དཱ༌བིད༌ དང༌ བེཐ༌ཤི༌བ༌།
11:1 ནེ༌ 27
11
སྤིད༌དི༌ ཏུས༌ ནམ༌ གྱལ༌པོ༌གུན༌ མག༌ག༌ ཆའད༌པིན༌,
དཱ༌བིད༌དི༌ ཡོ༌འབ༌ དང༌ ཁོའེ༌ མག༌མི༌གུན༌ མག༌ཏང༌ང༌ ལམ༌ ཅུགས༌།
ཁོང༌གུན༌ནི༌ ཨེམ༌མོན༌པ༌གུན༌ ཁྲེས༌ཏོར༌ ཅོས༌ཏེ༌ རབ༌བཧའེ༌ གྱལ༌སའ༌ སྐོར༌ཏེ༌ བོརས༌།
ཨིན༌ནའང༌ དཱ༌བིད༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌པིན༌།
2 ཞག༌ཤིག༌ ཉིང༌གུང༌ངི༌ ངལ༌ཚོའེ༌ སྟིང༌ནེ༌ དཱ༌བིད༌ ལངས༌ཏེ༌ ཁོ༌རང༌ངི༌ ཁར༌རི༌ ཁྱེ༌ཐོག༌གི༌ཀ༌ གྲུལ༌ལད༌པིན༌།
ཁེ༌ཐོག༌ནེ༌ ཁོའ༌ བུ༌མོ༌ཞིག༌ ཆུའ༌ ཞུགས༌ཨིན༌ ཐོང༌ ཡང༌ བུ༌མོ༌བོ༌ མ༌ ལྡེ༌མོ༌ ཡོད༌པིན༌།
3 ཁོའེ༌ མི༌ཞིག༌ ཏེ༌ བུ༌མོའེ༌ སྐོར༌ལ༌ གྱུས༌ ཅོའ༌ལ༌ ལམ༌ཅུགས༌ ཡང༌ ཁོའེ༌ གྱལ༌པོའ༌ ཟེརས༌,
“ཏེ༌ བུ༌མོ༌བོ༌ བེཐ༌ཤི༌བ༌,
ཨེ༌ལི༌འམ༌མི༌ བུ༌མོ༌ ཡང༌ ཧེད༌པ༌ ཨུ༌རི༌ཡཱཧའེ༌ ན༌མ༌ ཨིན༌ནོག༌།”
4 ཏེ༌ནེ༌ དཱ༌བིད༌དི༌ ཏེ༌ བུ༌མོ༌ ཁྱོང༌ང༌ལ༌ མི༌ཞིག༌ ལམ༌ ཅུགས༌ ཡང༌ ཁོའེ༌ བུ༌མོ༌ ཉམ༌པོ༌ ལུས༌བྲེལ༌ ཅོས༌།
༼བུ༌མོའེ༌ ཁོ༌རང༌ངི༌ ཟླ༌ ཁྲག༌གི༌ ཏུས༌པོ༌ ཚར༌ཏེ༌ རྩང༌མ༌ ཅོས༌ཏེ༌ ཨིན༌པིན༌༽།
ཏེ༌ནེ༌ བུ༌མོ༌བོ༌ ལོགས༌ཏེ༌ ཁང༌པ༌ སོང༌།
5 སྟིང༌ནེ༌ བེཐ༌ཤི༌བ༌ ཕྲུ༌གུ༌ སྐྱེ༌ཅེས༌ ཡོད༌ཁན༌བོ༌ ཧ༌གོའ༌ཅིག༌ ཁོའེ༌ དཱ༌བིད༌ལ༌ ལོན༌ ཀལ༌ཏེ༌ ཟེརས༌,
“ངའ༌ ཕྲུ༌གུ༌ སྐྱེ༌ཅེས༌མ༌ཞིག༌ གྱུར༌ཏེ༌ ཨིན༌ནོག༌།”
6 ཏེ༌ནེ༌ དཱ༌བིད༌དི༌ ཡོ༌འབ༌བ༌ ལོན༌ ཀལ༌ཏེ༌ ཟེརས༌,
“ཧེད༌པ༌ ཨུ༌རི༌ཡཱཧ༌ ང༌ ཡོད༌ས༌ ལམ༌ཅུག༌།”
ཡང༌ ཡོ༌འབ༌བི༌ ཁོ༌ དཱ༌བིད༌ ཡོད༌ས༌ ལམ༌ཅུགས༌།
7 ཨུ༌རི༌ཡཱཧ༌ ལེབ༌བ༌ཅིག༌ དཱ༌བིད༌དི༌ ཁོའ༌ ཡོ༌འབ༌ དང༌ མག༌མི༌གུན༌ གྱལ༌ལ༌ དུག༌ག༌ ཡང༌ མག༌ ཀ༌ཟུག༌ཤིག༌ ཆ༌རུག༌ ཟེར༌ཏེ༌ ཏྲིས༌།
8 ཏེ༌ནེ༌ ཁོའེ༌ ཨུ༌རི༌ཡཱཧ༌ ཟེརས༌,
“ཁང༌པ༌ སོང༌ ཡང༌ ངལ༌ ཚོས༌།”
ཨུ༌རི༌ཡཱཧ༌ ཁར༌ནེ༌ བིང༌ཏེ༌ སོང༌ ཡང༌ དཱ༌བིད༌དི༌ ཁོའེ༌ ཁང༌པ༌ སྐྱེས༌ ཀལས༌།
9 ཨིན༌ནའང༌ ཨུ༌རི༌ཡཱཧ༌ ཁང༌པ༌ མ༌ཆའ༌ ཏེ༌ ཚན༌བོ༌ གྱལ༌པོའེ༌ ཁར༌རི༌ སྒོ༌ སྲུངས༌ཁན༌གུན༌ ཉམ༌པོ༌ ཉིད༌ལོགས༌ཏེ༌ དུགས༌།
10 དཱ༌བིད༌ལ༌ ཨུ༌རི༌ཡཱཧ༌ ཁང༌པ༌ མ༌ ཆའ༌ཁན༌བོ༌ ཚོར༌ར༌ཅིག༌ ཁོའེ༌ ཁོ༌ བོད༌ཏེ༌ ཏྲིས༌,
“ཅི༌ཕིའ༌ ཁྱོ༌རང༌ དའང༌ ཚན༌ལ༌ ཁང༌པ༌ མ༌སོང༌པིན༌?
ཁྱོ༌རང༌ ཏུས༌ རིང༌མོ༌ཞིག༌ མག༌ཐང༌ངི༌ཀ༌ དུགས༌ཏེ༌ མན༌ན༌?”
11 ཨུ༌རི༌ཡཱཧའེ༌ ལན༌ཏངས༌,
“ཆད༌དོན༌ནི༌ སྒམ༌,
ཨིས༌ར༌ཨེལ༌ དང༌ ཡ༌ཧུ༌དཱའེ༌ མག༌མི༌ དང༌ སྤོན༌བོ༌ ཡོ༌འབ༌ ཐང༌སྟོང༌ངི༌ཀ༌ ཀུར༌རི༌ ནང༌ང༌ དུག༌ཨིན༌ ཨིན༌ནོག༌,
ཏེ༌ནེ༌ ང༌ ཁང༌པ༌ སོང༌ཏེ༌ རྒུན༌ཆང༌ ཐུངས༌ཏེ༌ ཟན༌ ཟོས༌ཏེ༌ ང༌རང༌ངི༌ ན༌མ༌ ཉམ༌པོ༌ ཀ༌ཟུག༌གི༌ ཉིད༌ལོག༌ཨིན༌?
ཉེ༌རང༌ དང༌ ཡ༌ཝའེ༌ སྐུན༌དུན༌ལ༌ ངའེ༌ ནའ༌ ཁུར༌རད༌,
ངའེ༌ ཏེ༌ཟུག༌ མ༌ནེ༌ མི༌ཅོ༌།”
12 ཏེ༌ནེ༌ དཱ༌བིད༌དི༌ ཁོའ༌ ཟེརས༌,
“ཡང༌ ཞག༌ཅིག༌ འི༌རུ༌ དུག༌,
ཏེ༌སྟིང༌ནེ༌ ངའེ༌ ཁྱོ༌རང༌ ལོགས༌ཏེ༌ ཀལ༌ཨིན༌།”
ཏེ༌བོའེ༌ཕིའ༌ ཨུ༌རི༌ཡཱཧ༌ ཏེན༌ན༌ ཞག༌པོ༌ ཡེ༌རུ༌ཤ༌ལེམ༌མ༌ དུགས༌།
ཐོ༌རེ༌ ཟུག༌པོ༌
13 དཱ༌བིད༌དི༌ ཁོ༌ གོང༌ཟན༌ལ༌ བོད༌ཏེ༌ ཁོའ༌ རྒུན༌ཆང༌ ཐུང༌ཅེས༌ལ༌ ཏངས༌ཏེ༌ ར༌རོས༌ ཅུགས༌།
ཨིན༌ནའང༌ ཨུ༌རི༌ཡཱཧ༌ ཁོ༌རང༌ངི༌ ན༌མ༌ ཡོད༌ས༌ ཁང༌པ༌ མ༌ཆའ༌ ཡང༌སྐྱར༌ གྱལ༌པོའེ༌ ཁར༌རི༌ སྒོ༌ སྲུང༌ཁན༌གུན༌ ཉམ༌པོ༌ ཉིད༌ལོགས༌ཏེ༌ དུགས༌།
14 ཏེ༌ནེ༌ སྟིང༌མ༌ ཞག༌པོ༌ ང༌མོ༌ ཨུ༌རི༌ཡཱཧ༌ ཉམ༌པོ༌ དཱ༌བིད༌དི༌ ཡོ༌འབ༌བ༌ ཨི༌གེ༌ ཞིག༌ བྲིས༌ཏེ༌ ཀལས༌།
15 ཨི༌གེ༌བོའེ༌ ནང༌ང༌ ཡོ༌འབ༌བ༌ བཀའ༌ ཏངས༌ཏེ༌ ཟེརས༌,
“ཨུ༌རི༌ཡཱཧ༌ མག༌ ཀྲག༌པོ༌ ཆ༌སའེ༌ དུན༌ལ༌ ཏངས༌ཏེ༌ ཁོ༌ སད༌ ཅུག༌ཅེས༌ལ༌ མག༌མི༌གུན༌ གྱབ༌བ༌ ཐེན༌།”
16 ཡོ༌འབ༌བི༌ མག༌མི༌ གྱལ༌སའ༌ སྐོར༌ཏེ༌ ཡོད༌ ཟ༌ནེ༌ ཁོའེ༌ གྲ༌འོའེ༌ མག༌མི༌ གྱལ༌ཤོག༌ ཡོད༌སའེ༌ཀ༌ ཨུ༌རི༌ཡཱཧ༌ ནོལ༌ལ༌ ལམ༌ཅུགས༌,
17 ཡང༌ གྲ༌འོའེ༌ མག༌མི༌གུན༌ གྱལ༌ས༌ནེ༌ བིང༌ཏེ༌ ཡོ༌འབ༌བི༌ མག༌མི༌གུན༌ལ༌ ནོལ༌ལ༌ ཡོང༌ ཟ༌ནེ༌ མག༌མི༌ འུ༌སྐྱོང༌ ཁ༌ཅིག༌ ཤི༌ ཀ༌བོའེ༌ ཕྲོའ༌ ཧེད༌པ༌ ཨུ༌རི༌ཡཱཧ༌འང༌ ཡོད༌པིན༌།
18 ཏེ༌ནེ༌ ཡོ༌འབ༌བི༌ མག༌གི༌ ནས༌ཚུལ༌ དཱ༌བིད༌ལ༌ ཀལས༌།
19 ཁོའེ༌ ལོན༌ ཁྱེར༌ཁན༌བོའ༌ ཟེརས༌,
“མག༌གི༌ སྐོར༌ལ༌ ནས༌ཚུལ༌ གང༌པོ༌ གྱལ༌པོའ༌ ཤོད༌།
20 ཨིན༌ནའང༌ ཁོང༌ང༌ སྲོ༌ ཡོངས༌ཏེ༌ ཏྲི༌སྲིད༌ཅེས༌ ཨིན༌ནོག༌,
‘མག༌མི༌གུན༌ གྱལ༌སའེ༌ ཏེ༌ཟམ༌ ཉེ༌མོའ༌ ཅིའ༌ ཁྱེར༌པིན༌?
གྱལ༌སའེ༌ རྩིག༌པའེ༌ ཀ༌ནེ༌ དའ༌ ཏང༌ཅེས༌པོ༌ ཅི༌ ཁྱོ༌རང༌ང༌ གྱུས༌ མེད༌ད༌?
21 གི༌དི༌འོན༌ནི༌ བུ༌ཚ༌ ཨ༌བི༌མེ༌ལེག༌ ཐེ༌བེཟ༌ཟི༌ ནང༌ང༌ བུ༌མོ༌ཞིག༌གི༌ རྩིག༌པའེ༌ ཀ༌ནེ༌ རྡོའ༌ གྱབས༌ཏེ༌ མ༌སདས༌ས༌?
ཅི༌ཕིའ༌ ཁྱོ༌ཞའ༌ རྩིག༌པའེ༌ ཉེ༌མོའ༌ སོང༌པིན༌?’
ཏེ༌ནེ༌ ཁོང༌ང༌ ཤོད༌,
‘ཉེ༌རང༌ངི༌ ཡོག༌པོ༌ ཧེད༌པ༌ ཨུ༌རི༌ཡཱཧ༌འང༌ ཤི༌ཏོག༌།’”
22 ཏེ༌ནེ༌ ལོན༌ཁྱེར༌ཁན༌བོ༌ ཡེ༌རུ༌ཤ༌ལེམ༌མ༌ ལེབ༌བ༌ཅིག༌ དཱ༌བིད༌ལ༌ ཡོ༌འབ༌བི༌ ཤོད༌ ཟེར༌ཁན༌ ཚང༌མ༌ ཤདས༌།
23 ཁོའེ༌ ཟེརས༌,
“ང༌དང༌ངི༌ གྲ༌འོ༌གུན༌ མ༌ སྟོབས༌ཅན༌ དུག༌པིན༌ ཡང༌ གྱལ༌ས༌ནེ༌ བིངས༌ཏེ༌ ཐང༌སྟོང༌ངི༌ཀ༌ ང༌ཞའེ༌ གྱབ༌གལ༌ལ༌ ནོལ༌ལ༌ ཡོངས༌ ཨིན༌ནའང༌ ང༌ཞའེ༌ ཁོང༌གུན༌ལ༌ གྱལ༌སའེ༌ གྱས༌སྒོ༌ ཚག༌པ༌ ལོགས༌ཏེ༌ ཁྱེར༌པིན༌།
24 རྩིག༌པའེ༌ ཀ༌ནེ༌ དའ༌ ཏང༌ཁན༌གུན༌ནི༌ དའ༌ ཏངས༌ཏེ༌ གྱལ༌པོའེ༌ མི༌ ཁ༌ཅིག༌ སདས༌ ཏེ༌གུན༌ནི༌ ཕྲོའ༌ ཧེད༌པ༌ ཨུ༌རི༌ཡཱཧ༌འང༌ ཤི༌།”
25 དཱ༌བིད༌དི༌ ལོན༌ཁྱོང༌ཁན༌བོའ༌ ཟེརས༌,
“ཡོ༌འབ༌བ༌ སེམས༌ཤུགས༌ མི༌ ཆག༌ཅེས༌ལ༌ ཟེར༌,
‘ར༌འི༌ ཉམ༌པོ༌ དི༌རིང༌ ཅིག༌ ཡང༌ ཐོ༌རེ༌ ཡང༌ ཅིག༌ ཤིའ༌ནོག༌།
སྟིང༌མ༌ གྱལ༌སའེ༌ཀ༌ སྤུང༌གོལ༌ ཀྲག༌པོ༌ ཅོས༌ཏེ༌ གྱལ༌ཁ༌ ལེན༌།’”