དཱ༌བིད༌དི༌ ཨེམ༌མོན༌པ༌གུན༌ལ༌ ཕམ༌ཀལས༌།
10:1 ནེ༌ 19
10
ཏུས༌ བན༌ཤིག༌གི༌ སྟིང༌ནེ༌ ཨེམ༌མོན༌པའེ༌ གྱལ༌པོ༌ ན༌ཧཤ༌ ཤི༌ ཡང༌ ཁོའེ༌ བུ༌ཚ༌ ཧ༌ནུན༌ གྱལ༌པོ༌ གྱུར༌།
2 དཱ༌བིད༌དི༌ ཟེརས༌,
“ཁོའེ༌ ཨ༌བའེ༌ ངའ༌ སྟན༌ཁན༌ ཙོགས༌ལ༌ ངའེ༌ ན༌ཧཤ༌ཤི༌ བུ༌ཚ༌ ཧ༌ནུན༌ལ༌ ཤ༌ཚ༌ སྟན༌ཨིན༌།”
ཏེ༌ནེ༌ ཨ༌བ༌ ན༌ཧཤ༌ ཤི༌ཅེས༌པོའེ༌ཀ༌ ཧ༌ནུན༌ལ༌ ཤ༌ཚ༌ སྟན༌ན༌ལ༌ དཱ༌བིད༌དི༌ ཐུས༌མི༌ ལམ༌ཅུགས༌།
དཱ༌བིད༌དི༌ ཐུས༌མི༌ ཨེམ༌མོན༌པའེ༌ ས༌ཀྱད༌དི༌ཀ༌ ལེབ༌བ༌ཅིག༌,
3 ཨེམ༌མོན༌པ༌ སྤོན༌བོ༌གུན༌ནི༌ ཁོང༌གུན༌ནི༌ སྤོན༌བོ༌ ཧ༌ནུན༌ལ༌ ཟེརས༌,
“འི༌ མི༌གུན༌ འི༌རུ༌ ལམ༌ཅུགས༌ཏེ༌ ཅི༌ དཱ༌བིད༌དི༌ ཉེ༌རང༌ངི༌ ཨ༌བའ༌ ཀུས༌པ༌ སྟན༌ཏེ༌ ཨིན༌ནོག༌ སམ༌མ༌རག༌ག༌?
མ༌ནོག༌ སྤུང༌གོལ༌ ཅོས༌ཏེ༌ ང༌དང༌ང༌ ཕམ༌ཀལ༌ ཉན༌ཅེས༌ལ༌ དཱ༌བིད༌དི༌ ཁོང༌གུན༌ ང༌དང༌ངི༌ གྱལ༌སའེ༌ སྲུང༌སྐྱོབ༌གུན༌ ལྟའ༌ལ༌ ལམ༌ཅུགས༌ཏེ༌ ཨིན༌ནོག༌།”
4 ཏེ༌བོའེ༌ཕིའ༌ ཧ༌ནུན༌ནི༌ དཱ༌བིད༌དི༌ ཐུས༌མི༌གུན༌ ཟུམས༌ཏེ༌ ཁོང༌གུན༌ནི༌ སམ༌དལ༌ ཕེད༌ བྲགས༌ ཡང༌ ཀོས༌ལག༌ ཆད༌ཏེ༌ སྤི༌ ཤ༌ ཐོང༌ཅུགས༌ཏེ༌ ཁོང༌གུན༌ དཱ༌བིད༌ ཡོད༌ས༌ ལོགས༌ཏེ༌ ལམ༌ཅུགས༌།
5 དཱ༌བིད༌ལ༌ ཏེ༌བོའེ༌ སྐོར༌ལ༌ ཤད༌ད༌ཅིག༌ ཁོའ༌ ཁོང༌གུན༌ལ༌ སྲན༌ཏྲེ༌ ཁྲེལ༌བ༌ སྟན༌ཁན༌བོ༌ ཧ༌གོ༌ཏེ༌ ཁོང༌ངི༌ ཏེ༌ མི༌གུན༌ལ༌ ལོན༌ ཀལ༌ཏེ༌ ཟེརས༌,
“ཁྱོ༌རང༌གུན༌ནི༌ སམ༌དལ༌ གང༌པོ༌ སྐྱེ༌སྐྱེ༌,
ཁྱོ༌ཞའ༌ ཡེ༌རི༌ཀོའེ༌ ནང༌ང༌ དུག༌།
ཏེ༌ནེ༌ རང༌ངི༌ ཁང༌པ༌ ལོགས༌ཏེ༌ ཡོང༌།”
6 ཨེམ༌མོན༌པ༌གུན༌ལ༌ ཁོང༌གུན༌ནི༌ དཱ༌བིད༌ལ༌ སྲན༌ཏྲེ༌ སྲོ༌ ཡོང༌ ཅུག༌ཁན༌བོ༌ ཧ༌གོའ༌ཅིག༌ ཁོང༌གུན༌ནི༌ བེཐ༌རེ༌ཧོབ༌ དང༌ ཟོ༌བཧ༌ནེ༌ ཨ༌རམ༌པ༌ མག༌མི༌ 20,000,
གྱལ༌པོ༌ མའ༌ཀཧའེ༌ མག༌མི༌ 1,000 ཡང༌ ཏོབ༌པ༌ མག༌མི༌ 12,000 གུན༌ལ༌ རིན༌ ཏངས༌ཏེ༌ ནོལ༌ལ༌ ཁྱོངས༌།
7 ཏེ༌བོའེ༌ སྐོར༌ དཱ༌བིད༌ལ༌ གྱུས༌ ཆའ༌ཅིག༌ ཁོའེ༌ ཡོ༌འབ༌ དང༌ མག༌མི༌ ཚང༌མ༌ ཁོང༌གུན༌ལ༌ ནོལ༌ལ༌ ལམ༌ཅུགས༌།
8 ཨེམ༌མོན༌པ༌ མག༌མི༌གུན༌ བིང༌ཏེ༌ གྱལ༌སའེ༌ གྱས༌སྒོའེ༌ཀ༌ ཡང༌ རེ༌ཧོབ༌ དང༌ ཟོ༌བཧ༌ ཨིན༌ཁན༌ ཨ༌རམ༌པ༌ མག༌མི༌ ཡང༌ ཏོབ༌ དང༌ མའ༌ཀཧའེ༌ མག༌མི༌གུན༌ སྤང༌ཐང༌ངི༌ཀ༌ མག༌གི༌ ཕིའ༌ གྲལ༌གྲིག༌ ཅོས༌ཏེ༌ དུགས༌།
9 ཡོ༌འབ༌བ༌ ཁོང༌གུན༌ནི༌ གྱབ༌དུན༌ ཉིས༌ཀོ༌ནེ༌ གྲ༌འོའེ༌ མག༌མི༌ ཡོད༌ཁན༌བོ༌ ཐོང༌ང༌ཅིག༌ ཁོའེ༌ ཨིས༌ར༌ཨེལ༌ལི༌ མག༌མི༌ གྱལ༌ཤོག༌ ཁ༌ཅིག༌ ལྡམས༌ ཡང༌ ཁོ༌རང༌ངི༌ གོ༌ཁྲིད༌ ཅོས༌ཏེ༌ ཨ༌རམ༌པ༌གུན༌ལ༌ ནོལ༌ཅེས༌ལ༌ གྲལ༌གྲིག༌ ཅོས༌།
10 ལུས༌ཁན༌ནི༌ མག༌མི༌གུན༌ ཁོ༌རང༌ངི༌ ནོ༌ ཨ༌བི༌ཤའི༌ ང༌ཡོག༌ག༌ བོརས༌ ཀ༌གུན༌ནི༌ ཨེམ༌མོན༌པ༌ ནོལ༌ཅེས༌ གྲལ༌གྲིག༌ ཅོས༌།
11 ཡོ༌འབ༌བི༌ ཁོ༌རང༌ངི༌ ནོའ༌ ཟེརས༌,
“ཀལ༌ཏེས༌ ང༌ཞའ༌ ཨ༌རམ༌པ༌གུན༌ལ༌ ཕམ༌ ཀལ༌ཅེས༌ ཀགས༌པོ༌ ཆ༌ན༌ ཏེ༌ནེ༌ ཁྱོ༌ཞའ༌ ང༌ཞའ༌ རོགས༌ ཅོའ༌ ཡོང༌གོས༌ ཡང༌ ཀལ༌ཏེས༌ ཁྱོ༌ཞའ༌ ཨེམ༌མོན༌པ༌གུན༌ལ༌ ཕམ༌ ཀལ༌ཅེས༌ ཀགས༌པོ༌ ཆ༌ན༌ ང༌ཞའ༌ ཁྱོ༌ཞའ༌ རོགས༌ ཅོའ༌ ཡོང༌ཨིན༌།
12 སྟོབས༌ཅན༌ གྱུར༌ཤིག༌,
ཡོང༌ཤིག༌ སེམས༌ཤུགས༌ ཉམ༌པོ༌ ང༌དང༌ངི༌ མི༌གུན༌ དང༌ ང༌དང༌ངི༌ དཀོན༌མཆོག༌གི༌ གྱལ༌ས༌གུན༌ནི༌ ཕིའ༌ ནོལ༌ཨིན༌།
ཡ༌ཝ༌ དཀོན༌མཆོག༌གི༌ གྱལ༌ལ༌ སམ༌ཁན༌བོ༌ ཅོའ༌ ཛད༌ཤིག༌།”
13 ཏེ༌ནེ༌ ཡོ༌འབ༌ དང༌ ཁོའེ༌ མག༌མི༌གུན༌ནི༌ ཨ༌རམ༌པ༌གུན༌ནི༌ཀ༌ སྤུང༌གོལ༌ ཅོའ༌ལ༌ བིང༌ ཨིན༌ནའང༌ ཁོང༌གུན༌ ཤོར༌ཏེ༌ སོང༌།
14 ཨེམ༌མོན༌པ༌གུན༌ནི༌ ཨ༌རམ༌པ༌གུན༌ ཤོར༌ར༌ ཐོང༌ང༌ཅིག༌ ཁོང༌གུན༌ ཨ༌བི༌ཤའི༌ ཀ༌ནེ༌ ཤོར༌ཏེ༌ གྱལ༌སའེ༌ ནང༌ང༌ ལོགས༌ཏེ༌ སོང༌།
ཏེ༌བོའེ༌ཕིའ༌ ཡོ༌འབ༌བི༌ ཨེམ༌མོན༌པ༌གུན༌ལ༌ མག༌ མ༌ཏང༌ང༌ ཡེ༌རུ༌ཤ༌ལེམ༌མ༌ ལོགས༌ཏེ༌ སོང༌།
15 སྟིང༌ནེ༌ ཨིས༌ར༌ཨེལ༌པ༌གུན༌ནི༌ ཕམ༌ཀལ༌ཁན༌བོ༌ ཨ༌རམ༌པ༌གུན༌ལ༌ ཧ༌གོའ༌ཅིག༌ ཁོང༌གུན༌ནི༌ ཡང༌སྐྱར༌ མག༌མི༌ ལྡུས༌།
16 གྱལ༌པོ༌ ཧ༌དའད༌ཟར༌རི༌ ཡུཕ༌རེ༌ཀྲས༌སི༌ ལྩངས༌པོའེ༌ འ༌ངོ༌ ཆོགས༌ལ༌ དུག༌ཁན༌ ཨ༌རམ༌པ༌ མག༌མི༌གུན༌ནའང༌ ཁྱོངས༌ ཡང༌ ཁོ༌རང༌ངི༌ མག༌སྤོན༌ ཤོ༌བཅ༌ཅའ༌ གོ༌ཁྲིད༌ ཅོ༌ཅུགས༌ཏེ༌ གྱལ༌ས༌ ཧི༌ལམ༌མ༌ ལེབ༌།
17 ཏེ༌གུན༌ དཱ༌བིད༌ལ༌ ཚོར༌ར༌ཅིག༌ ཁོའེ༌ ཨིས༌ར༌ཨེལ༌ལི༌ མག༌མི༌ ཚང༌མ༌ ཛོམ༌ཅུགས༌ཏེ༌ ཡོར༌དཱན༌ ལྩངས༌པོ༌ རྒལ༌ཏེ༌ ཧེ༌ལམ༌མ༌ སོང༌།
ཨ༌རམ༌པ༌གུན༌ནི༌ དཱ༌བིད༌དི༌ མག༌མི༌ གྱབ༌གལ༌ལ༌ མག༌ ཏང༌ཅེས༌ལ༌ གྲལ༌གྲིག༌ ཅོས༌།
18 ཨིན༌ནའང༌ ཨ༌རམ༌པ༌གུན༌ ཨིས༌ར༌ཨེལ༌པ༌གུན༌ནི༌ ཀ༌ནེ༌ ཤོར༌ཏེ༌ སོང༌།
དཱ༌བིད༌དི༌ མག༌མི༌གུན༌ནི༌ ཤིང༌རྟ༌ སྲུལ༌ཁན༌ 700 དང༌ གྲུལ༌ཁན༌ནི༌ མག༌མི༌ 40,000 སདས༌།
ཏེ༌ནང༌ང༌ ཁོང༌གུན༌ནི༌ མག༌མི༌ སྤོན༌བོ༌ ཤོ༌བཅ༌ ཐེས༌ཏེ༌ ཨིན༌པིན༌།
19 ཧ༌དའད༌ཟར༌རི༌ ང༌ཡོག༌ག༌ ཁྱོངས༌ཁན༌ གྱལ༌པོ༌ ཚང༌མའེ༌ ཨིས༌ར༌ཨེལ༌པ༌གུན༌ནི༌ ཕམ༌ ཀལ༌ཁན༌བོ༌ ཐོང༌ང༌ཅིག༌ ཁོང༌གུན༌ནི༌ ཨིས༌ར༌ཨེལ༌པ༌གུན༌ ཉམ༌པོ༌ ཞི༌དེ༌ བྲེལ༌ ཅོས༌ཏེ༌ གྱལ༌པོ༌ དཱ༌བིད༌དི༌ ང༌ཡོག༌ག༌ དུགས༌།
ཏེན༌ན༌ ཏུས༌ནེ༌ པར༌ལ༌ ཨེམ༌མོན༌པ༌གུན༌ལ༌ རོགས༌ ཅོའ༌ལ༌ ཨ༌རམ༌པ༌གུན༌ ཇིགས༌།