ཨིཤ༌བོ༌ཤེཐ༌ སདས༌།
4:1 ནེ༌ 12
4
ས༌འུལ༌ལི༌ བུ༌ཚའ༌ ཨིཤ༌བོ༌ཤེཐ༌ལ༌ ཨབ༌ནེར༌ ཧེབ༌རོན༌ནི༌ ནང༌ང༌ ཤི༌ཁན༌བོ༌ ཚོར༌ར༌ཅིག༌ ཁོའེ༌ སེམས༌ཤུགས༌ ཆགས༌ ཡང༌ ཨིས༌ར༌ཨེལ༌པ༌ ཚང༌མ༌ མ༌སྲན༌ཏྲེ༌ ཇིགས༌།
2 ཨིཤ༌བོ༌ཤེཐ༌ལ༌ སྤུང༌གོལ༌ ཅོ༌ཁན༌གུན༌ནི༌ སྡེ༌ འུ༌སྐྱོང༌ བའ༌ནཧ༌ དང༌ རེ༌ཀབ༌ ཉིས༌ ཡོད༌པིན༌།
ཁོང༌གུན༌ བེན༌ཡཱ༌མིན༌ནི༌ སྡེ༌ ནང༌ནེ༌ བེ༌རོཐ༌ལ༌ དུག༌ཁན༌ རིམ༌མོན༌ནི༌ བུ༌ཚ༌ ཨིན༌པིན༌།
བེ༌རོཐ༌ཐི༌ གྲོང༌ཁྱེར༌ བེན༌ཡཱ༌མིན༌ནི༌ སྡེ༌ ས༌ཀྱད༌དི༌ ཁག༌ཞིག༌ གྱུར༌
3 ཅིའ༌ཟེར༌ན༌ བེ༌རོཐ༌ཐི༌ ནང༌ང༌ དུག༌ཁན༌གུན༌ གིཏ༌ཏའ༌འིམ༌ ནས༌ས༌ ཤོར༌ཏེ༌ སོང༌།
ཁོང༌གུན༌ ཏ༌རུང༌ངའང༌ ཞན༌ཡུལ༌ལི༌ མི༌ ཙོགས༌ལ༌ ཏེ༌རུ༌ དུག༌ཨིན༌ ཨིན༌ནོག༌།
4 ༼ས༌འུལ༌ལི༌ བུ༌ཚ༌ ཡོ༌ན༌ཐན༌ལ༌ མེ༌ཕི༌བོ༌ཤེཐ༌ ཟེར༌ཁན༌ནི༌ བུ༌ཚ༌ ཡང༌ ཁོ༌ ཕྲུ༌གུ༌ནེ༌ ཕར༌ལ༌ ཞ༌འོ༌ ཡོད༌པིན༌།
ས༌འུལ༌ དང༌ ཡོ༌ན༌ཐན༌ གུན༌ མག༌གི༌ ནང༌ང༌ སད༌ཏོག༌ ཟེར༌ཏེ༌ ཡེཟ༌རེ༌འེལ༌ནེ༌ ལོན༌ ལེབ༌བ༌ཅིག༌ ཕྲུ༌གུ༌ ལུ༌ཁན༌ནི༌ བུ༌མོའེ༌ ཁོ༌ ཁུར༌ཏེ༌ ཤོར༌།
ཨིན༌ནའང༌ ཤོར༌ ཟ༌ནེ༌ ཕྲུ༌གུ༌བོ༌ ཁོའེ༌ ལག༌ནེ༌ བུད༌ ཡང༌ ཁོ༌ ཞ༌འོ༌ གྱུར༌།
ཏེ༌ ཟ༌ནེ༌ ཕྲུ༌གུའ༌ ལོ༌ 5 ཆའད༌པིན༌།༽
5 ཏ༌ བེ༌རོཐ༌པ༌ རིམ༌མོན༌ནི༌ བུ༌ཚ༌ རེ༌ཀབ༌ དང༌ བའ༌ནཧ༌ ཉས༌ཀོ༌ ཨིཤ༌བོ༌ཤེཐ༌དི༌ ཁང༌པ༌ སོང༌ ཡང༌ ཧ༌ལམ༌ ཉིང༌གུང༌ ཞིག༌ག༌ ཁོང༌གུན༌ ཏེ༌རུ༌ ལེབ༌ ནམ༌ ཨིཤ༌བོ༌ཤེཐ༌ ཉིང༌གུང༌ངི༌ ངལ༌ཚོས༌ཏེ༌ ཡོད༌པིན༌།
6 སྒོ༌ སྲུང༌ཁན༌ནི༌ བུ༌མོའེ༌ ཀྲོ༌ ལག༌མོ༌ ཅོ༌ཨིན༌ ཉི༌མའེ༌ ནང༌ང༌ ཀྲོས༌ཏེ༌ ཉིད༌ལ༌ སོང༌།
ཏེ༌བོའེ༌ཕིའ༌ རེ༌ཀབ༌ དང༌ བའ༌ནཧ༌ ཉིས༌ཀོ༌ སྐད༌ མ༌ཕིང༌ང༌ ཀུ༌ལེའ༌ ཏེ༌ བུ༌མོ༌བོའེ༌ དུན༌ནེ༌ ནང༌ཀུག༌ག༌ སོང༌།
7 ཁོང༌གུན༌ནི༌ ཨིཤ༌བོ༌ཤེཐ༌ ཁོང༌རང༌ངི༌ མལ༌ཙེ༌ཀ༌ ཉིད༌ལ༌ སོང༌ཏེ༌ ཐོང༌ ཡང༌ ཁོང༌གུན༌ནི༌ ཁོའ༌ རའི༌ ཙུགས༌ཏེ༌ སདས༌ ཡང༌ ཁོའེ༌ གོ༌ ཅདས༌།
ཏེ༌ནེ༌ ཁོང༌གུན༌ནི༌ ཁོའེ༌ གོ༌ ཁུར༌ཏེ༌ ཚན༌ གང༌པོ༌ ཡོར༌དཱན༌ནི༌ ལུང༌པ༌ རྒལ༌ཏེ༌ ཤོར༌།
8 ཁོང༌གུན༌ ཧེབ༌རོན༌ལ༌ ལེབ༌བ༌ཅིག༌ ཁོང༌གུན༌ནི༌ ཨིཤ༌བོ༌ཤེཐ༌དི༌ གོ༌ དཱ༌བིད༌ལ༌ ཕུལ༌ཏེ༌ ཟེརས༌,
“ཟིགས༌སའང༌,
འི༌ཀ༌ནེ༌ ཉེ༌རང༌ སད༌ཅེས༌ ཅོ༌ཁན༌ནི༌ ཉེ༌རང༌ངི༌ གྲ༌འོ༌ ས༌འུལ༌ལི༌ བུ༌ཚ༌ ཨིཤ༌བོ༌ཤེཐ༌དི༌ གོ༌།
དི༌རིང༌ ཡ༌ཝའེ༌ ང༌ཞའེ༌ སྤོན༌བོ༌ གྱལ༌པོའ༌,
ས༌འུལ༌ དང༌ ཁོའེ༌ ནང༌མི༌ ཚང༌མའེ༌ཀ༌ ལན༌ ལེན༌ཅེས༌སི༌ སྐབས༌ སལས༌།”
9 ཨིན༌ནའང༌ དཱ༌བིད༌དི༌ རེ༌ཀབ༌ དང༌ བའ༌ནཧ༌ གུན༌ལ༌ ཟེརས༌,
“ང༌ ང༌རང༌ངི༌ གྲ༌འོ༌ ཚང༌མའེ༌ ཀ༌ནེ༌ སྐྱོབ༌བ༌ ཛད༌ཁན༌ནི༌ སོན༌ཏེའ༌ དཀོན༌མཆོག༌ ཡ༌ཝའེ༌ སྐུན༌དུན༌ལ༌ ཟེར༌རད༌,
10 ཞག༌ཅིག༌ ཟིག༌ལག༌གི༌ ནང༌ང༌ སུ༌ཞིག༌གི༌ ངའ༌ ས༌འུལ༌ ཤི༌ ཟེར༌ཏེ༌ ལོན༌ ཁྱོངས༌།
ཁོའེ༌ ངའེ༌ ཕིའ༌ ནས༌ཚུལ༌ ཟང༌པོ༌ ཁྱོངས༌ཏེ༌ ཨིན༌ སམས༌ ཨིན༌ནའང༌ ངའེ༌ ཁོ༌ ཟུམ༌ཅུགས༌ཏེ༌ སད༌པིན༌།
ནས༌ཚུལ༌ ཁྱོང༌ཅེས༌ལ༌ ངའེ༌ ཁོའ༌ ཏེ༌ སོལ༌རས༌པོ༌ ཏངས༌པིན༌།
11 ཏེ༌ནེ༌ ངའེ༌ འི༌ མི༌ ངན༌པ༌གུན༌ལ༌ ཅི༌ སོལ༌རས༌ ཏང༌གོས༌,
ཀ༌གུན༌ནི༌ མི༌ ནོངས༌མེད༌ ཤིག༌ ཁོ༌རང༌ངི༌ ཁང༌པའེ༌ ནང༌ང༌,
ཁོའེ༌ མལ༌ཙེ༌ཀ༌ སདས༌།
ངའེ༌ ཁྱོ༌རང༌གུན༌ལ༌ ཁོའེ༌ སྲོག༌ ལེན༌ཅེས༌སི༌ སྐྱོན༌ ཀལ༌ཏེ༌ འི༌ ཇིག༌རྟེན༌ནི༌ ཀ༌ནེ༌ མེད༌ཁན༌ ཅོ༌ མ༌གོས༌ས༌?”
12 ཏེ༌ནེ༌ དཱ༌བིད༌དི༌ ཁོ༌རང༌ངི༌ མི༌གུན༌ལ༌ ཁོང༌གུན༌ སད༌ཅེས༌ལ༌ བཀའ༌ ཏངས༌ ཡང༌ ཁོང༌གུན༌ནི༌ ཏེ༌བོ༌ ཅོས༌།
ཁོང༌གུན༌ནི༌ ཁོང༌ ཉིས༌ཀོའེ༌ རྐང༌ལག༌གུན༌ ཅདས༌ ཡང༌ ཟུགས༌པོ༌གུན༌ ཧེབ༌རོན༌ནི༌ ཟིང༌ངི༌ དུན༌ལ༌ ཆར༌ལ༌ ཏངས༌།
ཏེ༌ནེ༌ ཁོང༌གུན༌ནི༌ ཨིཤ༌བོ༌ཤེཐ༌དི༌ གོ༌ ཁྱེར༌ཏེ༌ ཧེབ༌རོན༌ནི༌ ནང༌ང༌ ཡོད༌ཁན༌ ཨབ༌ནེར༌རི༌ སྤུར༌ཁང༌ངི༌ ནང༌ང༌ སུབས༌།