ས༌མུའེལ༌ 2 8

དཱ༌བིད༌ལ༌ གྱལ༌ཁ༌ ཐོབ༌ཁན༌གུན༌།

8:1 ནེ༌ 14

ཏུས༌ བན༌ཤིག༌གི༌ སྟིང༌ནེ༌ དཱ༌བིད༌དི༌ ཕི༌ལིས༌ཏི༌པ༌གུན༌ལ༌ ཕམ༌ཀལ༌ཏེ༌ ཁོ༌རང༌ངི༌ ང༌ཡོག༌ག༌ ཁྱོངས༌། ཁོའེ༌ ཕི༌ལིས༌ཏི༌པ༌གུན༌ནི༌ ཝང༌ངི༌ ཡོག༌ག༌ ཡོད༌ཁན༌ མེ༌ཐེག༌ ཨམ༌མཧའེ༌ ས༌ཀྱད༌ ལེནས༌།

2 དཱ༌བིད༌དི༌ མོ༌འབ༌པ༌གུན༌ལའང༌ ཕམ༌ཀལ༌ཏེ༌ ང༌ཡོག༌ག༌ ཁྱོངས༌། ཁོའེ༌ མོ༌འབ༌པའེ༌ མག༌མི༌གུན༌ སའེ༌ཀ༌ ཚིར༌ཚིར༌ལ༌ ཉལ༌ཅུགས༌ ཡང༌ སུམ༌མི༌ ནང༌ནེ༌ ཉིས༌པོ༌ སདས༌། ཏེ༌བོའེ༌ ཕིའ༌ མོ༌འབ༌པ༌གུན༌ ཁོའེ༌ ང༌ཡོག༌ག༌ དུགས༌ཏེ༌ ཁོའ༌ ཁྲལ༌ ཤལས༌།

3 ཡུཕ༌རེ༌ཀྲས༌ ལྩངས༌པོའེ༌ ས༌ཆའེ༌ཀ༌ རེ༌ཧོབ༌བི༌ བུ༌ཚ༌ ཟོ༌བཧའེ༌ གྱལ༌པོ༌ ཧ༌ད༌དེ༌ཟར༌ ཁོ༌རང༌ངི༌ ཝང༌སྲུལ༌ ལོགས༌ཏེ༌ ལེན༌ཅེས༌ལ༌ ཆའ༌ཅིག༌, དཱ༌བིད༌དི༌ ཁོའང༌ ཕམ༌ ཀལས༌། 4 དཱ༌བིད༌དི༌ ཁོའེ༌ ཤིང༌རྟ༌ 1,000, ཤིང༌རྟ༌ སྲུལ༌ཁན༌ 7,000 དང༌ མག༌མི༌ 20,000 ཟུམས༌ཏེ༌ ཁྱོངས༌། ཁོའེ༌ ཤིང༌རྟའེ༌ ཕིའ༌ ཀོལ༌ཁན༌ རྟ༌ 100 མ༌སྟོག༌ ཞན༌ཡང༌ རྟ༌ ཚང༌མ༌ ཞ༌འོ༌ ཅོས༌།

5 དཱ༌མེས༌ཀས༌ནེ༌ ཨ༌རམ༌པ༌གུན༌ ཟོ༌བཧའེ༌ གྱལ༌པོ༌ ཧ༌ད༌དེ༌ཟར༌ལ༌ རོགས༌ ཅོའ༌ལ༌ ལེབ༌བ༌ཅིག༌ དཱ༌བིད༌དི༌ ཁོང༌གུན༌ནི༌ མག༌མི༌ 22,000 སདས༌། 6 ཏེ༌ནེ༌ ཁོའེ༌ དཱ༌མེས༌ཀས༌སི༌ ཨ༌རམ༌ ཡུལ༌ཇོངས༌སི༌ ནང༌ང༌ མག༌ཚོགས༌ ཙུགས༌ ཡང༌ ཨ༌རམ༌པ༌གུན༌ དཱ༌བིད༌དི༌ ང༌ཡོག༌ག༌ དུགས༌ཏེ༌ ཁོའ༌ ཁྲལ༌ ཤལས༌། ཏེ༌ནེ༌ དཱ༌བིད༌ ཀ༌རུ༌ ཆ༌ནའང༌ ཡ༌ཝའེ༌ ཁོའ༌ གྱལ༌ཁ༌ སལ༌ལ༌ ཛདས༌།

7 དཱ༌བིད༌དི༌ ཧ༌ད༌དེ༌ཟར༌རི༌ གོ༌སྐྱོང༌གུན༌ནི༌ ཁུར༌ཁན༌ནི༌ སེར༌རི༌ ཕ༌ལི༌ ཡེ༌རུ༌ཤ༌ལེམ༌མ༌ ཁྱོངས༌། 8 ཡང༌ གྱལ༌པོ༌ ཧ༌ད༌དེ༌ཟར༌རི༌ གྲོང༌ཁྱེར༌ ཁྲི༌བཧ༌ དང༌ བེ༌རོཐ༌ནེ༌ ཟངས༌ མ༌ མང༌པོ༌ ཁྱེརས༌།

9 དཱ༌བིད༌དི༌ ཧ༌ད༌དེ༌ཟར༌རི༌ མག༌མི༌ ཚང༌མའ༌ ཕམ༌ཀལ༌ཏེ༌ ཁྲེས༌ཏོར༌ ཅོས༌ཏོག༌ ཟེར༌ཏེ༌ ཧ༌མད༌དི༌ གྱལ༌པོ༌ ཏོའི༌ ཚོར༌ར༌ཅིག༌, 10 ཁོའེ༌ ཁོ༌རང༌ངི༌ བུ༌ཚ༌ ཡོ༌རམ༌ གྱལ༌པོ༌ དཱ༌བིད༌ལ༌ གྱལ༌ཁའ༌ ཐོབ༌ཁན༌བོའ༌ ཀྲ༌ཤིས༌དེ༌ལེགས༌ ཟེར༌ཅེས༌ལ༌ ལམ༌ ཅུགས༌། ཧ༌ད༌དེ༌ཟར༌ དང༌ ཏོའི༌ གྲ༌འོ༌ ཨིན༌པིན༌ ཡང༌ མག༌ ཏང༌ཨིན༌ དུག༌གད༌པིན༌། ཡོ༌རམ༌མི༌ དཱ༌བིད༌ལ༌ མུལ༌, སེར༌ དང༌ ཟངས༌ མང༌པོ༌ སྟགས༌ལ༌ ཁྱོངས༌།

11 གྱལ༌པོ༌ དཱ༌བིད༌དི༌ འི༌ སྟགས༌ ཚང༌མ༌ དང༌ ཞན༌ ཁོའེ༌ ཕམ༌ཀལ༌ཁན༌ནི༌ གྱལ༌ཁམས༌གུན༌ནེ༌ ཅོམས༌ཁན༌ནི༌ སེར༌ དང༌ མུལ༌ ཉམ༌པོ༌ ཡ༌ཝའ༌ ཕུལས༌། 12 ཏེ༌གུན༌ ཨི༌དོམ༌, མོ༌འབ༌, ཨེམ༌མོན༌, ཕི༌ལིས༌ཏི༌ དང༌ ཨ༌མ༌ལིཀ༌ ཡང༌ རེ༌ཧོབ༌བི༌ བུ༌ཚ༌ ཟོ༌བཧའེ༌ གྱལ༌པོ༌ ཧ༌ད༌དེ༌ཟར༌རི༌ ཀ༌ནེ༌ ཅོམ༌ཁན༌ ཚང༌མ༌ ཨིན༌པིན༌།

13 ཨི༌དོམ༌པ༌ 18,000 ཚའེ༌ ལུང༌པའེ༌ ནང༌ང༌ ཁྲེས༌ཏོར༌ ཅོས༌ཏེ༌ ལོགས༌ཏེ༌ ཡོངས༌ཏེ༌ སྟིང༌ནེ༌ དཱ༌བིད༌ མང༌ང༌ མིང༌ཅན༌ གྱུར༌།

14 ཁོའེ༌ ཨི༌དོམ༌ གང༌པོའེ༌ ནང༌ང༌ མག༌མི༌གུན༌ དུག༌སའེ༌ ནས༌ས༌ ཅོས༌ ཡང༌ ཨི༌དོམ༌པ༌ ཚང༌མ༌ དཱ༌བིད༌དི༌ ང༌ཡོག༌ག༌ དུགས༌། དཱ༌བིད༌ ཀ༌རུ༌ ཆ༌ནའང༌ ཡ༌ཝའེ༌ ཁོའ༌ གྱལ༌ཁ༌ ཐོབ༌ཅུག༌ག༌ ཛདས༌།

དཱ༌བིད༌དི༌ གྱལ༌སྲིད༌ལ༌ རོགས༌ ཅོ༌ཁན༌གུན༌།

8:15 ནེ༌ 18

15 དཱ༌བིད༌དི༌ ཨིས༌ར༌ཨེལ༌ གང༌པོའེ༌ཀ༌ ཝང༌སྲུལས༌ ཡང༌ ཁོའེ༌ མི༌ཚང༌མ༌ལ༌ འོས༌པ༌ དང༌ ཀྲང༌པོ༌ ཨིན༌ཁན༌བོ༌ ཅོས༌། 16 ཟེ༌རུའི༌འཧའེ༌ བུ༌ཚ༌ ཡོ༌འབ༌ མག༌མི༌གུན༌ནི༌ སྤོན༌བོ༌ ཨིན༌པིན༌, ཨ༌ཧི༌ལུད༌དི༌ བུ༌ཚ༌ ཡེ༌ཧོ༌ཤ༌ཕད༌ གྱལ༌པོའ༌ ནས༌ཚུལ༌ ཡང༌ ཐག༌ཅད༌གུན༌ མི༌གུན༌ལ༌ ཤད༌ཁན༌བོ༌ ཨིན༌པིན༌, 17 ཨ༌ཧི༌ཏུབ༌བི༌ བུ༌ཚ༌ ཟ༌དོག༌ ཡང༌ ཨ༌བིའ༌ཐར༌རི༌ བུ༌ཚ༌ ཨ༌ཧི༌མེ༌ལེག༌ བླ༌མ༌གུན༌ ཨིན༌པིན༌། སེ༌རཱའི༌ཧཱ༌ གྱལ༌པོའེ༌ ཞུང༌ངི༌ ནང༌ང༌ ཇུང༌ཁན༌ ཚང༌མ༌ བྲི༌ཁན༌ ཨིན༌པིན༌། 18 ཡེ༌ཧོའི༌དའི༌ བུ༌ཚ༌ བེ༌ནཱའི༌འཧ༌ གྱལ༌པོ༌ སྲུངསྐྱོབ༌ ཅོ༌ཁན༌གུན༌ནི༌ སྤོན༌བོ༌ ཨིན༌པིན༌ ཡང༌ དཱ༌བིད༌དི༌ བུ༌ཚ༌གུན༌ བླ༌མ༌ ཨིན༌པིན༌།