ཨིན༌།’”
9 གྱལ༌པོ༌ དཱ༌བིད༌དི༌ ཁོའ༌ ཟེརས༌,
“གྱལ༌ལ༌ རག༌།
སོང༌ ཡང༌ ཁྱོ༌རང༌ངི༌ དམ༌ཆ༌ དྲན༌དྲ༌ གྲུབ༌ཅུག༌།”
ཏེ༌ནེ༌ ཨབ༌ས༌ལོམ༌ ཧེབ༌རོན༌ལ༌ སོང༌།
10 ཨིན༌ནའང༌ ཁོའེ༌ སང༌ཝའེ༌ ནང༌ང༌ ཨིས༌ར༌ཨེལ༌ལི༌ མི༌སྡེ༌ ཚང༌མ༌ ལོན༌ ཀལ༌ཏེ༌ ཟེརས༌,
“ཁྱོ༌ཞ༌གུན༌ནི༌ ཏུང༌སྐད༌ ཚོར༌ར༌ཅིག༌ ཀུ༌ཅོ༌ ཏངས༌ཏེ༌ ‘ཨབ༌ས༌ལོམ༌ ཧེབ༌རོན༌ནི༌ གྱལ༌པོ༌ ཨིན༌’ ཟེར༌ཤིག༌།”
11 ཁོའེ༌ ཡེ༌རུ༌ཤ༌ལེམ༌ནེ༌ གྲོན༌པོ༌ 200 ཁོ༌རང༌ ཉམ༌པོ༌ ཁྱེརས༌ ཨིན༌ནའང༌ ཁོང༌གུན༌ལ༌ ཁོའེ༌ ཅོ༌ཅེས༌ཅན༌ནི༌ ལས༌སི༌ སྐོར༌ལ༌ ཅའང༌ གྱུས༌མེད༌པིན༌།
12 ཨབ༌ས༌ལོམ༌མི༌ ཆོད༌པ༌ ཕུལ༌ ཟ༌ནེ༌ ཁོའེ༌ གྱལ༌པོ༌ དཱ༌བིད༌ལ༌ ཁ༌དའ༌ ཏང༌ཁན༌ ཨ༌ཧི༌ཐོ༌ཕེལ༌ལ༌ ཁོ༌ དུག༌སའེ༌ གྱལ༌ས༌ གི༌ལོཧ༌ནེ༌ ཡོང༌ ཟེར༌ཏེ༌ ལོན༌ ཀལས༌།
ཏེ༌ནེ༌ ཞན༌ མི༌མང༌པོ༌ ཨབ༌ས༌ལོམ༌མི༌ ཅུས༌ངན༌ནི༌ ནང༌ང༌ ཐུས༌ ཡང༌ དཱ༌བིད༌ལ༌ གྱབ༌གལ༌ ཅོ༌ཁན༌གུན༌ནི༌ ཀྲངས༌ཀ༌ གྱས༌ཏེ༌ ཤུགས༌ཅན༌ གྱུར༌།
དཱ༌བིད༌ ཤོར༌ཏེ༌ སོང༌།
15:13 ནེ༌ 37
13 ལོན༌ ཁྱོང༌ཁན༌ནི༌ མི༌ ཡེ༌རུ༌ཤ༌ལེམ༌མི༌ ནང༌ང༌ དཱ༌བིད༌ལ༌ ལོན༌ ཁྱོངས༌ཏེ༌ ཟེརས༌,
“ཨིས༌ར༌ཨེལ༌པ༌གུན༌ནི༌ ཨབ༌ས༌ལོམ༌མི༌ ཅུས༌ངན༌ལ༌ ཆོག༌སྐྱོར༌ ཅོ༌དུག༌།”
14 ཏེ༌ནེ༌ དཱ༌བིད༌དི༌ ཁོ༌རང༌ངི༌ གོ༌སྐྱོང༌གུན༌ལ༌ ཟེརས༌,
“ང༌དང༌ ཤོར༌གོས༌ ཏེ༌མན༌ན༌ ཨབ༌ས༌ལོམ༌མི༌ ཀ༌ནེ༌ ང༌དང༌ སུའང༌ མི༌ཐར༌།
ང༌དང༌ དག༌ས༌རང༌ ཤོར༌གོས༌།
ཨབ༌ས༌ལོམ༌ ལེབ༌བི༌ སང༌ སྔུན༌ལ༌ ང༌དང༌ གྱལ༌ས༌ནེ༌ བིང༌ མ༌ཉན༌ན༌ ང༌དང༌གུན༌ དང༌ ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ ཡོད༌ཁན༌ མི༌གུན༌ སད༌ཅེས༌ ཨིན༌ནོག༌།”
15 ཁོའེ༌ གོ༌སྐྱོང༌གུན༌ནི༌ ཟེརས༌,
“ང༌ཞ༌གུན༌ ཉེ༌རང༌ ཉམ༌པོ༌ ཨིན༌,
ཉེ༌རང༌ངི༌ གྱལ༌ལ༌ སམ༌ཁན༌བོ༌ ཅོའ༌ ཛད༌།”
16 གྱལ༌པོ༌ དང༌ ཁོའེ༌ ནང༌མི༌ ཚང༌མ༌ ཏེན༌ན༌མལ༌ལ༌ ཤོར༌ཅེས༌ལ༌ བིངས༌།
ཨིན༌ནའང༌ ཁོའེ༌ ཚེ༌ཡོག༌ ན༌མ༌ 10 ཁར༌རི༌ སྟ༌སྟོག༌ ཅོའ༌ལ༌ བོརས༌།
17 ཏེ༌ནེ༌ གྱལ༌པོ༌ གྲུལ༌ཅེས༌ གོ༌ཟུག༌ ཡང༌ མི༌ཚང༌མ༌ ཁོའེ༌ གྱབ༌ནེ༌ ཡོངས༌,
གྱལ༌སའེ༌ སྟིང༌ཇུག༌གི༌ ཁང༌པ༌ ཡོད༌སའ༌ ཁོང༌གུན༌ གྲུལ༌ མ༌གྲུལ༌ལ༌ དུགས༌།
18 གྱལ༌པོའེ༌ གོ༌སྐྱོང༌ ཚང༌མ༌ གྱལ༌པོའེ༌ སྲུང༌སྐྱོབ༌ ཅོ༌ཁན༌ནི༌ མག༌མི༌ ཚང༌མ༌ ཡང༌ གིད༌པ༌ མི༌ 600 གྱལ༌པོ༌ དཱ༌བིད༌ རྒལ༌ཏེ༌ ཁོའེ༌ སང༌ སྔུན༌ལ༌ སོང༌།
19 ཏེ༌ནེ༌ གྱལ༌པོའེ༌ ཨིཏ༌ཏའི༌,
གིད༌པ༌ སྤོན༌བོའ༌ ཟེརས༌,
“ཁྱོ༌རང༌ ཅི༌ཕིའ༌ ང༌ཞའ༌ ཉམ༌པོ༌ ཡོང༌ངད༌།
ལོགས༌ཏེ༌ གྱལ༌པོ༌ ཨབ༌ས༌ལོམ༌ ཡོད༌ས༌ སོང༌ ཅིའ༌ཟེར༌ན༌ ཁྱོ༌རང༌ ཨིས༌ར༌ཨེལ༌ལི༌ ནང༌ང༌ དུག༌ཁན༌ ཞན༌ ཡུལ༌ལི༌མི༌ ཨིན༌ནོག༌།
20 ཁྱོ༌རང༌ ཉེ༌ཐུབ༌ཤིག༌རང༌ ཡོངས༌ཏེ༌ དི༌རིང༌ ང༌ཞ༌གུན༌ ཉམ༌པོ༌ ཤོར༌གོ༌ཤེས༌པོ༌ འོས༌པ༌ ཚོར༌ར༌ མེ༌རག༌ ཡང༌ ང༌ཞའ༌ ཀ༌རུ༌ ཆ༌ཅེན༌ ང༌ཞའ༌ རང༌ང༌ གྱུས༌མེད༌?
ཁྱོ༌རང༌ངི༌ ཡུལ༌མི༌གུན༌ ཁྲིད༌ཏེ༌ ལོགས༌ཏེ༌ སོང༌།
ཡ༌ཝའེ༌ ཁྱོ༌རང༌ང༌ ཅེས༌པ༌ དང༌ ཐུག༌རྗེ༌ ཛད༌ཤིག༌།”
21 ཨིན༌ནའང༌ ཨིཏ༌ཏའི༌ གྱལ༌པོའ༌ ཟེརས༌,
“ཡ༌ཝ༌ དང༌ གྱལ༌པོའེ༌ ཚན༌ནི༌ ནང༌ང༌,
ངའེ༌ སྤོན༌བོ༌ གྱལ༌པོ༌ ཀ༌རུ༌ སྐྱོད༌ནའང༌ ང༌ ཉེ༌རང༌ངི༌ ཡོག༌པོ༌ ཉེ༌རང༌ ཉམ༌པོ༌ ཆེན༌ ཏེ༌བོ༌ མི༌ཚེ༌ ཨིན༌གྲོ༌ ཡ༌ ཤི༌ཅེས༌།”
22 དཱ༌བིད༌དི༌ ལན༌ཏངས༌ “གྱལ༌ལ༌ རག༌ ཏེ༌ནེ༌ ང༌ཞའ༌ ཉམ༌པོ༌ ཡོང༌།”
ཏེ༌བོའེ༌ཕིའ༌ གིད༌པ༌ ཨིཏ༌ཏའི༌ ཡང༌ ཁོའེ༌ མི༌གུན༌ དང༌ ཁོང༌གུན༌ནི༌ ནང༌ཚངས༌ ཚང༌མ༌ དཱ༌བིད༌ ཉམ༌པོ༌ ཡོངས༌།
23 གྱལ༌པོ༌ དང༌ ཁོའེ༌ མི༌ ཚང༌མ༌ ཆ༌ ཟ༌ནེ༌ ཏེ༌ ཡུལ༌མི༌ གང༌པོ༌ ཤེད༌ཅན༌ ངུས༌།
ཀིད༌རོན༌ནི༌ ལུང༌པ༌ རྒལ༌ཏེ༌ ཁོང༌ ཚང༌མ༌ ཐང༌སྟོང༌ ཆོགས༌ལ༌ སོང༌།
24 བླ༌མ༌ ཟ༌དོག༌ དང༌ ཨ༌བིའ༌ཐར༌ གུན༌ནའང༌ ཡོད༌པིན༌ ཡང༌ ལི༌ཝི༌ སྡེའེ༌ ནང༌ནེ༌ ཁ༌ཅིག༌གི༌ དཀོན༌མཆོག༌གི༌ ཆད༌དོན༌ནི༌ སྒམ༌བོ༌ ཁུར༌ཏེ༌ ཡོད༌པིན༌།
ཞན༌ མི༌ཚང༌མ༌ གྱལ༌ས༌ནེ༌ བིང༌ ཚར༌ཚར༌ ཁོང༌གུན༌ནི༌ ཆད༌དོན༌ནི༌ སྒམ༌ སའེ༌ཀ༌ བོར༌ཏེ༌ སྲུངས༌ཏེ༌ དུགས༌།
25 ཏེ༌ནེ༌ གྱལ༌པོའེ༌ ཟ༌དོག༌ག༌ དཀོན༌མཆོག༌གི༌ ཆད༌དོན༌ནི༌ སྒམ༌བོ༌ ལོགས༌ཏེ༌ གྱལ༌ས༌ ཁྱེར༌ཅེས༌ལ༌ བཀའ༌ ཏངས༌ཏེ༌ ཟེརས༌,
“ཀལ༌ཏེས༌ ངའེ༌ཀ༌ ཡ༌ཝའ༌ ཐུགས༌ཐད༌ད༌ ཛད༌ན༌,
ཏམ༌པ༌ ཀུར༌རི༌ ནང༌ང༌ ཆད༌དོན༌ནི༌ སྒམ༌བོ༌ ཐོང༌ཅེས༌ལ༌ ང༌ ཡང༌སྐྱར༌ ལོགས༌ཏེ༌ ཁྱོང༌ང༌ ཛད༌ཨིན༌།
26 ཨིན༌ནའང༌ ཀལ༌ཏེས༌ ཁོང༌ ངའེ༌ཀ༌ ཐུགས༌ མ༌ཐད༌ན༌ ཁོང༌ངི༌ འོས༌པ༌ ཨིན༌ཁན༌བོ༌ ངའ༌ ཛད༌ཤིག༌།”
27 གྱལ༌པོའེ༌ བླ༌མ༌ ཟ༌དོག༌ག༌ འི༌བོའང༌ ཟེརས༌,
“ཉེ༌རང༌ང༌ ནས༌ལུག༌པོ༌ གྱུས༌ཨིན༌ནོག༌།
ཉེ༌རང༌ དང༌ ཨ༌བིའ༌ཐར༌ ཉིས༌ཀོ༌ རང༌ངི༌ བུ༌ཚ༌ ཨ༌ཧི༌མཟ༌ དང༌ ཡོ༌ན༌ཐན༌ ཁྲིད༌ཏེ༌ གྱལ༌སའ༌ ཞི༌དེ༌ ཉམ༌པོ༌ ལོགས༌ཏེ༌ སོང༌།
28 ང༌ ཡོར༌དཱན༌ ལྩངས༌པོ༌ ཏེལ༌མོ༌ ཡོད༌སའེ༌ཀ༌ ཉེ༌རང༌ངི༌ ཆོགས༌ནེ༌ ནས༌ཚུལ༌ལི༌ ཕིའ༌ སྲུངས༌ཏེ༌ དུག༌ཨིན༌།”
29 ཏེ༌ནེ༌ ཟ༌དོག༌ དང༌ ཨ༌བིའ༌ཐར༌རི༌ དཀོན༌མཆོག༌གི༌ ཆད༌དོན༌ནི༌ སྒམ༌ ལོགས༌ཏེ༌ གྱལ༌ས༌ ཁྱེརས༌ ཡང༌ ཁོང༌གུན༌ ཏེ༌རུ༌ དུགས༌།
30 དཱ༌བིད༌ ཀེན༌ལ༌ ཨོ༌ལིཝ༌ཝི༌ རི༌ ཆོགས༌ལ༌ ངུ༌ཨིན༌ཞིག༌ སོང༌,
ཁོའེ༌ གོ༌ ཏུམས༌ཏེ༌ ཁོའེ༌ རྐང༌པ༌ ཅའང༌ མ༌གོན༌ན༌ ཡོད༌པིན༌།
ཁོ༌ ཉམ༌པོ༌ ཡོད༌ཁན༌ མི༌ ཚང༌མེའང༌ གོ༌གུན༌ ཏུམས༌ཏེ༌ ཆ༌ ཟ༌ནེ༌ ངུའད༌པིན༌།
31 དཱ༌བིད༌དི༌ ཁ༌དའ༌ ཏང༌ཁན༌ ཨ༌ཧི༌ཐོ༌ཕེལ༌ལི༌ ཨབ༌ས༌ལོམ༌མ༌ ཆོག༌སྐྱོར༌ ཅོ༌དུག༌ ཟེར༌ཏེ༌ དཱ༌བིད༌ལ༌ ཚོར༌ར༌ཅིག༌ ཁོའེ༌ མོས༌ལམ༌ ཞུས༌,
“ཀྱེ༌ ཡ༌ཝ༌ལེ༌ ཨ༌ཧི༌ཐོ༌ཕེལ༌ལི༌ ཨབ༌ས༌ལོམ༌མ༌ ཏང༌ཁན༌ནི༌ ལབ༌ཞ༌གུན༌ སམ༌བ༌ མེད༌ཁན༌ ཡོང༌ ཅུག༌ག༌ཛད༌།”
32 མི༌གུན༌ནི༌ དཀོན༌མཆོག༌ག༌ ཅོལ༌སའེ༌ ཨོ༌ལིཝ༌ཝི༌ རིའི༌ གོའ༌ དཱ༌བིད༌ ལེབ༌བ༌ཅིག༌,
ཨར༌ཀ༌པ༌ ཧུ༌ཤཱའི༌ རྡུག༌པོ༌ ཅོས༌ཏེ༌ ཀོས༌ལག༌ ཅད༌ཏེ༌ གོའེ༌ཀ༌ ཐལ༌བ༌ གོན༌ཏེ༌ དཱ༌བིད༌ལ༌ སྲུངས༌ཏེ༌ ཡོད༌ཁན༌བོ༌ ཐོང༌།
33 གྱལ༌པོ༌ དཱ༌བིད༌དི༌ ཁོའ༌ ཟེརས༌,
“ཁྱོ༌རང༌ ང༌ ཉམ༌པོ༌ ཡོང༌ཅེས༌པོ༌ ངའེ༌ ཕིའ༌ ཕན༌ཐོགས༌ཅན༌ མི༌ཡོང༌།
34 ཨིན༌ནའང༌ ཡེ༌རུ༌ཤ༌ལེམ༌མ༌ ལོགས༌ཏེ༌ སོང༌ཏེ༌ ཨབ༌ས༌ལོམ༌མ༌ ཟེར༌,
“ཉེ༌རང༌ངི༌ ཨ༌བའ༌ ཞབ༌ཤི༌ ཨིད༌ཤེས༌ཅན༌ ཞུའ༌ ཙོགས༌ལ༌ ཏ༌ ངའེ༌ ཉེ༌རང༌ང༌ ཞབ༌ཤི༌ ཞུ༌ཨིན༌།
ཏེ༌ནེ༌ ཁོ༌རང༌ངི༌ ཨ༌ཧི༌ཐོ༌ཕེལ༌ལི༌ ཁ༌དའ༌གུན༌ནི༌ གྱབ༌གལ༌ ཅོས༌ཏེ༌ ངའ༌ རོགས༌ ཅོ༌ཉན༌ཨིན༌།
35 ཟ༌དོག༌ དང༌ ཨ༌བིའ༌ཐར༌ བླ༌མ༌གུན༌ ཏེ༌རུ༌ ཁྱོ༌རང༌ ཉམ༌པོ༌ ཡོད༌ཏེ༌ ཨིན༌ནོག༌།
གྱལ༌པོའེ༌ ཁར༌རི༌ ནང༌ང༌ ཚོར༌ཁན༌ ཚང༌མ༌ ཁོང༌གུན༌ལ༌ ཤོད༌།
36 ཁོང༌ངི༌ ཁོ༌རང༌གུན༌ནི༌ བུ༌ཚ༌ ཨ༌ཧི༌མཟ༌ དང༌ ཡོ༌ན༌ཐན༌ ཏེ༌གུན༌ ཤད༌ཏེ༌ ང༌ ཡོད༌ས༌ ལམ༌ཅུག༌ ཨིན༌།”
37 ཏེ༌ནེ༌ དཱ༌བིད༌དི༌ ཛ༌འོ༌ ཧུ༌ཤཱའི༌ ཡེ༌རུ༌ཤ༌ལེམ༌མ༌ ལོགས༌ཏེ༌ ལེབ༌ ཟ༌ནེ༌ ཨབ༌ས༌ལོམ༌ གྱལ༌སའེ༌ ནང༌ང༌ ཞུགས༌ཨིན༌ ཡོད༌པིན༌།