དཱ༌བིད༌ ཨིས༌ར༌ཨེལ༌ལི༌ སྡེ༌ ཚང༌མའེ༌ གྱལ༌པོ༌ གྱུར༌།
5:1 ནེ༌ 5
5
ཏེ༌ནེ༌ ཨིས༌ར༌ཨེལ༌ལི༌ སྡེ༌ ཚང༌མའེ༌ འུ༌སྐྱོང༌གུན༌ ཧེབ༌རོན༌ལ༌ དཱ༌བིད༌ ཡོད༌ས༌ སོང༌ཏེ༌ ཁོང༌ང༌ ཞུས༌,
“ང༌ཞའ༌ ཉེ༌རང༌ངི༌ ཤ༌ཁྲག༌ ཨིན༌ནོག༌།
2 བུད༌ཁན༌ནི༌ ཏུས༌སི༌ ནང༌ང༌ ས༌འུལ༌ལི༌ ཝང༌སྲུལ༌ ཟ༌ནེ༌ ངོས༌པོའ༌ ཨིས༌ར༌ཨེལ༌ལི༌ མག༌མི༌ གོ༌ཁྲིད༌ ཅོ༌ཁན༌བོ༌ ཉེ༌རང༌ ཨིན༌པིན༌།
ཡ༌ཝའེ༌ ཉེ༌རང༌ང༌ མོལས༌,
‘ཁྱོ༌རང༌ ངའེ༌ མི༌ ཨིས༌ར༌ཨེལ༌པ༌གུན༌ནི༌ ལུག༌རྫི༌ དང༌ ཁོང༌གུན༌ནི༌ཀ༌ ཝང༌ སྲུལ༌ཁན༌བོ༌ གྱུར༌ཨིན༌།’”
3 ཏེན༌ན༌ ཏུས༌ ཧེབ༌རོན༌ནི༌ ནང༌ང༌ གྱལ༌པོ༌ དཱ༌བིད༌དི༌ ཡ༌ཝའེ༌ སྐུན༌དུན༌ལ༌ ཨིས༌ར༌ཨེལ༌ལི༌ འུ༌སྐྱོང༌གུན༌ ཉམ༌པོ༌ ཆད༌དོན༌ ཅོས༌ ཡང༌ ཁོང༌གུན༌ནི༌ དཱ༌བིད༌དི༌ གོའེ༌ཀ༌ མར༌ ལུགས༌ཏེ༌ ཁོ༌ ཨིས༌ར༌ཨེལ༌ལི༌ གྱལ༌པོའ༌ སྐོས༌།
4 དཱ༌བིད༌དི༌ ཝང༌སྲུལ༌ གོ༌ཟུག༌ ཟ༌ནེ༌ ཁོའ༌ ལོ༌ 30 ཆའད༌པིན༌ ཡང༌ ཁོའེ༌ ལོ༌ 40 ཝང༌སྲུལས༌།
5 ཁོའེ༌ ཧེབ༌རོན༌ནི༌ ནང༌ང༌ ཡ༌ཧུ༌དཱ༌ མི༌ལྡེའེ༌ཀ༌ ལོ༌ རྡུན༌ དང༌ ཟླ༌ཝ༌ དྲུག༌ ཡང༌ ཡེ༌རུ༌ཤ༌ལེམ༌མི༌ ནང༌ང༌ ཨིས༌ར༌ཨེལ༌ གང༌པོ༌ དང༌ ཡ༌ཧུ༌དཱའེ༌ཀ༌ ལོ༌ 33 ཝང༌སྲུལས༌།
དཱ༌བིད༌དི༌ ཡེ༌རུ༌ཤ༌ལེམ༌ ང༌ཡོག༌ག༌ ཁྱོངས༌།
5:6 ནེ༌ 16
6 ཏེ༌ནེ༌ དཱ༌བིད༌ དང༌ ཁོའེ༌ མག༌མི༌གུན༌ ཡེ༌རུ༌ཤ༌ལེམ༌མི༌ ནང༌ང༌ དུག༌ཁན༌ ཡེ༌བས༌པ༌གུན༌ལ༌ སྤུང༌གོལ༌ ཅོའ༌ལ༌ སོང༌།
ཡེ༌བས༌པ༌གུན༌ནི༌ དཱ༌བིད༌ལ༌ ཧེ༌པགས༌ ཉམ༌པོ༌ ཟེརས༌,
“འི༌ ནས༌སའེ༌ ནང༌ང༌ ཁྱོ༌རང༌ མ༌ནེ༌ ཞུགས༌ མི༌ཉན༌།
ཞ༌ར༌ དང༌ ཞ༌འོ༌ གུན༌ནིའང༌ ཁྱོ༌རང༌ སྒགས༌ཏེ༌ ཞུགས༌ མི༌ཅུག༌།”
ཡེ༌བས༌པ༌གུན༌ནི༌ ཁོ༌རང༌གུན༌ནི༌ སྲུང༌སྐྱོབ༌ སྟན༌པོ༌ ཡོད༌ སམ༌།
7 ཨིན༌ནའང༌ དཱ༌བིད༌དི༌ ཟི༌ཡོན༌ནི༌ གྱལ༌ས༌ ང༌ ཡོག༌ག༌ ཁྱོངས༌,
སྟིང༌ནེ༌ ཏེ༌བོའ༌ དཱ༌བིད༌དི༌ གྱལ༌ས༌ ཟེརས༌།
8 ཏེ༌ ཞག༌ག༌ དཱ༌བིད༌དི༌ ཁོ༌རང༌ངི༌ མག༌མི༌གུན༌ལ༌ ཟེརས༌,
“ངའེ༌ གྲ༌འོ༌ ཡེ༌བས༌པ༌ ཞ༌ར༌ དང༌ ཞ༌འོ༌ གུན༌ལ༌ སྤུང༌གོལ༌ ཅོ༌ཅེས༌ལ༌ ཁྱོ༌ཞའ༌ གྱལ༌སའེ༌ ནང༌ང༌ ཆུའི༌ ཡུ༌ར༌ གྱུད༌ཏེ༌ ཆ༌ གོས༌།”
ཏེན༌ན༌ གྱུན༌ཚན༌བོའེ༌ ཕིའ༌ “ཞ༌ར༌ དང༌ ཞ༌འོ༌ གུན༌ གྱལ༌པོའེ༌ ཁར༌རི༌ ནང༌ང༌ ཡོང༌ མི༌ཆོག༌” ཟེར༌ར༌ནོག༌།
9 དཱ༌བིད༌ ཏེ༌ གྱལ༌སའེ༌ ནང༌ང༌ ཚུགས༌ཏེ༌ དུགས༌ ཡང༌ ཏེ༌བོའ༌ དཱ༌བིད༌དི༌ གྱལ༌ས༌ ཟེརས༌།
ཁོའེ༌ གྱང༌སྐོར༌རི༌ ཕི༌ལོག༌,
ཤར༌ ཆོགས༌སི༌ ཀད༌པ༌ ནེ༌ གོ༌ཟུགས༌ཏེ༌ ནང༌ཀུག༌ ཚག༌པ༌ གྱལ༌ས༌ སྐྱེད༌།
10 ཡང༌ དཱ༌བིད༌ མང༌ནེ༌ མང༌ང༌ ཤེད༌ཅན༌ གྱུར༌ ཅིའ༌ཟེར༌ན༌ ཀུན༌ཝང༌ དཀོན༌མཆོག༌ ཡ༌ཝ༌ ཁོ༌ ཉམ༌པོ༌ ཡོད༌པིན༌།
11 ཏེ༌ནེ༌ ཧི༌རམ༌ ཏཱ༌ཡིར༌རི༌ གྱལ༌པོའེ༌ དཱ༌བིད༌དི༌ཀ༌ སྐུ༌ཚབས༌གུན༌ ཀལ༌ཏེ༌ ཐུན༌བྲེལ༌ ཅོ༌ཅེས༌ལ༌ ཞུ༌ཝ༌ ཕུལས༌།
ཁོའེ༌ དཱ༌བིད༌ལ༌ ཁར༌ རྩིག༌ཅེས༌ ཕིའ༌ སི༌གྲར༌རི༌ ལྡུང༌མ༌,
ཤིང༌ཁན༌ དང༌ རྡོའེ༌ རྩིག༌སྤོན༌ གུན༌ ཀལས༌།
12 ཡ༌ཝའེ༌ དཱ༌བིད༌ ཨིས༌ར༌ཨེལ༌ གང༌པོའེ༌ཀ༌ གྱལ༌པོ༌ སྐོའ༌ ཛད༌ཁན༌ ཡང༌ ཁོང༌རང༌ངི༌ མི༌གུན༌ནི༌ ཏོན༌ལ༌ ཁོའེ༌ གྱལ༌སྲིད༌ལ༌ ཅིན༌ལབས༌ སལ༌ལ༌ ཛད༌ཁན༌བོ༌ དཱ༌བིད༌ལ༌ ཧ༌གོ༌།
13 ཧེབ༌རོན༌ནེ༌ ཡེ༌རུ༌ཤ༌ལེམ༌མ༌ སོང༌ཏེ༌ སྟིང༌ནེ༌ དཱ༌བིད༌དི༌ ཞན༌ ན༌མ༌ དང༌ ཚེ༌ཡོག༌ ན༌མ༌གུན༌ ཅོས༌ ཡང༌ ཁོང༌གུན༌ལ༌ བུ༌ཚ༌ དང༌ བུ༌མོ༌ མང༌པོ༌ སྐྱེས༌།
14 དཱ༌བིད༌ལ༌ ཡེ༌རུ༌ཤ༌ལེམ༌མི༌ ནང༌ང༌ སྐྱེས༌ཁན༌ནི༌ བུ༌ཚ༌གུན༌ ཤམ༌མུའ༌,
ཤོ༌བབ༌,
ན༌ཐན༌,
སོ༌ལོ༌མོན༌,
15 ཨིབ༌ཧར༌,
ཨེ༌ལི༌ཤུའ༌,
ནེ༌ཕེག༌,
ཡ༌ཕིའ༌
16 ཨེ༌ལི༌ཤ༌མ༌,
ཨེ༌ལིའ༌ད༌ དང༌ ཨེ༌ལི༌ཕེ༌ལེཏ༌ གུན༌ ཨིན༌ནོག༌།
དཱ༌བིད༌དི༌ ཕི༌ལིས༌ཏི༌པ༌གུན༌ལ༌ ཕམ༌ ཀལས༌།
5:17 ནེ༌ 25
17 དཱ༌བིད༌ ཨིས༌ར༌ཨེལ༌ལི༌ གྱལ༌པོའ༌ སྐོས༌ཏོག༌ ཟེར༌ཏེ༌ ཕི༌ལིས༌ཏི༌པ༌གུན༌ནི༌ ཚོར༌ར༌ཅིག༌ ཁོང༌གུན༌ནི༌ མག༌མི༌ གང༌པོ༌ དཱ༌བིད༌ ཟུམས༌ཏེ༌ ཁྱོང༌ང༌ སོང༌ ཨིན༌ནའང༌ དཱ༌བིད༌ལ༌ ཁོང༌གུན༌ ཡོང༌དུག༌ ཟེར༌ཏེ༌ ཚོར༌པ༌ ཁོ༌ ཨིབ༌སའེ༌ ནས༌ས༌ སྟན༌པོ༌ ཞིག༌ག༌ སོང༌།
18 ཕི༌ལིས༌ཏི༌པ༌གུན༌ ཡོངས༌ཏེ༌ རེ༌ཕ༌འིམ༌མི༌ ལུང༌པ༌ གང༌པོའེ༌ ནང༌ང༌ ཡན༌ཏེ༌ དུགས༌།
19 ཏེ༌ནེ༌ དཱ༌བིད༌དི༌ ཡ༌ཝའ༌ ཏྲིའ༌ ཛདས༌,
“ང༌ བིང༌ཏེ༌ ཕི༌ལིས༌ཏི༌པ༌གུན༌ལ༌ ནོལ༌ལ༌ལ༌ ཆ༌ལེ༌?
ཅི༌ ཉེ༌རང༌ངི༌ ངའ༌ གྱལ༌ཁའ༌ སལ༌ ཨིན༌ན༌?”
ཡ༌ཝའེ༌ དཱ༌བིད༌ལ༌ ལན༌ སལས༌,
“འོ༌ན༌,
ངའེ༌ ཏན༌ཏན༌ལ༌ ཁོང༌གུན༌ ཁྱོ༌རང༌ངི༌ ལག༌ག༌ སྟད༌ཨིན༌།”
20 ཏེ༌ནེ༌ དཱ༌བིད༌ ཕི༌ལིས༌ཏི༌པའེ༌ མག༌མི༌ ཡོད༌ས༌ བའལ༌ པི༌ར༌ཟིམ༌མ༌ སོང༌ ཡང༌ ཁོང༌གུན༌ལ༌ ཕམ༌ཀལས༌།
དཱ༌བིད༌དི༌ ཟེརས༌,
“གཙོ༌བོ༌,
ངའེ༌ གྲ༌འོ༌གུན༌ ནི༌ ཕྲོའ༌ ཆུ༌ལོག༌ ཙོགས༌ལ༌ སྐྱོད༌ད༌ ཛདས༌།”
ཏེ༌བོའེ༌ཕིའ༌ ཁོའེ༌ ཏེ༌ ས༌ཀྱད༌པོའ༌ བའལ༌ པི༌ར༌ཟིམ༌a ཟེར༌ཏེ༌ མིང༌ ཏགས༌།
21 ཕི༌ལིས༌ཏི༌པ༌གུན༌ནི༌ ཁོང༌རང༌གུན༌ནི༌ སྐུན༌དྲ༌གུན༌ ཕངས༌ཏེ༌ སོང༌ ཡང༌ དཱ༌བིད༌ དང༌ ཁོའེ༌ མག༌མི༌གུན༌ནི༌ ཏེ༌གུན༌ ཁུར༌ཏེ༌ སོང༌།
22 ཡང༌སྐྱར༌ ཕི༌ལིས༌ཏི༌པ༌གུན༌ ལོགས༌ཏེ༌ ཡོངས༌ཏེ༌ རེ༌ཕ༌འིམ༌མི༌ ལུང༌པའེ༌ ནང༌ང༌ ཡན༌ཏེ༌ དུགས༌
23 ཡང༌ དཱ༌བིད༌དི༌ ཡ༌ཝའ༌ ཅི༌ ཅོ༌ ཟེར༌ཏེ༌ ཡང༌སྐྱར༌ ཏྲིས༌།
ཡ༌ཝའེ༌ ལན༌སལས༌,
“ཁོང༌གུན༌ལ༌ ཁ༌དྲང༌ང༌ སྤུང༌གོལ༌ མ༌ཅོ༌,
གྱབ༌ནེ༌ ཁོང༌གུན༌ལ༌ སྐོར༌ཏེ༌ བལ༌སམ༌ ལྕང༌མའེ༌ ཉེ༌མོའ༌ ཁོང༌གུན༌ནི༌ཀ༌ སྤུང༌གོལ༌ ཅོས༌།
24 ཁྱོ༌ཞ༌གུན༌ལ༌ ཏེ༌ ལྕང༌མའེ༌ ཁེ༌ཐོག༌ནེ༌ གྲུལ༌ཁན༌ནི༌ སྐད༌ ཚོར༌ར༌ཅིག༌ གྱོགས༌པ༌ སྤུང༌གོལ༌ ཅོས༌ ཅིའ༌ཟེར༌ན༌ ཏེ༌བོ༌ ཡ༌ཝ༌ ཁྱོ༌ཞ༌གུན༌ནི༌ སྔུན༌ལ༌ ཕི༌ལིས༌ཏི༌པ༌ མག༌མི༌གུན༌ལ༌ སྤུང༌གོལ༌ ཅོའ༌ལ༌ ཆའ༌ཁན༌ནི༌ སྟགས༌ ཨིན༌།
25 ཏེ༌ནེ༌ དཱ༌བིད༌དི༌ ཡ༌ཝའེ༌ མོལ༌ཁན༌ ནང༌ཞིན༌ ཅོས༌ ཡང༌ གི༌བེ༌འོན༌ གྱལ༌ས༌ནེ༌ གེ༌ཟེར༌ ཚོག༌པ༌ ཕི༌ལིས༌ཏི༌པ༌གུན༌ སད༌ཏེ༌ ཁོའེ༌ ཁོང༌གུན༌ལ༌ ཕམ༌ཀལས༌།