དཀོན༌མཆོག༌གི༌ དཱ༌བིད༌ལ༌ ཆད༌དོན༌ ཛདས༌།
7:1 ནེ༌ 17
7
གྱལ༌པོ༌ དཱ༌བིད༌ ཁོ༌རང༌ངི༌ ཁར༌རི༌ ནང༌ང༌ མལ༌མལ༌ སོང༌ཏེ༌ སྟིང༌ནེ༌ ཡ༌ཝའེ༌ ཁོ༌ གྲ༌འོ༌གུན༌ནི༌ ཀ༌ནེ༌ སྐྱོབས༌ཏེ༌ ཞི༌དེ༌ སལས༌།
2 གྱལ༌པོ༌ དཱ༌བིད༌དི༌ ལུང༌སྟོན༌པ༌ ན༌ཐན༌ལ༌ བོད༌ཏེ༌ ཟེརས༌,
“ལྟོས༌སའང༌,
ང༌ སི༌གྲར༌ ཤིང༌ང༌ རྩིགས༌ཁན༌ནི༌ ཁར༌རི༌ ནང༌ང༌ དུག༌ག༌ནོག༌ ཨིན༌ནའང༌ དཀོན༌མཆོག༌གི༌ ཆད༌དོན༌ནི༌ སྒམ༌ ཀུར༌རི༌ ནང༌ང༌ བོར༌ཏེ༌ ཨིན༌ནོག༌།”
3 ན༌ཐན༌ནི༌ གྱལ༌པོའ༌ ལན༌ཏངས༌,
“ཉེ༌རང༌ངི༌ སམ༌བའེ༌ ནང༌ང༌ ཅི༌ཞིག༌ ཡོད༌ནའང༌ ཏེན༌ན༌བོ༌ ཅོས༌ ཅིའ༌ཟེར༌ན༌ ཡ༌ཝ༌ ཉེ༌རང༌ ཉམ༌པོ༌ ཞུགས༌ཏེ༌ ཨིན༌ནོག༌།”
4 ཨིན༌ནའང༌ ཏེན༌ན༌ ཚན༌ལ༌ ཡ༌ཝའེ༌ ན༌ཐན༌ལ༌ མོལས༌,
5 “སོང༌ ཡང༌ ངའེ༌ ཡོག༌པོ༌ དཱ༌བིད༌ལ༌ ཟེར༌,
‘འི༌བོ༌ ཡ༌ཝའེ༌ མོལ༌ལ༌ ཛདས༌,
ང༌ དུག༌སའེ༌ ཁང༌པ༌ རྩིག༌ཁན༌བོ༌ ཁྱོ༌རང༌ ཨིན༌ན༌?
6 ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོངས༌པ༌ནེ༌ དག༌ས༌ ཚག༌པ༌ ང༌ ཁང༌པ༌ཞིག༌གི༌ ནང༌ང༌ མ༌ནེ༌ མ༌དུགས༌པིན༌།
ང༌ ཀུར༌རི༌ ནང༌ང༌ ས༌ཆ༌ ཅིག༌ནེ༌ ཅིག༌ག༌ གྲུལ༌ཨིན༌ དུགས༌པིན༌།
7 ང༌ ཨིས༌ར༌ཨེལ༌པ༌ ཚང༌མ༌ ཉམ༌པོ༌ ས༌ཆ༌ ཅིག༌ནེ༌ ཅིག༌ག༌ གྲུལ༌ ཟ༌ནེ༌ ངའེ༌ ཨིས༌ར༌ཨེལ༌པ༌གུན༌ལ༌ སྟ༌སྟོག༌ ཅོའ༌ སྐོས༌ཁན༌ འུ༌སྐྱོང༌ ཅིག༌ག༌ ‘ཅིའ༌ ཁྱོ༌རང༌ངི༌ ངའེ༌ ཕིའ༌ སི༌གྲར༌རི༌ ཁང༌པ༌ རྩིག༌ག༌ མེད༌’ ཟེར༌ས༌?
8 ཏ༌ ངའེ༌ ཡོག༌པོ༌ དཱ༌བིད༌ལ༌ ཟེར༌,
‘ཡ༌ཝ༌ ཀུན༌ཝང༌ དཀོན༌མཆོག༌གི༌ འི༌བོ༌ ཟེར༌ར༌རག༌,
ངའེ༌ ཁྱོ༌རང༌ ལུག༌ ཚོ༌ཅེས༌ནེ༌ ཕིངས༌ཏེ༌ ཨིས༌ར༌ཨེལ༌པ༌ ངའེ༌ མི༌གུན༌ནི༌ འུ༌སྐྱོང༌ང༌ ལྡམས༌པིན༌།
9 ཁྱོ༌རང༌ ཀ༌རུ༌ ཆ༌ནའང༌ ང༌ ཁྱོ༌རང༌ ཉམ༌པོ༌ ཡོད༌པིན༌ ཡང༌ ངའེ༌ ཁྱོ༌རང༌ངི༌ གྲ༌འོ༌ ཚང༌མ༌ ཁྱོ༌རང༌ངི༌ མིག༌གི༌ དུན༌ལ༌ མེད༌ཁན༌ ཅོས༌པིན༌།
ཏ༌ འི༌ ཇིག༌རྟེན༌ནི༌ མི༌ མིང༌ཅན༌གུན༌ ཙོགས༌ལ༌ ངའེ༌ ཁྱོ༌རང༌ མིང༌ཅན༌ གྱུར༌ཅུག༌ཨིན༌།
10-11 ཡང༌ ངའེ༌ ང༌རང༌ངི༌ མི༌ ཨིས༌ར༌ཨེལ༌པ༌གུན༌ལ༌ དུག༌སའེ༌ ནས༌ས༌ ཏངས༌ཏེ༌ ཁོང༌གུན༌ ཚུགས༌ ཅུག༌ཨིན༌ ཡང༌ ནོལ༌ཅེས༌ མེད༌པ༌ ཁོང༌གུན༌ ཞི༌དེ༌ ཉམ༌པོ༌ དུག༌ཨིན༌།
གྱལ༌ཁམས༌ ངན༌པ༌གུན༌ནི༌ ཁོང༌གུན༌ མ༌ནེ༌ ནན༌ཏེ༌ མི༌བོར༌ ཀ༌ཟུག༌ ངའེ༌ ཨིས༌ར༌ཨེལ༌པ༌ ང༌རང༌ངི༌ མི༌གུན༌ནི༌ཀ༌ ཁྲིམ༌སྤོན༌ སྐོས༌ཁན༌ནི༌ ཏུས༌ནེ༌ ཕར༌ལ༌ ཁོང༌གུན༌ནི༌ ཅོའད༌པིན༌།
ཏ༌ ངའེ༌ ཁྱོ༌རང༌ང༌ གྲ༌འོ༌གུན༌ནི༌ ཀ༌ནེ༌ ངལ༌ཚོ༌ ཏང༌ཨིན༌།’”
“‘ཡ༌ཝའེ༌ མོལ༌ལ༌ ཛདས༌ ངའེ༌ ཁྱོ༌རང༌ངི༌ སྟིང༌ནེའང༌ ཁྱོ༌རང༌ངི༌ གྱལ༌སྲིད༌པོ༌ སྟན༌པོ༌ བོར༌ཨིན༌།
12 ཁྱོ༌རང༌ ཤི༌ཏེ༌ ཁྱོ༌རང༌ངི༌ ཕ༌མེས༌པོ༌གུན༌ ཉམ༌པོ༌ ཛོམ༌ཏེ༌ སྟིང༌ནེ༌ ངའེ༌ ཁྱོ༌རང༌ངི༌ པུར༌གྱུད༌ ཁྱོ༌རང༌ངི༌ ཚབས༌ལ༌ ལང༌ཨིན༌།
ཁོ༌ ཁྱོ༌རང༌ངི༌ ཤ༌ཁྲག༌ ཡང༌ ངའེ༌ ཁོའེ༌ གྱལ༌སྲིད༌པོ༌ སྟན༌པོ༌ ཅོ༌ཨིན༌།
13 ངའེ༌ ཕིའ༌ དུག༌ས༌ ཆོད༌ཁང༌ རྩིག༌ཁན༌བོ༌ ཁོ༌ ཨིན༌ ཡང༌ ངའེ༌ ཁོའེ༌ ཁྲིས༌ ཏུས༌གྱུན༌ སྐྱོབས༌ཏེ༌ སྟན༌པོ༌ བོར༌ཨིན༌།
14 ང༌ ཁོའེ༌ ཨ༌བ༌ ཡང༌ ཁོ༌ ངའེ༌ བུ༌ཚ༌ གྱུར༌ཨིན༌།
ཀལ༌ཏེས༌ ཁོའེ༌ ནོར༌ཁྲུལ༌ ཅོ༌ན༌,
ཨ༌བའེ༌ རང༌ངི༌ ཕྲུ༌གུའ༌ ཅོའ༌ ཙོགས༌ལ༌ ངའེ༌ བེར༌ཀ༌ ཉམ༌པོ༌ ཁོ༌ སྐོངས༌ཏེ༌ ལམ༌ ཀྲང༌པོའེ༌ཀ༌ ཁྲིད༌ཨིན༌།
15 ཨིན༌ནའང༌ ས༌འུལ༌ལ༌ ཅོ༌ཁན༌ ཙོགས༌ ངའེ༌ ཁོའ༌ ཅམས༌པ༌ ཅོ༌ཅེས༌ མ༌ནེ༌ མི༌ཕང༌།
ཁྱོ༌རང༌ངི༌ མིག༌གི༌ དུན༌ལ༌ ངའེ༌ ས༌འུལ༌ ཐེན༌ཏེ༌ མེད༌ཁན༌ ཅོས༌པིན༌།
16 ངའེ༌ དུན༌ལ༌ ཁྱོ༌རང༌ངི༌ པུར༌གྱུད༌གུན༌ དང༌ ཁྱོ༌རང༌ངི༌ གྱལ༌སྲིད༌ ཏུས༌གྱུན༌ ལུས༌ཨིན༌ ཡང༌ ཁོང༌གུན༌ནི༌ ཝང༌སྲུལ༌ ཏུས༌གྱུན༌ སྟན༌པོ༌ ལུས༌ཨིན༌།”
17 ལུང༌སྟོན༌པ༌ ན༌ཐན༌ནི༌ ཡ༌ཝའེ༌ ཁོའ༌ སྔོན༌ཅུག༌ག༌ ཛད༌ཁན༌ ཚང༌མ༌ དཱ༌བིད༌ལ༌ ཤདས༌།
དཱ༌བིད༌དི༌ མོས༌ལམ༌།
7:18 ནེ༌ 29
18 ཏེ༌ནེ༌ གྱལ༌པོ༌ དཱ༌བིད༌ ཏམ༌པའེ༌ ཀུར༌རི༌ ནང༌ང༌ སོང༌ ཡང༌ ཡ༌ཝའེ༌ སྐུན༌དུན༌ལ༌ སའེ༌ཀ༌ དུགས༌ཏེ༌ ཁོང༌ང༌ མོས༌ལམ༌ ཞུས༌,
“ངའེ༌ ཡ༌ཝ༌ ཀུན༌ཝང༌ལེ༌,
ཉེ༌རང༌ངི༌ ང༌ དང༌ ངའེ༌ ནང༌མི༌ གུན༌ནི༌ ཕིའ༌ ཛད༌ཁན༌བོའེ༌ འོས༌པ༌ ང༌ མན༌།
19 ཡང༌ ཡ༌ཝ༌ ཀུན༌ཝང༌ལེ༌,
ཉེ༌རང༌ངི༌ ངའ༌ ཉེ༌རང༌ངི༌ ཡོག༌པོ༌ སལ༌ཁན༌ནི༌ གྱལ༌སྲིད༌པོ༌ ངའེ༌ པུར༌གྱུད༌གུན༌ནི༌ ལག༌ག༌ ལུས༌ཨིན༌ མོལ༌ལ༌ ཛདས༌།
ངའེ༌ ཡ༌ཝ༌ ཀུན༌ཝང༌ལེ༌,
ཉེ༌རང༌ངི༌ མི༌གུན༌ལ༌ འི༌ཟམ༌ ཐུག༌རྗེ༌ ཉམ༌པོ༌ བྲེལ༌ ཛད༌དད༌ད༌?
20 “ཏ༌ འི༌ སང༌ མང༌ང༌ ངའེ༌ ཉེ༌རང༌ང༌ ཅི༌ ཞུ༌,
ཡ༌ཝ༌ ཀུན༌ཝང༌ལེ༌ ཉེ༌རང༌ངི༌ ཡོག༌པོ༌ ཀ༌ཟུག༌ཤིག༌ ཡོད༌,
ཉེ༌རང༌ངི༌ ཁྱེན༌ན༌ ཛད༌ད༌ ནོག༌།
21 ཉེ༌རང༌ངི༌ ཞལ༌ཆད༌ དང༌ ཐུགས༌དོད༌ ནང༌ཞིན༌ ཉེ༌རང༌ངི༌ འི༌ ཆག༌ལས༌ ཀྲག༌པོ༌གུན༌ ཛད༌ཏེ༌ ཉེ༌རང༌ངི༌ ཡོག༌པོ༌ ང༌ སྟན༌ན༌ ཛད༌ཏེ༌ ཨིན༌ནོག༌།”
22 “ཡ༌ཝ༌ ཀུན༌ཝང༌ལེ༌,
ཉེ༌རང༌ ཙམ༌ཞིག༌ ཀྲག༌པོ༌ ཞུགས༌ཏེ༌ ཨིན༌,
ཉེ༌རང༌ ཙོགས༌ སུའང༌ མི༌དུག༌།
ཉེ༌རང༌ ཅིག༌པོ༌ མ༌སྟོག༌ ཞན༌ སུའང༌ དཀོན༌མཆོག༌ མན༌ ཡང༌ ང༌ཞའེ༌ ཚོར༌ཁན༌གུན༌ ཀྲང༌པོ༌ ཨིན༌ནོག༌།
23 ཨིས༌ར༌ཨེལ༌པ༌ ཉེ༌རང༌ངི༌ མི༌གུན༌ ཙོགས༌ སུ༌ ཡོད༌,
ཇིག༌རྟེན༌ནི༌ འིན༌ན༌ གྱལ༌ཁམས༌པོ༌ སྐྱོབས༌ཏེ༌ ཁོང༌རང༌ངི༌ མི༌ ཛད༌ཅེས༌ལ༌ དཀོན༌མཆོག༌ སྐྱོདས༌།
ཧ༌ལས༌ཤེས༌ དང༌ ཀྲག༌པོ༌ ཛད༌པ༌གུན༌ གྱུད༌ཏེ༌ ཁོང༌གུན༌ ཉེ༌རང༌ངི༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ང༌ ཛད༌ཏེ༌ ཉེ༌རང༌ངི༌ ཚན༌ ཇིག༌རྟེན༌ གང༌པོའེ༌ ནང༌ང༌ སྔོན༌ཅུག༌ག༌ ཛད༌།
ཉེ༌རང༌ངི༌ མི༌གུན༌ འི༌ ནས༌སའེ༌ ནང༌ང༌ ཁྱོང༌ཅེས༌ལ༌ ཉེ༌རང༌ངི༌ གྱལ༌ཁམས༌ མང༌པོ༌ དང༌ ཁོང༌ངི༌ ལྷ༌ལྷ༌མོ༌གུན༌ ཕིང༌ང༌ ཛདས༌།
24 ཏུས༌གྱུན༌ནི༌ ཕིའ༌ ཉེ༌རང༌ངི༌ ཨིས༌ར༌ཨེལ༌པ༌གུན༌,
ཉེ༌རང༌ རང༌ངི༌ མི༌གུན༌ ཅོའ༌ ཛདས༌ ཡང༌ ཡ༌ཝ༌ལེ༌ ཉེ༌རང༌ ཁོང༌ངི༌ དཀོན༌མཆོག༌ གྱུར༌ར༌ ཛདས༌།
25 ཏ༌ ཡ༌ཝ༌ དཀོན༌མཆོག༌ལེ༌,
ཉེ༌རང༌ངི༌ ཡོག༌པོ༌ དང༌ ངའེ༌ པུར༌གྱུད༌གུན༌ ཉམ༌པོ༌ ཛད༌ཁན༌ནི༌ ཞལ༌ཆད༌པོ༌ ཏུས༌གྱུན༌ ལུས༌ཤེས༌,
སྟན༌པོ༌ ཅོའ༌ ཛད༌།
26 ཡང༌ ཉེ༌རང༌ངི༌ ཚན༌ལ༌ ཏུས༌གྱུན༌ རྩི༌ཝ༌ ཐོབ༌ཤིག༌ ཏེ༌ནེ༌ མི༌གུན༌ནི༌ ཟེར༌ཨིན༌,
‘ཀུན༌ཝང༌ ཡ༌ཝ༌ ནི༌ ཨིས༌ར༌ཨེལ༌པའེ༌ དཀོན༌མཆོག༌ ཞུགས༌ཏེ༌ ཨིན༌ནོག༌།’
ཡང༌ ཉེ༌རང༌ངི༌ ཡོག༌པོ༌ དཱ༌བིད༌དི༌ གྱལ༌སྲིད༌ ཉེ༌རང༌ངི༌ སྐུན༌དུན༌ལ༌ ཏུས༌གྱུན༌ སྟན༌པོ༌ ལུས༌ཤིག༌།”
27 “ཡ༌ཝ༌ ཨིས༌ར༌ཨེལ༌ལི༌ ཀུན༌ཝང༌ དཀོན༌མཆོག༌ལེ༌,
ཉེ༌རང༌ངི༌ ཉེ༌རང༌ངི༌ ཡོག༌པོའ༌ སྔོན༌ཅུག༌ག༌ ཛད༌ཏེ༌ ཨིན༌ནོག༌ ‘ངའེ༌ ཁྱོ༌རང༌ངི༌ ཕིའ༌ གྱལ༌སྲིད༌ རྩིག༌ཨིན༌།’
ཏེ༌བོའེ༌ཕིའ༌ ཉེ༌རང༌ངི༌ ཡོག༌པོའ༌ ཉེ༌རང༌ང༌ འི༌ མོས༌ལམ༌ ཕུལ༌ཅེས༌སི༌ སྤོས༌པ༌ ཐོབ༌,
28 ཅིའ༌ཟེར༌ན༌ ཡ༌ཝ༌ ཀུན༌ཝང༌ལེ༌,
ཉེ༌རང༌ དེན༌བ༌ དཀོན༌མཆོག༌ ཞུགས༌ཏེ༌ ཉེ༌རང༌ངི༌ བཀའ༌གུན༌ ཀྲང༌པོ༌ ཡང༌ ཉེ༌རང༌ངི༌ འི༌ གྱལ༌ལ༌ ལས༌གུན༌ ཉེ༌རང༌ངི༌ ཡོག༌པོའེ༌ དུན༌ལ༌ ཞལ༌ཆད༌ ཛད༌ཏེ༌ ཨིན༌ནོག༌།
29 ཏ༌ ཐུག༌ཉེས༌ ཏེ༌ ཉེ༌རང༌ངི༌ ཡོག༌པོའེ༌ པུར༌གྱུད༌གུན༌ལ༌ ཅིན༌ལབས༌ སལ༌ལ༌ ཛད༌ ཏེ༌ནེ༌ ཏེ༌བོ༌ ཉེ༌རང༌ངི༌ སྐུན༌དུན༌ལ༌ ཏུས༌གྱུན༌ ལུས༌ ཐུབ༌ཨིན༌ ཅིའ༌ཞུ༌ན༌ ཡ༌ཝ༌ ཀུན༌ཝང༌ལེ༌ ཉེ༌རང༌ངི༌ མོལ༌ལ༌ ཛདས༌,
ཉེ༌རང༌ངི༌ ཅིན༌ལབས༌ གྱུད༌ཏེ༌ ཉེ༌རང༌ངི༌ ཡོག༌པོའེ༌ པུར༌གྱུད༌གུན༌ལ༌ ཏུས༌གྱུན༌ ཅིན༌ལབས༌ ཐོབ༌ཨིན༌།”