ཨབ༌ས༌ལོམ༌ ཡེ༌རུ༌ཤ༌ལེམ༌མ༌ ལོགས༌ཏེ༌ ཡོངས༌།
14:1 ནེ༌ 33
14
གྱལ༌པོ༌ དཱ༌བིད༌ད༌ ཨབ༌ས༌ལོམ༌ ཐུག༌ཅེས༌སི༌ དོད༌པ༌ མ༌ སྲན༌ཏྲེ༌ ཡོད༌ཁན༌བོ༌ ཡོ༌འབ༌བ༌ ཧ༌གོ༌།
2 ཏེ༌བོའེ༌ཕིའ༌ ཁོའེ༌ ཀྲི༌ཀོའ༌ གྲོང༌ཁྱེར༌ལ༌ དུག༌ཁན༌ ཤེས༌རབས༌ཅན༌ནི༌ བུ༌མོ༌ ཁྱོང༌ང༌ལ༌ མི༌ ལམ༌ཅུགས༌།
ཡོ༌འབ༌བི༌ ཏེ༌ བུ༌མོའ༌ ཟེརས༌,
“ཉ༌ངན༌ནི༌ ཀོས༌ལག༌ གོན༌ཏེ༌ མར༌ མ༌སྐུའ༌ ཤི༌ཁན༌ནི༌ ཕིའ༌ ཏུས༌ རིང༌མོ༌ཞིག༌ ནེ༌ ཉ༌ངན༌ ཅོ༌ཁན༌ནི༌ བུ༌མོ༌ ཙོགས༌ ཉ༌ངན༌ ཅོ༌ཟུན༌ ཏོང༌།
3 ཏེ༌ནེ༌ གྱལ༌པོ༌ ཡོད༌ས༌ སོང༌ཏེ༌ ཁོང༌ང༌ ངའེ༌ ཟེར༌ཁན༌ནི༌ སྤེ༌ར༌གུན༌ ཤོད༌།”
ཡོ༌འབ༌བི༌ བུ༌མོ༌བོའ༌ ཟེར༌ཅེས༌སི༌ སྤེ༌ར༌གུན༌ ལབས༌།
4 ཀྲི༌ཀོའ༌པ༌ བུ༌མོ༌ གྱལ༌པོ༌ ཡོད༌ས༌ ལེབ༌བ༌ཅིག༌ ཁོང༌ང༌ རྩི༌ཝ༌ སྟན༌ཅེས༌ལ༌ སའེ༌ཀ༌ གྱེལ༌ཏེ༌ ཆག༌ཕུལས༌ ཡང༌ ཟེརས༌,
“གྱལ༌པོ༌ལེ༌ ངའ༌ རོགས༌ ཛད༌།”
5 གྱལ༌པོའེ༌ ཏྲིས༌,
“ཁྱོ༌རང༌ང༌ ཅི༌ བར༌དོ༌ རག༌?”
བུ༌མོའེ༌ ལན༌ཏངས༌,
“ང༌ མ༌རང༌མོ༌ ཞིག༌ ཨིན༌,
ངའེ༌ མག༌པ༌ ཀྲོངས༌ཏེ༌ མེད༌།
6 ཞིང༌ངི༌ཀ༌ ངའེ༌ བུ༌ཚ༌ ཉིས༌ཀོའེ༌ ནང༌ང༌ ཛིང༌མོ༌ སོང༌ཏེ༌ ནོལས༌ ཡང༌ ཏེ༌རུ༌ ཁོང༌གུན༌ པེ༌ཁན༌ སུའང༌ མེད༌པ༌ ཅིག༌པོ༌ སདས༌།
7 ཏ༌ ངའེ༌ ཉེན༌གྲུང༌གུན༌ནི༌ ངའ༌ ཟེར༌དུག༌,
‘ཁྱོ༌རང༌ངི༌ ཞན༌ བུ༌ཚ༌བོ༌ ཏོང༌ ང༌ཞའེ༌ ཁོ༌ སད༌ཨིན༌ ཅིའ༌ཟེར༌ན༌ ཁོའེ༌ ཁོ༌རང༌ངི༌ ཨ༌ཅོ༌ སད༌ཏེ༌ ཨིན༌ནོག༌།
ཏེ༌ནེ༌ ཁྱོ༌རང༌ངི༌ མག༌པའེ༌ ནོར༌སྐལ༌ ལེན༌ཁན༌ སུའང༌ མི༌ ལུས༌།’
ཁོང༌གུན༌ནི༌ ངའེ༌ ལུས༌ཁན༌ནི༌ བུ༌ཚ༌ ཅིག༌ཅིག༌པོ༌ སད༌ཏེ༌ ངའེ༌ མག༌པའེ༌ མིང༌ དང༌ མིར༌གྱུད༌ ཇིག༌རྟེན༌ནི༌ ཀ༌ནེ༌ མེད༌ཁན༌ ཅོ༌ཅེས༌ ཨིན༌ནོག༌།”
8 གྱལ༌པོའེ༌ ཏེ༌ བུ༌མོའ༌ ཟེརས༌,
“ཁང༌པ༌ སོང༌ ཡང༌ ངའེ༌ ཁྱོ༌རང༌ངི༌ ཆོག༌སྐྱོར༌ལ༌ ཐག༌ཅད༌ ཏངས༌ཏེ༌ འི༌ ནས༌ལུག༌པོ༌ མེད༌ཁན༌ ཅོ༌ཨིན༌།”
9 ཀྲི༌ཀོའ༌པ༌ བུ༌མོའེ༌ ཟེརས༌,
“ངའེ༌ སྤོན༌བོ༌ གྱལ༌པོ༌ལེ༌,
ཀལ༌ཏེས༌ ཉེ༌རང༌ངི༌ ངའ༌ རོགས༌ ཛད༌ཅེས༌པོའ༌ མ༌བེབས༌ ཅོ༌ན༌,
ང༌ དང༌ ངའེ༌ ཨ༌བའེ༌ ནང༌ཚངས༌སི༌ ཉད༌གལ༌བོ༌ ལེན༌ཨིན༌།
གྱལ༌པོ༌ དང༌ གྱལ༌པོའེ༌ ནང༌ཚངས༌ ནོངས༌མེད༌ ཨིན༌ནོག༌།”
10 གྱལ༌པོའེ༌ ཟེརས༌,
“ཀལ༌ཏེས༌ སུ༌ཞིག༌གི༌ ངོ༌ལོག༌ ཅོ༌ན༌ ཏེ༌ མི༌བོ༌ ང༌ ཡོད༌ས༌ ཁྲིད༌ཏེ༌ ཁྱོང༌།
ཁོའེ༌ ཁྱོ༌རང༌ང༌ ཡང༌སྐྱར༌ མ༌ནེ༌ ནགས༌ མི༌སྟན༌ཅེས༌པོ༌ ངའེ༌ ཏན༌ཏན༌ ཅོ༌ཨིན༌།”
11 བུ༌མོའེ༌ ཟེརས༌,
“ཇུ༌ཇུ༌ ཉེ༌རང༌ངི༌ དཀོན༌མཆོག༌ ཡ༌ཝའེ༌ ནའ༌ ཁུར༌ར༌ ཛད༌ཏེ༌ ཉེ༌རང༌ངི༌ ངའེ༌ ཉེན༌གྲུང༌གུན༌ལ༌ སྲོག༌ ཚབས༌ ལེན༌ཏེ༌ ངའེ༌ བུ༌ཚ༌ སད༌ ཅུག༌ག༌ མ༌ཛད༌།”
ཁོའེ༌ ལན༌ཏངས༌,
“ཡ༌ཝའེ༌ ཚན༌ནི༌ ནང༌ང༌,
ཁྱོ༌རང༌ངི༌ བུ༌ཚའེ༌ གོའེ༌ སྲའ༌ ཅིག༌གའང༌ སའེ༌ཀ༌ མི༌ བུད༌།”
12 ཏེ༌ནེ༌ བུ༌མོའེ༌ ཟེརས༌,
“ཇུ༌ཇུ༌ ངའེ༌ སྤོན༌བོ༌ གྱལ༌པོ༌,
ངའ༌ ཡང༌སྐྱར༌ སྤེ༌ར༌ ཅིག༌ ཟེར༌ཅེས༌སི༌ གོངས༌པ༌ སལ༌།”
ཁོའེ༌ ཟེརས༌,
“སྤེ༌ར༌ ཟེར༌།”
13 བུ༌མོའེ༌ ཟེརས༌,
“ངའ༌ ཁ༌ཆད༌ ཛད༌ཁན༌ ཙོགས༌ ཉེ༌རང༌ངི༌ དཀོན༌མཆོག༌གི༌ མི༌གུན༌ལ༌ ཅིའ༌ ཛད༌ད༌ མེད༌?
ཉེ༌རང༌ངི༌ རང༌ངི༌ བུ༌ཚ༌ ཕིངས༌ཏེ༌ ཏང༌ཁན༌བོ༌ ལོགས༌ཏེ༌ མ༌ཁྱོང༌ང༌,
ཉེ༌རང༌ངི༌ མོལ༌ཁན༌བོའེ༌ ཉེ༌རང༌ ནོངས༌ཅན༌ ཐེས༌ཏེ༌ མ༌ནོག༌ག༌?
14 ང༌དང༌ ཚང༌མ༌ ཤི༌ གོས༌ས༌ ནོག༌ ཅིའ༌ཟེར༌ན༌ ང༌དང༌གུན༌ནི༌ མི༌ཚེའེ༌ སའེ༌ཀ༌ བོ༌ཁན༌ནི༌ ཆུ༌ ཙོགས༌ ཨིན༌ནོག༌ ཀ༌བོ༌ ཡང༌སྐྱར༌ ལོགས༌ཏེ༌ ལྡུམ༌ ཉན༌ན༌ མ༌ནོག༌།
ཨིན༌ནའང༌ དཀོན༌མཆོག༌གི༌ མི༌ཚེ༌ མེད༌ཁན༌ མ༌ཛད༌ད༌,
ཕིང༌ང༌ ཛད༌ཁན༌གུན༌ ལོགས༌ཏེ༌ ཁྱོང༌ཅེས༌སི༌ ལམ༌གུན༌ ཕེའ༌ ཛད༌ད༌ནོག༌།”
15 “ངའེ༌ སྤོན༌བོ༌ གྱལ༌པོའ༌ ངའ༌ འི༌ ཞུ༌ཝ༌ ཕུལ༌ལ༌ ཡོངས༌པིན༌ ཅིའ༌ཟེར༌ན༌ མི༌གུན༌ནི༌ ངའ༌ ཇིགས༌ ཤུགས༌།
ངའེ༌ སམ༌,
‘ཅི༌གྱུས༌ གྱལ༌པོའེ༌ ངའེ༌ ཟེར༌ཅེས༌པོའ༌ ཉན༌ སྲིད༌ཅེས༌ ཨིན༌ནོག༌།
16 ཡང༌ ང༌ དང༌ ངའེ༌ བུ༌ཚ༌ སད༌ཏེ༌ ང༌ཞའ༌ དཀོན༌མཆོག༌གི༌ སལ༌ཁན༌ནི༌ ནོར༌སྐལ༌ མེད༌ཁན༌ ཅོ༌ཅེས༌སི༌ རྩོན༌གྲུས༌ ཅོ༌ཁན༌གུན༌ནི༌ ཀ༌ནེ༌ ང༌ཞའ༌ སྐྱོབ༌ སྲིད༌ཅེས༌ ཨིན༌ནོག༌།’”
17 “ངའེ༌ སྤོན༌བོ༌ གྱལ༌པོའེ༌ མོལ༌ཁན༌བོའེ༌ ངའ༌ སེམས༌སི༌ ནང༌ང༌ ཞི༌དེ༌ སལ༌ལ༌ ཛད༌ཤིག༌ ཅིའ༌ཞུ༌ན༌ ཉེ༌རང༌ ཟང༌པོ༌ དང༌ ངན༌པའ༌ ཕེའ༌ ཛད༌ཁན༌ དཀོན༌མཆོག༌གི༌ ཕོ༌ཉ༌ ཙོགས༌ ཨིན༌ནོག༌།
ཡ༌ཝ༌ ཉེ༌རང༌ངི༌ དཀོན༌མཆོག༌ ཉེ༌རང༌ ཉམ༌པོ༌ ཞུགས༌ཤིག༌།”
18 གྱལ༌པོའེ༌ བུ༌མོའ༌ ཟེརས༌,
“ངའེ༌ ཏྲི༌ཁན༌ནི༌ ལན༌བོ༌ ངའ༌ ཀྲང༌པོ༌ ཤོད༌།”
བུ༌མོའེ༌ ལན༌ཏངས༌,
“ཀ༌ས༌ ངའེ༌ སྤོན༌བོ༌ལེ༌།”
19 “འི༌ ཚང༌མ༌ ཟེར༌ཅེས༌ལ༌ ཡོ༌འབ༌བི༌ ཁྱོ༌རང༌ང༌ ལམ༌ཅུགས༌ས༌?”
བུ༌མོའེ༌ ལན༌ཏངས༌,
“ཡ༌ཝའེ༌ སྐུན༌དུན༌ལ༌ ངའེ༌ ནའ༌ ཁུར༌རད༌,
ངའེ༌ སྤོན༌བོ༌ གྱལ༌པོ༌ལེ༌,
ངའེ༌ ཉེ༌རང༌ངི༌ ཏྲི༌ཝ༌ ལན༌བོ༌ ཀྲང༌པོ༌ ཏང༌གོས༌།
འོ༌ན༌ ཉེ༌རང༌ངི༌ ཞབ༌ཤི༌ ཡོ༌འབ༌བི༌ ང༌ ལམ༌ཅུགས༌ ཡང༌ ངའེ༌ ཟེར༌ཁན༌ནི༌ སྤེ༌ར༌ ཚང༌མ༌ ཁོང༌ངི༌ ངའ༌ ལབས༌།
20 འི༌ ནས༌ལུག༌པོའེ༌ ནང༌ང༌ གྱུར༌ཅུག༌ཅེས༌ལ༌ ཁོའེ༌ འི༌བོ༌ ཅོས༌ཏེ༌ ཨིན༌ནོག༌།
ཉེ༌རང༌ དཀོན༌མཆོག༌གི༌ ཕོ༌ཉ༌ ཙོགས༌ ཤེས༌རབས༌ཅན༌ ཡང༌ འི༌ ནས༌སའེ༌ ནང༌ང༌ ཇུང༌ཨིན༌ ཡོད༌ཁན༌ ཚང༌མ༌ ཉེ༌རང༌ངི༌ ཁྱེན༌ན༌ནོག༌།”
21 ཏེ༌ནེ༌ གྱལ༌པོའེ༌ ཡོ༌འབ༌ བོད༌ཏེ༌ ཁྱོངས༌ ཡང༌ ཟེརས༌,
“ངའེ༌ གོངས༌པ༌ ཏང༌ངད༌།
སོང༌ ཡང༌ ཞུ༌ནུ༌ ཨབ༌ས༌ལོམ༌ ཡེ༌རུ༌ཤ༌ལེམ༌མ༌ ལོགས༌ཏེ༌ ཁྱོང༌།”
22 ཡོ༌འབ༌བི༌ སའེ༌ཀ༌ གྱེལ༌ཏེ༌ ཀུས༌པ༌ སྟནས༌ ཡང༌ ཟེརས༌,
“དི༌རིང༌ ཉེ༌རང༌ངི༌ ངའ༌ ཆོག༌སྐྱོར༌ ཛད༌ཁན༌བོ༌ གྱུས༌སོང༌ ཅིའ༌ཞུ༌ན༌ གྱལ༌པོའེ༌ ཁོང༌རང༌ངི༌ ཡོག༌པོའེ༌ ཞུ༌ཝ༌ སན༌ན༌ ཛདས༌།”
23 ཏེ༌ནེ༌ ཡོ༌འབ༌ གེ༌ཤུར༌ལ༌ སོང༌ཏེ༌ ཨབ༌ས༌ལོམ༌ ལོགས༌ཏེ༌ ཡེ༌རུ༌ཤ༌ལེམ༌མ༌ ཁྱོངས༌།
24 ཨིན༌ནའང༌ གྱལ༌པོའེ༌ བཀའ༌ ཏངས༌,
“ཨབ༌ས༌ལོམ༌ ཁོ༌རང༌ངི༌ ཁང༌པ༌ ཆ༌ནའང༌ གྲིག༌ ཨིན༌ནའང༌ ཁོ༌ ངའེ༌ དུན༌ལ༌ མ༌ནེ༌ ཡོང༌ མ༌གོས༌།”
ཏེ༌བོའེ༌ཕིའ༌ ཨབ༌ས༌ལོམ༌ གྱལ༌པོ༌ ཡོད༌ས༌ མ༌ཡོངས༌།
25 ཏ༌ ཨིས༌ར༌ཨེལ༌ གང༌པོའེ༌ ནང༌ང༌ ཨབ༌ས༌ལོམ༌ ཙོགས༌ ངམ༌ཤན༌ ཡོད༌ཅེས༌ལ༌ སྟོད༌པ༌ སུའང༌ མ༌ཐོབ༌།
གོ༌ནེ༌ རྐང༌པ༌ ཚོག༌པ༌ ཁོའེ༌ ཟུགས༌པོའེ༌ ནང༌ང༌ ཅའང༌ ཟེར༌གོས༌ མེད༌པིན༌།
26 ཁོའེ༌ ཁོ༌རང༌ངི༌ སྲ༌ ལོའེ༌ ནང༌ང༌ ལན༌ཅིག༌ མ༌ནེ༌ བྲག༌ག༌ མེད༌པིན༌ ནམ༌ ཏེ༌བོ༌ མ༌ ལྕིན༌ཏྲེ༌ ཁུར༌ མི༌ཉན༌ཅེས༌ ཆའ༌ཅིག༌།
ཁོའེ༌ ཁོ༌རང༌ངི༌ སྲ༌ བྲག༌ཁན༌བོ༌ སྐརས༌ ཡང༌ གྱལ༌པོའེ༌ སྐར༌ཀ༌ ནང༌ཞིན༌ ཏེ༌བོའེ༌ ལྕིད༌ ཀི༌ལོ༌ 2 སང༌ མང༌ང༌ བིང༌།
27 ཁོའ༌ བུ༌ཚ༌ སུམ༌ ཡང༌ བུ༌མོ༌ ཅིག༌ ཡོད༌པིན༌,
ཁོའེ༌ བུ༌མོའེ༌ མིང༌ང༌ ཏ༌མར༌ ཟེར༌རད༌པིན༌ ཡང༌ ཁོ༌ མ༌ ལྡེ༌མོ༌ ཡོད༌པིན༌།
28 ཨབ༌ས༌ལོམ༌ ཡེ༌རུ༌ཤ༌ལེམ༌མི༌ ནང༌ང༌ དུགས༌ཏེ༌ ལོ༌ ཉིས༌ སོང༌ ཨིན༌ནའང༌ ཁོའ༌ གྱལ༌པོ༌ མ༌ཐུག༌ག༌ ཨིན༌པིན༌།
29 ཏེ༌ནེ༌ ཨབ༌ས༌ལོམ༌མི༌ ཡོ༌འབ༌ གྱལ༌པོའེ༌ཀ༌ ཀལ༌ཅེས༌ལ༌ ཁོ༌ བོད༌ད༌ མི༌ཞིག༌ ལམ༌ཅུགས༌ ཨིན༌ནའང༌ ཡོ༌འབ༌ མ༌ཡོངས༌།
ཨབ༌ས༌ལོམ༌མི༌ ལན༌ ཉིས༌པ༌ བོད༌ད༌ མི༌ ལམ༌ཅུགས༌ ཨིན༌ནའང༌ ཡང༌སྐྱར༌ ཡོ༌འབ༌ མ༌ཡོངས༌།
30 ཏེ༌ནེ༌ ཨབ༌ས༌ལོམ༌མི༌ ཁོ༌རང༌ངི༌ ཡོག༌པོ༌གུན༌ལ༌ ཟེར༌ “སོང༌ ངའེ༌ ཞིང༌ངི༌ དུན༌ལ༌ ཡོད༌ཁན༌ ཡོ༌འབ༌བི༌ ཞིང༌ ནས༌ ཏབས༌ཏེ༌ ཡོད༌ཁན༌བོའ༌ མེ༌ ཏུག༌།”
ཡོག༌པོ༌གུན༌ནི༌ ཁོའེ༌ ཞིང༌བོའ༌ མེའ༌ ཏུགས༌།
31 ཏེ༌ནེ༌ ཡོ༌འབ༌ ཨབ༌ས༌ལོམ༌མི༌ ཁང༌པ༌ ཡོང༌ཏེ༌ ཟེརས༌,
“ཅིའ༌ ཁྱོ༌རང༌ངི༌ ཡོག༌པོ༌གུན༌ནི༌ ངའེ༌ ཞིང༌ མེའ༌ ཏུགས༌ཏེ༌ ཨིན༌ནོག༌?”
32 ཨབ༌ས༌ལོམ༌མི༌ ལན༌ཏངས༌,
“ངའེ༌ ཁྱོ༌རང༌ གྱལ༌པོའེ༌ཀ༌ འི༌བོ༌ ཏྲི༌ཅེས༌ལ༌ ཀལ༌ཅེས༌ ཡོད༌པིན༌,
‘ང༌ གེ༌ཤུར༌ནེ༌ ཅི༌ཕིའ༌ ཁྱོངས༌པིན༌?
ང༌ ཏེན༌ན༌རུ༌ བོར༌པིན༌ན༌ གྱལ༌།
ཏ༌ ངའ༌ གྱལ༌པོ༌ ཐུག༌ཉིན༌ རག༌ ཀལ༌ཏེས༌ ཁོང༌ངི༌ ངའ༌ ནོངས༌ཅན༌ ཐེའད༌ན༌ ཁོང༌ང༌ ང༌ སད༌ཅུག༌།”
33 ཡོ༌འབ༌ གྱལ༌པོ༌ ཡོད༌ས༌ སོང༌ཏེ༌ ཨབ༌ས༌ལོམ༌མི༌ ཟེར༌ཁན༌གུན༌ ཤདས༌།
ཏེ༌ནེ༌ དཱ༌བིད༌དི༌ ཨབ༌ས༌ལོམ༌ བོད༌ཏེ༌ ཁྱོངས༌ ཡང༌ ཁོའེ༌ གྱལ༌པོའེ༌ དུན༌ལ༌ ཆག༌ཕུལ༌ཏེ༌ ཀུས༌པ༌ སྟནས༌ ཡང༌ གྱལ༌པོའེ༌ ཁོའ༌ ཁྲིལ༌ཏེ༌ པུག༌ཏངས༌།