ཆད༌དོན༌ནི༌ སྒམ༌ ཡེ༌རུ༌ཤ༌ལེམ༌མ༌ ཁྱོངས༌།
6:1 ནེ༌ 23
6
ཏེ༌ནེ༌ ཡང༌སྐྱར༌ དཱ༌བིད༌དི༌ ཨིས༌ར༌ཨེལ༌པ༌ མག༌མི༌ གྱལ༌ཤོག༌ 30,000 ཛོམ༌ཅུགས༌།
2 དཱ༌བིད༌དི༌ མག༌མི༌གུན༌ ཁྲིད༌ཏེ༌ དཀོན༌མཆོག༌གི༌ ཆད༌དོན༌ནི༌ སྒམ༌ ལོགས༌ཏེ༌ ཁྱོང༌ཅེས༌ལ༌ ཡ༌ཧུ༌དཱའེ༌ བའ༌ལཧ༌ ནས༌ས༌ སོང༌,
ཀ༌བོའ༌ ཆེ༌ར༌བེམ༌མི༌a ཕར༌ལ༌ ཞུགས༌ཁྲིས༌སི༌ཀ༌ ཞུགས༌ས༌ ཛད༌ཁན༌ ཡ༌ཝ༌ ཀུན༌ཝང༌ངི༌ ཚན༌ བོད༌ད༌ ཛད༌ད༌ནོག༌།
3 ཁོང༌གུན༌ནི༌ དཀོན༌མཆོག༌གི༌ ཆད༌དོན༌ནི༌ སྒམ༌ ལང༌རེལ༌ སོ༌མ༌ ཞིག༌གི༌ཀ༌ ཀལ༌ཏེ༌ རི༌ཀ༌ ཡོད༌ཁན༌ ཨ༌བི༌ན༌དབ༌བི༌ ཁང༌པ༌ནེ༌ ཕིངས༌ཏེ༌ ཁྱོངས༌།
ཨ༌བི༌ན༌དབ༌བི༌ བུ༌ཚ༌ ཨུ༌ཟཧ༌ དང༌ ཨ༌ཧི༌འོ༌ གུན༌ནི༌ ལང༌རེལ༌ལ༌ ལམ༌ སྟན༌ནད༌པིན༌།
4 ཨ༌ཧི༌འོ༌ ཆད༌དོན༌ནི༌ སྒམ༌ ཀལ༌ཁན༌ནི༌ ལང༌རེལ༌ལི༌ དུན༌ ཆོགས༌ནེ༌ གྲུལ༌ལད༌པིན༌།
5 དཱ༌བིད༌ དང༌ ཨིས༌ར༌ཨེལ༌པ༌ ཚང༌མའེ༌ ཡ༌ཝའེ༌ སྐུན༌དུན༌ལ༌ ལུ༌ ཏང༌ཨིན༌,
ལེར༌,
ཧརྦ༌,
དབ༌,
ཆིལ༌ཆིལ༌ དང༌ ཆིམ༌ཆིམ༌ རོལ༌མོ༌ སྣ༌ཚོགས༌ རོལ༌ཨིན༌ གའ༌མོ༌ ཅོའད༌པིན༌།
6 ཨིན༌ནའང༌ ཁོང༌གུན༌ ན༌ཀོན༌ནི༌ ཡུལ༌ཐག༌ག༌ ལེབ༌བ༌ཅིག༌ ལང༌ཏོ༌གུན༌ སྒག༌གྱབས༌པ༌ ཆད༌དོན༌ནི༌ སྒམ༌བོ༌ སྲུགས༌,
བུད༌ མི༌བུད༌ཅེས༌ལ༌ ཨུ༌ཟཧའེ༌ ཁོ༌རང༌ངི༌ ལག༌པ༌ ཉམ༌པོ༌ སྒམ༌བོ༌ ཐམས༌།
7 ཏེ༌ནེ༌ ཡ༌ཝའ༌ ཨུ༌ཟཧའེ༌ཀ༌ སྐྱོདས༌ ཡང༌ ཁོ༌ ཏེན༌ནེ༌ཀ༌ ཆད༌དོན༌ནི༌ སྒམ༌མི༌ དུན༌ལ༌ སད༌ད༌ ཛདས༌ ཅིའ༌ཟེར༌ན༌ ཡ༌ཝའེ༌ ལི༌ཝི༌པ༌ ཅིག༌པོ༌ མ༌སྟོགས༌ ཞན༌ སུའང༌ ཆད༌དོན༌ནི༌ སྒམ༌མ༌ ལག༌པ༌ རྩེ༌ མི༌ཆོག༌ མོལ༌ཏེ༌ ཨིན༌པིན༌།
8 ཨུ༌ཟཧའེ༌ གྱབ༌གལ༌ལ༌ ཡ༌ཝའེ༌ ཐུག༌སྲོ༌ སྟན༌ན༌ ཛད༌ པ༌སང༌ དཱ༌བིད༌ལ༌ ཁོང༌ངི༌ཀ༌ སྲོ༌ ཡོངས༌ ཡང༌ ཁོའེ༌ ཏེ༌ ས༌ཆ༌བོའ༌ པེ༌རེཟ༌ ཨུ༌ཟཧཱ༌b མིང༌ང༌ ཏགས༌།
9 ཏེ༌ ཞག༌ག༌ དཱ༌བིད༌ ཡ༌ཝའ༌ ཇིགས༌ ཡང༌ ཟེརས༌,
“ཀ༌ཟུག༌གི༌ ངའེ༌ ཡ༌ཝའེ༌ ཆད༌དོན༌ནི༌ སྒམ༌ ང༌རང༌ངི༌ སྟ༌སྟོག༌གི༌ ནང༌ང༌ བོར༌ཅེས༌ལ༌ ཡེ༌རུ༌ཤ༌ལེམ༌མ༌ ཁྱེར༌ཨིན༌?”
10 ཏེ༌བོའེ༌ཕིའ༌ དཱ༌བིད༌དི༌ ཡ༌ཝའེ༌ ཆད༌དོན༌ནི༌ སྒམ༌,
ཁོ༌རང༌ ཉམ༌པོ༌ དཱ༌བིད༌དི༌ གྱལ༌ས༌ མ༌ཁྱེར༌ར༌ གིད༌པ༌ ཨོ༌བེད༌ ཨི༌དོམ༌མི༌ ཁང༌པ༌ བོར༌ཅེས༌ལ༌ ཐག༌ཅདས༌།
11 ཡ༌ཝའེ༌ ཆད༌དོན༌ནི༌ སྒམ༌ ཨོ༌བེད༌ ཨི༌དོམ༌མི༌ ཁང༌པའེ༌ ནང༌ང༌ ཟླ༌ཝ༌ སུམ༌ ལུས༌།
ཡ༌ཝའེ༌ ཨོ༌བེད༌ ཨི༌དོམ༌ དང༌ ཁོའེ༌ ནང༌ཚངས༌ལ༌ ཅིན༌ལབས༌ སལས༌།
12 ཏེ༌ནེ༌ གྱལ༌པོ༌ དཱ༌བིད༌ལ༌ “ཆད༌དོན༌ནི༌ སྒམ༌ ཡོད༌ཅེས༌པོའེ༌ ཡ༌ཝའེ༌ ཨོ༌བེད༌ ཨི༌དོམ༌མི༌ ནང༌ཚངས༌ ཡང༌ ཁོའ༌ ཡོད༌ཁན༌ ཚང༌མའ༌ ཅིན༌ལབས༌ སལ༌ལ༌ ཛད༌ཏེ༌ དུག༌” ཟེར༌ཏེ༌ ཤདས༌།
ཏེ༌བོའེ༌ཕིའ༌ དཱ༌བིད༌ ཏེ༌རུ༌ སོང༌ ཡང༌ ཡ༌ཝའེ༌ ཆད༌དོན༌ནི༌ སྒམ༌ ཨོ༌བེད༌ ཨི༌དོམ༌མི༌ ཁང༌པ༌ནེ༌ དཱ༌བིད༌དི༌ གྱལ༌སའེ༌ ནང༌ང༌ ཐད༌པོ༌ ཉམ༌པོ༌ ཁྱོངས༌།
13 ཡ༌ཝའེ༌ ཆད༌དོན༌ནི༌ སྒམ༌ ཁུར༌ཁན༌གུན༌ནི༌ ཀོམ༌པ༌ དྲུག༌ སྤོའ༌ཅིག༌ དཱ༌བིད༌དི༌ ལང༌ཏོ༌ཞིག༌ དང༌ བེ༌ཙོ༌ གྱགས༌པ༌ཞིག༌ སྲོག༌ཆོད༌ལ༌ ཕུལ༌ལད༌པིན༌།
14 ཏེ༌ཏུས༌ ཡ༌ཝའེ༌ སྐུན༌དུན༌ལ༌ དཱ༌བིད༌དི༌ ཤེད༌སྟོབས༌ ཉམ༌པོ༌ རྩེས༌,
སྐྱེད༌པ༌ནེ༌ ཡོག༌ག༌ རིན༌ཅན༌ རས༌སི༌ ཨེ༌ཕོད༌c སྲིལ༌ཅེས༌ མ༌སྟོག༌ ཁོ༌ རྗེན༌ཉལ༌ལ༌ ཡོད༌པིན༌།
15 དཱ༌བིད༌ དང༌ ཨིས༌ར༌ཨེལ༌པ༌ ཚང༌མའེ༌ ཡ༌ཝའེ༌ ཆད༌དོན༌ནི༌ སྒམ༌ ཀུ༌ཅོ༌ ཏང༌ཨིན༌ སྐྱིད༌པོ༌ ཅོས༌ཏེ༌ ཏུང༌ ཕུ༌ཨིན༌ ཁྱོངས༌།
16 ཨིན༌ནའང༌ ཡ༌ཝའེ༌ ཆད༌དོན༌ནི༌ སྒམ༌ དཱ༌བིད༌དི༌ གྱལ༌སའེ༌ ནང༌ང༌ ལེབ༌བ༌ཅིག༌ ས༌འུལ༌ལི༌ བུ༌མོ༌ མི༌ཁལ༌ལི༌ ཀར༌ཁུང༌ནེ༌ ལྟས༌ ཡང༌ ཁོའ༌ གྱལ༌པོ༌ དཱ༌བིད༌ ཡ༌ཝའེ༌ སྐུན༌དུན༌ལ༌ ཆོམས༌ཨིན༌ རྩེ༌ཨིན༌ ཐོང༌ང༌ཅིག༌,
དཱ༌བིད༌དི༌ ཁྲེལ༌མེད༌དི༌ ལས༌ ཅོས༌ཏེ༌ ཁོ༌ ཁྲེལ༌ ཅུགས༌ཏེ༌ ཨིན༌ནོག༌ སམ༌ ཡང༌ མི༌ཁལ༌ ཁོའེ༌ཀ༌ ཁམ༌ལོག༌།
17 ཁོང༌གུན༌ནི༌ ཡ༌ཝའེ༌ ཆད༌དོན༌ནི༌ སྒམ༌ ཁྱོངས༌ཏེ༌ དཱ༌བིད༌དི༌ ཙུག༌ཁན༌ ཏམ༌པ༌ ཀུར༌རི༌ ནང༌ང༌ ཁོང༌རང༌ངི༌ ནས༌སའེ༌ཀ༌ བོརས༌།
ཡང༌ དཱ༌བིད༌དི༌ མེའ༌ སྲག༌ཅེས༌ དང༌ ཡ༌ཝ༌ ཉམ༌པོ༌ ཐུན༌བྲེལ༌ལི༌ ཆོད༌པ༌གུན༌ ཕུལས༌།
18 དཱ༌བིད༌དི༌ ཆོད༌པ༌ ཕུལ༌ཅེས༌པོ༌ ཚར༌ར༌ཅིག༌ ཁོའེ༌ མི༌གུན༌ལ༌ ཡ༌ཝ༌ ཀུན༌ཝང༌ངི༌ ཚན༌ནི༌ ནང༌ང༌ ཅིན༌ལབས༌ སལས༌།
19 ཏེ༌ནེ༌ ཁོའེ༌ ཨིས༌ར༌ཨེལ༌པ༌ བུ༌ཚ༌ དང༌ བུ༌མོ༌ ཚང༌མ༌ལ༌ པག༌ཕེ༌ ཏ༌གི༌ ཡང༌ ཁ༌སོར༌ དང༌ བ༌ཤོ༌ ནན༌ཏེ༌ ཁོ༌ལག༌ ཅོ༌ཁན༌གུན༌ ཏངས༌།
ཏེ༌ནེ༌ མི༌ཚང༌མ༌ ཁོ༌རང༌གུན༌ནི༌ ཁང༌པ༌ ལོགས༌ཏེ༌ སོང༌།
20 དཱ༌བིད༌ ལོགས༌ཏེ༌ ཁོ༌རང༌ངི༌ ནང༌མི༌གུན༌ལ༌ ཅིན༌ལབས༌ ཏང༌ང༌ལ༌ ཆའ༌ཅིག༌ ས༌འུལ༌ལི༌ བུ༌མོ༌ མི༌ཁལ༌ ཁོ༌ ཐུག༌ག༌ལ༌ ཡོངས༌ཏེ༌ ཟེརས༌,
“དི༌རིང༌,
ཉེ༌རང༌ངི༌ ར༌རོས༌གུན༌ ཙོགས༌ལ༌ ཡོག༌མོ༌གུན༌ནི༌ དུན༌ལ༌ རྗེན༌ཉལ༌བོ༌ སྟན༌ཏེ༌ ཨིས༌ར༌ཨེལ༌ལི༌ གྱལ༌པོའེ༌ ཀ༌ཟུག༌གི༌ རྩི༌ཝ༌ཅན༌ནི༌ ལས༌ ཅོས༌ཏེ༌ ཨིན༌ནོག༌?”
21 དཱ༌བིད༌དི༌ མི༌ཁལ༌ལ༌ ལན༌ཏངས༌,
“ཏེ༌བོ༌ ཡ༌ཝའེ༌ སྐུན༌དུན༌ལ༌ ཨིན༌པིན༌།
ཁོང༌ངི༌ ཁྱོ༌རང༌ངི༌ ཨ༌བ༌ ཡ༌ ཁོའེ༌ ནང༌མི༌གུན༌ མན༌པ༌ ངའ༌,
ཡ༌ཝ༌ ཁོང༌རང༌ངི༌ མི༌ ཨིས༌ར༌ཨེལ༌པ༌གུན༌ནི༌ཀ༌ ཝང༌སྲུལ༌པ༌ ལྡམ༌མ༌ ཛདས༌ ཏེ༌བོའེ༌ཕིའ༌ ངའེ༌ ཡ༌ཝའེ༌ སྐུ༌དུན༌ལ༌ གའ༌མོ༌ ཅོས༌པིན༌།
22 འོ༌ན༌ ང༌ ང༌རང༌ འི༌ སང༌ མང༌ང༌ བུང༌བུ༌ ཡ༌ ཁྲེལ༌མེད༌ གྱུར༌ཅེས༌ལ༌ ཐད༌པོ༌ ཨིན༌ ཨིན༌ནའང༌ ཁྱོ༌རང༌ངི༌ ཟེར༌ཁན༌ནི༌ ཏེ༌ ཡོག༌མོ༌གུན༌ནི༌ ང༌ རྩི༌ཝ༌ ཉམ༌པོ༌ ལྟའ༌ནོག༌།”
23 ཏེ༌བོའེ༌ ཞས༌ཏེ༌ ས༌འུལ༌ལི༌ བུ༌མོ༌ མི༌ཁལ༌ལ༌ ཤི༌ཤི༌ ཞག༌ ཚག༌པ༌ ཕྲུ༌གུ༌ མ༌ནེ༌ མ༌ ཇོར༌།